入院小報告 PART2 化療左五日，其實每一日都好驚架，雖然唔係真係好辛苦，但諗起無止境既嘔吐，就會好 驚，擔心黎緊一日既療程會好辛苦。今日既療程過左，又會擔心聽日，所以呢幾日我都無 心機去做任何野，放縱自己不停咁去訓覺、訓覺、訓覺....訓左既時侯就唔會再驚。五日 既化療好快就過去，我竟然奇蹟地無嘔過呀，不過呢幾日我都好努力架，盡量唔做一ｄ令 自己反胃既野，一有少少作嘔我就會....訓覺。 窗口位既姐姐住左一個星期就出左院喇，我自己都知今次住呢度既日子唔會短，所以不停 要求俾我調過隔離床，唉....難就難在兩個護士長都唔鐘意我架，因為我太奀皮囉，講左 成個下午，終於佢肯「破例」俾我調去窗口位，呵呵~~調左唔夠幾個鐘，同房就有新病 人入黎喇，佢係一位中年女人，都幾好傾架，成日都笑，所以我地都相處得幾好。 中午十二點幾，本來我都未起身架，不過我聽到隔離床要抽骨髓，咪即刻響床度彈起身， 衝出走廊囉，雖然唔係自己抽，但都好驚架嘛，可能緊張得滯加未訓醒，跑左出去之後開始眼花花想嘔，哎呀....頂唔順呀，唯有叫人幫我拎個「嘔兜」，我一接就嘔喇，無野食過呀，所以都係嘔黃膽水咋，唉....下次都係唔好咁激動，小心身子。 之後又有一晚，食藥丸既時侯，粒藥竟然黐住響舌頭度，唔上唔落，我盡量保持冷靜咁狂飲水，飲晒一杯，再去倒第二杯、第三杯，終於吞到粒藥，但因為一次過飲得太多水，所以忍唔住又想嘔，死，周圍無放「嘔兜」添，唯有衝入廁所，對住個面盤起勢咁嘔，唉.. ..陰鬼功囉。嘔，真係好辛苦架，嗚~~

入院小報告 PART3 其實今次入院，主要係落血幹，血幹就係做血既細胞，呵~~咁ｄ血幹響邊度黎？咪就係響 呀哥度抽出黎囉，今次真係咩仇都報晒，等佢成日蝦我，呵呵~~ 本來有部新機俾呀哥洗血架，點知呀哥平日飲水太少，ｄ血濃得滯，搞到部機死左，唯有臨時臨急搵部古董上黎同呀哥洗血喇。果部老爺野，就好似一部超級大既洗衣機咁，呀哥左、右手都插住一支飲管咁粗既針，一支係抽血，一支係入血。過程係由右手抽血，然後ｄ血入左洗血機，洗左ｄ血幹出黎，之後就由左手輸番ｄ無血幹既血入番身体，足足抽左 25000毫升既血，先洗得50 毫升既血幹，洗左四個鐘呀，呵~~打我喇打我喇，平時打我打得我咁爽丫喇。要抽兩日呀 ，呀哥隻手腫到好似好科咁，嘻。 真係濕滯，入左醫院無耐，放cgi果個account竟然死左，唉，我而家龜速上網，要upload 番ｄ野都有排，唯有等幾日，睇下佢會唔會好番喇。點知等左幾日都無用，唉....無辨法 ，師父！出山喇，今次又叫邦邦幫我整囉，嘻，佢好勁呀，好快幫我搞番掂個留言版同計數器，嘻，唔該晒邦邦。 舅父響kodak 做，有日黎探我，竟然送左一部數碼相雞俾我，嗚~~~~開心死喇，我成日都 恨有部數碼相雞，咁就可以任影，又唔怕浪費菲林，又唔洗「屎驚」入電腦，嘻，我係咪發緊夢呀。於是我就成日拎住部相機，日影夜影，任何人黎探我，例必俾我狂影，實在太好玩喇，多謝晒二舅父！ 今次入院，雖然無乜點嘔過，好似好舒服咁，但好景不常，「蜜月期」好快就過左，然後 就係真正要捱既日子。落完血幹幾日之後，每日起身時，都會感受到口腔比之前一日乾， 呢個就係口爛既先兆。過多兩日，口腔內既黏膜已經脫落得七七八八，姑媽炒黎俾我食既飯，我都食唔到，希望現在既情況已經係最差喇。有日起身，感覺到喉嚨有ｄ痛，一陣之 後，情況都未見好轉，到左下午，我已經連水都吞唔到，因為實在太痛，口服既藥丸都轉 晒做吊藥水。果日係我心情最低落既一日，我要握緊掌頭，先至有勇氣吞一啖口水。全日都未必飲到半盒250 既飲品，唔係我唔口喝，唔係我唔肚餓，不過口痛比起口喝、肚餓厲害一點。醫生開左一包「小雞」俾我，呢包俗稱「小雞」既營養水，營養非常高，幾日之後我已經重左幾磅。呢包野要吊成晚，夜半差不多有三、四次要起身去廁所。訓得唔好，又食唔到野，所以都無乜心機，唯有不停 咁訓覺，只有訓著左既時間，我可以忘記肚餓同口痛。上次換骨髓，我個口足足爛足三、 四個星期，口痛得一直無法吞口水，但今次我要迫自己吞，我知道我愈唔吞，就會痛得愈耐。脫落既黏膜好似一堆泡泡，又好似一啖痰，黏住個口，連講野都講到一舊舊。如果用醫院供應既超級殺菌"浪"口水，仲會吐出好多一塊塊既皮，真係見到就驚。 初初爛口果幾日，真係好唔慣，又驚會好似換骨髓咁，三個星期都食唔到野，媽咪爸爸都要番工，所以九點十點先黎到。終於有晚，我忍唔住攬住媽咪喊，我真係好驚....

入院小報告 PART4 口痛既情況一日比一日好轉，雖然依然係咁痛，但似乎都習慣了，無再好似第一日爛口咁驚，因為吞唔到藥丸，所以成日都要吊住藥水，加上又講唔到野，呢個星期的氣氛特別沉靜，見到姑娘仔、呀姐、男護士，都唔可以口花花撩佢地講野喇。無得講野，唯有訓覺囉 ，我好叻架，有病以來每次入院，我都會帶眼罩訓覺，所以唔怕朝頭早光，又唔怕燈光。 每晚我都係十二點幾至一點訓，第二日就訓到中午十二點，有幾次仲訓到兩點添呀，幾勁 呀，一起身就食午飯喇。醫生多數係九點幾巡房，每次黎到都係揭起我個眼罩同我講 「點呀，綽姿，有無唔舒服呀？」因為未訓醒，所以我淨係識攬住sony貓擰頭。 「咁無野喇，你繼續訓喇。」然後佢又幫我閂番埋個眼罩。 再晏少少就會有教授巡房，呢個就麻煩ｄ，有時要叫我起身問話，有個星期係李教授巡房 ，我成日聽到佢話我點解日日訓覺，嘿嘿，然後佢又問下我隔離床，我係咪好夜訓喎，呵 ，隔離就話唔知，因為我夜晚打機、傾電話都好細聲，呵呵，終於有日佢忍唔住叫左我起 身，話好耐未見過我喎，嘿嘿嘿。 (係拉哥李國維教授先會問咁多野。)             每個病房都有兩張床，不過未必個個都會住得咁耐，有ｄ可能住一兩日就走，有ｄ可能一 個星期就走，所以我已經係「房長」，呵~~新黎既同房都要就晒我呀，嘿嘿，一、不准睇亞視，二、不准佔用電話過久，阻住我上網，真係好鬼威，好似陀地咁。第一個同房係二十到盡既姐姐仔，第二個係做得我呀媽既中年女人，第三個係呀婆。 呀婆第一日黎到，佢個女又唔著袍、又唔戴口罩入黎，唉....不過人地唔做我都無計架， 但佢個女竟然用病房電話，我唔係唔俾佢用，不過我地ｄ病人無扺抗力架嘛，我又成日用個電話黎煲粥，於是媽咪咪叫佢戴番個口罩先囉，佢又唔理，打左先算。之後佢出左去戴 口罩時，媽咪就叫佢順便著埋袍先入黎，個師奶就照做。我趁個師奶出左去，即時拎住張火酒紙，飛身過去個電話度消毒。師奶入番黎之後，我就開始不停聽到佢細細聲講我地， 又話「你ｄ野夠有菌喇！」，我望下媽咪，媽咪無乜反應，喂！我呀媽都係為我好，你講我好喇，講我呀媽？於是我就忍唔住氣同佢嘈，媽咪淨係叫我唔好出聲，但我又好激氣， 所以就忍唔住喊左出黎，個師奶仲不停口數我地不是。平伏左之後咪上網囉，佢個女又走左入廁所，喂！大佬呀，果個病人廁所黎架，屎屎尿尿有菌架嘛，我又望下媽咪，媽咪只係無奈地擰頭，叫我唔好出聲，平來已經平伏既我，又開始著急了，我地千小心萬小心， 希望減低感染既可能，但偏偏唔可以防止別人自私的行為，無奈。見間房一片殺氣，忍唔住走左出房，同一個相熟既姑娘哭訴剛剛既遭遇，佢就靜靜雞同我講，原來員工們都唔鐘意果個呀婆ｄ女同ｄ新抱架，話佢地平時都好唔守規矩。我入番房之後無耐，佢個新抱話肚痛，又想走入廁所，哇！唔係喇fa，肚痛？咁你去完個廁所我唔洗去喇，咁多菌，你 正常人就好地地，我咪即時話「呢個病人廁所黎架！」，但佢都依然唔理我，照閂門，呀婆個女就好求其咁敲左一下廁所門，過左十秒，佢個新抱就走番出黎，呼~~總算逃過一劫 ，我諗十秒鐘都唔到廁所卦。過左一陣，同我friend果個姑娘入左黎，同佢地講一次「病房守則」，呵~~同完佢地講之後，姑娘就走過黎問我「點呀~~綽姿妹，個心係咪好涼呀？ 」嘿嘿嘿，講到咁鬼大聲，係人都知係我篤灰喇，呵~~係明篤你呀，鬼叫你地唔尊敬下房長呀。(呢呢~~~~佢就係念慈姑娘喇 ^^) 原來呀婆ｄ新抱同女，仲串親過ｄ呀姐架，哇，病房最惡就係呀姐，你地都敢得罪，真係威，所以一到交更時間，例必趕走佢地，呵~~偏偏我又同ｄ呀姐friend喎，嘿嘿....心涼心涼....加埋成百歲仲蝦我細既，扺你既。 (寶藍色字是羊媽媽後加)

入院小報告 PART5 我一向都好鐘意千fa同東東架，但百份百感覺２就唔到我睇喇，因為唔出得街嘛，嘻，好 彩世界上有vcd呢種偉大既發明，仲要未落畫已經有正版vcd出左，呵~~我緊係第一時間叫 人幫我買喇。wow~正，千fa真係好鬼索既呢，不過講到個故事就真係麻麻地，睇完都唔係咁深刻，反而薰衣草就好睇好多喇，嘻，雖然我鐘意千fa，但講到做戲，都係kelly正d，睇到我喊晒咁呀。仲有買左特警新人類２，係舊左ｄ，不過我目的都係睇希希之嘛，呵~~好型呀希希！不過個故事又係睇完都唔知講乜，悶到死，佢隻vcd 仲有隻game送埋架，隻game 就真係....廢到嘔囉，唉....咁無聊既 2D game 都算係古董囉。 自己ｄ vcd睇晒唔緊要，可以問隔離房借嘛，佢借左一隻叫「大和撫子」既日劇俾我，都估唔多好睇架喇，又無木村，又無常盤貴子，得果個松島菜菜子，不過無野做咪睇下囉， 由第一集起已經俾佢吸住，完全係不能自拔果隻，哇....好好睇呀，雖然男主角唔靚仔，不過個故事真係一流，我覺得仲好睇過悠長假期同戀愛世紀呀。睇左六集之後，有個姑娘話聽日last day番工，叫我果晚拿拿林睇晒佢，哇....媽咪爸爸夜晚十點幾先走，一走我就開始努力咁睇，結果睇到兩點幾，哇....仲有三集未睇呀，仲要好鬼眼訓添，唯有放低睇左果九集響桌面俾佢，第二日起身，佢一隻都無拎走呀，因為佢講過一係唔睇，一睇就要睇晒， 死喇....好鬼內疚添。 有日唔知咩節，有班基督徒上黎派杯杯喎，好正架隻膠杯，寫住「活水泉源 」，正~~嘿嘿 ，其中一個女基督徒見到我部電腦係千fa wallpaper ，佢就同我講起，原來佢男朋友又係千fa fans 黎架，佢話千fa下個星期有新書簽名會喎，叫我俾個名佢，到時佢拎去幫我簽。過左一個 星期之後，都完全唔記得有件咁既事lu，但果個女基督徒竟然同埋佢男朋友一齊黎探我呀 。原來佢地黎探我之前，就係去左西九龍中心，登買左本「沙沙麥卡」俾千fa簽名，然後 仲即時晒埋影千faｄ相送俾我，嗚~~果一刻真係感動到暈，一個萍水相逢既人，竟然為左 我既一句說話而山長水遠去搵千fa既簽名，簡直係難以置信呀，其實佢男朋友都鐘意千fa 架，不過偏偏將辛苦得黎既簽名書送左俾我，好感動....多謝晒.... 簽左我個名同「早日康復」既書書 千fa簽左名既沙沙麥卡 (後來知道排隊人太多，佢地係打尖托人俾千嬅簽名，而果個被托的人在咩咩走左之後，也巧合地被引領到這裡重遇。)

冇得走咯<---->呀 咩 昔 日 發 傻<---->跟住又點呀