九 月 四 日
 | ||
|
我想學懂「哭」 今朝早九點社康姑如黎左幫我洗傷口，好眼訓呀，之後再訓到中午十二點，都算係訓得最成功的一次喇 。約左呀明六點係樂富等，嗚～諗住吹水梗係要啤一啤喇，但呀明哥仔唔俾飲喎....最後嫘到飲jolly sendy 都算係幾俾面架喇。吹水地點係樂富山，行上山果陣真係以為自己會休克呀，呼～大半年了，這 個老地方風景依然咁靚，睇星一流。我地兩個傻左咁勁嗌勁笑，之後又訓係度睇星睇月光，真係free到 震呀，不過可能笑得太多個口太大，好似吞左隻蚊，原來呀咩唔係羊，係一隻青蛙，呱呱～我一個人食 晒成包大的蝦條，死喇....聽日實「呱～」唔出喇。走果陣勁驚呀，我竟然唔記得走果條路，搵到後又 發現黑得滯，所以行左另外一條，唉....真瘀皮呀，俾人知道我係一隻超怕黑的羊，噓～ 其實今次約出黎係好想可以釋放自己，這兩個月的失眠令我快瘋掉了，生活告訴我，我一定要堅強，開 心不開心都要笑，漸漸我臉上喪失了哭的那個功能，可以正常控制淚線竟然也變得侈奢。有笑有淚，做 人才有意思，不懂哭，只會笑，也只是行屍走肉。 「還含著笑裝開心 今宵的你可憐還可憫 目睹她遠去 他的腳印心中會永印」 聽到這首歌，我想我是應該哭吧，但心卻想「我係男仔黎架(？)，點可以喊架。」唉....看來我的抑鬱 失眠症唔係一朝一夕可以解開了。到底可以開解到我的人幾時會出現呢？你可以教我哭嗎？ | ||
| 九 月 五 日
| ||
|
覆診日 想訓又唔訓得，今朝一早要返醫院覆診呀，篤手指染血果陣又諗住「我係男仔，唔可以驚。」我諗我痴 左線，點解架呢，好彩去廁所之前無以為自己係男仔。醫生開左五粒安眠藥俾我，每粒得4mm直徑，醫生 仲話唔好食晒成粒，食一半好喇，但我怕一切落去成粒粉碎左，我諗一係每一次申條出黎掂一掂算喇 ，咁細粒都溶左一半lu。book左中秋之後入院，嗯，我唔怕辛苦，我係男仔黎架嘛，嗚嗚～又一排無得 摸下部電腦喇。之後去左啟德大笪地，哈，我一見到公仔就發顛喇，好想買晒返屋企，但媽咪係度，所 以我先無失控。買左一隻馬騮公仔，一返到屋企我就拎住隻馬騮扮金鷹，哈，扮佢個招牌動作囉，哥哥 話我似養金鷹果個呀伯，哈哈，笑左我成晚。 嗚～可愛的包姐姐竟然開唔到icq，呀咩當堂耳根清靜，哈哈，但少左包姐的「ao噢」聲，又好似若有所 失，祝包姐個icq早日回魂喇。 今日晒左星期日去沙灘ｄ相喇，好搞笑呀。
| ||
| 九 月 六 日
| ||
|
今日又去wet 約左一個好耐無見的老朋友去唱ｋ，我十一點幾就到左銅鑼灣喇，走左去搵消毒藥水，搵黎做咩？其實 ....講起上黎有ｄ尷尬，我硬係覺得neway ｄ咪好污糟，個個都拎住放入口，ｅ....咁我呢個下一手唱 的咪即係同前一個打邪輪？唔得，當我去左惠康搵消毒藥水時，有個男人好似念經咁講「俾兩蚊黎買洗 頭水....」下？唔係喇卦？我笑笑口話「你出去叫佢平兩蚊俾你囉。」，之後佢就彈開，繼續向走過的 人「化緣」。最後我終於買到一支滴露，哈哈，出街人地會唔會以為我想自殺呢，定係好似sammie咁走去抹 廁所呢。我同嘉凝唱lunch ｋ，我地兩個人竟然係坐上次十幾個人唱果種大房，難委上次我地咁鬼迫， 我發現「為難自己」真係超好聽呀。之後去左好鐘意果間世貿老麥，仲一定要係窗口位，望到成個維港， 真係free到震呀。我地去左太古城，uny 勁多烘麵包的靚野，我又忍唔到手....識到嘉凝真係好呀， 佢係做老翻睇場，所以cd vcd任，唉....勁想睇「人妖打排球」呀，但無人約我睇，唯有睇老翻喇。 嗚～我俾嘉凝姐昆呀，佢話606 可以出旺角，等我一支箭咁上左，兜左成粒鐘先知係去彩雲，仲凍到腳甲都發黑，人生路不 熟，落車果下真係有蕩失路感覺，最後又係死死地氣去撘地鐵，嗚～成八點先到旺角，各位久等了。今 晚係約左呀明、把聲低十六度的呀德和一個女仔，呀德就係我icq 的朋友仔，他竟然係呀明的舊同學，而那個女仔的細 路又係我icq 朋友喎，你話呢個世界幾細，你認住我個光頭樣喇，話唔定有一日又會見到我。呀咩真係 大鄉里呀，第一次去左熊之家咋，聽個名仲以為係食日本野，點知原來係漫畫店和網絡咖啡的合体，仲 有毛氈、vcd 機、層層疊等等供應，free到暈呀。 今日同兩個朋友有ｄ誤會，吵左，唉....我唔打算解釋，再講落去只會愈描愈黑，我的睇法就係佢地識左我咁耐，都明我係咩為 人，如果佢地真係咁睇我，即係一向覺得我衰格，咁大家扮friend落去都無意思，唉....雖然係咁講， 但都幾唔開心佢地咁誤會我。 哈，我今日發現我鐘意的男仔，除左先決條件係大口之外，仲要好搞笑、好玩得，究竟呢個人幾時出現 同我去玩拍拍機３呢？ | ||
九 月 七 日
 | ||
|
記得買今期internet magazine 一早俾呀媽嘈醒去灣仔睇中醫，唉....想訓又無得訓，咁又點可能唔失眠。去到睇中醫果 陣，佢一路同我打脈，我一路係度釣魚，之後仲毫不客氣地訓著埋，我「銀」住左塊面訓 ，搞到訓醒左之後塊面有個寸幾長的「刀巴」，是但喇，都幾型仔呀。之後我、媽咪、舅 父和舅父的女朋友bass姐姐飲茶，bass姐姐介紹左一個教「呼吸」的班俾我，千幾蚊得果 兩日，仲要食齋呀，不過好似幾好玩，由細到大都無人教我應該點透氣，哈，所以我就一 口答應左。食飽飽之後，我地上左舅父大角咀的新屋參觀，成屋都係「宜家」，好似去左 「宜家」的示範單位咁，好整齊呀，個廁板軟棉棉，好得意。而我就最鐘意玩舅父朋友送 給他的一條大樹枝，只要左右搖一搖，就會有「海浪」的聲音，好舒服，其實樹枝裡面有 好多細細的種子，所以郁動時就會發出聲音，不過都有成三尺長，所以拎得多都幾。舅 父車我地返屋企，係車度我又再度昏迷，實在太眼訓喇。 我同internet magazine 做果個訪問出左喇，第28期sammie封面架，嗚～影到我好似低能 婆咁，算喇，真人靚過上鏡，哈哈，不過始終有點失望雜誌搵我的病做招來，唉.... 今日呀咩吉場正式上契俾martin喇，佢係吉場出世以來都百般關心、無微不至，佢實在好 適合做吉場的契爺，係喎，martin你記得買番條金鍊仔俾吉場呀。 夜晚同nathya上天台吹水，嗚～個個都唔俾我啤，唉....唔驚，仲有一個月就十八歲喇。 我地上到天台都唔夠，仲爬左上去隻「大大鑊」隔離坐，因為係半山，所以三十幾樓都好 高呀，好清楚望晒成個官塘同維港，我以汽水代酒，兩個人聽歌、大嗌、吹水，真係free 到飛起呀，仲大嗌「I am the king of the world！」，痴左線。原來我死穴係「祝君好 」，一聽到就忍唔住....這裡可以望到我前男友的房，我幽幽的說一句「祝君好」但願你 永遠快樂。原來我之前唔再喊，係因為我個心已經死左，而我今次喊，係因為我始終好內 疚曾經要佢陪我病，我唔忍心害左一個人。 今期internet magazine的訪問----> 
| ||
| 九 月 八 日
| ||
|
呀咩著裙喎，唉..... 今日好安詳咁訓到十點，失眠症好似一下子轉好了，心情也好起來，所以就好想可以去電 腦舖買一個靚靚keyboard，因為而家用緊呢個實在太多野食係ｄ掣中間，上次仲倒瀉左阿 華田，搞到好多蛇蟲鼠蟻，有幾個掣仲按左之後黐實，唔曉彈返上黎，情況都幾危急。我 張身份證留左係nathya度(nathya係time square 做)，而我今晚又要出去銅鑼灣做節，所 以就好順理成章咁諗住五點幾出到灣仔揀keyboard，之後再出銅鑼灣。正好興奮諗住換衫 出街之際，忽然好想「扮女仔」喎，於是就搵左條裙仔著，左睇右睇，邊個角度都係好man 喎，男人老狗著裙咁，但諗深一層又想著喎，於是就對住塊鏡左扭右扭，扭到過晒時間， 呀！博一博喇，於是就衝左出門口。撘巴士果陣我掛住聽md，個電話狂響我都聽唔到，搞 到成個車箱ｄ人都眼啤啤，幾唔好意思呀，就到銅鑼灣果陣，我好唔想落車，都係覺得好 驚，好想撘到金鐘先落，但又無理由咁白痴架，所以都係膽粗粗衝左落去。唉....好驚呀 ，成個銅鑼灣都係人，而我又好有罪惡感喎，梗係覺得自己唔應該扮女仔，做番一條好漢 咪好囉，而家成個人妖著住條裙咁，唉....心理唔平衡呀。去到page one等nathya放工果 半個鐘，我都淨係敢企係同一個位置，睇住同一本書，等到花兒也謝了終於睇晒成本書。 我地兩公婆去左世貿影卡卡，之後佢就丟掉我去左搵朋友，而我就孤令令去左行「宜家」 ，行完八點幾就上左太湖做節食飯，二舅父送左個音樂盒月餅俾我地，哈，可以一邊聽音 樂一邊食月餅、歎茶，幾好幾好，之後五舅父就車左我地返屋企喇，唔該舅父。 哈，成晚住個死人假髮玩，唉....你話我有番頭髮幾好丫，起碼唔洗再成個人妖咁都可 以扮女仔，頭髮呀頭髮呀，你快ｄ長喇。 今日susuky話我知，佢拎左本internet magazine 番學校俾李sir睇呀，李sir一見到即刻 左去影印，開心死我喇，哈哈，中學時期我暗戀李sir 架，不過全班都知，應該唔算暗 戀喇卦。
一年前的nathya和女仔呀咩
| ||
| 九 月 九 日
| ||
|
兩個完美弱智者的相遇 哇哇，今日好叻仔呀，訓到十一點鐘先醒，唔通我的失眠症好番晒？ 因為傾明天去沙灘的事，傾得好混亂，好煩，所以無喇喇係隻大脾度用marker畫左 「^_^say cheez！」，四寸乘兩寸咁大架，心情即時靚靚，哈哈，希望下次心情唔好，唔 洗係塊面度畫公仔喇先開心。 好緊張呀，今日係我第一次約icq friend出街咋，我約左bee 哥哥去睇「人妖打排球」 (嗚～終於有人陪我睇喇！)，bee 哥哥實在太可惡喇，遲到不特止，仲要我呢個弱質女子 去買飛，嗚～我行左兩間都係得番最前一行位咋，好不知所措之際，bee 哥哥終於天仙下凡(定係撒旦降臨呢) ，佢毛筆一揮，我地就決定買最前一行喇，唉....幾好丫，起碼係一個好難得的經驗 (唯有咁講個心才好過一點。)。bee 哥哥拎左ｄ墨寶俾我睇呀，唔笑得！我應承過你我唔 會笑的，於是我就係尖咀的鬧市舉起新界皇帝bee 哥哥的真跡，幾威呀。 八點鐘，入場喇，唔係丫，成間戲院爆晒，差ｄ要係前面加位咁滯呀，我地坐第一行都唔 係好瘀之嘛，咪同人講我地調轉左黎睇，以為買左最尾一行囉，仲好喇，又無人頭飛黎飛 去。好正呀，近到好似自己係第七個打排球的人妖咁，個波飛埋黎果一刻真係有飛撲出去 接的衝動，人妖頭又超大超近，非一般！因為坐得太近，坐到好，散場果陣好似真係打 完排球咁，呼～十點幾拐左bee 哥哥去海運天台，我好鐘意果度架，唔同海旁咁多人，但 又望到維港靚境，我地兩以jolly sandy 代酒，啤一啤，之後行左去海旁，好邪呀，我竟 然撞到民安隊的朋友，他和我其中一個icq friend行緊街，哈，不過我地無傾計呀，事後 佢話我知，唔想阻我「拍拖」喎，我又係衰，知bee 哥哥會著橙色衫牛牛褲，我又走去跟 佢著，哈，搞到俾人以為係情侶裝，仲有人兜撘佢買花，真係尷尬呀，最衰都係我唔用腦 。我地兩丁友一邊食風一邊吹水，十二點鐘就閃人喇，難為你喇，bee 哥哥要撘Ｎ車番屯 門。話時話，我成日以為新界仲係有好多田，好多牛牛羊羊的，乜唔係架？ 其實同bee 哥哥識左三個星期咋，不過同佢特別夾，我地一齊成日有好多精境野， 「我誤會你講的野，係因為你表達能力差，我領悟能力低咋。」 「我地兩個係弱智。」 「咁咪唔係完美主義者囉？」 「要弱智得徹底，從內到外，100%，咁咪完美弱智者囉。」 係咪唔明呢，因為我地弱智得太完美，所以非常人可以明白。 bee 哥哥話，我成日當自己係男仔，係因為形勢所迫、身不由己，我的生活告訴我，我要比一個男仔 更堅強，搞到而家想做返女仔，竟然有「扮」的感覺，開始心理唔平衡喇。其實我係咪應 該係適當時間做返一個女仔呢？24小時不斷武裝自己，為的就是不想再被傷害，要死撐爛 撐，好辛苦。誰可以教我哭、教我笑、教我睡得安心、教我做番一個女仔？ | ||
| 九 月 十 日
| ||
|
發顛！！玩通頂！！ 我的失眠時好時壞，都唔知幾時好得番晒，不過有好轉都算係好感激上帝架喇。 今日成日係屋企悶，悶到訓左兩次晏，今晚做節，所以之前又唔俾去街，五點幾叔叔上黎 幫我洗晒電腦ｄ野再重新安裝呀，thanks圖叔(叔叔說佢都有睇我日記架^^)，我部機之前 真係好唔掂下，填親from個ie就會當，而最可以消磨時間的「受氣時代」又同某ｄ野撞左 ，開黎開去都開唔到，我諗同包姐姐開唔到icq 係同一道理，而我咩都走去dl番黎用下， 搞到成部電腦好似垃圾站，所以就出此下策，電腦，你同我作對？去洗喇你！ 我約左ｄ展大(哈，其實係展翅大使的簡讀)朋友晚夜去石澳睇星星，食完飯七點幾我就帶 埋前幾日買果隻「金鷹」去街街喇，嗚～千嬅隻cd仲未有得買，官塘真係落後地方呀。我 地七個小矮人，九唔撘八咁左搞右搞，搞到九點幾先入到石澳，好正呀！雖然無淺水灣咁 大，但ｄ沙就好幼好幼，好似麵粉咁幼，個灘好平，所以走到好出，都好淺水，不過費事 行行下有隻手抆住隻腳，所以都係唔敢走咁遠，彩彩彩～呢度真係好靚，個月光好似一個 哈密瓜咁圓碌碌，星星又多又光，但我始終都係睇唔到bee 哥哥講的獵護座腰帶，無得懶 叻。十一點幾有兩個朋友走左，得番我地五個，咁難得有咁多星星任睇唔嬲，好唔捨得走 呀，所以就死嫘要通頂。嗯，幾值得丫，我地三男兩女(我係男仔嘛～)咩低能仔野都玩下 。係天光前果幾個鐘頭裡面，我地玩水、玩蠟燭、玩煙花、玩水、玩沙....佢地幾個仲係 度狂掘沙，掘到鬼咁深，唔知ｄ人見佢地咁落力，真係以為想藏屍呀，最衰我口多多，結 果，我就俾佢地拎左黎際旗，嗚～賣我落火坑(其實係沙坑)，再堆ｄ沙埋住我，，跟住仲 影左相，哈，想睇相？好難喇。我地五個又排成一字，幫前面果個鍊骨，正！呀明哥哥真 係十分靠害呀，竟然係個沙灘度寫左超超超超大的心，裡面寫住「咩，i love u forever ！明」哇，你條友丫，咁陷害我？明哥哥鐘意邊個，我同佢心照喇，搵我個名代替「佢」 個名之嘛，真係....出賣朋友呀！收賣人命呀！滅絕人性呀！之後我地玩真心話，不過我從來都唔識睇 啤牌大細的我，真係搵笨呀，究竟淩型同提子邊個大ｄ呀。玩到咁上下就訓左係度睇星星 ，好正呀，好多流星，蕉蕉蕉～咁又幾粒，不過次次掛住嗌，都唔記得許願，正傻佬。 玩到六點，我地就坐第一班巴士回家，番到官塘七點，好想打俾susuky叫佢一齊食早餐， 不過條傻婆個電話又唔開，仲諗住撐下台腳。 我個icq list無晒人呀，見字請跟我say 個hi，等我add 番ｄ朋友仔。 | ||
講左喎<--------昔日發傻-------->繼續睇丫~