| 廣洲一日遊 |
|
::::::一月九日::::::星期三:::: 我諗上次咁早起身已經係幾個月前既事，今朝六點幾就俾媽咪嗌醒喇，因為今日要北上番廣洲一天，仲係撘直通巴士喎，所以要八點出到旺角上車，好趕呀好趕呀，我個咀角爛到好精彩，橫掂番大陸之嘛，索性唔畫眼耳口鼻，無所謂喇，其實有無化粧，最覺果個都係自己之嘛。爸爸首先開電單車出左去睇下幾確實係幾點開車，而我、麻麻、媽咪就響屋企樓下食早餐，儲夠體力先，今日姑媽都會去架，但佢七點幾打黎話剛剛先起身，唔黎喇喎，下下下，我地而家仲食緊早餐，佢即刻出門口都仲趕得切架喎，於是我地就叫姑媽響藍田撘的士過黎兜埋我地過去旺角喇。 大約八點左右我地出到去波鞋街附近，同爸爸、阿華集合好之後就上車嚕，哇...架旅遊巴好大架呀，比起平時坐果ｄ大好多，車身又高，ｄ坐位又舒服又乾淨，哈，好似大鄉李出省咁添，八點十五分開車喇，我地經過大埔，慢慢駛向羅湖，成架車加埋我地都係十幾個人左右，所以鐘意坐邊就坐邊，幾鬼free。可能因為架車夠晒大架，所以坐得好穩定，爸爸媽咪佢地個個都訓著晒嚕，無人陪我吹水，我又訓覺先。去到皇崗口岸，就要落車過關嚕，過完香港呢面，上番車撘多一陣，就要過深圳果面既關口，唔知點解次次過關，果個海關叔叔都望好鬼耐，不過又唔怪得既，我回鄉証張相影係我中二果時影架，影到我印堂發黑，成個賊咁。 過左關之後爸爸就去買煙，媽咪佢地就去廁所，搞掂晒之後就要慢慢搵番我地架旅遊巴，因為呢度勁多旅遊巴泊晒響度，架架一樣樣既，都幾鬼難搵，好彩我地都好快搵到，但我地快上車無用架，要等齊番果班人先開得車架嘛，點知呢就係有對父子走失左，搞到成車人等左好耐，等到發晒皮四，好彩等左三個字之後佢地終於番黎，唔係都唔知開唔開車好。 我地架車慢慢駛離深圳，向廣洲進發。我總係覺得大陸既交通好古怪，有時明明係紅燈，但架車又唔會停喎，而且ｄ車響馬路左穿右插，險象橫生，都咪話唔恐佈呀，所以都係訓覺好ｄ，話晒真係出事既話，訓著左都無咁驚丫嘛，嘿，采采采。又唔知訓左幾耐之後，終於到左廣洲喇，我地響一間唔知咩名既酒店落車，然後爸爸就用漫遊既電話打俾明伯同五姑婆，嘻，等佢地黎接我地。原來時間已經係中午十二點幾喇，有ｄ肚仔餓添，我地坐響荷花池旁邊等，哇...響我有印像以黎，我第一次見到荷花咋，雖然淨係開咋少少，但都覺得好新奇，媽咪話再晏少少佢就會開晒，到左夜晚又會合番埋，咦，好得意喎。明伯同五姑婆同埋幾個唔知點稱呼既親戚一齊黎，嘻...真係無大無細呀，唔知點叫人添，無計喇...唔係成日見住嘛，不過我都認得佢地架。 等齊人終於有得去吃野喇，我地去左酒店附伊既某樓飲茶，一入到去就知係富貴地方喇，個樓底好高架，仲好好招呼添，見我地係香港人卦。我地都有十幾個人架，響香港好少機會咁多人一齊去飲茶，明伯一向都好豪氣，今次叫野食都唔例外，每樣點心都幾籠幾籠咁叫，哈哈，感覺好古怪呀，平時我同媽咪去茶樓都係每樣叫一籠架之嘛。 飲飽食醉之後，我地就要做番ｄ正經野喇，嘻，今趟上黎廣洲，係因為爸爸要去「狀元坊」買財神衫呀，買黎做表演用既，就快新年喇嘛，而我同媽咪既正經事就當然係黎shopping喇(其實主要係我)，我地咁多個人，計落條數撘的士唔扺喎，而且親戚們都識路嘛，於是我地就一齊撘巴士去喇，等巴士期間，見到有個著住ｄ小數民族衫既女人，佢身上...掛住ｄ動牧既頭骨...一望落去就係一隻羚羊既頭骨，哇...好驚呀，但又要驚又要八喎，仲偷偷影低左，諗住可以同朋友分享下嘛，原來響後面仲有一個又係掛住動物頭骨既女人，哇！呢個仲勁，佢身上掛住左個牛頭骨呀，哇...我咁大個女都係第一次見咋...
撘左幾個站巴士之後就到左「狀元坊」喇，哇，呢度真係超級多人呀，好多都係學生，好似旺角咁，爸爸、麻麻同親戚們就去揀財神衫，而我同伯娘、姑媽、媽咪就去shopping，哇哇...呢度好多舖頭呀，有賣公仔、賣帽、賣衫...哇！樣樣都係我最鐘意既，先講公仔，呢度ｄ公仔雖然唔係正版貸貨，但好多都冒得好靚架，同香港既比較平成一半或以上，仲平果我行年宵見果ｄ呀，買ｄ細細既掛響袋或者送俾朋友都得，希望唔會係用血綿花喇，嘿嘿；到帽喇，呢度咩款色都有，當然唔少得近排大熱既阿伯帽喇，我忍唔住手買左一頂白色冷帽、黑色頭巾、啡色格仔阿伯帽、灰白色冷既畫家帽，嘻，頭就得一個，但帽就買左四頂，又靚又平丫嘛，不過ｄ老闆見我地係香港人，好似專登唔肯平咁，好彩有伯娘響度幫我地講價，嘿嘿，佢講價好叻架，可以講到早成一半咁滯；呢度既衫衫褲褲雖然大陪份都娘娘地咁，但間唔中都會發現一ｄ合心水既，記得我響女人街買左一條薄薄既運動褲，都要五十蚊呀，但呢度有條差唔多樣既，仲要係加左綿響入面，冬天著左會好暖咁架，都係賣三十蚊，哈哈，又執到平野。 我成日想買個平平地既黑色尼龍袋，經過一間舖頭，入面咩款都有，仲要係超級平喎，諗住可以響度揀番個喇，點知無端端有個女人衝入黎大大聲咁鬧果個老闆娘，初初我以為佢地響度玩架咋，但佢地開始郁手郁腳，仲聽到個女人大聲鬧「你個ｘ街，勾我老公...我同你死過...」，哇哇，愈鬧愈激烈，我呢個八婆仔本來都想八卦下既，但媽咪就即刻拉我走，話驚佢地打打下交傷及無辜喎，咁唯有響門口遠處望下嚕，好快就有公安黎嚕，然後拉晒果兩個女人走，間舖頭閘都閂埋，噢，無得買袋嚕... 行晒成個狀元坊，我買左好多野呀，買到媽咪帶黎既人民幣都用晒嚕，嘿嘿，平丫嘛，咪忍唔到手嚕。我地行番去狀元坊既街口同爸爸佢地匯合，然後又到第二站嚕，我地再撘巴士去第二度，架巴士好迫人呀，頭先行到勁累，見到有人起身想落車，媽咪咪指示我去坐囉，點知有個女人一野攝埋去就坐左嚕，媽咪就話我「響呢度唔讓得架，你讓人地人地就坐左你個位架喇。」，嘻，所以第二次我醒目喇，快手快腳咁坐左個靚位。
今次黎到呢度乜野都無得買既，淨係跟住爸爸去買野，佢想買ｄ紙扇、扇骨...又係預備做表演用既，我同媽咪佢地唯有坐響路邊等喇，好彩媽咪專登帶左個連埋張椅既背囊，哈，去到邊都有得坐。我地等到好悶呀，於是伯娘就話帶我去行街，佢話有個商場ｄ學生好鐘意去架，梗係好喇，又有得shopping，於是爸爸佢地又繼續買野，麻麻會響度住幾日，所以就跟五姑婆番佢屋企。 伯娘話個商場好近，所以我同媽咪、姑媽就同埋佢一齊行路去，點知行極都唔到，足足行左一個地鐵站咁遠呀，早知撘一個站仲好喇，其實行都唔算勁辛苦，最弊係...我地差唔多過左成十條馬路先到，條條馬路都勁多車，每次過馬路就好似響彌敦道橫過馬路咁，超級驚險呀，嗚...我一直都好驚過好多車既馬路，呢度ｄ馬路又鬼咁窄，行到去馬路中間既時候，前前後後既車就響身邊一尺左右衝過，真係驚到我「後尾怎」都涼一涼呀。果一刻我真係覺得又驚又無助，雖然媽咪就響身邊，但我真係好怕好怕，同埋暗地裡埋怨伯娘明知我有病都要我行咁遠，而且仲要過咁多條無斑馬線既馬路先到，唉...每次我驚到死話要撘的士既時候，佢就會話就快到，好彩結果都係勁驚無險，不過真係好驚囉。 幾經辛苦，我地終於到左地鐵站側邊既商場，呢度賣既野係好靚，好似香港咁，但價錢都好似香港咁貴呢，同香港一樣價錢的話，我洗乜響呢度買喎，所以齋睇都唔捨得買，行晒成個商場之後，買左一支捷毛液，總算係有收獲喇。時間都差唔多嚕，我地約左爸爸響火車站等，於是我地四個一齊撘地鐵過去，哈，第一次撘廣洲既地鐵咋，係站入面既燈比較暗嚕，其他既同香港都係差唔多。
六點左右我地同爸爸響廣洲火車站匯合，買左車飛，大約七點幾會番到深圳，噢，到左我地同明伯、伯娘分別既時候嚕，真係有ｄ唔捨得，每次見面佢地都咁熱情招呼我地，有機會要上廣洲住番幾日玩下先得。回程少左麻麻，但多左個陳太，陳太係幫爸爸做野既，但真係唔知佢上黎廣洲做乜，加埋我、爸爸、媽咪、姑媽、阿華，總共六個人，番到深圳之後，佢地大嗌肚仔餓呀，咦...我想買波鞋呢，因為我平時著開對涼鞋有ｄ爛喇，於是拉媽咪陪我去睇，而佢地就上去酒樓坐住先，千揀萬揀，終於以一百元買左一對深紅色既波鞋，嘻，好野。之後我又拉媽咪去睇玉器，因為我有個朋友條水晶手鍊爛左呀，所以想買番一條俾佢，可惜好多間都係買假野，玻璃黎之嘛，都係係水晶，噢，結果都係揀唔到，可惜。
買夠野我地終於可以去吃野喇，每次上黎深圳我就一定要黎呢間酒樓食片皮鴨，今次都唔例外，我淨係食片皮鴨都食到飽晒嚕，嘻，能夠食鐘意既野食飽，果種感覺真係幸福呀。食完野都差唔多九點幾十點嚕，係時候回程喇。爸爸買財神衫既時候，特登買多三個行李箱，佢怕會整爛ｄ財神冠喎，但三個行李箱未拎到番香港已經報銷，唔係甩左個輪就係爛呢樣爛果樣，唉...made in china係差唔多架喇...原本我今次上黎想買番ｄ煙花架，可以同朋友去沙灘、郊外既時候玩丫嘛，但最後都搵唔到有得賣，不過都好彩無買咋，我第一次過關俾人搜呀，去到羅湖既時候，有個海關捉住我要搜我個袋喎，雖然我無帶違禁野，但都唔知點解好驚，驚有ｄ野係違左禁而自己又唔知，好彩最好都無事，哈，唔知係唔係我面色唔好，個樣似白粉婆呢，所以俾人捉住黎搜。 阿華住粉領架，佢話火車去到粉嶺之後，我地一齊出閂，然後佢去開架車車晒我地番屋企喎，哇哇，梗係好喇，唔洗再撘咁多個站，又無得坐又要轉幾次車嘛，於是我地就響火車站門口等佢。等下等下，有好多賣野食既小販呀，賣咩既都有，當然不少得我最愛既格仔餅喇，但頭先實在吃得太飽喇，所以我淨係要左個雞蛋仔，過左一陣之後阿華就黎到喇，嘻，我梗係霸個車頭位喇，夠舒服丫嘛。當架車駛到吐露港公路既時候，阿龍打電話俾我喎，佢話我知佢考到入藝員訓練班喇！佢仲話一知道就第一個打俾我，好開心呀，果下真係開心到想喊出黎，我一直都覺得阿龍係掂架，可以更加出色，佢考得入証明我既眼光係無錯既，我真係好戥佢開心呀，仲有佢第一個打俾我喎，又証明佢當我係好朋友，係一個可以同佢分享開心既人，哈哈，我開心到收左線都仲響度笑呀，一諗起就忍唔住笑，我真係好開心好開心，恭喜你呀。 |
| 城門水塘bbq |
|
::::::一月十二日::::::星期六::::: 嘻嘻，今日約左展翅大使班同學仔一齊去燒野食呀，有thomas、阿達、jimmy、阿輝、大隻佬、vernon、瑩瑩、阿dick、阿may、阿may既男性朋友、阿may既男性朋友既細路，哈，總共一打人咁多呀，我地決定去番上次平安夜燒野食果度，即係城門水塘嚕。今次係我提議搞既，怕搞得唔好，所以都幾大壓力，時間地點都改左幾次呀，最擔心買漏野，或者買得太少太多，哎呀...好緊張、好緊張呀，我呢幾日一諗到買咩就寫低，希望唔會買漏喇。 約好三點鐘響荃灣地鐵站恆生銀行等，而我同thomas、jimmy、阿輝、大隻佬就早一個鐘頭到，去百佳買定野食。前幾日番大陸，行到隻腳跛咁滯呀，仲腫左一舊舊唔知ｄ乜野，按落去硬硬地好鬼痛架，我負責買野食架嘛，痛到咁點買呀，所以前日番醫院輸血小板果陣順便俾醫生睇，佢話我可能係雞肉發炎喎，咁痛，吃ｄ止痛藥喇，於是乎我今日出門口之前就「隊」左粒先出門口，勁呀，之前仲好拐下拐下，而家可以跑步添呀。 哥哥車到我去荃灣時，見仲有時間，我就叫佢兜我去搵ok便利店，因為我應承左thomas送個花花火機俾佢，淨係ok先有得賣架咋，結果為左搵ok，所以遲左少少，好彩我到左地鐵站時得thomas一個到左咋，等埋大隻佬同阿輝，我地就一齊上去百佳買野食喇。我地依住清單買，好快就買得七七八八，忽然唔知點解好暈，仲想嘔添，唔知係唔係呢度焗得滯呢，哎呀...唔係好掂喎，於是我同thomas講我上番哥哥架車度等佢地，行左幾步之後，開始頭暈眼花，仲有少少標汗，哎哎呀...我靠左埋去堆汽水度，諗住伏住抖下，但都係唔得，情急之下我諗住番轉頭搵番thomas，不過行左兩步我就腳都軟埋，坐左響個地下度嚕，百佳ｄ阿姐見到我咁，就問我係唔係暈，我話「係呀...我暈呀，仲想嘔呀，可唔可以俾個袋我呀。」，於是我拎住果個袋，坐響地下度打俾哥哥，叫佢上黎接我。個經理見我唔舒服就問我洗唔洗叫白車，下？梗係唔洗，打死我都唔入醫院呀，於是佢就拎張椅俾我坐下，真係感動呀，上次響地鐵流晒鼻血都無人理，今次遇著個個都咁好心幫我，好彩好彩。哥哥黎到之後就扶番我上車，過左一陣佢地就買完野落黎喇，於是我同大隻佬、阿輝就入去霸爐先。我地要駛到好入先搵到爐呀，不過無所謂喇，呢度又有個公廁咁正，人有三急都唔洗走咁遠嘛。過左無耐其他人都到齊嚕，哎呀，阿may嫌我地買野買得少喎...食得晒先好講喇... 哇哇，響呢個荒山野嶺既地方，竟然有雪．糕．車呀！好野好野，睇佢地個款有排都未透得著個爐架喇，一於食番杯雪糕先，嘻，阿輝同大隻佬都吃呀，於是我地三個一齊去買嚕，阿輝好搞笑地叫個老闆整大杯ｄ喎，我以為個老闆實唔理佢喇，點知真係俾左杯超級大既我，哇...我第一次吃軟雪糕係扭到咁鬼高架咋，呵呵呵，即時不停偷笑，嘻。
呀...食落先知杯雪糕真係好大杯，係太大杯喇，我食到尾尾都頂唔順嚕，好飽呢...丫！到獎品時間喇，我揀左隻著黃色衫既矇矇兔公仔俾瑩瑩，同埋thomas、jimmy既生日熊公仔，嘻，佢地鐘意我就開心喇。佢地開始燒野食果陣，我都仲係好飽呀，我地特別買左十粒左右既魚蛋，好得意架，上面係個公仔頭黎既，我千叮萬囑話留番兩粒俾我架嘛...點知thomas竟然響我面前燒鬼埋，唉...你係燒黎食都好丫，點知玩下玩下就跌左一粒，咦...我想食都無得食，你竟然請地下食...都唔俾我食，你好野...哼！ 佢地吃飽左第一輪之後，就開始響度玩喇，唉...jimmy、thomas、呀輝竟然玩搖可樂，哈，ｄ可樂預到剛剛好一人兩罐架咋，拿拿臨拎番罐先...搖完一輪之後就開始猜喇，猜輸左果個梗係要開可樂喇，哇哇，我都係走遠ｄ先，整污糟件衫黐立立事少，陣間惹埋晒ｄ蟻呀、蜜蜂呀、蛇呀、老鼠呀、大笨象...我咪死。結果係thomas猜輸左，嘻，不過原來罐可樂搖得太多太勁之後，開左係會無氣架，係開果下噴左少少出黎嚕，不過都睇到大家幾緊張架喇。阿輝玩搖可樂果陣，唔小心將罐可樂掟左落我背脊度，哇...果下真係痛到想喊架，不過竟然無人理我，哈，既然無人覺得係一回事，我又無理由小器到喊架，於是我就當無野咁，繼續玩，女仔就係咁架喇，如果當時ｄ人係咁哄埋黎，不停問我有無事呀，我實喊死都似，哈，既然無人理我，我喊黎俾邊個睇喎(滴汗)。 開始天黑嚕，我地就坐埋一齊傾計，又玩果ｄ有問必答既遊戲嚕，玩下玩下、傾下傾下就八點幾嚕，之後我地就執拾行李慢慢行番出去，行左一輪之後我地響水庫邊個亭度又坐左一輪，佢地話講鬼故喎，雖然呢度一盞燈都無，但我都唔係好驚，淨係覺得佢地講得有ｄ悶，不過話時話丫，我地發現左一樣比較奇怪既事，亭旁邊係一條分叉路，一條路上，一條路落，多數人都係響上果邊燒野食既，要行一段路先會到，同埋好少爐，而下果條路一望落去就係一個好大既爐烤場，好近、好多爐，但偏偏一個人都無，點解呢。 聽佢地講完鬼話之後，我地又慢慢行出去水塘口，因為隻街唔係好靈光呀，所以行得比較慢，好彩阿輝陪我慢慢行咋。我地響水塘個路牌度影大合照，總共影左三張，然後繼續行番出去大路，行行下後面有架車喎，我同阿輝咪行埋路邊嚕，但架車又跟住我地咁駛向路邊，我地行番出馬路，架車又駛出馬路，如是者一直釣住我地尾，哎呀，我最怕過馬路架喇，點解佢咁跟住黎架，一睇，原來係阿哥架車...搵笨。 阿輝要出去黃大仙呀，於是我地就一齊坐哥哥架車喇，響車上面阿輝不停向我say sorry，話頭先掟親我唔好意思喎，仲係都要我打番佢，於是我咪輕輕力打左佢一拳嚕，佢又話唔算數，哎呀，你唔好難為我喇，都過左去嚕，估唔到阿輝咁婆媽既，傻瓜。 番到屋企落車既時候，我先記得...盞燈呢？我明明帶左一盞電燈去架，死喇，盞燈係爸爸好多年前買架喇，我每次夜晚去釣魚或者去沙灘都會帶架，死喇...於是哥哥由官塘，又駛番去城門水塘搵嚕，結果...都係搵唔到，嗚...盞燈爸爸架，而且仲有好多快樂既回憶，死喇，爸爸實嬲死我呀。我驚爸爸嬲呀，所以咪喊住咁入門口嚕，嚇死媽咪呀，佢以為我有咩事，好彩爸爸一ｄ都無嬲，仲安慰我話佢想掉左盞燈好耐，成日阻住ｄ地方喎，佢話見到我喊，仲心痛過唔見左盞燈，唉...不過依然好內疚呢。 番到屋企先知...我隻腳腫到豬蹄咁呀，點解？因為我今日吃左三次止痛藥，唔識痛，咪不停跑跑跳跳嚕，搞到而家咁...哎呀，累事喇累事喇。睇番今日ｄ相好開心呢，不過睇到大合照果三張...點解全部都好似俾一個半透明既黑影遮左一半既？睇到我毛管動...點解既呢...有怪莫怪，怪我細路仔唔識世界...
|
