樟木頭遊記

::::::星期三::::::十二月五日::::::

媽咪個老闆響樟木頭買左間屋,老闆同老闆娘今日會番上去住一晚,於是就問我地去唔去喇,哇,又有機會離開香港去玩喎,梗係去,順便可以睇下有無平野買,呵,不過...星期三晚要交game稿喎,哎呀...唔理喇,番黎先寫嚕。九點幾出門口,約好梁生梁太響大圍火車站月台等,今次得我同媽咪去咋,即係加埋四個人嚕,我地撘左架去上水既火車呀,所以好多位坐,不過去到上水要轉車嚕,好快我地就去到羅湖喇,好肚餓呀,仲諗住會響度食d野先再上路,但似乎佢地好趕呀,急急腳咁就走左去車站等車,唉...我餓都有少少反白眼喇,上左車之後,趁架車響度等緊客,我就叫媽咪幫我去買罐寶礦力嚕,有d野飲下都好d。

我地撘果架車係十幾個位既小型巴士黎架,不過d坐位好似好污糟咁,一上車我仲見到張椅度有隻扁左隻蝴蝶,好彩仲有位,唔洗咁殘忍坐住隻蝴蝶。架車由羅湖去到樟木頭,要成三十蚊一個人呀,響大陸撘車黎講都算幾貴,可能距離好遠卦,差唔多粒幾鐘先到,雖然大陸d馬路好恐佈,d車衝直撞,但實在太悶太肚餓喇,所以都係忍唔住訓著左。

訓醒之後已經到達樟木頭喇,哇,好野,終於有得食野喇,不過...又係去飲茶。我以前曾經好鐘意去飲茶架,覺得樣樣野都好食,但換完骨髓之後,街出面既野都唔食得,媽咪知我鐘意飲茶,所以就將公仔d點心買晒番黎,蝦腸、牛肉腸、燒賣、蝦餃、糯米龜,結果我由好鐘意食,變成食厭左,雖然話茶樓果d好食過公仔點心,但其實又係果d野、又係果個樣...

食完野我地就要再行去撘多一程車,行去車站途中,有好多阻攔呀,有唔只一個人問過我地拎錢喇,又有人追住我地,要我地買木瓜,十蚊三個呀...哈,不過可惜我都唔鐘意食木瓜既。等左一陣就有車喇,今次係坐大架既旅遊巴,好多香港人一齊坐架,當堂放心d。

過左一兩個字左右,終於到左我地既目的地,康湖山莊喇,好緊張好緊張呀,唔知間屋有幾大既呢?但可能只係一個單位...都係唔好抱咁大期望,行呀行,終於到喇,哇...原來係一幢三層既屋黎架,一入到屋,我梗係勁話「好正」「好靚」喇,嘻,因為我咁講梁生梁太會好開心嘛,原來除左門口一個小花園之外,後面都有一個大花園架,正,如果我有間咁既屋響香港就發喇,一定搵晒吉場d朋友黎後園度bbq,諗下都開心呀,二樓就有三間房,兩間單人房,一間雙人套房,三樓成層都係主人房,哇...淨係個主人房都大過我個廳呀...勁呀...


媽咪話呢張叫貴妃椅喎

參觀完畢我就勁叫媽咪陪我去華潤,因為近日好想食紅豆雪條,但樓下間惠康又執鬼左,搵左好耐都無,希望呢度間超級市場有喇。哇...呢間華潤有好多香港牌子既野食賣呀,仲要平好多喎,嘻,我買左一包好大既旺旺、麥提莎、m&m...不過可惜喇,係無雀巢果隻紅豆樂既...得阿波羅,都食住先喇,我地仲買左炭燒咖啡雪條,諗住今晚番去一齊慢慢歎,正呀,肥死都扺。

買完野食番去,係時候搵d野搞下,嘻,梁生間屋有幾架單車架,我幾年前學踩過一次,總算係踩得郁架單車,係唔識轉彎、唔識避人、唔識上斜、唔識落斜、唔識慢駛之外,要我死衝都無乜問題既,不過...過左幾年,唔知而家踩唔踩到呢,經過半個鐘左右,呀...結果係最多踩到大約十米,哈,都好過少少都踩唔到既...(滴汗)

玩到我一身汗咪走番入屋睇電視嚕,哇...勁舒服呀,我訓響果張單人梳化上面,好似俾人抱住咁,一邊飲汽水、食朱古力,一邊睇電視,哈哈,響香港根本無呢d機會,因為...我響屋企永遠都只會坐響部電腦前面,偶然有機會咁樣歎下都真係幾happy

歎到七點左右,我地就慢慢行去食飯,沿途有好多賣野既攤檔呀,可惜都好似唔多適合我既,行下睇下咁,行左半個鐘就到酒樓喇,但酒樓前面有一條大馬路,條馬路比起香港果d更加闊,d車橫衝直撞,即使我地依燈號都無用,因為呢邊既車行完,又到果邊既車行,d司機完全唔會讓你,只會踩盡油門,不停響安,車就響身邊轉彎,差一點點就碌扁隻腳喇,過到最後一段馬路,我地唯有趁剛剛轉燈的交接其間衝過馬路,呼...真係好驚險呀。

原本諗住食片皮鴨架,但呢間酒樓竟然無喎,唉...即時無晒胃口,最後好艱難咁揀到一個紅燒豆腐,其實揀飲擇食都唔係我想架,有時真係美食當前都食唔落,就淨係想食自己鐘意食既野,我都想食番多d野,起碼行街都有力嘛。

食完野九點幾,我地沖沖撘車番去睇酒是故鄉醇,哈,番到黎大陸都離不開追劇集,我地四個攤晒響梳化上面睇,睇完之後都十點幾嚕,梁生梁太話想去腳底按摩喎,哇...咪搞我,我以前試過一次喇,所以今次都係堅決拒絕,話晒身體髮膚,受諸父母嘛,點可以俾人咁催殘自己架,所以索性同媽咪兩個留低響度,早d沖涼早d訓喇。人生路不熟,梗係捉媽咪陪我沖涼喇,廁所入面有一塊好大既鏡,沖完涼既時候,無意中望到鏡入面無著衫既自己,哇...好肉酸呀,直情見到d肋骨,好似厭食症相入面果d人咁呀,媽咪成日話我瘦,我都唔覺得,而家我先知我真係瘦得咁可怕,唉...我都好想食多d呀...


睇下呢兩支汽水有乜特別

我同媽咪一齊訓雙人房,不過成晚都有隻細蚊錫我,搞到我痕鬼醒左,半夜媽咪唔知響邊搬左個風扇黎,有dd風就無再俾蚊煩住嚕,嘻。

終於到喇...::::::睇下::::::
主人房大到蕩失路::::::睇下::::::

北上消費

::::::星期四::::::十二月六日::::::

媽咪話朝早七點會跟梁生梁太去晨運,咁鬼早,我仲發緊夢呀,唔好預我,所以醒既時候得番我一個響張床度,尋晚臨訓無拉窗簾,一起身就見到有個男人響對面間屋個外牆度整野,哇,死喇,咁我個訓覺樣咪俾人睇到晒?即時響被竇度飛過去閂窗簾,然後再上番床典多一陣,然後就起身嚕。係喎,無帶牙刷黎喎,媽咪話...佢頭先都係用手指刷牙咋,哇,咁勁既,我就唔得喇,所以問梁生拎左支新牙刷,但點解支大陸版既黑人牙膏,d牙膏會係黃色既...響滿心懷疑不安底下,我都係求求其其刷兩下就算喇,容乜易中毒呀。換好衫,畫好樣,可以去食早餐喇,三個大人問我想食中式定西式,哈,梗係西式喇,尋日都飲過茶嚕,今日試下第二樣嘛。於是我地就行去山莊入面既西餐廳食早餐,我要左個煎雙蛋加麥皮,食左兩隻蛋都已經唔想食嚕。

食完野之後,梁生梁太好有興致咁想周圍行下,原來山莊擁有一個荔枝山響旁邊,收成既時候,每個住戶都會有兩蘿荔枝,正呀,除左西瓜之外,我最鐘意食荔枝架,嘻。之後我地去睇左幾個示範單位,d裝修好靚呀,我最鐘意有個複式單位連天台,哇...響天台燒下野食,又或者日落既時候坐響度吹吹風,都不知幾鬼過癮,可惜我地未中過六合彩喇。其實我都無乜心機行,因為實在好凍呀,尋晚番風,得十五度咋,今日又無太陽喎,我淨係想快d番去訓響張梳化度抖下咋。回去途中,見到有一家人既花園特別大,再睇真,哇...果個人起左個大泳池響花園呀,仲要勁深勁深,差唔多有兩層樓咁深呀,足夠跳水呢,真係厲害呀,有錢係唔同d。

番到屋之後,見無乜野做,梁生就搵陳慧琳d卡拉ok碟出黎俾我唱喎,雖然話音響設備都幾正,但一條友響度唱總係怪怪地咁,而且k房都係黑蚊蚊架嘛,而家咁鬼光,好唔慣呀...哈,所以唱左幾首就無心機唱嚕,到媽咪出動喇...佢就梗係唔係唱陳慧琳喇,佢唱粵曲呀,呵欠,愈聽愈想訓覺,之後梁太都一齊唱,救命呀,好嘈呀,下次都係自己拎d卡拉ok碟黎,大人就打麻雀,小朋友就唱k,嘻,幾溫馨。其實我同佢地三個上黎既目的真係有d唔同,佢地就諗住上黎悠閒悠閒,我就諗住上黎搏老命shopping,嘿嘿,都係同埋哥哥一齊好d,起碼有佢陪住我去shopping嘛。

唱到兩點幾,佢地終於罷休喇,媽咪約左哥哥五點鐘響東門等,都係時候走嚕,我地撘車出去樟木頭,再撘番果架三十蚊車去羅湖,梁太話想買番個假既名牌手袋,叫我帶佢去買喎,哈,於是我就帶左佢去羅湖商業城嚕,梁太數口真係精,百八蚊可以講價講到八十蚊,我都要好好學習一下先得。之後梁生梁太就過關番香港,而我地就撘巴士去東門同哥哥匯合。我發現左有一個好奇怪既現像,唔知點解有多人望住我對腳,媽咪話係因為兩隻腳太瘦喎,膝頭大過脾,話口未完,又有一個女仔行過黎第一眼就係望住我對腳,仲眼都唔眨添,下?唔係咁嚴重呀。嘻,今次有咩收獲呢,我買左三對襪、一條西褲同一對拖鞋,三對襪之中只有一對係買俾自己既,其他果兩對係打算送俾朋友,點解送襪咁奇怪?因為可以俾佢響屋企著,唔洗踩住冷冰冰既地板囉,好凍既時候你試下著番對襪丫,真係暖好多架,而且送襪又唔同送頸巾、手襪咁普通呢,仲有對毛毛拖鞋,我第一眼見到就鐘意左喇,係simson個爸爸黎架,個樣好鬼得意,嘻,所以決定買黎送俾念慈姑娘做生日禮物,對鞋咁cute,起碼可以搏念慈姑娘一笑嘛。呀哥仲威,佢買左一有半個人咁高既forever friend熊熊,諗住送俾女朋友做生日禮物喎,原本佢諗住買果隻仲大呀,成個人咁高,但...香港地寸金尺土,我諗屋企唔係幾千尺,都幾難放得到,咁q大隻送俾女朋友?你似同佢有仇多過似愛佢喎...俾佢訓左張床,你女朋友咪要訓地下?所以響我同媽咪極力阻止下,哥哥就買左隻細一半既熊熊喇(但都好大隻)


連埋個盒,咬住兩個冬甩

大家都有收獲,開開心心撘車番羅湖食飯,我地去酒樓開左位,放低d戰利品先,然後我就拉左哥哥去買野...嘿嘿...nathya響羅湖買左個假prada銀包,好靚架,入面d格格又實用,又可以放相喎,所以我都想買番個,但當然唔係恨佢係prada喇,最好佢無pradalogo響度,廢事俾人以為我想充大頭。於是我就去果d賣手袋既舖頭,逐間問有無prada銀包,咦...原來佢地將d冒明牌冒到一模一樣既產品,收得好密架,有d舖頭淨係俾d相我睇咋。終於搵到一間有果個款既銀包喇,我話想買既時候,個職員即刻反轉其中一張梳化椅,哇哇...原來佢地響張梳化底整左條拉鏈,入面有好多好多銀包,一盒盒咁放晒響度架,哇...第一次見識咋。nathya買六十蚊,我仲諗住可以買五十蚊,番到香港有得威下添,但個sell屎企硬七十蚊喎,我咪話我個friend買六十蚊,如果我買得貴過佢會俾佢笑囉,哈,最後六十蚊成交!


我係唔係好索呢

番到酒樓,哥哥又拉左媽咪去睇頸巾,得番我一個響度,片皮鴨到黎喇,佢地仲未番黎,個師父響我隔離片隻鴨,個個都望住呢面,但我張台又得我一個,搞到好似我一個人食晒隻片皮鴨咁,哎呀...仲未番黎,為左唔好歎凍晒隻鴨,嘻,所以我唔客氣喇,一條友響度起勢咁食,食左幾件之後媽咪同哥哥先捨得番黎,今次食片皮鴨有d無癮呢,可能因為太少人一齊食,無人爭就唔馨香卦,得我地三個,我淨係食片皮鴨都食到飽晒嚕,哈,不過可以食自己鐘意食既野食到飽,果種感覺真係好幸福。 九點幾我地就過關番香港嚕,打俾爸爸,爸爸話同呀華兩個響倉度執緊野,可以叫呀華黎接我地番屋企喎,嘻,好野,於是我地去到九龍塘,就有專車送我地番去喇,唔洗拎住一袋二袋撘地鐵、再轉小巴,嘻。

 

展翅義工課程 round one

::::::星期六::::::十二月八日::::::

今日超級凍呀,諗住扮下純情著番條裙仔出街架嘛,但真係好唔掂,出面仲落晒雨咁,我把叮噹蔗又留左響中心,成個月都唔記得去拎番,無所謂喇,我撘1A直接出到尖沙咀,隔離就係文化中心嚕,最多淋兩下,唔會濕晒既,而且我件褸有帽架嘛,可以蔗住個頭,一於咁話喇。今日去文化中心做乜?上堂囉,展翅有個義工課程,總共三堂,分三個星期六上,今堂係第一堂,有d緊張添,唔知班展翅大使係咩人嘛,又驚人地覺得我化粧係壞女仔(又要驚又要化),咁唔化d面色真係好似有病嘛...(咁又真係有病嘛)呀明同呀dick都係今期展翅大使黎架,但呀dick約左同學做功課,呀明又要放工先黎,唉...即係要一個人番去喇,死喇,好驚呀,個個都唔識,唔知到時會唔會戇戇居居咁一條友坐響度呢...

我預左一個鐘時間撘車,平日就好充足既,但今日係星期六,出到太子已經開始大塞車喇,基本上係成個彌敦道都塞死晒,兩點半開始上堂,睇住隻錶,已經撘三喇,架車仲係塞死晒,睇情況我要三點先到到,於是我索性響旺角落車,走去撘地鐵,去到尖沙咀都撘七嚕,哎呀...我呢世女最鬼怕遲到,唯有跑過去文化中心喇,但原來距離地鐵站出口都幾遠架,加上又落雨,好鬼狼狽呀,幾經辛苦我先跑到,唉...身體差,搞到不停喘氣,上到去仲要行過一條長長既走廊,雖然個心好急,但都唯有慢慢行,因為我仲喘緊氣,而且再跑落去我驚我會暈低。

呼呼呼...課室原來響走廊盡頭,終於到喇,入到去首先要簽到,然後貼自己個全名響件衫到,真係有少少唔慣俾人叫全名...然後我咪求其搵個位坐低囉,咦?我發現個個都同自己隔離果個勁好傾喎,無理由架,上次鑽石山展翅迎新日之後,今次最多係第二次見面,無理由咁friend架,唔通...我入錯課室,我懷疑左一陣之後,先醒起,頭先簽到果張紙上面有我個名架喎,哈,所以一定無入錯喇。開始上堂喇,個miss話要分組,呢個情況下,多數d人都係搵晒坐自己隔離果班一組,我隔離個男仔又好nice咁叫我同佢地一組,但係...原來佢地個組全部都係男仔黎架,哈,好驚喎,然後我望到不遠處有個女仔向我揮手,叫我過去同佢地一組喎,嘻,我梗係飛過去喇,真係好彩,有人幫我解圍。

今堂都係玩下遊戲,又講下d定義咁嚕,唉...真係可惜,迎新日d靚仔今日都無黎,仲有果個好似男仔既超級有型女仔都無番呀......乏味。有一part係玩角色扮演,其實我好想玩架,不過響三十幾個人面前自薦又好似好白痴喎,結果我都係無主動舉手話想玩,怕人地覺得我想搏出位嘛,唉...我幾時變得咁細膽既呢。呀明差唔多遲左一個鐘先到呀,哈,放學果時我好自然係等埋呀明一齊走喇,展翅迎新日同我地一組既vernon,竟然走過黎問我「你老公仔呢?」,下?唔係喇fa,嘿嘿,佢以為我同呀明有路呀,咁我同佢識左成年,而且我佢又識我爸爸喎,自然係friend d架喇,可能我地成日衰婆前、衰佬後咁,引起人地誤會卦,哈。

五點半放學,我地成班同學仔決定去麥記吹水,真係好,我連早餐都未食呀,不過今日星期六,成個麥記都係人,我地唯有分幾張台咁坐嚕,嘿,唔知點解我同呀明被編排坐左去張雙人台度,仲話我地兩個撐台腳喎,哈哈,講多無謂,愈描愈黑。其實呢期d展翅大使都幾好玩,不過我都係懷念上年多d,嘻,上年有呀明、呀dickkarrytony、呀翠,佢地個個都好善良架,仲記得果時我地差唔多一個星期見一次,約出黎吹水、玩囉,嘻,我勁鐘意佢地呀,可能就係太過偏心,所以硬係覺得今次無左佢地無咁正。今年d女仔個個都唔出聲既,一係就古古怪怪,男仔就個個世界仔,好似出黎玩慣咁,我呢d咁老土既女仔,好似好難入到佢地個世界咁,不過初初識感覺陌生係正常既,可能遲d又會發現到一d可愛既朋友呢。

麥記實在太多人喇,於是我地唯有離開麥記,去左海運一邊行一邊傾計,又計劃定月尾搞番次燒野食,哈,佢地好多個我都係第一次見架咋,估唔到第一次見既朋友,已經好似好friend咁約定晒去邊度玩,好熱情,但又好似好假...嘿嘿,不過咁都好既,多d機會相處,自然快d熟絡。我地行下吹下水咁,就差唔多七點嚕,有個女仔話想去食野,哈,頭先我響麥記食飽左喇喎,於是同呀明走先嚕,嘻,快d到下個星期六就好喇。

仲未笑完喎<---->呀 咩 昔 日 發 傻<---->開心繼續笑