每天傻笑

發生咩事---羊媽媽後記

1-4-2003
四月份咩咩入院換血幹細胞，住了整整一個月的醫院，打激素谷白血球上升，打左幾日，出院時升到六點幾，但跟住黎果個月，d 紅,白血球就一路係咁跌，在六月頭再一次抽骨髓，未換血幹之前，癌細胞只是少量，但今次的骨髓報告是升到55%，即是哥哥的血幹完全起唔到作用，跟住又可以點做呢，都係要哥哥的血幹，但今次就咩野抗排斥葯也不不用，希望可以有排斥就有希望 ~~~~

沒人再記得這裡了

六月十四日
今日醫生話俾我聽，我又復發。前後醫左一年零四個月，復發左三次，可能對人地黎講，我出左院就等於好番，我復發咁多次都唔死得，即係無事，但其實唔係架，我既病，一次復發比一次嚴重，身体一次比一次差。醫生話癌細胞有55％，做左咁多次都仲係有，好難醫得好。而家可以做兩樣野，一係不停輸血，一係再換血幹。不停輸血，初時可能一個星期輸一包，但個幾月之後，癌細胞會愈黎愈多，然後會死。換血幹，又要再住多一個月醫院，又要辛苦，而且可以好既機會唔大，只不過又係拖。
我初初病，個個都黎睇我，好似要見我最後一面咁，愈病得耐，探我既人愈少，個個都以為我好番，但其實情況係一次一次咁差。因為唔出得街，好少再聯絡朋友，朋友因為我病，亦好少再搵我。對佢地黎講，我既價值就係吃喝玩樂。
人生自古誰無死，不過十八歲就要死，我會覺得未玩夠，我仲好想返學，我仲好想去街。
再入醫院根本醫唔好，我寧願信神信鬼信中醫，至少要死，我都唔要死響醫院。
到頭黎都係要死，點解唔一開始病就死呢，反而要我辛苦完又辛苦，有希望完又絕望，然後有一個夜晚，因為特別累所以我好早睡了，自此沒有人會再記得我，這個網頁裡的呀咩，只會成為一個故事中的人物。

一封好好玩的信

六月二十二日

本來唔係咁開心，都無心情寫日記架，不過我收到一個傻婆既信，佢既內容都幾得意，所以決定依信上方法做一次。記住呀，當你見到呢篇日記，我就當你收到我既信架喇，所以你都要寫番一封俾我，等我了解下你，唔洗怕醜喎，大家都咁熟嚕。

To my friends,
將整封E-mail複製，貼在一封你要寄出的新郵件上。將所有的答案改成你自己的，然後send給你認識的人，包括將這封信寄給你的人。
這個理論要說的是，你將了解你的朋友許多不為人知的種種。
別忘了把郵件也寄回你的發件者你永遠不知道你將會從中學到些什麼！
以下依照順序就是這68道題目，如果願意的話，你和你的朋友們也可以試著回答：

■1. 現在時間（what time is it）
14:27 22/6/2001

■ 2. 出生證明書上的全名（name as it appears on your birth certificate）
吳綽姿 ng cheuk chi

■ 3. 綽號（nicknames）
呀姿(屋企人)，amesanna(中一既英文名@@，都唔係好記得點串)，呀芝，吳綽，唔知，呀婆(中三之後既尊稱，就係因為扮過問米，連呀sir都係咁叫我)，meredith (中四之後既英文名)，mary(設雞d同學改既)，呀咩(展翅d朋友改既)，二索(民安隊 d男仔改既，至於點解，自己意會喇)，孖辮妹(民安隊果時我日日都綁孖辮，好明顯係扮可愛喇)

■ 4. 上一次生日蛋糕上蠟燭的數目（number of candles that appeared on your last birthday cake）
無呀，因為個病，所以無得食。

■ 5. 你通常吹熄這些蠟燭的日期（date that you regularly blow them out）
十月十五號喇，仲洗講既。

■ 6. 寵物（pets）
養過龜、龍蝦、青蛙、魚、狗、金毛鼠、癸鼠、雞、了哥...不過最深感情既係一隻養左十幾年既鸚母，叫多多，不過因為個病，所以俾左人地養lu...每次講起都好唔開心。

■ 7. 身高（height）
155卦。

■ 8. 眼珠顏色（eye color）
啡色卦。

■ 9. 頭髮顏色（hair color）
無頭髮喎，汗毛就有幾條，唔好意思。

■10. 耳洞（piercing）
耳仔窿？人人都有兩個架喇，不過我無釘過耳呀，咁鬼痛，夾既就戴得多。

■11.刺青（tattoos）
紋身貼紙就玩過，用原子筆畫花隻手算唔算呢。

■ 12. 你有多喜歡你目前的工作？（how much do you love your job?）
你話糧地呢份工？其實唔係咁鐘意，就快自閉，我都係鐘意番學多d。

■ 13. 出生地（birthplace）
寶血醫院。

■14. 家鄉（hometown）
順德，果度好靚架，有好多田、好多樹。

■ 15. 目前居住地（current residence）
官塘

■ 16. 喝過Calypso Breeze 雞尾酒嗎？（had the drink Calypso Breeze）
真係有條雞尾響度架？呢排禽流感喎，你都唔好試。

■ 17. 曾經墜入情網嗎？（been in love before）
問得咁老土既，點會無喎。

■18.去過非洲嗎？（been to Africa）
長洲就去過。

■ 19.喝醉過嗎？（been drunk）
有飲過，不過無醉過。

■20. 曾經被當人成廁紙嗎？（been toilet-papered）
咩意思先，咁污糟，無卦。

■ 21. 曾經愛一個人愛很深，深到讓你落淚（loved somebody so much it made you cry ）
有呀，佢又對我好好，我又好鐘意佢，場面好感人架(肉麻@@)。

■22. 曾經出過車禍嗎？（been in a car crash）
巴士壞車囉。

■ 23.（凱撒沙拉裡）喜歡放麵包丁還是碎培根？（croutons or bacon bits）
碎培根、麵包丁？唔知係乜喎，不過放麵包糠都幾好食。

■ 24.（汽車）喜歡兩門式的還是四門式的？（2 doors or 4 doors）
兩門，好鬼型，不過好麻煩。

■25. 喜歡雪碧還是七喜？（Sprite or 7UP）
雪碧，不過都好少飲，太甜喇。

■26. 喜歡咖啡還是咖啡冰淇淋？（coffee or coffee ice cream）
咖啡雪糕，夏天嘛。

■ 27. 喜歡麥當勞還是漢堡王？（Big Mac or Whopper）
我鐘意肯得基多d，因為有親切感。

■28. 喜歡的沙拉醬（salad dressings）
千島醬。

■29. 喜歡的襪子顏色（color of socks）
橫條、彩色、腳眼襪。

■30. 最喜歡的數字（favorite number）
4，因為我身份証有四個4字。

■ 31. 喜歡地毯還是櫸木地板（carpet or hardwood floor）
地毯，軟綿綿。

■ 32. 喜歡被吻的部位（place to be kissed ）
面，咁朋友又可以錫嘛，屎weet。

■33. 最喜歡的電影（favorite movie）
notting hill(摘星奇緣)，好開心、好感人、女主角好大個口，好靚。

■ 35. 最懷念的假期（favorite holiday）
1999年既聖旦節，同當時男朋友一齊過，周街玩，好開心。

■36. 喜歡的食物（foods）
雪糕、紫菜、荔枝、西瓜、朱古力，不過病左，通通都唔俾食。

■37.喜歡禮拜幾? （day of the week）
星期五。

■38. 喜歡的味道? （favorite smell）
青檸味、滴露味。

■39. 喜歡的電視影集（TV shows）
美味情緣，因為有我最鐘意既千fa。

■ 40. 喜歡的航空公司（airlines）
都無撘過，唔知喎。

■41. 喜歡的餐廳（restaurant）
pizza hut囉，我地呢d學生哥都夠錢俾。

■42. 喜歡的花（Favorite Flower）
鬱金香、太陽花(注意，太陽花同菊花係唔同樣架)。

■43. 最不喜歡的話題（least favorite subject）
問我個病，不停咁講我唔做得既野，鬼唔知無病好咩，真係想打鑊佢。講耶穌，不停咁迫我信，咁同邪教有乜分別。

■44. 最喜歡的酒類（favorite alcoholic drink）
姐姐，我唔識飲酒架，我好乖架喎。

■45. 喜歡看的運動（sport to watch）
靚仔打籃球、排球(好man呀)。

■46. 喜歡冰淇淋的種類（type of ice cream）
芋頭、薄荷、朱古力、菠蘿，香蕉船都唔錯。

■47. 喜歡的動物園跟展區（zoo exhibit）
水族館、師子、老虎、大笨象。

■48.《芝麻街》裡喜歡的角色（sesame street character）
elmo囉，個口夠大。

■ 49. 最喜歡的電視台（TV station）
無線囉，有時都會睇有線。

■50. 喜歡的速食店（fast food restaurant）
我最鐘意麥嘜嘜，我最鐘意麥兜兜，我最鐘意食麥當勞，家下麥下麥下甜蜜下。

■51. 上次上醫院是什麼時候？（when was your last hospital visit）
四日之前，覆診。

■52. 最喜歡的飲料（favorite drink）
香片、紅豆冰。

■53. 臥室的地毯是什麼顏色？（what color is your bedroom carpet）
地板就有，啡色。

■54. 你從小抱到大的那條毛毯叫做什麼名字？（what was the name of your childhood blanket）
哇...無d咁既辟好喎，不過我鐘意攬住sony貓攬枕。

■55.（駕照考了幾次才拿到？） how many times did you fail your rivers license test)
碰碰車就玩過。

■56. 你覺得碟仙怎麼樣？（what do you think of Ouija boards）
都唔知點解會郁既，不過可能係心魔。

■57. 你覺得自己十年後會在哪裡？（where do you see yourself in 10 years）
香港

■58. 在這封E-mail之前，上一封電子郵件是誰寄的？
念慈姑娘。

■59. 曾經犯法被逮捕過嗎？（have you ever been convicted of a crime）
聽mp3算唔算呀？但又捉唔到我喎。

■60. 哪一家店會讓你想把信用卡刷到爆？（which SINGLE store would you choose to max your credit card）
卡就無，八達通就有。

■61. 無聊的時候你大多都做些什麼？（what do you do mostoften when you are bored )
打機、整網頁。

■62. 你住得距離最遠的一個朋友是誰？（name the person that you are friends with that lives the farthest)
加拿大既暉暉同陳明。

■63. 全世界最惱人的事（most annoying thing is）
點解我要有病，仲醫極都唔好，想食既野又唔俾食，街又唔出得，學又無得番，激死我喇。

■64. 全世界最好的事（best thing）
無病無痛，留番長d頭髮番學。

■65. 通常幾點上床睡覺？（bedtime on a normal day）
兩、三點。

■66. 你猜誰會最先回這封信？（who will respond to this fastest）
呀豆(唔係第一個回咪好瘀，你好快d回我呀，我好小氣架)。

■67. 你寄這封郵件的對象中誰最不可能回覆？（who is the person you sent this to that is least likely to respond?）
呀基囉，因為佢去左訓練，多數都好忙好忙，又或者好累好累。

■68. 現在幾點了？（what time is it now）
7:16

呀咩上

我沒有病了

七月一日
其實真係唔想再入院，所以媽咪幫我四圍問有無好既中醫，但個個都要排期，根本等唔切。有一晚，大約十點幾，其中一個中醫打黎，佢話剛剛有時間，問我地可唔可以即刻去，於是我同媽咪、爸爸撘的士去太古城----醫師既屋企，等到差唔多十二點，佢就開始同我睇病，不過醫師都係讚成首先入院化療，出院之後先用中藥調理，唉....講黎講去都係要入院，不過醫師勸媽咪俾我食多ｄ鐘意食既野，話咁樣我會開心ｄ，個病自然好喎。
番瑪麗覆診，定左六月二十五號入院，雖然一直都知自己復發，但定了日期入院，果一刻既心情，就好似定了入獄日期一樣。
不過有得醫，總好過無得醫。有ｄ人想醫，都無得醫....
入院前既一段短短既日子，我終於可以試試食西瓜既滋味，我又可以再吃半年多無吃過既雪糕，我仲食左兩餐蝦....好感動....好開心....平日既限制令我喘不過氣來，但當我可以再食自己鐘意食既野，我終於感到自己唔係一個「病人」，最起碼食緊既十五分鐘內，我都忘記了。

當我捧住這個西瓜時，我忍唔住不停狂笑，我終於沒有病了。

千嬅駕到

七月四日
尋日馬太打電話黎，話俾我知....「千fa聽日三點黎探我呀！」，死喇，一知道左之後，全日都情緒緊張，但好彩夜晚都總算訓得。
唔知我咁諗係咪多餘呀，不過其實我又唔係咁開心架，我總覺得千fa黎之前，響我心目中係一百分架，但佢黎左之後，會唔會減分呢。可能我鐘意既係我想象中既千fa，而唔係真既千fa。而且千fa黎左，好開心；千fa走左，我咪好唔開心囉，我真係會架，我仲係細路黎架咋。
完美既野，始終留響心入面係最好既。
大約兩點要落哥哥捐俾我既血幹細胞，落之前要打防敏感針，o！no~我的天，一打完就好想訓覺。因為怕落緊血幹會有唔好反應，所以一直都量住心跳同血壓。心跳好慢，慢到部機響添呀，但一講「千fa~千fa~」就心跳上升喇。
幸好千fa響我訓著之前終於黎到喇。哇，佢好靚呀，著住一件黑色 t-shirt、黑色牛仔褲、反光波鞋，化左少少粧，不過可惜要著住紫袍戴口罩喇，無左個靚樣。因為係私人性質，所以無記者，千fa淨係同佢舊經理人黎，我呀，白痴到尖叫，仲喊添呀，唉.... 真羞家，咁真係開心丫嘛，人地千fa大明星喎，嗚~~滾動，仲嚇親千fa添。
經千fa証實，楊千嬅係佢真名黎架，仲有原來佢真係讀過慕光(我以前間中學)，初初人地講我都唔信架，佢話佢果時未夠十八歲去唔到考護士，所以響慕光「坐」左三個月，嘻，咁我都算半個「千fa小師妹」喎。我仲拎番97年，響hmv 撞到佢同佢影既合照，佢話仲記得喎，呵~~都唔知係咪既。

佢帶左「play it loud kiss me soft」既cd同poster 送俾我，嘻，而我就送左「百里鮮電腦畫」同手繪千fa一幅，我仲拎左兩隻陳年cd俾千fa簽名，當然係揀我最鐘意既「冬天的故事」同「夏天的故事」喇。

本來哥哥問朋友借左部即影即有架，不過原來壞左，廿四孝媽咪即話去百老匯買左部新架，哇....五百幾呀，媽咪知我鐘意千fa，所以先咁捨得咋。千fa停留其間，我哥哥就勁用數碼影，我媽咪又用即影即有影，我仲用眼仔錄低埋，不過可惜無收音。探左大約八、九個字之後，哥哥仲送埋千fa走，影到佢架車黎為止，嘻成五十幾張相，可以慢慢回味呢。其實千fa講左好多野架，不過我唔記得晒lu，我淨係識傻笑，暈晒大浪。我仲開左我個網俾佢睇，不過....一入黎首歌竟然係張柏c....瘀呀。

嘻，今日我已經開心到傻左喇，連護士分藥問我叫乜名，我都淨係識答「楊千嬅....」 ....我係千fa 就好喇......

沒逃避過

七月十二日

最近好鐘意玩石器時代，反而憎左玩ic蕉。

寫完「沒人再記得這裡了」之後既幾日，我都無上ic蕉，就算online我都係用眼眼，連朋友打電話黎，我都無聽，我唔係謝絕朋友既關心，只係再諗、再講，復發已經成為事實，我唔覺得將同一個事情，講多幾次我會由唔開心變成開心，所以我選擇左投入另外一些事情，投入另外一個沒有人認識我的空間，那裡沒有人會提起我的病，沒有人會不停煩厭的向我問話，沒有人會俾面我，我就像普通人一樣。是石器時代。

我每天都不停打獵去升level，心裡只是想著打機的一切事情，我會因為俾隊友打飛、被屈係人妖而喊，我會因為寵物又升級了而笑，雖然簡單，但開心，我每天就是在石器裡過了。

你覺得這是「逃避」，我不覺得。我只係做自己開心既事。

我討厭自以為是的人，請停止再向我推薦悲情電影，我講過唔睇，就係唔睇，難道要我解釋「唔睇」呢兩個字既含意嗎？

如果套戲結果係要死既話，即使過程係如何轟烈，我睇左只會令我感到挫敗。

如果套戲結果係會好番，即使過程如何輕描淡寫，我都會覺得鼓舞。

如果我選擇睇完會開心既電影，我每天傻笑，我忘記自己的病和痛，就是你眼中的「逃避」，那麼我不介意被人這樣形容。

我只是選擇令自己快樂的模式罷了，又沒有干擾到別人，你幹嗎硬要我不停高呼「我係一個病人」，這對你有何好處？當有日我真的信了你，不停認真的去想著自己的病，每天以淚洗面，你就會高興了嗎？這就是你所謂的「面對」了。

感謝我沒有聽你說，所以我仍然快樂。

附上唯一一張光頭相，雖然唔靚，但呢個先係真既呀咩。呵~~看來我開始愛上這個光頭look了。

樓上來的聲音

七月二十四日

成日都會聽到隔離房既聲音，有時係講野聲，有時係搬動物件既聲，無聊既時侯我會從聲音推斷下隔離房究竟做緊乜呢。有一日我聽到隔離房傳來一陣哭聲，我諗佢可能情況唔係太好，然後又有一日，義工告訴我，隔離房既人係「道長」，佢雖然叫道長，但並不是七老八十的伯伯，而係一個二十歲的青年。佢係換過骨髓架，有次院牧為我地介紹過一次，然後我知道有一個同我年紀相約既人，同我一樣都被迫遠離出面既花花世界。

偶然在夜深人靜時，我又會自己一個人響度，憑聲音估下佢既狀況。有時好夜好夜既時侯都會見到佢開住房燈，然後我又會估，係咪佢情況唔好呢。出於一點八卦和關心，我向一些病友同義工打聽佢既消息，雖然房中間隔左一道牆，我地既距離只差一兩米，但就係欠缺一點勇氣去關心佢。

平日我會訓到下午先起身，但有一日，大約上午八時多，我俾隔離房傳來既哭聲嘈醒左，喊既人係佢媽媽同爸爸，一邊喊一邊叫喚兒子，聽得心酸。然後我記起我有一個十九歲既女病友，佢離開時都係住隔離房，佢媽媽一邊喊，一邊說「養到個女咁大都要走....」，我好驚，我怕有一日住果間房既人係我，喊既人係我爸爸媽媽。我病左一年幾，當時初初入院所認識既病友，好多都離開左，佢地響我心目中唔單止係醫院既其中一個病人，佢地都係我既朋友，我地曾經傾過計，曾經互相鼓勵，出左院之後，我會帶佢地鐘意食既野俾佢地食，我地之間有感情，佢地曾經都係一個活生生既人，佢地都以為佢地會好得番，但估唔到有一次入醫院，係再無機會出院。到底，醫院係一個失望既地方，定係一個有希望既地方。

果個朝頭早我好眼訓，但訓唔到，姑娘問我係咪好嘈，我話少少喇....然後合起雙眼，醒左既時侯好靜，無再聽到喊聲，一切都結束了。

以為得囉<---->呀咩昔日發傻<---->跟住又點呀