::::::星期三::::::八月八日::::::

我是單眼皮的，而且眼睛亦不大，所以從來都不是一個靚女。哥哥也是單眼皮的，但每次當佢唔夠訓同唔舒服的時侯，就會變成雙眼皮，好奇怪呢，我都希望可以試下雙眼皮呀，唔知會唔會靚d呢。可能入左院之後晚晚都兩點幾先訓既關係，我竟然變左雙眼皮呀，有時會一隻眼，有時會兩隻都雙眼皮，我仲諗可以騙騙朋友，說我偷偷割了雙眼皮呢，嘻。

人人都話夜晚十一點至兩點係身体最需要休息的時間，好，即管試下搵一晚早少少訓，其實我十二點幾就上床架喇，不過慣左要睇下書先訓，睇完都一點幾嚕。第二日起身，一照鏡連自己都嚇親，哇，點解變左兩隻眼都單眼皮既，捽捽捽~~捽黎捽去都捽唔番做雙眼皮，嗚嗚~~好衰樣呀(其實根本係咁既樣...)。

星期三又要一早起身，當然放榜唔關我事喇，兩年前都仲關關地(其實都唔多關，因為我都唔讀書既)。今日要去太古城睇中醫呀，唉...睇中醫又無保險賠，出親街都唔可以撘巴士、地鐵，只可以撘的士，野野都過海，撘的士都撘到破產，不過我總比住元朗、新界既病友好一點既...

以前曾經識過一個的士司機，我叫佢林生，平時我地撘番瑪麗醫院大約係160蚊，咁我地次次都係call佢，佢用私家車載我地，就收我地150蚊，平左10蚊，撘左大約三個月之後，點知佢無喇喇話要加番我地價，話私家車d油貴d喎(車~邊鬼個話要你用私家車載我地喎)~10蚊唔係多，不過就係唔順氣嚕，我揮一揮手都截到的士喇，call你黎又要等你。之後有日佢用的士黎車我地，我地咪問佢係唔係可以平番10蚊呀?點知佢又話佢空車黎接我地，又唔肯減喎，你講晒喇。好好彩當時有另一個病友介紹左個的士司機俾我地，原來佢地圍內成班七、八個司機都肯接order架，於是之後每次覆診前後我地都會call佢地，而佢地都會打個八折俾我地。

睇完中醫之後例行動作當然係行太古城喇，嘻，今次又係響panash買麵包呢(唔知有無串錯)，次次食麵包都唔厭架，起碼好過無得食嘛，而且咁多款，一日食一款都食成個月呢，嘻。我食左一個蘋果批呀，勁好食呀，又食左少少朱古力扭抆，好脆好好食呢。

之後我地去左吉之島行超級市場呀，嘻，我揀左好多糖諗住拎番醫院請朋友食呢，大人 同細路仔一樣，都係要人"乙水"既。嘻，我拎住一大堆糖傻婆咁笑，好野，搵到有個姐 姐好鐘意食既酸酸糖呀，佢一定好開心呢。

記得n年前有個朋友好鐘意食薄荷拖肥糖架，果種味度我一直都好記得，聽講佢係響馬莎 買架，但我去搵既時侯，售貨員小姐竟然話俾我知，無出過薄荷拖肥糖，朱古力拖肥糖 就有，我唯有買了朱古力的一解相思之苦喇，響幾年後既今日，我竟然無意中響吉之島 搵到一隻薄荷拖肥糖，雖然唔知係唔係當年所食的牌子，但味道也算是十分不錯呢，咬 著咬著，感覺好幸福呀，我竟然可以再吃到薄荷拖肥糖，好像發夢一樣，可惜我只係買 左一包咋，實在要自私一次呢，下次見到又可以買俾朋友吃嚕，讓你也分享到我的幸福。

::::::星期四::::::八月九日::::::

本來今日打算跟爸爸去西九龍中心開工架，順便我又可以行下街呢，不過西九龍中心 有其他節目搞，所以爸爸就可以休息一天。咦咦咦，咁去邊遊車河好呢。

我讀書就唔叻呀，不過就好鐘意睇小說，所以d小說仲多過教科書，書櫃放到滿晒之後 ，唯有左攝一本，右攝一本咁喇，如果有個大書櫃就好喇，咁我就可以將成set既張小 嫻齊齊整整放好喇。咦？近門口仲有幾尺位喎，咦？放左個櫃都仲行得過丫，咦？放 個櫃都幾有書卷味喎(奸笑中)，於是就叫媽咪幫我睇下有無d書櫃可以放響果度喇。 媽咪響將軍澳睇中左一個架喇，正好今日爸爸放假，咁咪可以幫媽咪車個櫃番屋企，唔 洗媽咪搬得咁辛苦。

以為今日係坐綿羊仔喇，著靚靚落樓先知...原來爸爸買左架新車呀，咁咪可以載埋媽 咪嚕前果架俾呀哥撞爛左，之後一直都無乜機會出街嚕，因為我唔撘得公車嘛，唉... 無左架車既日子就好似無左對腳咁，邊度都無得去。不過有時有同無都差唔多架喇， 呀哥要車佢d女朋友、朋友嘛，幾時輪到我喎，最好就我自己識開車，咁就鐘意幾時就 幾時去，去邊都得。新呢架車係二手架，灰色，係娘左少少嚕，不過我坐響入面之嘛， 靚唔靚有咩所謂呢，呵~~好鐘意呢對「腳」呀。

我地八點幾到將軍澳厚德村，哇~~吉之島出面有一隻超級大隻既「旋風狼」呀，呢~ 即係賓尼兔、翠兒果堆卡通人物呀，成幾層樓咁高既吹氣公仔，哇!~當堂驚叫，最衰 黑麻麻喇，架車又行得太快，爸爸兜左兩次我都係影唔到，真失敗。淨係影到室內果 隻賓尼兔咋。

我地同媽咪一齊上去吉之島睇櫃，因為媽咪睇左兩日，所以個售貨員都認得媽咪，過黎講「咦...帶埋你仔仔黎睇呀？」

哇...呀嬸你小心講野好喎，望真d，我係短頭髮，但我唔係仔黎架喎，不過都好彩，唔係話帶埋個老公黎，我話「下？我係囡囡黎架喎。」

個呀嬸梗係瘀喇，咪問「點解剪到d頭髮咁短呀？」

我咪話「夏天熱呀。」我都唔知講乜好。媽咪咪話「佢學游水呀。」哇...前後矛盾， 嘿嘿。

結果買左兩個櫃，一個擺底放報紙，另一個放上面放書，yeah。之後我地又去左行超級市場，咦咦咦...睇下有無拖肥糖先，本來都可以慢慢睇，但...愈行愈唔對路，係唔係電費平呢？點解咁鬼凍既，凍到好似入左殮房咁，我淨係跑黎跑去睇，都唔敢停低，我驚我一企響度會變左雪條，咦...呢間都無果隻拖肥糖既。我諗最大收獲係買左十蚊 三包既雪米茲，仲要係芋頭味，正。

仲有一間十蚊店呀，我呢d師奶仔梗係唔會放過執平野既機會喇，我見到有d好靚既尼龍袋 呀，但拎出街又好似好騎尼咁，結果買左一條指甲既...物體，可以率到d指甲閃令令 架，閃到好似搽左指甲油咁架，仲有買左一隻龍蝦...今晚加料。

d雪米茲本來諗住上車食架，但媽咪又話未食飯唔俾食喎，哇...希望唔會溶喇。之後我叫爸爸 車我去順利村果邊，果邊有個攀石場，我想...報名。媽咪梗係反對喇，但我又好有興 趣喎，而且屋企行黎呢度都唔算遠...問左先算喇。哇...去到見到好多人爬緊牆呀，好 有型呀~~原來香港得兩間攀山會架咋，所以想響度爬就要去果兩間報名，咦...咁煩 既，唯有打去再問下喇。我要好好把握時間，去做想做既野，無任何藉口可以再阻止我。

::::::星期五::::::八月十日::::::

上個星期醫院打黎話我知...我搵到骨髓喇，估唔到，有d朋友搵幾年都唔到，然後就 離開左，有d朋友搵成年先至搵到，但我竟然搵左四日就搵到兩個同我骨髓吻合既人 ，據我所知，一個係男人，一個係女人，姑娘仲話一打俾個女人，佢就即刻肯黎驗多次血，好熱心，好令人感動。但我決定唔會再做，有人問我點解要放棄自己？我話，我唔係放棄自己，我只係將自己既生命投資響第二種方法上。無人知道我換左會唔會都係復發，就算 冇復發，但排斥同感染都會有生命危險，我唔覺得值得咁無把握去冒呢個險，我相信西醫醫唔好我，亦總會有其他辨法。

我深信我係會好得番，我又唔係大奸大惡既人，上帝唔會俾一個好人死。而家每一日我都過得好開心，因為我覺得自己唔係一個病人，我唔會咁快死。我相信自己會係一個奇蹟，懷著這個信念，我可以好好撐下去。

其實即使真的要離開，我也不會太不甘心，因為這個病，我失去了許多許多，但就是因為失去過，才明白擁有的可貴。生活的每個小節都變成恩賜。雖然這個病給了我許多限制，但原來站在圈圈內看出面的世界，係咁靚咁可愛架。總括一句，病左之後既我係開心多左。如果我一直都無病，我諗我會係一個蒲天光既老泥妹。

唔換骨髓唔代表我放棄，我是不會放棄的。

因為珍惜，普通的陽光變得美麗。

::::::星期一::::::八月十三日::::::

今日又要覆診喇，我帶左部md雞，一於扮聾耳陳。我知病友、姑娘、醫生想我換骨髓，都係想我好，但始終辛苦既都係自己，對不起，我拒絕再虐待自己。

姑娘一見到我又問我想點，我咪話唔想做嚕，佢就話而家驚動左個捐贈者，係換就快ｄ換，唔係就唔好再搵果位捐贈者，怕擾騷到人。唉...其實當我知道有兩個人與我的骨髓一樣之後，我就諗到底對方係個咩人黎既呢？會唔會性格上同我有ｄ似既呢？雖然我從來都無見過佢，連佢既名我都唔知，但我地好似血脈相連咁，我地既身體都係流住一樣既骨髓。佢竟然為一個素未謀面既人捐出自己既骨髓，點解佢會對我咁好既？好想寫一封去多謝佢，多謝佢既熱心。

暫時我都唔會考慮換骨髓，隨非我真係有咩冬瓜豆腐一個唔好彩入左廠，迫住要我一定換左先有得出院，咁咪換囉，肉隨針板上。

響覆診果度坐，坐坐下見有個男仔入黎喎，戴住副茶色眼鏡，

第一眼感覺：咦？有靚仔喎。

望真ｄ之後：咦...細舅父黎既...

呵~細舅父真係靚仔到認唔出添(滴汗)，舅父今日特登黎陪媽咪同我見醫生，有舅父響度媽咪就無咁驚喇。今次血報告係，所有血球都跌，扺抗力跌到得番零點幾，一個唔該感染左就大鑊，唯一升高左既 係癌細胞，我問醫生唔換癌細胞會點，佢話好快會去一個快樂大家庭，人人都會去，爭在遲或早。我今次無喊，我淨係傻笑，耳仔係聽到，但並無入腦。血小板得番二十粒，一流血的話會唔止血，血色素得七點幾，隨時暈響街度，所以約左聽日輸血。

嘻，今日細舅父開左車黎呀，好野，唔洗俾百幾蚊去撘的士。首先我地落左銅鑼灣接bass 姐姐，最衰銅鑼灣難搵位泊車喇，銅鑼灣廣場第二期有間茶樓d點心好好食架，有好多特色小食佢果度先有架，好恨食呢。

我地入去屯門探三舅父同三舅母，之前去左深井食野先。哇...黎到深井好興奮呀，每次到達未去過既地方時，都會特別開心，好似打開新一期既雜誌咁，好新鮮，但又似曾相識。我地去左陳記飲茶，可能因為人流少，所以點心都唔多新鮮，好似俾人揀到溶溶爛爛咁，唯一令人叫好的就係海鮮窩麵，有好大隻蝦(得兩隻架咋)，d湯好鮮甜，正。

三舅父係住建生村對面架，舅父個bb好鬼得意既呢，叫正男，好好聽喔。本來打算去到玩 bb既，但一見到電腦...仲要係上左網，即刻又失控喇，見到自己部電腦都無咁興奮呀 ，因為自己果部乜都裝好晒喇嘛，呵~~我幫舅父單撈左好多軟件呀，裝呢樣裝果樣， 仲要係寬頻，好好玩呀(舅父部電腦真係慘...)。