監獄風雲

::::::十月十九日至二十九日::::::

十九號準時執包伏入院渡假,一入到去梗係第一時間問下有無窗口位喇,點知姑娘話 如果我無遲一日先入院,果張就會係窗口位,仲話係特登留俾我架,嗚...無計喇,唯 有死死地氣入房,咦?同房既病人係女仔,睇落去同我差唔多年紀添喎,再傾下計先 知,原來佢同我一樣十九歲架,住響澳門,不過因為澳門無得換骨髓,所以就黎到香 港換喇。醫生姑娘同佢都好好傾架,死喇...今次失寵喇!


小魔hi~


小魔要拆我菲林呀

第一日入院,床都未坐暖呀豆同小魔就黎到喇,晏少少bee狗都到埋,我地吹下水, 玩下部DV ,咁就過左一日喇,嘻,第二日仲有細拳黎探我呀,當然強迫佢畫番幅靚 畫俾我喇,有朝無早餐食,又多得呀如買埋早餐黎探我喎,佩琪仲黎左兩日添呀,佢 好似禮物小姐咁,次次都帶好多野飲野食黎,有日仲拎買左件朱古力蛋糕,哇...超級 好食呀!雖然d朱古力好甜,但真係好正,嘻,仲有曲奇同我表妹kk呢,曲奇帶左d 好好食既朱古力黎,哇,個個都想我肥肥白白呢,嘻。今次我無叫好多人黎探我呀,其一 係知道應該入得唔耐,其二係我都想寫下日記,有d網友以為我之前唔寫有咩事,其實...慚 愧的說,我係因為日日去街,所以先無寫日記,而家可以日日寫,反而係因為入左醫 院,不過我都堅持希望一日寫到一篇架。


托眼鏡的細拳


獎品小姐佩琪

有日食完午飯,打算寫日記,但唔知點解無端端好眼訓喎,仲好凍添,於是就訓覺無 寫喇,姑娘入黎探熱,佢話「三十八度五。」,下?唔係喇fa,姑娘你探錯左呀?咪 叫佢探過第二隻耳仔囉,但結果都係一樣,下?我發燒呀!點解既呢,唔通係響樓下 買果個焗豬扒飯作怪?不過諗黎都無用喇,唔燒都燒左囉,初愈黎愈唔舒服,頭重重 ,又頭痛喎,開始好唔開心喇,唔舒服都唔係最緊要,最驚係超過三十八度要響手度 抽血,嗚...一諗起我就忍唔住喊喇,我最怕打針架喇,最慘係化療左之後血管幼好多 ,d醫生仔好多時都唔係一下篤中條血管,兩拮多幾下先中架,咁拮法,容乜易俾你 拮到成手窿架...嗚...媽咪呀...我同姑娘講定一定要用「飛機仔」,因為支針幼d,應 該無咁痛赴,結果等到醫生入黎之後,我就再無喊喇,全個過程最痛唔係佢用針拮我 果下,而係佢之前用條橡筋帶縛住我隻手,目的係想d血唔流通,等d血管可以現d ,但縛得太實,隻手谷到紅晒,仲要係超級痛,果陣我真係寧願佢快d拮我呀。我一 直訓,訓到夜晚要吊血小板,一吊我又開始發冷喇,凍到我縮埋一舊,震晒咁,好彩 呀哥七點幾黎到,佢拎多張氈俾我,咁我就慢慢暖落黎喇,唉...發燒真係辛苦呀。


美華 vs Qoo

隔離床既十九歲澳門女仔叫美華,性格好樂天架,好似乜野都好開心咁既,比起我成 日嫘出院,又成日喊,對住佢真係有少少慚愧呀,佢堅強過我咁多。佢媽媽特登搬左 去香港個親戚度住,五點幾就會走架喇,咁美華就會一個人落去買飯食,好獨立呢。 我地個主診陳醫生勁錫美華,成日都會入黎坐定定同佢吹水架,相對黎講陳醫生就對 我好普通喇,可能我真係唔討人歡喜喇,有晚我同美華傾計傾到成一點,佢靜靜雞話 我知,佢好多人追架,就算係病左之後都一樣,真係好羡慕呀,有邊個女仔唔想人見 人愛喎。不過其實佢又真係好得人鐘意既,好似我地講起有隻公仔叫Qoo好得意,佢 第二朝早就走去買左兩支Qoo番黎,一人一支,有晚我忽然好想食朱古力,佢落去買 宵夜又特登買番黎俾我食喎,佢媽咪仲買個西瓜黎諗住我同美華一人一半食添呀,可 惜我俾姑娘阻止左,無得食。人地對我好,我梗係要對人好架喇,知佢好想試下金龍 船既千層蛋糕,於是我又叫媽咪買黎嚕,有咁既同房真係開心呀。


羊哥哥+Qoo袋

我同美華同房四日左右,佢就要番過去澳門喇,不過我地同一種病,遲早都會再見既 。美華走左之後我就調過去佢張床,即係窗口位喇,然後又有另一個病人調入黎,個女人四十幾歲左右喇,但有d身經質,成日不停講佢老公d唔好既野,每晚佢老公拎飯黎佢就不停鬧佢老公,唉...真係煩死呀。媽咪同爸爸晚晚都好夜先黎探我,咁我就梗係捉住佢地傾計架喇,點知果個女人又成日插咀講左第二個話題,有次真係好激氣,我地唔知講緊乜野既時候,佢一句插埋黎「細路仔唔好問咁多野喇,呢d係大人既事。」,哇...你老...丫,我住緊成年人病房架,咩細路仔呀,成人身份証我都拎過兩張添喇,我忍你,我唔出聲...有時聽到佢又數佢老公,我都好想回敬佢「你咁對佢,佢都對你咁好,好心你就收聲喇。」,唉...所以呢,我係絕對唔會主動同佢傾計架,當然佢同我講野我都保持我既教養,回答佢既問題囉。但當呀麻麻或者媽咪黎到,佢又會捉住佢地傾計架喇,媽咪都好d,聽左就算,但麻麻真係好俾心機聽,有問有答果種,搞到個女人非常有癮咁不停講,我真係背一次出黎都得呀,有時真係忍唔住走去其他房同朋友傾下計清靜d。

今次入院頭五日都要做化療,好彩無嘔過,依然好有食慾,起初以為做院就走得架嘛 ,點知佢又唔俾我走,隔離個女人又日日轟炸我,搞到我都就快痴線喇,所以我畫左張畫放響床頭,係一個縛住「我要出院!」頭巾既公仔,仲寫左一句詩「無自由,我失自由,我傷心痛心,我眼淚流。」,每朝大小醫生巡房,見到淨係識得笑,醫生... 我係要出院呀...你唔好笑而不語喇...我好痛苦呀...


心聲

醫院生活真係好苦悶,日日好似等人探監咁,拎d野食黎,有時夜晚訓唔著,又會亂諗野,始終唔響屋企,感覺都係唔自在。最多人上網都係夜晚,所以成日上網上到兩點幾,有時傾電話仲會傾到三、四點添呀,我都算係幾激下既病人嚕,朝頭早無十一點都唔起身,咁早起身托咩?電視又無野睇,唉...我要自由呀...

咁落去真係唔掂,而且萬聖節就到喇,我約晒朋友仔果日出去玩架嘛,響醫院請假出去又煩,唔通夜晚玩到一、兩點,然後成個死人粧咁番黎咩,嚇死d姑娘姐姐呀,於是我每晚就響度諗定聽朝同醫生講野既台詞,大約係「醫生,你俾我走喇,你日日留我響度就淨係抽血,又無其他野做,呢度中央冷氣呀,搞到我咳得勁左好多,遲早咳甩肺呀,仲有我出去仲要做野架,全家上下等住我開飯架,醫生...你網開一面喇...」,本著橋唔怕舊,於是我就日日都講d差唔多既野,終於佢頂我唔順俾我出院喇,yeah !成功響二十九號出冊!感謝主。

(美華02年頭進行骨髓移植,初時癌細胞已消失了,但在四月就復發,一個月後的五月三日就離開了。 多謝大咀鳥肥豬提供正確資料!羊媽媽後加)

v哇鬼叫萬聖節

::::::星期三::::::十月三十一日::::::

好心急好心急,籌備左一個月,耗資千萬...個腦細胞,花費一百...都唔洗,既紙扎 公仔裝,今晚終於可以登場喇。成個月前已經約好isiah,一齊參加中心呢個萬聖節 活動,但上個星期佢又話臨時約左第二個朋友去睇show喎,叫我同其他人玩,嗚~ 可憐既我除左識isiah一個之外,就唔識中心其他人喇,叫我同其他人玩...即係叫我 同街上面d人玩無分別呢,唉...但佢甩底意已決,我都無謂迫人陪我喇,唯有積極 咁約過其他朋友喇。

初初呀龍話黎得架,但尋日又話要今晚要加班,無計喇,呀如又要番學,呀哥又要 番工,karry 仲要番民安隊,守蘭桂坊守到兩點添,嘻,不過最後我都約到兩個朋友仔,義犬bee狗同佩琪,再加埋中心其他人,唔怕無得玩喇。

好彩前日出到院,唔係今晚到幾難有得去玩呀。嘻,天時、地利、人和,上天真係 對我好呀!上車果陣我打趣同bee狗講「好緊張呀,希望唔會無喇喇取消喇!」, 正當我打算出發早d番尖沙咀中心化粧既時候...電話響起...電話裡頭既人同我講, 中心既萬聖節活動取消,起初我都以為佢係講笑架,但愈聽愈真,於是打番去中心 搵搞事人呀頌證實一下,嗚...係真架,唉...真係哭笑不得,原本應該開開心心出發 架嘛,而家...響車上面反而顯得好無助+無奈,甩我一個底唔緊要,最弊我仲搵左 兩個朋友架嘛,我真係唔知點同佢地講呀,佩弄仲特登買左件旗袍諗住今晚著添架 ,人地無責任心,但我對朋友一定要有,所以點都好喇,今晚我地三個自己玩囉, 一於依原定計劃行事喇!

哥哥車到我同bee狗出去尖沙咀,我見佩琪仲未放工,就陪呀哥一齊等車位嚕,但 睇晒成條街既米錶,最快都要四個字先滿呀,於是呀哥就等四個字果架嚕,點知... 等左到四個字之後,有條友著住拖鞋咁走過黎入米錶,唉...無奈,唯有等過第二架 喇。如是者等左九個字,終於爭到一個車位喇,嗚...滾動,於是我同bee狗就去肯 德基同佩琪匯合喇。雖然相距只係幾個街口,但係我為左方便,所以就咁著左對死 人紅鞋出黎,對鞋其實係我貪平響羅湖城買架,得果三十六碼,我隻腳起碼三十八 喇,尋晚已經剪左後面條帶,等著得無咁辛苦,就係咁對鞋就變左拖鞋,以為好好 多喇,點知...著耐少少先覺得個鞋底好硬,行到隻腳就抽筋,而且我成個人d衫都 深色,著住對紅色拖鞋響尖沙咀行喎,無人望就奇喇...望咩望,唔俾我住響呢度架 ?


化粧之前響電腦影番張靚相先

好開心呀,我最鐘意食肯德基既雞翼,於是叫左個餐,係有五隻龜翼同個沙律,我 都唔明點解佩琪同bee狗可以食得咁快,佢地乜都食晒既時候,我仲係食緊第三隻 龜翼,唉...佢地仲笑我呀,話我搽左黑色指甲油,一望到我拎住隻龜翼就唔開胃喎 ,哼哼!最後我同果幾隻龜翼由六點糾纏到七點左右,終於解決左佢地喇。

我提議不如去海運化粧,因為果邊平日都唔係咁多人,如果有時間我地仲可以行下 玩具反狗城,睇下d扮鬼裝備嘛。由金馬倫道行過去都幾遠架,今日都唔知吹咩風 ,成個尖咀都超多人,唔通因為係萬聖節?千山萬水終於行到去海運既玩具反狗城 喇,哎呀...好多人呀,響度化粧實勁多人望喇,於是走上一層,即時少好多人,但 又撞正人地麗星遊輪上船處...呀...是但喇。


響個螢幕度影番出黎

我同佩琪一坐底就係咁化係咁化,我要化得白d嘛,於是野野重手,而bee狗就無 無聊聊咁影下我地,佩琪化得好淡呀,個粧似平日去街多d,我同bee狗勁話唔夠 濃唔夠濃,於是迫到佢化到好濃先收口,嘻,咁先似鬼架嘛。我兩邊面要畫個圓形 呀,哇,好難喎,一定要同位置,又要同大細喎,如果唔係好肉酸架,到時唔係嚇 親人,係笑死人呀,第一個圓形畫得幾好,因為唔洗怕唔對稱嘛,但第二個圓就有 d難度喇,好彩都難我唔到,第一關總算通過喇,到第二關喇,就係畫個咀仔,哎 呀,畫左幾次都畫得唔夠好,激死。好喇,我地乜都整好喇,仲爭未著件死人衫, 嘻,我已經沾沾自喜咁同佩琪講,人地見到實好羡慕我地咁勇呀,點知...落到玩具 反斗城果下,先知原來我地都唔係最正,有好多稱得上專業水準既鬼響度飄黎飄去 ,哎呀,即時給比下去,唉...唔想見人呀,我地仲遇上一個差唔多七尺高既吸血疆 屍,靚鬼呀。


靚仔疆屍先生

諗住一係唔扮,一扮就一定要最激,點知以為自己已經好激既時候,先知人地仲激 ,唉...簡直淨係想望住個地下,原全唔敢望人,怕人地睇穿左我地想激又激唔起既 真相,我地三個行呀行,就行到海運門口喇,於是我就打開把油紙蔗,室內開蔗邪 丫嘛,所以出到黎先開。之前都無乜人留留我地架,但一開蔗,好似所有人都望到 我地咁,佩琪仲話好恐佈,叫我唔好蔗佢喎,我地慢慢行,經過馬頭去到文化中心 附近,哇!有一家人主動繳請我地影相呀,好開心呀!以前都係我搵人地影相,從 來都無人搵我影相架,即時重拾自信,佢地仲勁講影左出黎會唔會唔見左我同佩琪 呀,又問我地d手勢同步法係唔係練過,哈哈,讚到我地勁開心。黎到文化中心呢 邊,我地都算係化粧得最專業果堆喇,我地繼續行,繼續有好多人搵我地影相,又 有好多途人一見到我地即刻尼埋,或者大嗌「好恐佈呀~~」、「係唔係真架?」 ,嚇到人果下真係好有成功感架。雖然有好多人都扮鬼扮馬,但d女仔多數係扮靚 多過扮鬼囉,就咁戴頂巫婆帽就算,見得最多人扮既咪係奪命狂呼嚕,就咁戴住個 面具已經算係扮左喇,所以最激都算係我地兩個女仔,全個海旁既目光都係落響我 地身上,又多人搵我地影相喎,真係好似大明星呀,估唔到扮得最樣衰果日最受歡 迎喎。


好多鬼呀~~~~

雖然我地嚇親好多人,但...我竟然俾一個高度到我肚腩既細路嚇番轉頭,佢地幾個 細路係同媽咪一齊架,個個都係戴住奪命狂呼面具,佢地一見到我地就即刻跑過黎 ,其中一個個面具仲識得流血架,佢衝過黎果下,我第一時間係覺得「唔似細路喎 ,似一個生得矮既大人多喎...」佢係完全唔驚人架,走到過黎係我面前起勢咁笑, 仲要係笑得好恐佈果種,呀...好驚呀...我咪走囉,佢又追鬼住我,嚇到我死呀,最 後係由佢呀媽叫番住佢唔好嚇我,嗚...十九歲女竟然俾個細路嚇親。

行到尖東果頭開始比較少人扮鬼喇,於是我地就折返文化中心,離遠已經見到有班 成二十幾隻鬼既,點知佢地一見我同佩琪即刻成班跑過黎,嚇到我搵把蔗蔗住自己 ,原來佢地想搵我地影相...嘿嘿,嚇死。之後仲見到一個裝扮同我一樣既女仔呀, 不過佢兩邊面個圓形係...兩張紅色紙黐上去架,好頂癮呀,姊妹重逢梗係要影番張 喇。行到近馬頭果度,我離遠已經見到...頭先個細路呀,我已經十分低調,兼用蔗 蔗住自己,但...仍然俾佢發現左我,佢即刻又跑過黎,我咪起勢咁走囉,走左好遠 ,擰番轉頭,佢仲響我後面呀...嗚...好驚呀,黐線架,邊有細路仔咁唔可愛架,見 到紙扎公仔咁恐佈都唔驚,仲要追住黎嚇...最後都係佢呀媽嗌住佢唔好嚇我,佢呀 媽話今晚番去會打佢喎,嘿嘿,嚇死。我地又遇到幾個女仔,可能佢地第一年出黎 玩喇,走過黎響我地面前講「咦?不如我地影相囉!」,我話「咦?都好喎。」, 咁既開場白我都係第一次聽咋。有個賣花既叔叔見左我地幾次,次次都話我地扮得 好正,最後果次仲話要送支花俾我地,但我地個look拎住支花會好似賣花女架喎, 唔好浪費左人地支花喇,於是我就話「我地淨係要劍蘭同菊花架咋。」,嘻。


姊妹

差唔多十點半嚕,我地下一站係蘭桂坊,當然揀撘地鐵喇,夠多人嘛,於是就沿廣 東道轉北京道出去地鐵站,每逢等過馬路,就同行過d車揮手,好客香港丫嘛,然 後車上面既乘客又會同我地揮番手喎,勁正呀。嘻,唔知點解今日地鐵站好似特別 少人既,就算係我地撘果一架地鐵,都好少人,仲諗住可以嚇下人架嘛,無所謂喇 ,我地就響地鐵上演一幕「幽靈人間二」,正到暈呀。去到中環落車,響月台又俾 人捉住影相,哇呢...呢度勁多人呀,淨係地鐵站都多過尖沙咀好多,最衰頭先同佢 細路玩賽跑喇,搞到我開始有d累,一出地鐵站,我同佩琪又再成為蕉點,行到蘭 桂坊附近,即時引起哄動呀,原本好迫架,但d途人圍住我地,逐個逐個同我地影 相,我地就好似佈景板咁,望完呢面又望果面,做埋同一個死人動作,影左差唔多 十分鐘人群先慢慢散去,哇呢...我就快暈喇,我件中國衫係短袖架,驚凍所以之前 著出街件背心冷衫著左響入面,但太多人,又加上太興奮,而家淨係覺得好熱好焗 ,唯有行到勁遠去搵廁所喇,我而家先知咩叫舉步難行呀,行多兩步就有人捉住我 地影相,幾經辛苦終於行到去廁所喇,得三格,仲要幾多人下,等廁所好自然就係 對住個廁格度門等架喇,佩琪好醒目咁叫我唔好對住度門等,唔係嚇親出黎果個, 嘿嘿,厲害!我都醒唔起自己今日係特別靚女,嚇親人就唔好喇。


幽靈人間2

除左入面件冷衫即刻舒服好多,繼續發癲扮鬼嚇人!我地企響馬路邊,同電車上面 d人揮手,好正呀,電車行得慢嘛,呵...好玩呀好玩呀,都差唔多十一點幾喇,原 來入蘭桂坊要排隊架,我兩個展翅大使朋友仔,呀明同呀dick黎左join我地,一行五個人 一齊排隊嚕,哇...要兜好大個圈呀,愈行愈辛苦,原本好熱心要入去蘭桂坊玩,但而家已經 無乜心機喇,開始仲有d想嘔、想暈、腳軟,無端端佩琪無問係唔係唔舒服,哇, 點解你會知既?佢話見我唔講野所以估到我唔舒服喎,勁呀!唉...我都係放棄喇, d差佬封晒路,仲要行多幾條街先到,剛剛好響前面唔係好遠有個轉彎位,果度係 間商場門口,有幾級樓梯可以俾我地坐下,又唔會阻住條路俾d差佬鬧,呼,有得 坐梗係happy喇,即刻唔理咩鬼樣唔鬼樣,佩琪同bee狗都好累呀,最慘係bee狗 ,佢要幫我地兩個拎晒d野,又要成日幫我地影相,真係辛苦晒佢喇。


嚇親自己

我地剛剛好坐響個轉彎位度,所以好多人都見唔到我地,但又因為呢度高左幾級, 好似一個台咁,所以又好多人見到我地喎,於是想休息都唔休得太耐,一陣又有人 走過黎同我地影相,真係做死人喇。d差佬都唔知做乜,成日都唔俾人地同我地影 相,話我地阻住條路喎,哇,大佬,我地已經閃埋一二邊架喇,咁都唔俾。

當我繼續坐響度擔住把死人蔗「等客仔」既時候,竟然有人飄過黎問我「呀咩?」 ,哇!係小may呀,好開心呀,當然即刻捉住佢影番張相喇,嘻,今日唯一就係撞 到小may一個咋,嘻,邪呀邪呀。

我地玩到成一點,呀哥過到黎接我地,終於我地都係要閃喇,今晚真係超好玩,臨 走過馬路果陣,又俾人捉住影相,不過今次因為個個都等過馬路,所以又係圍晒圈 咁圍觀,仲有幾個拎住大相機,類似記者既物體響度影我地呀,哇哇,大明星呀, d閃光燈勁閃勁閃,嘻,好爽呀。上車之前仲見到有個男人,貼左條「染血」既姨 媽巾響個額頭度,哇...好激喎。

上左車之後我地仲未玩夠架,過紅隧果陣,不停同隔離車揮手,有一架的士載住幾 個遊客,個的士佬一見我地咁既鬼樣,即刻叫班遊客睇,雖然好多人都顯得好不屑 ,可能覺得大吉利是卦,不過亦有好多人同我地揮番手,嘻,真係好鐘意大時大節 出黎玩呀,可能有d人會覺得好無聊,但做人下下都咁有聊,咁咪少好多樂趣囉, 出到黎,成條街都係自己朋友咁,我同你揮下手,你又走過黎嚇下我,嘻,原來香 港人都有可愛既人面架。雖然今日原定同成班人出黎癲,不過最後得番我地三個人 ,竟然仲好玩喎,起碼鐘意去邊就去邊,我諗我十九年黎玩得最癲都算係今日喇, 仲好威添,由尖沙咀哄動到蘭桂坊。

差唔多兩點幾,哥哥車晒佩琪、bee狗同呀dick番屋企,我地就去d閂左門既士多搵 Qoo牌,嘻,足足立左兩個呀,卡哇伊呢!

最後最後都係要多謝bee狗,唔係佢我地今晚都唔會玩得咁開心,因為我地d野太 重,搞到bee狗膊頭痛左兩日,好內疚呀,無以為報,唯有...唔偷你d狗糧食喇。

相睇多d相?按我喇!

幸福就係咁簡單,之嘛

::::::星期六::::::十一月三日::::::

呵欠,今朝八點幾就要起身喇,因為今日約好左呀頌入上水耕田呀,而咁橋媽咪呢幾 日又響上水廣場開工喎,咁我就可以同媽咪一齊入左上水先,我記得大快活有個好好 食既早餐架,嘻,可以順便食埋添。原來九龍塘去上水都好遠架,差唔多成個鐘頭車 程呀,入到去剛剛好肚仔餓,不過我以前食開果個早餐無左嚕,唯有食個炸豬扒煎雙 蛋喇,都好正呀。食完野媽咪就要去開工喇,咁我就留響大快活度上網,話時話,而 家d快餐店都幾先進,除左有得上網,仲有得好似HMV咁試聽CD,好high呀。上上 下網有個細路女同細路仔玩我隔離部電腦,但個細路女就坐左響我張椅度,哇...雖則 我個pat pat 係比較細,但你無可能霸我半張椅架嘛,我唔慣同陌生人咁親密架喎, 其實佢坐都無所謂,最弊佢不停咁郁,我都唔知點睇網頁,於是一見佢走開我咪移開 d張椅囉,但佢一番到黎都依然有本事坐到我張椅,唉...算...好彩電話響,呀頌佢到 左火車站喇。

今日係分兩批架,頭果批就係一班中四既學生,中午入去拍一段偷渡客既短片,第二 批就兩點鐘響尖沙咀中心出發,入黎耕田,第二批果班我全部都唔識架,橫掂我留響 屋企都係無野做架喇,所以索性早d入去,話唔定入面d景好靚既呢。七個中四既男 仔,死喇,一次過見到咁多男仔,唔敢講野添,好彩佢地個miss都有去,於是我就成 日捉住個miss,話晒我地都係唯一兩個女性嘛,原本係約十一點三架,但有位同學遲 左成粒鐘,結果我地幾個就足足企左一個鐘,企到成隻企鵝咁。

我地十個人分兩架的士,入去蕉徑村,哇呢,好曬呀,我已經特登著左件背心,但都 覺得勁熱,我地響村口間士多等班學生買完野,就一齊慢慢行入去喇,條路好熱好長 ,咪講話我呢個弱質女子行到反晒白眼喇,班中四大漢都行到嘔晒白泡呀。其實蕉徑 村都幾得意架,令我覺得自己好似番左大陸咁,因為成日見到d村民駕住d不知名的 小電車,而且就算開電單車佢地都唔戴頭盔架,呢條村就好似自成一國咁,自給自足 ,周圍既田都種滿晒菜,而且比起響街市買既大好多,只不過係經過望一眼,已經好 想親手擇番個黎生食喇,嘻,我相信用佢黎打邊爐一定會好好食。

行左三個字、曬足三個字終於到喇,未到之前我仲以為會係好似音樂農莊果類,俾d 小朋友用個鏟仔產兩下就當係耕左田,一切都會刻意佈置得好有農田feel,點知...見 到先知...呢度係廢田一大塊+破爛鐵皮屋一大間,嘿嘿,雖然唔係我想像中咁靚,不 過而家又有另一番風味丫。我地到達後坐響鐵皮屋門口,個個都唔出聲,因為頭先既 一段路已經行到大家好累嚕,班中四既男仔梗係除衫喇,咁鬼熱,可惜...我同miss只 可以繼續捱熱,好彩隔離有個井,可以俾我洗個面,cool!好涼呀。


廢田一塊

坐夠喇,班學生就開始換晒d佢地覺得似偷渡客既衫褲,出去拍短片,我同miss同呀 頌就留守鐵皮屋,同租屋俾我地既伯伯傾計,伯伯係講客家話架,呀頌同miss都係讀 書人,一定有語言天份架喇,所以聽得明喎,而我就聽到頭頂一大個問號,於是就走 出去左影右影。旺角人多車多,空氣污糟得要成日遮住個鼻同口,但呢度呼吸既每一 口空氣都係最清新,好似經過空氣清新機過濾咁,真係好舒服,眼見既地方都係綠色 ,天空都係藍色,唔似得市區既天空,灰灰白白,一點生氣都無。

忽然好想食蝦條呀,於是miss同呀頌就打算陪我一齊行出去村中間間士多度,睇下有 無喇,但行出去條小路既時候,剛剛有人響度燒緊草,原因係佢想燒大d條路,呀頌 男人老狗梗係唔怕喇,但我仲著住拖鞋架咋,燒一燒變左鳳爪點算!於是就捉住miss 行,呼,好彩都無事,平安去到士多,但結果...係無蝦條既,一場黎到,呀頌就叫左 碗麵,而我同miss就要左支可樂,哇...好好飲呀,從來都唔覺得可樂可以咁好飲架, 可能平時既可樂都係隨手可得喇,唔通呢d就叫身在福中不知福?可以飲到可樂都已 經算係幸福嚕。

飲飽食醉之後,miss就要走喇,而我就同呀頌兩個行番去鐵皮屋,班學生搞掂左偷渡 客d短片嚕,我都有睇番呀,勁搞笑,段片俾我既感覺就係...一班城市人扮傻仔...嘿 嘿。之後呀頌就捉住佢地幫手燒野草,塊田d野草足足長到成米咁高呀,呀頌尋日都 燒左d架喇,不過佢唔知流左d火水響條褲度,個火水筒同條褲摩左幾下之後...呀頌 就覺得勁痛,尋晚去左睇醫生,就話佢係液體性灼傷,所以今日燒草既公作就要交俾 餘下既男生喇,而我呢d弱質女子就負責用把簾刀割下草咁嚕,忽然覺得自己真係幾 鬼似女工,嘿嘿。搞到四點幾,第二批人終於黎喇,仲有死對頭isiah 都黎左呀,嘻 ,因為第二批人都係二十幾歲既,所以做野好快手,天黑前就清左一行喇,於是我地 就拖住好累既身驅離開喇...


做男仔真係好...

出番去上水我就去上水廣場搵媽咪,媽咪d同事個個都係由細睇到我大架,佢地都知 我病,所以一見到我即刻個個走過黎同我傾計,仲特登去買野飲俾我呀,嘻,忽然覺 得自己好似一個重要人物咁添,趁媽咪未放工,就走左入去esprit行下喇,哇...d呀 嬸同師奶好似唔洗錢咁,個個都一籃籃咁,仲要籃籃滿呀,等我睇下先...真係好平喎 ,有d好大條好暖既頸巾都係廿九蚊,d衫衫褲褲都係六十九咋,等我又搵下有無平 野先,不過d野俾人揀到亂晒,好似入左旺角d平價舖頭咁,而且好野一早都俾人揀 晒嚕,而家夜晚仲邊有好野喎,最後我揀左一對手襪同一條頸巾。red earth 五折呀 ,於是行完esprit再過去red earth ,足足買左二百幾蚊野呀,梗係喇,五折喎,即 係平一半喎,千載難逢呀,雖然入院前買左部dv,出院後又買左部dc,恆生指數(即 係我放響恆生銀行既錢)無左...一萬點...不過今次買野唔係真金白銀俾佢,用eps之 嘛,嘻,即時無咁肉痛(自欺欺人),增加進脹先係最實際,快d催game評果邊出糧 先得!到時又可以再買過,yeah。


媽咪既檔仔

媽咪九點幾先收好檔,於是我就捉左佢去陪我食車仔麵喇,好正呢好正呢,我要左碗 魚蛋麵,媽咪就要左個撈麵同油菜,哇...碟油菜...好好食呀!可能因為d菜夠晒新鮮 喇。食飽都成十點幾嚕,我地撘火車轉地鐵番官塘,嘻,再響官塘整多碗熱辣辣既豆 腐花,好暖呢,心情都即刻好d,原來開心既最基本條件就係溫飽。

阿伯教路放火::::::睇下::::::
齊心合力來開荒::::::睇下::::::
合法放火::::::睇下::::::
d魚以為d腳毛係蟲...::::::睇下::::::

前面笑完又喊<---->呀 咩 昔 日 發 傻<---->後面難得一聚