九 月 十 一 日
好累呀~
早上七點幾先返屋企,拿拿臨沖涼,然後閃上床訓覺,訓到九點社康姑娘黎洗傷口,救命 呀,好死眼訓。昨天剛剛洗晒成部電腦,所以一見到部電腦我就忍唔住要黐實佢,幫佢裝 番晒d野,死喇死喇,幾驚呀,我裝唔到「快碼」呀,我淨係識用「快碼」打字,無快碼 就等於整唔到網頁,而我呢個英文白痴就更加唔洗玩icq 喇,好彩左整右整,終於整番好 ,十一點幾再去再訓過,訓到兩點幾俾isiah 打黎催我交關於「展翅」果篇文,但實在太 眼訓,所以無理,訓到四點幾先至識回魂,大大鑊!因為....一、未寫昨天的日記,二、 未寫「展翅」果篇文,三、陣間五點幾要出門口去表演織草蜢,但我半年無織過,所以要 練下,好亂呀,唔知做邊樣先,咁唯有分輕重做喇。衝入廁所拿左一棵草,再坐係個廳度 慢慢開草,計時,織左一隻三分幾鐘,好喇,記得點織就得喇,唔鬼練喇。再去寫「展翅 」果篇文,死喇....太耐無寫字,一寫手都震埋,唔理喇,用電腦打喇,哈,幾鬼好文采 架,不過係作得白痴左d,有機會拿出黎大家笑下。其實昨晚到現在都沒食過野,朝早番 屋企餓到四點幾,終於一邊寫日記,一邊食朱古力月餅,哇,正呀~肥死都扺呀。五點幾 撘華哥哥架車經馬鞍山、大埔再去到目的地,元朗朗晴居做表演,媽咪做織繩,姑姐做整 月餅,華哥哥做糯米滋,我就做草蜢。就咁用一條米幾長的草,就可以織到一隻草蜢喇, 係咪叻呢,不過得我一個做,又勁多人排隊,搞到OT左,臨尾真係變撒亞羊咁呀,大約兩 分鐘就一隻喇。
昨晚玩得太多,兩隻腳好酸呀,剛剛織草蜢又織到抽筋咁滯,唉....人老喇,就黎骨頭打 鼓喇~呀dick,快d幫我鍊骨喇。
慘喇,昨晚通左頂,唔單止屋企人唔鐘意,就連家裡的工人都唔睬,嗚~搞到成朝無野食 。其實我覺得自己仲細,所以好想成日玩,我有病到而家都半年喇,我亦都屈左係屋企半 年喇,係呢個月我先可以做番以前的自己,可以出去同朋友開開心心玩果個先係真正的我 呀。點解成日要話病好先可以去玩喎?不要騙我了,大家都唔知我個病幾時會好,亦都唔 知會唔會等到呢日,我淨係想把握現在,我不要再浪費時間,我身体有病,但我心靈無病 ,我要似番一個十七歲的女仔咁去玩。
好久之前網友做給我的,唔知道真係以為我自戀狂---->


九 月 十 二 日
I Love You All
哎呀哎呀,又好早就醒左喇,好眼訓呀。八點幾起身,就四圍打俾人約約約今晚去玩玩玩 ,今晚去元朗大棠燒野野味呀。原本今日睇中醫架,但無理由拎住一大包中藥去燒野食架 ,所以又推話聽日先睇。五點幾,撘哥哥的順風車出到銅鑼灣,順便去探page one做野的 nathya。我約左展大的朋友八點九係元朗蘿白m的巴士站等,但又約左susuky上佢上環的 屋企喎,死喇死喇,伯母仲專登整左上海餅餅俾我食,盛情難卻,唯有七點幾上到susuky 屋企,世伯伯母又熱情到死,搞到我鬼咁唔好意思,八點一食完即閃喇,但去到荃灣都八 點九喇,唉....生平最最最憎憎憎人地遲到,所以一向都好少遲到,一遲得多少少就會內 疚到想喊,今次仲....,我遲左半個鐘呀,風一樣的tony同人妖dick都無責怪我,真係好 有風度,而我又詐唔知唔知咁當自己無遲,勁賤。結果等下其他人、又買下野、又等下車 ,成十點幾先入到大棠,嗚~仲要封路,行上山果下真係幾係野架。雪梨一個人霸住個爐 等我地咁多個呀,真係辛苦晒你喇。大棠呢度勁熱鬧呀,個個爐都有人,成條馬路塞實晒 d車,好有中秋氣氛。
我唔燒得野食呀,所以成晚坐冷板,今晚又玩真心話,謝謝dick教識我睇d啤牌大細,哈 ,愚子可教也,但鋤大D呢個咁高深的課程,我都係學唔識。雪梨三點幾走左,得番三男 三女(今次我係女仔喇),一路曬月光,一路吹水,好溫馨呀。之後仲變態到玩滴蠟,佢地 個個女仔好鬼勁架,火又唔怕,蠟又唔怕,karry 仲用蠟整左個大約2cm的心心俾我,嗚 ~超感動呀。
我好想好想話俾你地知「我好鐘意你地呀!」,好假咩?但係我出自真心架,望住你地個 個玩得咁開心,我都好開心,我後日入院喇,唔知幾時再見到你地,我一直唔識喊,但今 日的回程途中,我傻傻瓜瓜的一個人係巴士度喊,今次我係真喊,係發自內心的難過,原 來對住一些自己心愛的東西,我終於動了真情,我太怕失去你們了,我怕跟住落黎的日子 我唔可以同你地去玩,你地會好快將我忘記,我怕我們的感情會被時間沖淡。我記得係識 你地果日,我怕你地當我怪人,所以刻意將我的病收藏起來,這是我的自卑,我實在不想 我永遠的名字都是「有病的人」,但到左今日,你地的關心話俾我知,我當日咁做係多餘 ,對不起。我好想緊緊咁攬住晒你地咁多個,我好想大聲同你地講「i love you all!」 。你們讓我歡喜讓我悲,原來,我係不經不覺間,同「友情」談戀愛了。


九 月 十 三 日
對著心愛的東西,我哭了
朝早八點幾先返到官塘,哇,好多著得好update的少男少女,又係剛剛番屋企,個個都係 一對黑眼圈咁,好邪呀。九點訓,十二點就起左身,又失眠喇,個心成日諗住要入院,好 唔捨得班朋友仔,嗚....橫掂今日都係last day,不如玩盡去,「扮」女仔喇,哈,我拎 住個假髮再睇右睇,都OK架,一於咁話喇,於是我就著住裙仔、戴住假髮、化左個淡粧, 扮番一個姣女咁扭扭下出門口喇,事後諗起都覺得難頂,都係做番男仔好。
尋晚通頂果六個人再多兩個,總共八個人呀,幾鬼多人呀,八點半係尖咀等。首先去左 city super食野,可惜無銅鑼灣果間的日式燒餅,之後我笨的選擇印度燒餅,唉....我諗 我整的餅一定比它好吃。九點幾出左文化中心長梯吹水,睇住個鐘愈黎愈夜,好唔開心, 好怕要同朋友分手,唉....之後我都笑唔出lu,到左十二點幾,真係要走喇,我又忍唔住 攬住karry 喊,嗚~~karry 見我喊,佢又喊,我真係好鐘意你地呀,你地個個都好錫呀咩,我又好鐘意karry ,所以我 當佢你係好好朋友,希望你都會鐘意我喇。
回家路上,我和同車的朋友說話不超五句,其一係太唔開心,其二係好累,番到屋企沖完 涼就訓著lu。


九 月 十 四 日
嘻~~無床唔洗入院
一覺訓到十二點幾,好耐未試過可以訓得咁安詳喇。因為個個人都揀中秋之後先入院,所 以今日無床,可以貪多一日去玩,嘻。好動感呀,一起身呀dick就打黎話去醫院探我,但 今日又無得入,所以不如去玩喇。嘻,一點幾去左銅鑼灣neway唱k,之後又去pageone 探 nathya。話時話,佢果度有一本好得意的書,叫「book of answer」,好似一本聖經的大 細,只要你係心裡面諗一個問題,再翻開其中一頁,那一頁就會有你的答案,其實即係類 似占卜的原理,無無聊聊時都幾好玩。之後行左去灣仔搵勞工處薛小姐拿展翅委任狀,五 點幾鐘我同dick兩條佬撘小輪過海,嘻,好玩呀。我同dick約好今晚再出黎玩,而我就番 左設雞學院探同學,原本話去食飯架,不過有兩個女同學都唔得,有D掃興呀,咁結果就 無食飯,走果陣竟然俾我見到「愛與誠」的poster,呀東好靚仔呀,我同細拳、raymand 三個人夾手夾腳撕左佢落黎,超大張呀,仲要係彌敦道鬧市喎,幾鬼多人望呀,哈哈,好 感動呀,其實每行過都好想撕,但一個人好似好瘀喎,呢個係我一直心願黎架,真係多 謝各位。我黐費迪車,車左我去愛民村搵呀dick。我地兩條佬買左d野食上去京士柏 公園吹水,我地行到最高最高,雖然都唔係好夠,但dick話已經係全何文田最高的山喇, 不過呢度都幾恐佈,成日有d唔知係咩的不明飛行物体走黎走去,忽然仲有一隻手板咁大 的黑老鼠kiss我隻腳,死喇,我仲著涼鞋,今次真係水洗都唔清呀。之後我地兩個訓左係 度睇星星,好鬼正呀,不過滿月所以星星唔多,吹水吹到十一點幾就走lu,落到愛民村, 竟然見到呀咩最鐘意玩的千鞦,哎呀,又忍唔住走左去玩,原來「初戀無限touch」 係係 呢度拍架,我一路打千鞦,一路回味緊套戲,真係好鬼正架。
番到屋企上緊網時,忽然有隻兩寸大的,媽咪就即刻尖叫,而我就好鎮定咁攬住媽咪 ,但走得好快,走左去電腦後面,我就扮無事咁繼續上網,之後又走番出黎,我 又走去攬住媽咪,等媽咪無咁驚,其實我唔係唔驚架,不過我知道如果我又驚,媽咪就會 更加驚,所以我就要好堅強咁去保護媽咪,嘻,懶勁咁。


九 月 十 五 日
謝謝我的好朋友
訓到十點幾,咦?醫院又無打電話黎,好野,又可以偷多一日去玩喇,去邊玩好呢?個個 都要番工、番學,哈,好彩呀dick仲未開學,我屈左佢黎官塘陪我。我約左佢係月華街巴 士總站等,我又懶叻諗住係屋企行去接佢喇,點知係自己地頭都蕩失路,真係瘀死呀。我 帶左dick哥哥去秀茂坪一日遊,好正呀,適逢中秋節做大戲,我地兩個就走左去睇,不過 其實係坐係度笑多d。好奇怪呀,個個行過都望住我,咩喎,我個頭yeah得滯嘛,你有你 望,我有我玩。原來dick哥哥打千鞦好叻架,可以打到九十度架,果然係身輕如燕,見到 佢打得咁高都無乜引,唉....之後呀dick又幫我鍊骨,我地兩個就咁坐係地下,好似練法 輪功咁,d差人行過仲睇到實一實,驚我地唔知做咩,哈哈哈。呀dick要番紅磡開會呀, 之後我地又約左十點幾去天台睇星星喎,我地兩丁友吹水吹天光,幾勁呀,其實真係好感 動有人陪我顛,我要入院喇,所以好多野都唔捨得,但朋友畢竟都不是自己,佢地都有自 己的生活,唔會因為我而有咩改變,所以朋友都唔會唔捨得我吧,好多謝dick陪我呀,呢 個幾星期第三次通頂 lu,雖然掛住兩個大眼袋,但總算不往此行。
望住個天愈黎愈光,我知道入院的時間亦愈近了,忽然諗到「夕陽無限好,只是近朝早。 」都幾應境同幾悲,但其實可能係「夕陽無限好,明天會更好。」呢,嘻嘻,呀咩又傻笑 了。


九 月 十 六 日
等我番黎呀
我入院喇,所以呀咩暫時唔會係度傻笑,今次入院係做化療,總共兩日,但化療的藥會影 響身体,可能會引致發燒,所以可能要入十幾日都唔定架,如果你掛住我,就打個電話俾 我喇,或者係留言板留言,你每一句說話都會支持係醫院的我努力撐下去。
包姐姐你記得要勤力發up風呀,回來我會偷偷檢查;bee 哥哥要作多一篇文送給我呀;明 哥哥要重視一下我們展大的朋友呀,不要每次聚會都不來;karry 等我出院一起去沙田史 勞比公園影相呀;呀如搬辨工室了嗎;四哥不要再怨天怨地了,把握機會吧;呀dick要幫 我鍊骨呀;你地記得黎探我呀。i love u all。

九 月 十 七 日
入院第一日
星期日,早上八點幾坐爸爸的綿羊仔入院,等到夜晚六點佢先開始落第一次藥,因為呢種 藥係高濃度,其中會影響眼睛,所以要keep住兩個鐘頭滴一次眼藥水,就算訓著左都要起 身滴,所以真係無覺好訓。今次我係住大房,好彩係住窗口位,所以電視就係我掌握之內 ,哈哈,不過慘在唔似細房有廁所有電話,人有三急一係去呀公廁所,一係要入細房借廁 所。debby 姐姐黎左探我呀,佢話我肥到塊面好似個波波咁,今日總算幾開心喇,不過成 日都無乜食過野,因為醫院的飯菜真係無得頂囉,一餓餓到夜晚,一次過食左個香甜熱狗 同脆辣雞腿包,今晚先開始落藥,食埋呢餐就有排挨喇。傾電話傾到十二點幾,呵欠~~早 抖。

 
 都幾好丫<--------------昔日發傻--------------->跟住點呢