::::::二月二日至三日::::::

上個星期先出院，但要吃好多化療藥黎控制病程，怕白血球又升不停，所以成日都好累，由朝訓到晚，精神好差，個人好殘，不過又忙到不得了，第一，因為出院既一個星期入面，我要每一日都去順利村睇中醫，雖然好近，近到撘的士都唔洗跳錶，但下下都要換衫著鞋，行一大段路，對於我黎講，實在係太辛苦嚕，可以既話我唔想出街，淨係想響屋企好好休養。第二件忙事就係要搞camp既野，租渡假村、交涉、收fax、清楚讀熟營入面有咩設施、打電話、約人、計數...通通都係我一個人做晒，呀...原來搞camp係咁辛苦架。點解無端端會想去camp？事源我同展翅班同學仔，一月頭去完燒野食之後，大家興起想去camp，左度右度，就度好二月二同三呢日搞，之前果排入左院，我都唔想插手...不過thomas話去東堤喎，唔係喇fa，媽咪即刻話唔俾去，話果度陰氣重，我時運低好易撞到野呀，哥哥又話佢以前響銀礦灣既渡假營入面做，原本要早三個月book同埋最少三十人，但我地早一個星期book同最少十五 個人都得，哇，渡假營喎，比起租渡假屋乾淨，同埋又多ｄ野玩呢，人數方面...搵我ｄ朋友又唔得，因為我有可能身體唔舒服去唔到架嘛，到時我ｄ朋友又唔識我ｄ展翅班同學仔，咁唔得架嘛...最後我終於係搵左我ｄ親戚，嘻，唔洗玩埋一齊架，夠人大家入去有得各自玩咪得囉，呼...好彩姑媽三嬸都得閒，而爸爸、哥哥都會去呀。

一切搞掂好晒，每人一百四十三蚊，親戚們都係夜晚自己入去，而頭一批就十二點約左響中環碼頭等，有我、哥哥、小倍、表妹、細拳、冬冬、jimmy、thomas、阿暉、阿達、阿dick，我地要撘十二點三既船入大嶼山，然後入到去再join埋瑩瑩、大隻佬同vernon。一切一切都要十分清楚，怕會等少左人，怕帶漏野，仲有提醒自己上船收錢時，要記住唔好找錯錢，唔係少左就要自己嘔出黎嚕。

我同哥哥撘601出到灣仔，再轉的士去中環碼頭，其實可以直接撘地鐵既，不過我身體好差，兩隻耳仔成日都會塞住，為左保留體力，唯有咁喇。十二點鐘去到碼頭，等齊人就上船嚕，咁多朋友仔一齊去camp，真係好興奮架，開心到一路跑一路跳，但一跳果下...腳軟...係喎，唔記得自己身體未復原呢，哈哈，好彩無扑親。上到船要走黎走去收錢呀，收好晒之後又開始耳仔塞塞地，於是響椅度訓著左，訓到落船先醒呀，好累呢。佢地成班去晒碼頭附近既超級市場買野同租單車，淨番我同細拳響海旁度同佢地看住ｄ行李，哇...呢度好大風呀，好彩有細拳陪住我說說笑笑咁咋，不過耳仔又塞住，好辛苦、好唔舒服，但原來倒轉個頭，ｄ血充上腦度又會通番喎，不過個頭一調番轉，耳仔又會塞番嚕。

等左九個字左右，佢地就買齊野，租埋單車番到黎嚕，嘻，我行唔到遠呀，所以哥哥特登租左架有後坐既三輪車，不過佢唔係好識控制，所以就由thomas黎踩，嘻，踩到佢上氣唔接下氣，真係辛苦晒喇，而其他唔踩單車既呢就沿住沙灘行過去。雖然話我坐車尾好舒服，不過其實都好驚架，因為單車一開始要駛出馬路，哇哇哇...驚到我死咁滯呀，平時我最怕就係過馬路，今次要響馬路上面同ｄ旅遊巴爭路，仲要係得一條線行車，ｄ車響身邊差不多一尺既地方風馳電制咁飛過...嗚...嚇死我喇，之後駛入沙灘既路邊，以為會好放心喇，但原來條路好高好窄架，一邊就係爛地，另一邊就係同條路既高度相差一米既沙灘，哇哇，個轆差兩寸就會跌落去架喇，嗚嗚，唔制呀，跌落去撞到ｄ石頭、樹枝實週身損傷呀，俾架三輪車同thomas「責」親仲會內傷添呀，好驚呀...

幾經辛苦，死左好多腦細胞之後，終於到左喇，個營係向住沙灘，好正架，不過佢係起響一個山丘上面，所以由門口去其他地方，就要又上又落，行好多樓梯喇。佢地泊好晒ｄ助駕，等齊人我地就一齊上禮堂聽訓話，呼...禮堂處於是高既地方，行上去都唔易架，我又怕我會腳仔軟喎，所以一直都捉實側邊既扶手，唯有一步一步慢慢咁爬上去喇。集合好李姑娘就開始講營規喇，例如唔俾響營入面食煙、飲酒，夜晚唔可以太嘈之類，仲有十一點之後就無熱水供應，所以要趁早沖涼呀。因為哥哥以前響度做，所以李姑娘都唔講咁多嚕，不過我始終擔心同學仔佢地玩得太癲會失控，到時要哥哥「咩鑊」，希望佢地個個都乖乖地喇。

我地分配到兩間二十人既房，每間房有十張碌架床，咁就可以一邊俾同學仔，一邊俾親戚們喇，而且兩間房中間有度門打通架，有咩事要過隔離借野都好放便呢。哇，一見到張床我就好想訓覺喇，拿拿臨舖好張床先，小倍佢真係寧捨細心呀，佢用多左出黎既棉胎墊響床褥上面，哇呢，本來硬掘掘，而家訓落去軟綿綿，好似訓左落舊雲度咁舒服呀，蓋埋被仲正呀，暖笠笠，就係咁，我就尼左響個被竇入面唔捨得出黎，係唯有咁樣訓響度我隻耳仔先唔會塞住，訓下訓下就訓著左嚕。

到左五點幾六點，聽到隔離房好嘈，走過去八下佢地為乜玩得咁開心嚕，原來thomas同細拳響度玩超級無敵乒乓波呀，表妹、小倍、冬冬佢地咪響度睇嚕，嘿嘿，因為無乒乓波台，所以佢地既規守就係個波一直唔可以落地，就咁用個拍拍番過去俾對方，勁呀，咁都諗到既，真係好搞笑兼好高難度喎，於是我就霸左小倍張床，訓響度慢慢睇佢地玩喇，輸左一次要做十下掌上壓架，thomas差唔多輸左十四次呀，嘿嘿，做到青筋暴現，細拳都輸左幾次呀，哎呀，心痛死喇...等我幫你抹汗。

吉場國家代表...阿拳！

七點幾八點左右，我地上左去禮堂繼續打乒乓波，等左一陣就落燒烤場準備燒野食，呢個時候第二批營友就到嚕，嘻，有爸爸、三嬸、叔叔、唐細路、姑姐、阿華，聽閒晏ｄbd華以前個女朋友高音王eling都會黎呢，嘿，講起呢個高音王佢就勁嚕，有次阿華帶佢上黎吃飯，佢一邊吃就一邊用細路仔既聲線話ｄ魚有骨，要阿華揀起ｄ骨喎，你話有咩魚係無骨架？有...八爪魚囉，搞到我地個個都拿拿臨食兩啖就彈開，我坐響度玩電腦都俾佢果把充滿童真既聲線搞到毛管動，之後佢個電話響，一聽電話即時變番老牛聲，仲要講野到爆晒粗咁，又有ｄ女仔咁得意既...可能係精神分裂，唔怪得佢既。

食左兩條腸仔我就想番去嚕，因為實在唔係好舒服，於是我同kk、小倍番去沖涼先，九點幾左右，搞掂晒我就想訓嚕，唉...點解玩都玩得咁辛苦架，無計喇...係我搞既，唔黎唔放心嘛，佢地玩得開心我咪開心嚕。

陸陸續續佢地吃完番黎，差唔多十一點幾既時候媽咪突然出現呀，仲拎左pizza黎，嗚，好感動呀，佢開完工專登撘船入黎架，pizza好快就俾佢地分屍左，而媽咪就上去同爸爸一齊燒野食，好溫馨呀，最衰咁累喇，唔係我都想去陪下媽咪。

本來想訓架喇，但thomas講左一句「黎camp訓覺既話不如番屋企訓。」，咁又係喎...於是我又過左去隔離房，同細拳佢地一齊玩。姑媽、三嬸佢地無響度訓呀，原來安排左間領隊房俾佢地，好正架，有電視雞同獨立廁所。

半夜高音王入左黎，哈，我地都無個識佢，但以佢既細仔聲線同扮細路舉動(可能唔係扮既，或者佢 智商同真正既細路無分別)，好快就同班餓狼男同學混熟左嚕，我都無眼睇呀，我同kk、冬冬、小倍、哥哥知佢ｄ妖法，所以就索性自己坐埋一邊傾計算嚕，不過有時睇下佢又幾好笑既，明明牛高馬大，個樣似二十五歲，但又要扮到咁細個，好似有ｄ勉強。我地傾傾下計，thomas響出面煲完煙番黎，坐左響我張床度，一腳踩左上張被面，然後我地就聞到一陣屎味...我地個個都勁嗌好臭呀，原來thomas踩屎呀，救命呀，佢走左之後等成五分鐘陣味先散得晒呀。我地傾下計、唱下歌咁就差唔多四點幾五點嚕，呼...頂唔順喇，一定要訓下先得喇...

第二朝八點幾左右俾媽咪嘈醒，佢同爸爸要撘早船走嚕，唉...好唔捨得添，只係咁見一見就要走。成間房既人都仲係訓緊覺，而我就偷偷咁走左出黎，因為我好肚餓呀，原來姑媽、叔叔、三嬸、哥哥佢地一早起左身食晒早餐，仲響度玩緊繩網添，之後三嬸就陪我上去禮堂食野，因為我遲左起身呀，所以淨番ｄ麵包同凍左既薯餅、腸仔，一見到就唔開胃喇，所以我淨係飲左杯阿華田，唔知係唔係太過餓呢，我覺得杯野好好飲呀，正。

食完野，抖左一陣，細拳又起身喇，於是我地就同埋三嬸一齊行出去石灘行下，唐細路同叔叔、姑姐響度捉蟹蟹呀，哈哈，一搬開ｄ死頭，就會有ｄ蟹仔，響度架喇。石灘ｄ路好難行，好彩有細拳強而有力既臂彎，呵呵，乘機搏下矇摸多幾下先。

食埋下午飯，我地係時候閃嚕，今次係由阿輝載番我出去碼頭...同thomas手車相比...阿輝手車辣好多...坐到我落車果陣腳軟，之後我地就撘船出番去中環，然後再轉小輪過尖沙咀，結束今次既兩日一夜宿營嚕。

等巴士既時候哥哥走左去七十一買左兩杯軟雪糕，嘻，上到車發現哥哥個背囊上面有一篤雀屎，好搞笑呀，嘿嘿，於是我地一手拎住杯雪糕，一手周圍搵紙巾，嘻，又會咁邪既...

番到屋企撻上床果一刻，先真正輕鬆落黎，呢兩個星期為左宿營既事太過緊張喇，我就係咁架喇，一係唔做，一做就要做到最好，今次我雖然無乜點玩過，好多時都係訓，但佢地玩得開心，即係我搞得好喇，既然係咁就值得開心喇，嘻，終於可以鬆一口氣嚕，始終都係屋企最舒服。

超級無敵乒乓波::::::睇下::::::
哎呀，細拳好man呀::::::睇下::::::
搽緊藥膏既呢::::::睇下::::::