生日之旅

::::::星期一::::::十月十五日:::::: 今朝一早九點就起身喇，嘻，因為我地打算十點出門口嘛，咩事？今日係我既大日 子，我十九歲生日呀，年年生日都平平淡淡咁過，今年我想特別ｄ，我想離開平時 既生活環境，忘記自己係一個病人，去第二度過，長洲又好、大嶼山又好，嘻，最 後我地就諗到一個短線遊，就係去深圳玩喇，點知遇著唔知咩高交會(肛交會？)， 全個深圳灣既酒店都爆晒，ｄ房比假日仲貴，又無早餐送，原本打算住深圳灣酒店 架，但都無位，住香蜜湖又驚好舊好恐佈喎，Ｒ晒頭都唔知點好。媽咪近日日日都 打去旅社問邊間酒店有位，最後佢使出絕招，同個旅社姐姐講佢個女生日呀，嘿嘿 ，於是旅社姐姐就好努力咁搵到間兩人房俾我地喇。嘻，梗係唔只我同媽咪兩個弱 質女子去喇，仲有爸爸同哥哥，兩人房就當然係佢地訓地下喇，呵呵。 book到房就開開心心撘火車去羅湖喇，哇...平日早上都好多人番大陸呀，迫死羊喇 ，不過都無驚無險過到關，成功去到羅湖喇，媽咪要去羅湖商業城拎貨，嘻，而我 同呀哥就去行街街喇，今次黎一定要搵到傳聞已絕跡既玻璃介子！點知一搵就搵到 ，仲間間都有咁滯添，於是咪問下幾錢囉，佢一開價就...五蚊，下？以前一開價要 成三十五蚊架，我最平都係買過七蚊，仲要係買好多隻先肯平果種，哇...乜搞到咁 平呀？呵，益晒我喇，我睇第一間已經忍唔住買左十一隻喇，之後又買多五隻，哇 ，好開心呀，嗚，親愛的玻璃介子，我們又重逢了。我仲買左兩條靚靚既花花腰帶 、蝎子同魔鬼魚既毛毛公仔、十蚊既紅鞋，諗住萬聖節著架，哇，我就快失控喇， 而呀哥呢就買左部有線解碼器，免費睇有線喎，仲有得睇埋自選台添呀，噓，細聲 ｄ，犯法架。 哇呢，我都未試過一日之內俾咁多人叫做靚女架，個個走過黎sell野，第一句就「 靚女...」，嘿嘿，不過佢地見到ｄ夏蕙姨咁既樣都係嗌靚女架喇。大約兩點幾，媽 咪終於捨得走喇，於是我地響羅湖撘酒店專車去深圳灣酒店，上車無耐哥哥同爸爸就訓著左喇，勁喎， 我就梗係無訓喇，興奮呀嘛，半個鐘左右就到達目的地喇，check in果陣個小姐話 普通房滿晒，免費同我地升做豪華房喎，哇...梗係嫘飯應喇，貴成一倍架，普通房 →高級房→先到豪華房，足足升左兩級呀，然後一路行去，我就一路狂想間房幾大 幾大，唔知會唔會好似拍戲果ｄ總統套房咁正呢...終於行到喇...一開門...妖！咪同 普通房一樣，最多咪個景好少少囉，對住個花園，唉...失望失望，放底ｄ行李，我 地就落去食野喇，我叫左個干燒伊麵，一食...哇...好辣呀，我個口又痛喎，所以食 左兩啖雖然仲好餓，但都投降喇，唉...食得是福福福福福福... 食完野之後哥哥話想游水喎，於是我地就分頭行事，我捉左爸爸同媽咪陪我行下個 花園，有ｄ景都幾靚架，所以又影左ｄ相。嘻，呀哥個好肥呀，一落泳池都無左一 半水嚕，睇見佢游得咁開心，真係好鬼似細路仔，游左一陣佢就唔游嚕，於是佢番 上房沖涼，而我地三個就去行下文俗文化村出面ｄ小攤檔，睇下有無平野執，經過 有一檔賣椰青，個椰青好似西瓜咁大架，我又餓餓地喎，咪買左個黎飲嚕，但都唔 甜既，好似飲水咁，ｄ椰肉又淡毛毛，個椰青又重到死，我一拎上手就已經手軟喇 ，嘻，呀媽包底包底。我睇中左把油紙蔗呀，好適合萬聖節用喎，但佢一見我地係 遊客就獅子開大口，不過最後都係十五蚊成交，好野。 行晒附近既舖頭仔，都只係五點幾咋，睇黎今日都係提早收工架喇，都好既，今日 休息夠，聽日再出擊。哥哥提議不如去東門喎，但媽咪就唔係咁鐘意喇，佢話果度 好雜，ｄ野食又污糟唔適合我食，不過哥哥講到果度好似香港既女人街咁架，哇呢 ，話唔定可以執番ｄ又靚又平既正野喎，嘻，我梗係話去喇，結果...壽頭大晒，出 發！ 撘左六十幾蚊的士左右就到喇，響呢邊撘的士撘得特別豪既，行勁遠都唔跳一次錶 ，相比起香港，由官塘去九龍城都要咁多錢嚕。哇...呢度真係好旺好旺，好多人呀 ，周圍都係商場，條路又闊，唔會話好易撞到人。不過好多名廠賣既化粧品或者衫 ，同香港都係差唔多，就算商場入面ｄ賣衫既舖頭，稍為好睇少少既衫，價錢仲貴 過香港咁滯，睇黎買靚衫就一定無著落架喇。呀哥佢去左畫紋身，即係兩個星期左 右會甩果ｄ呢，我都好想畫呀，畫個響手臂，著背心都幾型喎，又唔係好貴，幾十 蚊一個，畫呀畫呀，但媽咪就第一時間阻止，佢話ｄ顏料蝕入肉，會有毒架喎，嗚 ，唔制呀，好想要呀，呢個情況呀媽梗係拿埋口面話唔理我，由得我畫架喇，唉... 咁我咪唯有好唔開心咁睇住呀哥畫囉...算...我自己番屋企用原子筆畫，仲畫得靚過 佢喇。 於是同媽咪去左買紋身貼紙囉，見到有對鞋好平呀，仲幾鬼靚添，藍色架，不過媽 咪話會刮腳喎，唉...紋身又唔俾，買鞋又唔俾，開始到我拿埋口面喇。話時話，個 商場既格局勁似九龍城廣場架，呀哥聽到我咁講，好 不其然咁指住印左商場名既banner ，原來...真係叫九龍城廣場...無得頂呀！去到大街，我又買左副太陽眼鏡，哥哥就 買左十幾隻dvd，媽咪就走左入間賣繩結既舖頭睇到唔捨得走，我同爸爸同哥哥三 個企響度，好似響麻雀館門口等呀媽出黎ｄ細路咁，我就發皮四話要番轉頭買果對 藍色鞋，於是哥哥就同我番去喇，睇多次，原來對鞋邊係披口架，所以起碼一定要 著襪嚕，結果...都係無買到，嘻，諗住番去搵爸爸媽咪既時候...俾我見到有間舖頭 掛左幾頂牛仔帽出黎喎，哇...我兩年前已經好想買架喇，但香港要成百幾蚊呀，點 買得落手喎，呢度買...可能平ｄ呢，於是就走入去問佢幾錢喇，佢一口價五十，少 少都唔肯平，不過因為我真係好鐘意，所以就買左喇，嘻，即刻開心番晒，好有型 呀頂帽，鐘意到戴住唔捨得除呀。集合番之後，媽咪同我去左睇假髮呀，嘻嘻，買 左一個碎碎地，好似wet妹既髮型呀，嘻。 睇下錶，原來已經八點半喇，最後我地諗住去陽光廣場上面間酒樓食飯，但一上到 去，間野鬼影都無隻，梗係唔入去食喇，都唔知俾乜我地食，於是大家又忘記左要 食飯呢個念頭，各自各去左行街，爸爸就去睇魔術，媽咪就去睇繩結，我同哥哥就 入左機舖打雞。之前我響羅湖城見到有ｄ毛毛蟲既攝石，好想買條黎掛響袋架，不 過十蚊又好似唔係好扺，呢度都有ｄ差唔多架，十蚊三隻呀，我同媽咪一齊去揀， 佢就揀左隻青蝏，我就睇中左隻烏蠅，隻烏蠅好真架，似到我都唔敢掂，咦？咁仲 有一隻揀咩好呢，不如揀...隻蟑螂喇(原來我個輸入法係無「甲由」兩個字既)，媽 咪即時尖叫話唔得，但我覺得掛響個袋度會好得意喎，再唔係當頭夾都幾好呀，於 是都係買左隻蟑螂，嘻，卡哇伊呢。 個個行到忘晒形，原來成十點鐘喇，於是急急腳咁走嚕，行過部貼紙機，媽咪又話 我地全家未影過貼紙喎，於是又用左兩個字去影貼紙。離開商場，周圍既舖頭都收 檔喇，我個口痛又唔食得麥記、肯德基喎，咪提議不如去大家樂喇，但爸爸話生日 應該食餐好架喎，最好決定撘的士出番羅湖城食。去到都十點半嚕，原來一入黑， 好多街童幫人開車門賺錢架，個細路黎同我地開車門，但我一落車就搶番隻車門黎 開「唔洗喇，我自己開得喇。」，點知佢佢都唔肯走開，結果我地梗係雞咁腳咁走 喇，爸爸話一俾錢佢，就會有好多其他細路擁過黎問拎錢架喇，好恐佈喎。 我地去左利苑食飯，好彩仲有好多人未走，爸爸、媽咪、哥哥早、午兩餐都唔飽， 而我更加係全日無乜食野野喇，於是火速點菜，而佢地因為趕收工既關係，都好快 上菜，我最鐘意食呢度既片皮鴨，今日生日當然唔例外喇，因為太餓，一上菜我地 就狼吞虎嚥喇，我雖然個口痛，但都食得好快，不過一開波食左四件片皮鴨就投降 喇，呼，食自己鐘意食既野食飽，果種感覺真係幸福。 食完野十一點幾，我地就撘的士番酒店，平時起錶係十二個半架嘛，但呢架車一起 錶係十六個一既？我地係咁講，但個的士佬都唔理我地，死喇...佢唔講野果種感覺 好陰深呀，唔會係賊車呀...上左公路之後，佢足足開到成百二米呀，好似玩緊賽車 game咁，逢車過車，上帝呀、佛祖呀，但求我既生日唔會同我死忌同一日喇，好 彩最後都安全番到酒店，感謝主，阿門。

千金難買一回頭

::::::星期二::::::十月十六日:::::: zzzz.....媽咪一早起左身嚕，而我地就訓到十點幾十一點，先捨得起身，哎呀，張 床褥軟得滯，訓到我腰骨痛呀，而爸爸同哥哥訓地下，就因為地板硬得滯，都係腰 骨痛既，嘿嘿。媽咪話十一點樓下就無得飲茶架喇，變左又要去果間勁貴既西餐廳 食野，所以我地就踢左爸爸同哥哥兩個落去開定位先，而我同媽咪就慢慢執好晒ｄ 行李先落去。落到去見到佢地已經叫到成台點心喇，鬼咩，ｄ車仔全部收晒工喇， 不過一次過叫晒咁多點心，都食唔切，好多都凍晒。唔知係唔係剛剛起身既關係， 我完全無乜胃口，淨係叫左壼香片，不停響度飲茶，咁黎茶樓係飲茶架嘛。 呀哥大我一個size呀 飲完茶我地寄放左ｄ行李，然後就向世界之窗出發！今日都幾鬼曬呀，雖然著住背 心，但都好熱。今日係平日，入場費都係一百蚊咋，我仲記得以前張入場卷有得影 自己張相上去架，不過而家唔知點解無左嚕。一入到去爸爸同媽咪就話要包架車仔 遊一個鐘，我就覺得唔多扺喇，不過俾錢既人話事，無所謂喇，呢一個鐘主要都係 響世界之窗入面既大路兜一個圈，如果見到路邊有咩靚境，我地就可以叫佢停車俾 我地去影相，我見到仲有入黎影婚沙相呀，係靚就靚呀，但一見到套婚沙，連我都 熱埋一份，好熱呀...就係咁行下影下就過左一個鐘喇。 全家福＋司機姐姐 我同呀哥炸世貿呀 落車之後我地就可以去行另外一ｄ大境點，第一站係日本，哇呢，好多櫻花呀(當 然係膠架喇)，有個魚池好多錦鯉架，媽咪同哥哥兩個響池邊，哥哥將咬完ｄ花生 吐落個魚池到，然後ｄ魚就一窩瘋咁撲晒上黎，呀哥吐得好happy，媽咪就睇到如 痴如醉，悶死我同爸爸喇，於是我就拉左爸爸同我去玩千鞦，個千鞦好高好高架， 嘻，好玩呢。世界之窗有五樣野係要另外俾錢玩架，一set套票四十五蚊就可以玩三 樣，行完日本之後我地經過「富士山環繞數碼劇場」，呢個就係其中一樣要俾錢玩 架喇，佢地三個都好有興趣喎，但我就好不屑咁覺得，車，海洋公園果個咪仲好玩 ，呢個實cheap雞好多喇，咪搞我，不過小數服從多數，唯有睇下嚕。因為我行到 好累，所以提早左幾個字入場，坐下、歎下冷氣都好嘛，原來陣間睇果陣係要戴3D 眼鏡架，即時又覺得呢度好落後，仲有呀，ｄ椅下面有好多電線一條條咁，好似都 仲係裝修緊咁，我同哥哥發現每一張椅後面都有兩個孔，原本坐緊個行果兩個孔唔 係對到正架，於是我地就坐前一行，對到正一正咁，但始終唔知係乜黎。終於開場 喇，旁白係講國語既，由頭到尾都唔知佢講乜，不過戴左個3D眼鏡睇又幾正喎，有 條海豚走過黎既時候，好似真係響自己面前咁架，我直情投入到忍唔住伸隻手去摸 下佢，掂到喇掂到喇，之後又有條蛇游過黎喎，好刺激呀，不過幾驚都好，合埋眼 咪得囉，點知...條蛇張大個口噴毒汁喎，即時有條水柱唔知響邊噴過黎，仲射正我 隻眼，哇！原來果兩個孔係咁用途架...嚇左我一跳呀，仲要係心跳加速果隻，媽咪 咪拿拿臨拎條毛巾俾我蔗鬼住果兩個孔囉，另一個孔仲會噴煙架，哇，嚇死我喇， 嗚...好Ｑ驚呀，媽咪呀...果兩個孔仲成日噴野，但因為我蔗住左，所以都算定番落 黎，以為今次實無死喇，然後...有一幕係好多老鼠走過黎架，車，老鼠，我都唔驚 既，點知椅下面好多條電線即時撩住我對腳，我仲要係著短褲架，嗚哇...痴線架！ 邊可能整到咁恐佈架，嚇到我尖叫呀，全個影院睇得最投入、最驚果個都算係我喇 ，睇完之後成個散晒，成身汗，仲腳仔軟添，梗係喇，俾老鼠爬過喎，我地一路行 番出去一路大讚套野好勁，有其他遊客見我地剛剛出黎，咪問好唔好睇囉，我地即 時叫佢一定要睇，正到無得頂呀！ 黑超女郎 響劇場行番出大路要上一條好長下既樓梯呀，嘻...我唔洗驚喇，因為我有「座駕」 ，哥哥~~~~(好嬌既聲音)，妹妹累呀...(我都打個冷震)，嘻，於是呀哥就揹左我 上去喇，嘻，我仲要得寸進尺，叫呀媽影相，影低我做西部牛仔既証據。 之後我地繼續行，一見靚景又影相，慢慢就行到第二樣要額外收費既「金字塔幻想 館」喇，呢個其實係我話想睇既，因為我成日都覺得矣及好神秘，好得意，但呢個 幻想館就...又唔神秘又唔得意囉，講解果ｄ電視全部都係講國語既，你考我咩，但 再行入ｄ，原來又有一個細既數碼影院喎，呢個咁細，應該無料到喇，點知...原來 又有噴水同老鼠爬既環節，真係俾佢嚇死呀。 之後爸爸同哥哥又話要去玩「大峽谷探險漂流」喎，即係好似海洋公園個急流咁架 ，但呢個ｄ景就扮晒大峽谷咁囉，我同媽咪就幫佢地拎晒ｄ野，費事佢地濕晒呀， 結果last衝落黎果下哥哥係濕晒既，嘿嘿，成條褲都濕晒果種，爸爸就因為按實件 雨褸，無事！玩完大峽谷，我地就花費左廿蚊，租左隻摩打船去個湖果度遊下，但 其實主要係大家都想坐下，而我又想補下個粧，淨番哥哥開船囉，佢兜左一陣之後 爸爸就提議由我黎開喇，於是我同呀哥調位，嘻，原來都幾好玩架喎，爸爸特登叫 我行ｄ窄路，初初都會撞架，但兜左ｎ個圈之後我已經好熟習喇，嘻，果然有潛質 學車喎。 天都開始黑喇，我地終於玩到最後一個機動遊戲，就係「亞馬遜叢森穿梭」喇，係 類似有一條有上有落有轉彎既滑道，如果我地架車開得快，離心力會好強，轉彎仲 會成架車打側咁，本來諗住我同哥哥一架車，媽咪同爸爸一架車咁，但我見到有兩 個遊客一上車就以超高速向前滑，嚇到我即刻話唔玩，咁媽咪就唯有陪我唔玩喇， 我地兩個行番去出口等佢地，唔夠一分鐘之嘛，已經見哥哥同爸爸玩完番黎喇，哇 ！唔好再快ｄ？但爸爸講到完全無野咁喎，佢勁叫我玩，搞到我又心思思，好喇！ 死就死喇，最多驚一餐之嘛，爸爸付責開車，要坐後面，我就坐前面，黎喇，準備 ，一、二、三！一開車果段路雖然係向上，但爸爸以子彈既速度進發，我淨係覺得 我好似衝緊上太空咋，嚇到我即時大嗌，之後佢先肯慢番ｄ，結果本來行一分鐘既 路，我地行左成個字，就連ｄ工作人員都覺得奇怪我地咁耐先番黎，呼...好彩爸爸 係一個好錫個女既安全司機。經過印第安射箭場，爸爸同哥哥又話要玩喇，真係好 似兩個細路仔咁呀，而我同媽咪就坐響側邊餵蚊囉...終於個天都黑齊晒，七點半就 會有表演喇，我地諗住睇埋表演先走，而哥哥呢就去室內滑雪場滑雪，八點幾再集 合，我同爸爸媽咪響廣場等呀等，等到七點半，咦？點解無人表演既？好多人都覺 得好奇怪，然後等候既人慢慢散去，都過左成三個字嚕，我先留意到星期一至五， 表演係響另一個地方舉行架，我地再去到都已經開始左嚕，唯有去滑雪場睇下哥哥 滑雪喇，不過...其實係睇下點扑多ｄ，睇佢跌到又爬番起身，真係有少少似一個學 緊行既ｂｂ仔呀，不過當然係超巨型果隻喇。 八點幾左右我地就離開世界之窗，番酒店拎番ｄ行李，再向羅湖進發，今晚我地去 左丹桂軒食飯，聽講呢間野係和記老闆開，所以食ｄ野好香港feel，而且基本上入 到黎全部都係香港人，都差唔多十點嚕，都依然係迫滿晒人，唔通真係咁好食？不 過ｄ野係整得幾靚既，食飽都十一點囉，過關，撘火車，番屋企，我既生日之旅就 係咁完左喇。 餵鴨仔 但係...................當我地四個都累到行屍走肉，離開旺角火車站月台，先至發覺 媽咪留左隨身果個手袋響車，哥哥即刻去紅磡搵，都已經搵唔到喇，我地響票務處 搞到十二點幾，媽咪梗係唔開心喇，佢唔見既現金仲多過今次去旅行所洗既錢，仲 有幾張信用卡、電話、我同佢既身份証同回鄉証，仲有........等我同對眼既數碼相 機...錢無左可以搵得番，但部相機入面既相係影唔番，可以同爸爸媽媽一齊去旅行 ，已經係我十三歲既事喇，仲有我張身份証... 爸爸去左車哥哥番屋企，而我就同媽咪撘的士番去，上車之後我就忍唔住喊喇，我 已經好耐好耐無試過咁喊法，番到我屋企依然繼續喊，結果...喊到兩點幾，我終於 收口喇，因為...我喊到流鼻血，仲要一直止唔到血，一張又一張染滿血既紙巾，全 家都出盡辨法同我止血，但都係無用，因為喊得太過累，最後我用張紙巾塞住個鼻 ，不出三秒我已經好快訓著，第二日當然係一早要番醫院喇，唉...數碼相機...無左 佢...日記再無色彩喇。

獎勵的一天

::::::星期四::::::十月十八日:::::: 尋日因為流鼻血，所以局住番左醫院，一驗血之下先知，白血球升得好高呀，正常應 該係十二以下，但而家總共有一百一十幾，其實果ｄ唔係真正既白血球，而係癌細胞 ，醫生話要入院打化療，我真係唔想，呢兩個月難得重獲自由，我真係唔想再被醫院 所困，但諗深一層，化療完出番黎，咪又係一條好漢，一樣可以好似之前咁去玩架， 唯有當今次係入去休養下，橫掂我差唔多日日都去街，都應該追番ｄ日記，既然入院 已經係必然既事喇，向好果方面諗點都對自己好ｄ。 今朝一早就有姑娘打黎叫我入院喇，哇...又話床位緊迫，第二日就即刻有位？一定係 醫生響度作怪，我梗係唔想喇，因為今日約左呀龍，我知佢唔會黎探我架，因為佢係 一個路痴，唔知幾時再可以見面喇，所以今日好想見佢，而我又未補領身份証同回鄉 証喎，於是媽咪就同姑娘求情，叫佢遲一日俾我入院喇，幾經辛苦，先至挨到咋，如 果俾醫生知道我咁危險仲唔肯入院，一定嬲死我。 於是哥哥就車我地去官塘海濱道影身份証相，上次果幅影到我成個菲傭咁，今次點都 要整番靚ｄ，一、二、三，笑...嘻，希望今次無咁樣衰喇，媽咪勁怨話以前張身份証 影得好靚，今次再樣好醜樣，車...你自己整唔見既，仲好講，整唔見埋我果張，唉... 上次就八月十八影，好意頭嘛，發一發，點知兩個月後既今日，要影十月十八，都無 意思既，唯一意思咪係我十九號會響醫院囉。補領身份証要三百九十五呀，我地仲要 兩個人，真係肉都赤。之後我地又要去中旅社補領回鄉証，頂佢...扼錢呀！明搶架！ 一張要五百二十蚊喎，我地兩個加埋成千幾蚊呀，哇！回歸祖國咋喎，洗唔洗咁貴呀 ，真係討厭大陸呀，香港都回歸左喇，折扣都唔打個俾我，無良心，見媽咪無左幾千 蚊，我咪幫補番二千蚊囉，橫掂我ｄ錢放響銀行都無用架喇。 8-18影既 10-18影既 搞掂晒我就可以去將軍澳搵呀龍喇，有時見佢一個人住，屋企立立亂，佢個人又咁單 純，真係有少少唔放心佢架，雖然佢高過我又大過我，但佢響我眼中就好似一個小朋 友咁，要人照顧。本來諗住拎ｄ盒裝紙巾上去架，但最後我都係買左兩打可樂，仲有 兩個檸檬，果ｄ可樂重到我搬都搬唔郁，好彩我地約左響新都城等，佢一見到ｄ可樂 ，即時好驚訝咁問我做乜買咁多，我無理由話擔心佢響屋企無得飲架，好易令人誤會 架喎，於是我咪話係我自己無端端想飲檸樂，見可樂平咪買多ｄ囉，唔知算唔算牽強 呢？我地又走左去食粥，食飽之後佢就話唔想撘車，不如行番去厚德村喎，又講到好 近咁，是但喇，橫掂拎住成打可樂果個又唔係我，呼...點知行左成四個字先到，真係 唔知好嬲定好笑，上佢屋企既主要目的係佢話想整多ｄ mp3落電腦，但單撈又慢，又 唔係首首有，所以我就燒左兩隻mp3既碟拎去同佢整嚕，整好之後我地又聽下歌，一 邊飲檸樂一邊吹水，七點幾左右佢話要去番去佢呀媽屋企食飯，於是我就call哥哥黎 接番我走喇，「呀龍，你要好好保重呀。」。 每次出街，無論去邊，我都一定會帶住部數碼相機，而家無左真係好唔慣，見到靚既 野又唔可以影低同大家分享，聽日就要入院喇，想同朋友影相都唔得...不如...而家即 刻去買喇！於是就叫呀哥車我出去旺角喇，聽聞數碼攝錄機一樣可以影相架喎，咁不 如貴多少少買部DV 喇，結果用左六千蚊，買左一部panasonic既DV ，滿心歡喜咁 番屋企喇，不過...買左之後先知，佢所謂既影相，只不過係響個viedo入面cut 番ｄ 相出黎，仲有...要另外再買一個hardware 先可以放ｄ viedo入電腦...唉...都怪自 己買得太心急喇，乜都唔清楚就買左，不過第一次拎住部viedo 影黎影去又真係好開 心既，算喇！六千蚊放響銀行，同六千蚊買左部DV 放響屋企都係一樣之嘛。 聽日要入院喇，希望可以快ｄ番黎屋企喇。