241個半月大的我

::::::星期五::::::十一月三十日:::::: 好緊張好緊張呀，今朝要九點半就起身喇，因為我同nathya...約左攝影師影相呀，哇哇，中五之後都無影過嚕，果日無端端同nathya講起，大家都心血來潮，於是就約好左今日去影喇。其實我想去史勞比公園架，因為果度夠cute、夠colorful嘛，但nathya就唔係咁想，無所謂喇，橫掂係影人唔係影景，所以最後決定去金鐘港麗同香格里拉酒店，我之前影過覺得呢度幾好，又唔會太多人。 刷牙、洗面、換衫、畫樣，呀！眼肚下面原本已經有一點半粒米咁大既紅點，尋晚再爆多一粒響原本果粒下面，大細一樣，搞到眼肚下面多左個＝符號，好彩！世界上有一種偉大發明叫化粧！哈哈，一野就變走左喇，呵，呢個世界無醜人架喇。我仲要執多一套衫去換，其實都未諗到帶咩衫好，媽咪就提議一套著裙一套著褲，都好既，兩個感覺，於是我就執左條牛仔褲同恤衫，而自己就著住裙去。約左nathya十一點響金鐘等，因為掛住揀衫，所以成十點半先落到去巴士站，好彩都係遲左一個字咋。之後我地就行過去太古廣場麥記食野，哇...我地好似揀錯時間，剛剛撞著人地放lunch，好多人呀，好彩我地都好快搵到張台，nathya叫左個雞翼餐，我就叫左個開心樂園餐，嘻，我想換snoopy嘛，醫生同情人都幾靚喎，咦，但係我憎醫生！尋晚玩到我咁透，所以我都係揀左情人，嘻，好靚架，攬住個心心。我同nathya掛住講，結果我同佢個餐都係食左少少咋，加上我又厭食呢，好似有ｄ浪費咁添，早知兩份叫一個餐算喇。 見咁多人，我地都唔好意思坐得耐，於是索性早ｄ上去酒店果度等攝影師黎。我地入化粧間互相執正ｄ眼耳口鼻，之後攝影師就打俾我話佢黎左嚕，嘻，佢叫傑飛呀，我中五既時候就係搵佢影架喇，見佢都影得幾好，所以今次又搵番佢囉，哇...我反轉左間房先搵得番佢張卡片呀，嘻，好彩咋，搵其他人影無信心嘛，差唔多三年無見過傑飛喇，佢以前係長頭髮，好浪子feel架，而家變左短髮型佬，cool！嘻，依然係咁多野講，咁搞笑，都好既，起碼影相果陣無咁緊張嘛，嘻，開始影相喇，我影先，哇哇，好緊張呀，笑到梗左，我想影著裙既相多ｄ，所以影左大半筒呀，傑飛真係好正，佢會成日不停同我傾計，分散我注意，等我自然ｄ，無咁緊張，每次擺pose，佢都會自己擺一次先，叫我學佢咁擺，嘻，見到佢擺ｄ咁女仔既pose真係幾鬼搞笑。之後到nathya去影嚕，嘻，我咪付責響旁邊影下佢地ｄ蝦碌囉，嘻，有一張仲要爬上去個窗邊，嘿嘿，頭先我地放ｄ野響窗邊都俾實蕉鬧呀，哈哈，搞到nathya影果陣好驚，好彩無人鬧，不過就好多人行過望住囉...之後佢地去左遠ｄ既地方影，我就一個人企響度睇住ｄ袋嚕，番黎果陣nathya話頭先撞到個無線既小女藝員，攬住一個老餅既男人，一見到傑飛拎住個相機，即刻以為係佢係記者，然後彈到遠一遠，哈，白痴，之後傑飛就話「唔洗驚，我唔係影你。」，咦？唔知佢地黎酒店做咩呢下。 話咁快我地就影完上半場，我地就走入洗手間換衫，嘻，恤衫、牛仔褲、打呔，重點所在就係...尖頭鞋！哈哈，今日終於大派用場喇，平時著黎行街，對腳會好痛架，今次著黎影一陣相，就唔怕喇，嘻，好靚呀，著左之後覺得自己好似大個女左咁，哈哈，行出洗手間，一路行一路「咯咯」聲，好鬼頂癮，忽然覺得自己好似miss。傑飛真係好呀，任由我地慢慢換衫，我地出到黎響度補粧佢都無話催我地，yeah！我地繼續扮晒大明星咁響酒店入面影相，嘻，影得多左就自然ｄ喇，之後我地去左馬路邊影呀，有張係我坐響個路邊架，哇，車來車往，幾驚俾架車碌扁隻腳呀，四點幾左右我地就影完嚕，哇...足足搞左四個幾鐘呀，傑飛做左成個下午先賺到我地錢咋...辛苦晒佢喇。 同中五比較下 曬相既工場響尖沙咀呀，所以我地一齊撘車過番尖咀，傑飛就去曬相，而我同nathya就去茶仙坊食野，哇...入面熱到嘔呀，真係想除晒ｄ衫，撞鬼，我仲著左兩件底衫...好熱...坐左好耐先舒服ｄ，哇，一坐低我就忍唔住靜靜雞換鞋喇，果對尖頭鞋係好鬼靚，但真係唔慣，我都係鐘意著平底鞋多，哈，梗係喇，我成日跑跑跳跳，著住果對尖頭鞋容乜易ｐｋ架。 我男朋友呀 等呀等，等到五點半，傑飛終於黎到喇，好心急睇相呀，唔知會唔會影到好豬丙呢，佢話呢度迫，不如去美麗華下面個美食廣場度先睇相，好，於是我地就飛過去果邊，哇，好緊張呀，睇喇睇喇，咦...nathya果ｄ好靚呀，影得好清純呀，大頭果ｄ都影得好靚呀，羨慕呢，自己果ｄ我都幾滿意，哈。 姊妹 其實特登影輯相唔係話發姣，只係抱住玩下玩下既心態，同埋仲有可以比較下而家都以前既我嘛，結果梗係...愈大愈正喇，哈哈，原來我已經有241個半月大喇。(好多人以為241個半月即係20歲，其實...一歲之前果十二個月我都已經生存緊架喇，所以...241個半月即係...咁多歲囉，呵，自己計喇。) 想睇多ｄ相就按我喇！ 俾傑飛反偷拍::::::睇下::::::

天是藍的風正吹著

::::::星期六::::::十二月一日:::::: 今日原本係約左四哥去紅館睇show架，睇咩show？唔知架，不過四哥話佢個朋友有份表演，所以想去捧下場，嘻，去睇男仔？梗係好喇，但前幾日四哥又話今日要番工去唔到喎，就話俾左兩張飛我，叫我同朋友去，其實主要係去睇四哥個朋友，佢唔去都無乜意思喇，都諗住唔去架喇，但，當張飛到手時，咦？由林以諾牧師主講...林以諾...咪即係講耶穌講到好似棟篤笑果個，咦？佢仲成日上電視架喎，咦...忽然又好有興趣去睇喎，嘻，於是就約左呀dick去睇喇。 我以前就係住呢座喇 我細細個係住秀茂坪架，果度有一檔碗仔翅係我覺得最好食既，差唔多七年無食過嚕，今日我特登約埋呀dick一齊去食，唔知果檔野仲響唔響度呢。經過附近既茶餐廳，見到碗仔翅個老闆響入面同人打緊牙較，然後行過去佢檔口，咦？無翅既？原來佢仲未開檔呀，老闆見有生意，就拿拿臨走過黎開檔，嘻，等一陣喇無所謂，真係好想食嘛，見到老闆開始煲翅，客人都陸陸續續咁黎到等買野，嘻，我地係第一個黎到，頭兩碗梗係我地架喇，正呀...唔...同我回憶中一樣咁好食，食晒一碗剛剛夠飽，嘻，食完係時候要撘車去紅磡嚕，好好彩地，有一架車係直接去到紅館架，我地響總站等車時，排我地後面果個男人無端端問我地係唔係去睇佈道會，呀呀呀，哈，係呀係呀，之後我同佢就傾起上黎喇，哈，又會咁橋既。 總站撘到總站呀，撘左成粒鐘，車上面有幾班後生仔女，講野勁嘈，聽呀dick講佢地都係去佈道會架，哇...個個都係去果度，咁咪即係好多人...去到見到入場條龍係見唔到龍尾既，哈，仲要係不設劃位，唔知會唔會無位坐呢，好彩...排隊入到去都係坐山腰，都可以見到台上面既人好似lego咁大既。 三點幾開場，一開始係有隊band響台上面一邊彈結他，一邊唱聖詩，ｄ聖詩好有時代感，又夠rock，一ｄ都唔似得以前聽果ｄ，又慢又悶，周圍既人個個都跟住唱，哇...原來佢地個個都識唱架，哈，即刻覺得自己好似係偷偷潛入黎既異教徒咁，其實有幾首都好好聽，好易上口架，尤其係有一首叫「全因為你」，唔知點解我聽到想喊呀，哈，係唔係好恐佈呢，可能ｄ詩歌入面係有魔法架，搞到人鬼咁感動。唱完一輪詩歌之後，就到話劇喇，即係四哥個朋友有份演出既項目，可能係我蠢喇，佢地做左成個鐘我都唔係好明佢想表遠ｄ乜，不過有ｄ位係幾搞笑，例如有人扮twins同方力申，嘿嘿，雖然無側手翻，但見佢地孖公仔既衣著都已經覺得好鬼正。 戲肉喇戲肉喇，終於到林以諾出場喇，佢講左成個鐘，哈，我真係唔多覺佢講過耶穌，淨係覺得佢響度講棟篤笑咁咋，好正呀佢...好鬼崇拜佢呀，唔知佢番邊間教會既呢...之後佢話由今日起信耶穌既就行黎台前面，我...其實係想行近ｄ睇真林牧師個樣架咋，點知一落到去就俾個教徒+工作人員捉住我，問我ｄ資料，撞鬼嚕，唔通我話佢知我行落黎唔係想信耶穌，係想八掛下咩，唯有局住俾左ｄ資料佢，佢話之後會聯絡我，踢我入會...oh my god，我係唔係好豬兜呀？唉... 散場既時候，響紅館出面見到林牧師，呀...本來好想走過去架，但有個女仔一直同緊佢講野，我無理由無端端走過去架嘛，咦？但走過去做乜呢？我想識佢囉！好！一於走過去同佢講「我想識你呀。」，果一刻我真係有勇氣咁同佢講架，但可惜果個女仔一直同林牧師講野，而林牧師就一邊行一邊聽，然後...愈走愈遠，結果我都係無講到，但無左呢個機會係好定唔好呢，可能我講左之後佢會當我係傻婆呢，哈，係喎，咁算喇，嗚，唯有咁安慰自己喇，其實...可以識到佢，俾人當係傻婆一次又有咩所謂喎。 夜晚我約左響民安隊識既kenji呀，佢同佢ｄ中學同學響銅鑼灣唱Ｋ，我就過去搵佢唔知做乜，係囉，去到都唔知做乜，咁人地約我咪出囉，哈，好似有ｄ俾人搵笨既感覺，不過講開好邪，我以前既男朋友同kenji係同班同學，咁我男朋友有時會帶我同佢ｄ同學一齊出街，所以kenji既同學有半班左右我都見過，其中一個女仔仲係我讀切雞既同學添呀，呢個世界真係細。原來今日呀ken都有去，嘻，我同呀ken比較熟，因為我地平時響icq都有傾計，佢個樣好得意架，唔出聲既時候個樣好陰森，所以...我同佢改左一個好難聽既花名...強姦犯，嘻。kenjiｄ同學我都唔熟，我唱歌咁難聽，梗係唔敢唱喇，唯有齋坐囉，好彩kenji同呀ken都有同我傾計，唔係實悶死呀。救命呀，每次呀ken一唱情歌，就會...情深款款咁望住某位男同學黎唱，哇，搞基呀，哈哈哈，笑死我喇，呀ken佢又要好正經，唔笑咁既樣喎，仲要起勢咁放電呀，我響旁邊都差ｄ誤中流彈，哈哈，真係笑到我反肚，仲有ｄ毛管動添呀。 唱完ｋ九點幾，我地就去花園餐廳食野，經過間vcd舖，我見到有胡桃夾仔既vcd呀，嘻，仲要係賣十蚊咋，梗係即刻買左佢喇。我地六個人，得我一個女仔，佢地五個都係叫牛...扒...help，我係唔食得牛扒架，但据扒多數都係食牛扒架喇，唉...不過唔緊要喇，頭先我響唱ｋ果度，飲左一杯雜賓同朱古力奶，已經飽到上頭頂，所以我無叫野食呀，但見到呀kenｄ薯條好似好正咁喎，於是我就叉左一條食喇，放左入口...先記得...ｄ薯條好似係俾塊牛扒責住架喎...死...我即刻搶左呀ken張餐紙巾，吐左條薯條出黎，再飲一大啖水，衝入廁所吐番啖水出黎，然後再不停漱口，仲有ｄ反胃添，可能潛意識我係唔可以食牛，所以當我一掂到牛我就反胃...死喇，有ｄ失禮添，無端端走左去廁所，出番黎我就解釋番嚕，唉...好尷尬好尷尬。 食完野kenji話約左舅父響九龍城唱ｋ，呀ken佢地個個都話去，咁我都去喇，點知kenji話唔想我去喎，咦...佢話佢ｄ舅父個個食煙，驚對我唔係咁好...唉...咁人地咁講到，我都無理由仲要話去既...唯有自己撘車走先嚕。十點幾，個肚而家開始餓喇，一條友，響銅鑼灣可以食乜呢，好想食七十一既茶葉蛋呀，於是走去七十一睇下有無嚕，哇...由門口到入面，全部都係ｄ著到懶in、化晒厚粧既青年男女，仲要係個個都擔住飛煙，救命呀，好驚呀，入到去見到無得賣都拿拿臨走喇，容乜易俾佢地ｄ煙頭燒到架，唉...無得食，唯有買番本精神食糧喇，amy今期係千嬅封面呀，好喇，買上車睇。 等左成個月，終於有機會多謝一個朋友喇(大家都知我日記通常都係隔成個月先寫到架喇...)，今日，我收到一個公文袋，一打開，裡面係一對手襪，好靚呀，原來係我既網友雪糕蛋糕寄俾我架，睇完封信我先知，對手襪係佢親手織架，果一刻我都係好感動好感動，點解你會對我咁好？點解你會咁錫我？點解你會花時間織對手襪俾我？多謝你，真係好多謝你，嘻，手襪上面仲縫左一ｄ字，左手縫住「天是藍的風正吹著」，右手縫住「我的心情good」，嘻，多謝你，我會好好保存，呢份係我收到最有意思既一份禮物，重來都唔會有人為我親手整ｄ乜野，你係第一個，多謝你。 偷偷錄音::::::聽下::::::