豬海之旅

::::::星期六::::::九月一日::::::

病左咁耐我都未試過離開香港呀,因為始終離開左香港,如果出左咩事都危險嘛,但 今日上去中山係拜神,即日來回,應該都唔會太驚既,最多咪好似入左轉長洲玩咁。 今朝一早六點就要起身喇,出面好似好熱,但又落晒雨咁,真係唔知著咩衫好。上到 去d衛生咁差,媽咪話都係自己拎d野去食算喎,唉...拜神呢度好多野都唔俾食架, 牛就呢世唔食得喇,雞、雞蛋、雞粉、糯米雞、cd雞、相雞、md雞...總之係雞或者 雞蛋製品如麵包,好番之前都唔食得,就連炸過雞既油同切過雞既針板都唔得,唉... 去麥叔叔食野,我淨係可以食雪糕咋,唉...原來公仔麵同杯麵都有雞粉架,嗚嗚~~ 媽咪都係帶d餅乾同腸仔去俾我食咋...好似好慘咁。

今日除左媽咪之外,爸爸同麻麻都會去呀,好似去旅行咁。我地七點半左右響尖沙咀 港外線碼頭上船,好野,有窗口位坐呢,最衰今日落咁大雨喇,影唔到靚靚風景相。 興奮既心情平伏落黎之後,都係時候訓下覺喇,原來呢隻船會經過青馬大橋橋底架, 響橋上面就行得多,響橋下面都係第一次。

九點鐘我地就到達豬海喇,原來仲有好多人上黎打哥爾夫球,個個個袋都大過個人, 佢轉一轉身都差d撞左我落海。本回鄉証張相影到我成個通輯犯咁,佢左睇右睇先肯 俾我過關,因為我地第一次黎,唔知點去坦洲,好彩有好多人都係上黎拜神,有個大 師兄就同我地一齊撘的士去,佢一上車就話「坦洲,呀伯果度。」,然後個司機就識 去嚕,哇...原來都幾出名架喎。平時撘的士,一上車就係扣好安全帶,但今次連前坐 都無安全帶,死喇,唔係好習慣添,大陸d車又左片右片,好似玩緊賽車咁。由碼頭 撘車去坦洲,大約要六十蚊,十蚊雞起錶,又耐先跳一次錶喎,都要六十蚊,即係都 好遠下。哇...我咁大個女都未試過去豬海架,好似都幾多野玩咁喎,最衰即日來回喇 ,唔係可以玩下散下心嘛,響香港日日都響屋企,就算約左朋友都係出黎吹下水,都 好耐未真真正正玩過嚕。

原來呀伯間廟真係好大架,好似住宅咁,d樓梯好窄,但有好多層,因為太四通八達 ,我都唔清楚真正有幾多層,不過每一個地方都放左好多好多佛像,大大細細都有, 仲多過萬佛寺呀,每個佛都要拜,每個香爐都要插三支香,拜到腰骨痛都未拜完呀。 另一邊佛堂有一個幾層樓高既佛祖,望住佢好舒服,佢個樣好慈詳呢。太多樓梯同秘 道喇,好似一個迷宮咁,走失左都幾難搵番呀。

媽咪話澳門有登革熱,呢度都近澳門,所以一定要做足防蚊操施,由頭頂到腳趾尾都 噴晒蚊怕水,死未?唔毒死你都浸死你。

開始要誦經念佛喇,果間房唔係好大,但百幾人焗晒響度真係好熱,熱到我不停出汗 ,仲愈黎愈眼訓,最衰我又唔識唱果d佛歌喇,見佢地唱得咁開心,我都想唱埋一份 ,我坐響度乜野都唔做,然後...愈坐愈眼訓,其實個情況同響教堂一樣,個個都唱聖 詩,而只有我一個響度遊雲,唉...結果我偷偷地訓左一陣,好似以前上堂偷訓覺咁, 托住個頭黎訓,大約個幾兩個鐘之後終於念完喇,呼...去酒樓食飯。 頭先念經果陣,爸爸同麻麻兩個又唔知去左邊,而家話去食飯,又搵唔到佢地,我同 媽咪又唔知去唔去食飯好喎,我地又唔知酒樓響邊,唯有跟大隊走喇。媽咪又怕我行 得辛苦,一見到大師兄佢地三個人撘的士,就推我上車,叫佢地車埋我去,而媽咪就 自己行去,真係感動呀。但原來大 師兄佢地唔係直接去酒樓架,仲要去酒店check in 先,去到酒店佢地就留左我一個響的士等,哇...好驚呀,唔好拐我去賣呀,架的士郁 一郁我都驚佢唔知會車我去邊,我諗定晒架喇,一見勢色唔對路就跳車!好彩最後都 無事...呼...去到酒樓先知原來爸爸同麻麻一早到左,唉...反肚。

食飯果陣我地同同台都有傾有講,而我都有講野...食完之後我就拉左爸爸去行街,事 後媽咪話番俾我知,我同爸爸走左之後,同台兩位女仕同我媽咪講「你仔仔好似爸爸 喎。」,下!唔係喇fa,我女仔聲架喎,佢地以為我係未發育果d男仔...

雖然大陸d野無咁靚,但勝在夠平嘛,我最鐘意尋寶架喇,響平價貨之中一定會搵到 正野既,行左一陣,我同爸爸都俾一間賣釣魚用品既舖頭吸引左過去,我買左一支好 得意既魚干,申長左之後一支竹咁,勁似古代片d俠客,咬住條草響河邊釣魚果隻, 正到暈呀,我仲買左個魚網,嘻,可以響沙灘網d魚仔玩嘛。而爸爸就買左一支魚干 、一個搞搞、同好多好多鉛,哇...好想去釣魚呀!之後我又買左好多平野,開心呢。

番到佛堂...響同一地點,再黎念多次佛經,飯氣攻心既關係,我又偷訓左一陣,念左 個幾兩個鐘之後,都差唔多三點幾嚕,我地都要番香港嚕,不過...出面落超級大雨呀 ,由佛堂行番落大馬路要經過一段好長,好斜既路,而我地係行落,死喇,會唔會企 唔隱架,大雨到個天都變晒色,好驚呀,好彩都有驚無險,落到去截的士。架的士漏 水架,上車果陣我已經見到我坐果個位成個水池咁,但太大雨喇,根本無時間抹乾再 坐,唯有照坐喇...好濕好濕...

撘番船番香港,本來媽咪話撘的士番屋企架,但好彩的士排晒長龍,我咪勁話撘巴士 嚕,呵,又慳番一次喇,不過呢架巴士無冷氣架,所以都無電視睇,嘻,無所謂喇, 有得撘巴士,遊下車河已經好開心嚕。

今日個傷口仲好痛呀,痛到左手完全舉唔起,著衫著到成隻蟹咁,傷口仲有少少流血 蹟像,希望明天會更好喇。

::::::星期一::::::九月三日::::::

哇呢,期待左今日好耐喇,今日係三舅父同三舅母註冊結婚,嘻嘻,響我記憶中,我 都無參加過呢d儀式既,所以好緊張呀,一定要著套靚靚裙去先,正所謂「唔係猛龍 唔過江,唔係豬扒唔化粧」,好,我今日就扮下豬扒喇。

今日要番醫院覆診,不過如果睇到一點之前果一輪都應該無乜問題既,但哥哥車我地 番醫院果陣塞車塞到嘔呀,成粒鐘先番到去,所以排隊排好後呀,本來一點前無得睇 架喇,不過姑娘幫我地打尖,睇左我地先,但搞到有兩個人要睇兩點之後呀,有d過 意唔去添。

醫生一睇我個傷口就話一定要"蚊"左條喉喇,我梗係死都唔肯喇,佢就話俾多三日時 間我,如果星期四番到去都係好肉酸的話,就一定要"蚊"喎,呢三日就每日洗三次傷 口,希望會好d喇。

見完醫生哥哥就黎接我地,之後再去旺角接舅父,好慘呀...舅父架靚車...俾人偷左呀 ,嗚~~哥哥話係因為我地果日上大霧山,俾人睇中左喎,幾日之後有日零晨四點幾, 有人去停車場偷左舅父架車,之後一前一後咁衝閘走左...唉...我好似間接整唔見舅父 架車,好過意唔去添,唉...我又唔夠錢買番架車俾佢喎,唯有自己整左隻「同居蜜友 」翻版黎俾舅父解下悶喇。

我地兩點幾就到達屯門政府合處,好緊張呀,三舅父黎左先,之後三舅母同bb都黎埋 喇,bb今日好似好鐘意我咁喎,不停咁爬過黎,死喇,你唔好扯甩我個假髮呀,呢度 咁多人,唔笑死都瘀死喇。嘻,我見bee狗狗都係住屯門,咪叫佢出黎陪下我嚕,點 知其他親戚見到,以為我同佢有路喎,哈,都傻既,主人點會同狗拍拖喎。

人客到親喇,要入去註冊喇,我坐最前一行,哇...睇到我好感動呀,如果我朋友結婚 ,我一定勁喊呀...太滾動喇。簽完紙之後呢,我地繼續留響度影下相咁,最衰我有勁 多野唔食得喇,所以之後佢地去食飯,我都唔去得,咁又係既,到時碟碟都香噴噴, 真係幾難忍。

因為細舅父架車無左,所以都被迫同我地一齊早走,之後佢地去左餐廳食野,而我就 同bee狗狗去爬蟲館,哇...好搞笑呀,隻龜超級大隻呀,仲要兩隻疊住唔知做緊乜咁 喎...火噴噴呀...原來龜會叫架,哈哈,正呀。

之後我地去餐廳搵媽咪,佢叫左個焗豬扒飯我食呀,未到之前都仲好肚餓既,不過一 見到個飯就唔開胃嚕,唔係佢整得唔靚,而係最近幾肚餓都好喇,都唔係咁想食野, 唉...鬼咩...乜Q都唔俾食,食得既都係果d清菜、魚咁...我真係無乜心機食野。

食完晒之後哥哥就車舅父番屋企,之後車我同媽咪出加連威老道行街街,哇哈,好開 心呢,成十個月無行過街喇,買呀買呀,我仲為我個假髮買左d靚靚頭飾,呵~~有 頭髮真係好呀。其實我下午偷偷食左一條芝士腸呀,之後就開始成日想嘔喇,行行下 愈黎愈唔舒服添,哥哥又唔知車左架車去邊,我同媽咪唯有走左入去中心果度借左張 椅坐嚕,個叔叔超級好人呀,仲主動倒左杯暖水俾我,好溫暖呀...飲左之後都舒服好 多嚕,望住呢杯水,我諗起一個故事,響沙漠上面有兩個男人,佢地行左好耐之後, 都覺得好辛苦,終於佢地搵到半杯水,第一個男人就覺得「有無搞錯呀,得半杯,邊 夠呀,渴死我喇。」,而第二個男人就覺得「哇!真係太好喇,竟然有半杯水喎,好 彩我有呢半杯水咋。」,水,就係得咁多架喇,唔同人對呢杯水都有唔同睇法,遇到 唔好既事,人們都喜歡怨天怨地,但事實放在眼前,何不樂觀去面對呢?多謝你俾呢 杯水我。

界刀狂人

::::::星期五::::::九月七日::::::

落左兩個星期雨,今日朝頭早終於有太陽喇,可惜到左下午又落大雨,仲要紅色暴雨 警告添,弊喇,我約左兩個民安隊既好朋友出黎架,但我又聯絡唔到佢地喎,咁到底 出唔出呢,咁唯有頂硬上出喇。

今次係我第一次自己撘巴士出街咋,仲要遇上大風雨。我執左好多野,風褸喇、雨遮 喇、md雞喇、相機喇,真係要帶個藏屍袋先裝得晒。媽咪好唔放心我一個人出去呀, 所以就送到我上車先走,而我其中一個朋友又會響九龍灣上車,所以實唔怕悶喇。嘻 ,我朋友叫呀高呀,而佢又真係我咁多朋友之中最高既一個,有六尺一寸呢,要望住 佢黎講野,條頸都幾辛苦架,佢仲係典型靚仔,呵~~不過斯文既男仔唔多適合我, 而且佢都名草有主嚕,仲要係打風都打唔甩果隻,佢女朋友今晚晏d都會出黎,呵~~ 呀嫂呢。呀高響九龍灣上車,佢上到上層,竟然唔認得我喎,咁又係,我地都年幾無 見過嚕,佢就好似傻仔咁又走番落去下層再打俾我,真係笑死我喇。

我同呀高六點就出到尖沙咀喇,見到鐘樓開左門,本來諗住上去睇下風景,但轉個頭 就閂左門嚕,原來佢開到六點架咋,嗚~~下次要早d先得。又落雨又多人,咪走左 去五支旗干隔離間麥記度坐嚕,點知另外一個男仔kenji遲到,坐到我地兩個變左雪 條咁滯,搞到要走入廁所用個吹風雞黎暖下手,結果kenji成七點先到,一到就話八 點半就要走喇,哇...好一個遲黎早走,佢話如果我地陪佢睇鬼片的話就唔走喎,哇... 你都好俾面...套鬼片喎,原來我地都唔及套鬼片重要。見佢遲到咪屈鬼佢請食野嚕, 但成個麥記我淨係可以食雪糕,哈,結果我震震震震下咁食完杯菠蘿新地。

呀高叫左佢女朋友出黎呀,但佢女朋友電話剛剛無電,等左好耐又唔到,呀高就好鬼 擔心咁話要出去睇下,咁我地咪跟埋出去嚕,原來佢女朋友少出黎尖咀,所以蕩失路 。唉...之後就呀高同高嫂孖公仔咁行,然後我就同kenji一齊行,唉...我唔係唔鐘意 人地帶男、女朋友出黎,不過出到黎就好似佢地自己拍拖咁,咁其實都唔洗約我地喇 。

之後我帶左佢地上海運天台,本來係諗住睇風景架,點知有隻獅子星號停左響度,都好喇,當睇下人地做乜嚕,哇...點解睇到有個肥佬無著衫既?唔通佢游緊水?咦?唔係喎,原來連褲都無著,仲要企正響玻璃邊,哇...唔睇,生眼挑針呀,不過話時話都幾多人響船度換衫,喂,泊左埋岸架喇,唔係特登睇你,不過你唔好特登俾我地睇喇 。

八點半就散嚕,響馬頭竟然見到一架車牌777既舊車,哇...七月喎,好邪呢,過左一 分鐘,仲見到一架車牌係單字一個4,哇...呢架仲驚。

高嫂住官塘架,所以呀高、高嫂同我都係撘1A番屋企,佢地坐最後面果個位,而我就坐佢地前一個位,去到太子道既時侯有個二十歲左右既男仔上車,坐左響走廊的另一邊,我無聊咪望下佢嚕,點知我見到佢一坐低就扯高左手衫袖,然後右手拎住一把大界刀,將把界刀不停咁伸縮,好似想界落去隻手度,哇...我即時唔敢望,我唔知佢做緊乜呀,不過聽到佢不停將把界刀伸縮,「卡卡卡卡卡...」既聲音不停傳入耳朵,我仲要瞄到佢不時望住我,嗚~~好驚呀,我好驚佢衝過黎插我一刀呀,好彩呀高同我講野,俾佢知道我係同我d朋友一齊既,但呀高同高嫂兩個旁若無人咁,根本就唔知有個界刀狂人響度,我又唔敢講喎,嗚~~我淨係側晒面咁望住個窗,希望佢唔會襲擊我喇,驚到想喊呀。佢地兩個早過我幾個站落車,於是我咪跟埋去落樓下果層嚕,見 到多d人我都無咁驚,但一到站就成個下層d人都落晒車咁滯,我咪唯有尾埋響後面 ,希望界刀狂人落到黎見唔到我喇,原來佢早我一個站落車架,我見佢落左車向我屋 企果邊行,原來...佢係住我隔離果座架,好彩我叫左媽咪落黎接我,一見到媽咪我即 刻攬住佢呀,嗚~~好驚呀。

好多蚊呀

::::::星期日::::::九月九日::::::

今日又要入元朗學氣功喇,但因為爸爸要車姑媽去黃埔,所以十二點鐘就要出發喇, 呵~~我咪當遊下車河嚕。唔知係唔係食左三日化療藥既關係,好想嘔呀,但陣間又 要行氣功喎,咪求求其其拎左包零食上車食嚕,見去到元朗仲有時間,咪叫爸爸四圍 兜下,睇下見唔見消防訓練學校嚕,因為下個星期我有個好朋友響果度畢業呀,怕到 時搵唔到遲大到嘛,但我地淨係搵到八鄉消防局咋。之後爸爸去左車場睇車,我又八 八掛跟左去睇喎,點知勁熱勁曬,睇左之嘛,一陣上番車成隻手都紅晒,好似燒熟左 咁,慘喇...曬一曬之後更加唔舒服,但都黎到元朗嚕,頂硬上喇。番學校之前我已經 噴好晒蚊怕水架喇,點知一企定d蚊就衝過黎咬我,喂!你識唔識規矩架,噴左就唔 俾咬架嘛,隻腳不停趕蚊,咁點練功呀,另一個同學見到我隻腳抽晒筋咁去避蚊,就 好心借左支白花油過我,搽完總算係好少少喇,不過d蚊依然好惡,我行緊路都咬我 隻手,呵~~梗係一野俾我打死左喇,殺生添,善哉善哉。

其實未到真正上堂既時間架,不過一個星期番黎一次,梗係要扮到勤力d喇,等師兄一番到黎就見我行緊,咁佢實覺得我好乖喇。可能係因為今日好熱又好焗喇,愈行愈唔舒服,師兄黎到無耐我就頂唔順要休息下喇,唉...扮得唔夠勤力添,為左面子,我坐左一陣又繼續行,行多兩個圈之後,已經開始眼花花,想暈咁,唔掂...又要再坐,一坐低...想嘔呀!唔理三七二十一,即時用手按住個口,拎住支水衝衝衝去廁所,因 為廁所太遠,半路已經差d嘔左出黎,好彩...忍,結果衝左入廁所,對住個屎坑不停 嘔...好彩剛剛有人入廁所,見到我嘔緊就叫左個師姐黎睇下我,佢一入黎就問我做乜 ,下?你睇到我嘔緊架,唔通我去緊廁所唔閂門咩。

師兄見到我做到嘔,所以都無話我懶,淨係叫我抖下,然後今日早d走,好感動呀,於是我坐左一陣師兄就送我出門口,門口個師姐一見到我,就話「又係你...」,咁我又真係唔爭氣既,黎左三次,三次都早走,好彩我師兄同其他師兄師姐個個都幫住我,話我好勤力好乖。於是我就慢慢爬番出去大馬路叫爸爸黎接我,呼...得番半條命,打俾媽咪,媽咪半句問候都無,淨係話我好早走,應該響果度等等等等到好 番d,繼 續練功喎...哇...咁又係,唔舒服果個唔係你,你又點會明丫。

上左氣功第一堂<---->呀 咩 昔 日 發 傻<---->我自由嚕