::::::星期二::::::七月三十一日::::::

好眼訓呢，今日一早就要起身喇，要去太古城睇中醫嘛，其實次次見醫師都無乜野講既，不過講好笑，有日susuky 打話我知，原來佢賣衫間舖頭個老闆娘個男朋友係醫師個仔喎，呵~~世界真係細呢。

睇完中醫之後，例牌動作就梗係行街街喇，太古城有間麵包舖既麵包好好食架，而我平時都會食朱古力忌簾角，麵包用朱古力舖面，再包住凍凍既忌簾，忌簾唔太甜，食落既感覺好似雪一樣，好幸福呢。

之後我地行左一陣超級市場同文具部，發現原來有一種小食係附送一隻爆炸豆(狗)架仲可以換頭髮呢，呀...好想買呀，不過淨番兩個好樣衰既款，所以都係...除左睇公仔會令我發癲之外，行文具部都會令我有輕度失控，呵~~女仔嘛，見到卡哇伊既精品就忍唔住好想擁有，不過我又唔係讀緊書，又唔鐘意寫信...睇到好多野都唯有左手捉住右手，阻止自己，我見到一個彩虹筆袋呀，好靚架，但屋企未用既筆袋都有幾個，唉...結果最大收鑊就係買左三包膠公仔，可以黐住響個電話後面架，媽咪就揀左鼠鼠，我就揀左傻兔兔(？)，我見另外仲有隻熊仔個樣好似momo呢，嘻，我又記得有個朋友仔鐘意momo，好野，又可以買埋嚕。

滿載而歸番屋企，好累呀，nathya話晏d黎接我呢，等下等下訓著左呢。我地四點幾出發，司機當然係nathya既廿四孝男朋友喇，咁司雞隔離就當然係司雞夫人nathya姐喇，後 座就係一隻超巨型既Jacob Cat公仔(感謝小魔提供貓名)，係大到驚嚇既程度， 佢仲坐住響小Jacob Cat公仔紙巾盒上面(扁左)。結果我就係咁同隻死肥貓一齊坐左響後座，我坐左佢一半位，佢梗係眼超超望住我喇，再望掟你出車。

我地沿葵涌、大窩口、荃灣，上左大帽山。上山既路都幾彎架，通常男仔響呢個情況 下都一定會開~快~車，唉....我呀哥係其中一個，俾著佢一定以為自己係鄭伊健坐住 架skyline ，好彩今次前面有架大貨車頂住，所以...開得都幾慢下。我地響山腰一個觀景台落車睇風景，呢度好高，仲可以望到深圳呢。嘻，其實睇風景都係次要，我最希望見到既係.....牛，唔知點解呢，馬騮我又唔係真係咁鐘意睇喎，可能太易睇到喇，但牛響香港都算少見喇，而且牛真係好可愛呢。上山途中竟然真係俾我見到有隻牛響路邊呀，仲係超級大牛呢，呵~~開心死，真係想走過去攬住佢>_<"

落山既時侯前面無大貨車lu，司雞哥哥即刻伊健上身咁，就算我縛好安全帶，依然都覺得好唔安全，一個急彎我就飛左過去右邊壓住隻肥貓，再一個急彎又變成個肥貓坐住我，呼~~感覺好似坐緊旺角d通宵小巴咁。

我地響山腳一間叫「恩記」的茶餐廳食野，其實係佢地食，我淨係有睇既份，因為唔食得街外野嘛，nathya叫左一杯「大咸檸吉七」(唔知有無記錯，總之係呢幾個字切埋喇)， 係由檸檬、咸甘吉同七喜製成，仲用啤酒杯上，好大杯呢，我見咁騎呢，所以忍唔住 飲左一啖，評價：咁鬼咸，飲完可能仲要叫其他野飲先解到渴，但nathya 一於少理 ，飲得津津有味。佢仲幫佢男朋友叫左一個「七彩飯」，我心諗nathya 唔通同佢男 朋友有仇，聽個名都知呢個飯...大整蠱喇，七彩？唔通係顏料飯？定係d食剩賣剩既 野撈埋一碟呢....睇真....原來呢個飯係招牌飯黎架，仲上過雜誌，所謂既七彩係七樣材料，有午餐肉、紅腸、火腿、太陽蛋(前四樣感覺上幾扼錢)、架喱雞(根本就無雞， 得薯仔)、雞全翼、冬菜牛腩(真係唔明點解冬菜會配牛腩)。

都差不多天黑嚕，下一站去左黃金海岸，哇...聽就聽得多，但今次真係第一次黎，不過，感覺上怪怪的，沙灘望出去對面岸全部都係樓，沙灘又窄，好似響個貨櫃碼頭游水咁，不過比較特別就係，呢度竟然可以眺望赤臘角新雞場，好驚呢。

有條數學題唔係好明，Nathya 同佢男朋友去士多買左一支佳得樂、一支紅豆樂、一 包細珍珍薯片，竟然可以38蚊找數，計黎計去我都計唔到，我諗一定係俾人打劫。 天都黑齊嚕，媽咪又係時侯打黎搵女，原來佢響西九龍中心接爸爸放工，於是我就叫 nathya 響深水步掉低我，嘻，真的充心感謝nathya 兩夫婦俾我做左一日電燈膽。 去到西九龍我又捉住媽咪去行街，哇...好多公仔呢，忍唔住手買左一隻豬仔，係布做架，唔黐塵，所以可以幸免唔洗著太空衣呢。