內有惡犬

::::::星期五::::::八月二十四日:::::: 今日好多地方要去呀，首先一朝早要去九龍塘侵會睇中醫，見今日都唔係好熱，又戴個假髮玩下先，真係羨慕有頭髮既人呀，無形間這個假髮，竟然漸漸變成我的自尊心 。侵會中醫董教授係一個女人黎架，講普通話，所以有少少雞同鴨講，我地講既佢又唔明，佢講既我地又唔明，所以今次媽咪約多左個識講、識聽普通話既朋友出黎，幫我地翻譯一下。 平時睇西醫，都話68蚊日丫，呢度睇一次，成二千蚊，都唔知點睇落去，病左之後開支又多，下下去邊都要撘的士，唉...真係要節衣縮食先得喇... 我地三個人一齊撘的士落又一城，上左車轉左兩個彎之嘛，佢就叫我地落車喇喎，點知原來落左車仲要行好遠架...你個死人的士佬呀...行到我出晒汗，個頭殼頂又痕喎， 好彩又一城入面冷氣十足。我同媽咪行log-on，咦...有頂針織既帽好鬼靚架，不過係 綠色架，帽仔細細都要百幾銀喎，咁鬼貴既...我自己織頂仲扺喇...算... 哇哇...我響屈臣屎見到超級無敵獎門狗隻公仔呀，仲連埋一隻羊架！好鐘意呀，佢地兩隻眼仔碌碌咁，好似真係望住你咁架！仲要係一比一咁大，又可以四隻腳咁企響度喎，一見到就忍唔住一定要帶佢番屋企，好！就當係出左糧送俾自己既獎勵喇，以後趕稿就攬住佢，呵~~好開心呀，我無搵個袋入住佢呀，就咁拎住繼續行商場，我仲聽人地響度講「果隻咪咩咩咩果隻狗嚕...」。響超級市場入面，有個叫人試食既嬸嬸 話「咦？隻狗同你好襯呀。」 我笑笑口講：「下？即係我似狗呀？」 佢即刻兜：「唔係...你隻狗同條裙襯呀...」 下？咁都得？完全兩樣野黎架喎...我唯有話「係呀係呀...」等大家好落台嚕，嘿嘿。 行完街兩點左右，就要去番醫院輸血小板嚕，上車果陣我問司機叔叔隻狗洗唔洗附加 費，佢話如果隻狗識叫就要喎...嘿嘿...   輸血小板之前要打防敏感針，打完一分鐘我就訓著左嚕，大約四、五點左右就可以番屋企喇。撘電梯落到一樓既時候，有個細路仔走過黎，轉身向另一個人大叫「有電梯呀！」，但我地係落，佢係上，所以結果都無撘，當電梯門慢慢合上時，我先睇到原來另一個人係......蕭芳芳...當時我淨係識得按住自己咀巴大叫，到左電梯門完全合上時，才意會到發生什麼事，不過太遲了，來不及和芳芳姐影番幅相...嗚~~我好鐘意蕭芳芳架...芳芳呀...芳芳...

熊貓步法one two three

::::::星期日::::::八月二十六日:::::: 今日要入元朗八鄉呀，去咁遠做乜？去學氣功呀，果度好出名架，電視都旁問過，好多患癌既人都會去學，果度係免費架，但只收重病既人，醫緊既佢都唔收呀，即係一係醫院話你好番晒、一係醫院話你無得醫，就可以去學喇，咦...不過果度初初都唔肯收我架...話我十八歲女無恆心喎，雖然我真係幾無恆心，但我個病咁難搞，點都要試下架喇。今日爸爸唔得閒載我同媽咪去喎，所以要就麻煩舅父車我地去，醫院又有另一個病友響果度學氣功，我地約左佢兩點鐘響大欖隊道口等，見仲有時間媽咪就話不如去青馬大橋旁邊個觀景台睇下風景，但架車行黎行去都入唔到個觀景台，兜得黎都就快兩點嚕，都係走嚕，舅父問媽咪應該行邊條路，媽咪唔知做緊乜，是是但但咁答左舅父，於是...我地就穿過往大嶼山既路牌，向青馬大橋進發，原來果個係最後一個路口黎架喇，之後完全無位可以u turn，唯有局住入左大嶼山...慘喇...我地今日明明係去元朗架喎，點解去左大嶼山架。時間一分一秒過去，正常係要入到東涌先有得u turn，因為無人估到竟然有人會「唔小心」入左黎大嶼山架嘛，於是打俾爸爸求救， 問下入東涌之前仲有無其他路口可以u turn喇，爸爸話行到一半會有個叫小蠔灣車廠 ，駛入去就可以u turn喇喎，死喇，繼續行落去都唔見，仲以為過左添，哎呀，見到喇見到喇！駛左入去之後...好唔對路喎，人都無個問下，係有條橋可以u turn過去回程果邊呀，但...佢個路牌寫住係唔俾車行架喎，唔俾車行唔通俾馬行呀？我地響條橋度左兜右兜，去又唔係，唔去又唔係，唔俾車行喎，都係入東涌先u turn喇，哎呀哎呀，定係博好呢？車停響交差路口，我地三個人都唔知行左呢條路既後果會係點，舅 父好勇咁「死就死喇！」然後就踩盡油，行左果條唔俾車行既路，呼~~因為開得好快 ，所以我地好快就脫離左果條路喇，嗚嗚~~嚇死我呀，最後我地又由大嶼山出番黎， 好彩都唔算遲好多。 學氣功果間學校好偏僻架，周圍都係廢車場，ｄ廢置既紅色綠色的士堆到山咁高，企 響前面真係好壯觀。可能因為學氣功呢度係免費，又唔怕無人黎學喇，所以同我地呢 班新仔講解果個義工串到飛起，有個病友帶左兩張病之前既相黎交之嘛，佢即刻叫人 除晒帽撘巴士出番市中心去再影過喎，洗唔洗咁串呀，病人同普通人一樣都係人之嘛 ，病人唔代表低人一等要受你氣架喎，真係望多佢個衰樣一陣都想作嘔呀。 聽完果個義工噴口水之後就要去填form，我地負責講，義工負責寫，填左足足成粒鐘，填完之後我就要一個人去跟師兄學氣功喇，我個師兄叫東東，個樣好似李力持架，初初佢叫我好似平時行路咁行俾佢睇，但佢話我連就咁行路都唔識喎，咩喎，平時行到咪得囉，邊有咁講究架。之後佢就教我步行功，大約係點樣手勢，隻腳點樣行，我 唔係咁習慣，所以行到成隻熊貓咁，吼~~ 點解有病既人通常係大人呢？睇均晒呢度最細係我，唉...無靚仔，可惜可惜。可能太耐無運動過，我體又弱，行多一陣我都覺得好辛苦，辛苦到個心都唔知去左邊，師兄話我唔專心，我咪講俾佢聽我好累嚕，坐左一陣之後以為自己掂喇，點知師兄教緊我第二樣功既時候，我見到好多星星呀，我...好暈...仲好想嘔，唉...結果又坐番響度，好唔開心呀，仲喊左出黎，我明明唔想俾佢睇死我無恆心，但而家做少少野都暈，我真係好無用...佢唔會覺得我係唔舒服，佢淨係會覺得我懶，點解要俾人睇死... 因為唔多舒服，師兄俾我早走，叫我每日早上五點、十點、下午五點都要行個半鐘， 哇...唔知我頂唔頂到呢。原來媽咪同舅父兩個人響車度睇瘦身男女，哇...舅父架車好勁呀，有long play既md雞，仲有vcd雞，舅父話佢架車叫「咬地沙」喎，仲 要係日本版，舅父買左呢架車之後開心左好多呀，見佢咁開心我都好開心。 舅父沿大霧山果邊走，半山果度有個亭，聽舅父講果度叫英雄亭，好多人鬥車都會響果度等架，好似今日咁，果度泊滿晒車，個個個樣都凶神惡殺咁，一定以為自己拍緊烈火戰車。話晒果度都係山路，ｄ路又窄又斜又彎，哇...你地爭住去死，咁不如俾條命我喇。當舅父架車駛過英蟲亭既時候，全部人百幾二百對眼個個都望住我地...佢地見舅父架係跑車，以為舅父黎鬥車呀...哇... 我話想睇牛牛，舅父就載左我去郊野公園果邊...哇~~~~~~~~~~~~~~~~~~ 我咁大個女都係第一次見到咁多牛咋！果度地方又唔係大，足足有四十六隻牛牛呀，ｄ牛仔好似狗仔咁架，好得意呀，真係好想走過去同佢地一齊食草呀，咩~~~~~~

新同樂

::::::星期一::::::八月二十七日:::::: 唉...今日又要覆診喇，唔知幾時開始，覆診前一兩日，我就會開始抑鬱，終日茶飯不思，可能因為每次都係唔好消息喇，可以提起番醫院都唔開心。唉...今日番去要決定換唔換骨髓喇，其實我個心就唔想換，但情況迫我一定要換，我都仲未有決定呀...番到醫院等見醫生果陣，我起勢咁訓，訓著唔洗諗野嘛。 媽咪問醫生如果換骨髓，有幾多成機會，醫生話得兩成，哈，兩成...媽咪話其他果八成即係會死喎，兩成，好彩既就好得番，但排斥一樣會死架喎，兩成，我身體情況已經不及當年，話唔定感染左連醫院都無機會出，辛苦左又係要死，咁倒不如響出面開開心心過，拖得幾耐得幾耐喇。我竟然無喊，我一直笑，我根本無將醫生既說話放入心，既然唔醫，即係一成都無，係零，癌細胞愈黎愈惡，我就會死...我而家淨係好想見我既朋友...我希望再見面另佢地記得我，所有人同物，見得一次得一次喇。 念慈姑娘送左一個佢繡既公仔俾我呀，仲有一張卡，睇完之後好感動呢，個公仔繡得好好靚、好仔細呀，佢用個木盒仔入住，有隻牛牛響入面架(原來係狗)，念慈姑娘對病人又好，做野又落力，連放左工都特登整野送俾我，嗚~~好感動呀，多謝你。 睇完醫生媽咪打電話叫車，但聽佢ｄ語氣好似同個的士佬好friend咁喎，唔對路...唔通...原來今日媽咪特登約左舅父同bass姐姐去飲茶呀，好野，我勁想去銅鑼灣廣場上面間酒樓呀，就快到既時候先知，原來今日係去新同樂飲茶呀，哇...聽媽咪講果度好高級，專係食翅架，死喇，無帶相雞添，好緊張呀，舅父都未停好車，就有個呀叉響對面衝過黎幫我地泊車喇，哇...忽然覺得自己好似貴賓，然後個呀叉又衝出馬路，好似交通警咁擋住ｄ車俾我地過馬路，哇...我都係第一次見ｄ咁既排場咋...死喇，我今日又戴頂鴨咀帽，著得鬼咁寒酸，失禮晒，上到去酒果度，咦？無人既？因為過左食飯時間，好似包廳咁，一坐低就有人遞毛巾，仲幫我放張餐巾響大脾，哇...我緊張到唔敢講野，我驚我一出聲即刻顯得我好市井，我淨係忍住笑細細聲講「我地呢ｄ見慣大場面既...唔好笑唔好笑...」bass姐姐叫左好多野食呀，哇...呢度連叉燒腸粉都高貴過人，個個個...蝦餃...ｄ蝦大隻到好似手臂咁粗呀(誇張左少少添)，咬落去「啪啪 」聲架...我未試過下午茶都食得咁高檔呀，不過成日有個待應關公咁企響度，有少少唔係好自然，搞到我唔敢大大聲講野，今餐係bass姐姐萬歲架，咦咦咦...有ｄ唔係幾好意思添...bass姐姐對我咁好，我又咁鐘意佢，好想送ｄ野俾佢呢，不如搵日請bass姐姐陪我去影貼紙喇！呵~~好呀好呀。 食完之後bass姐姐要去番工，舅父又約左朋友喎，於是我就捉左媽咪陪我去行街喇 ，我告別左呢個銅鑼灣九個月喇，我竟然可以再踏足呢度，好開心呀。我地去左書 店睇書，原來「交換日記」出到第五喇，諗住買架喇，點知佢話得番最好一本，咦 ...我好錫書架嘛，本書太殘舊喇，唯有搵下第二間喇，但行左幾間都無，噢~可惜。 媽咪叫唔到的士呀，呢度撘番去咁貴，所以...我游說媽咪撘巴士，嗚嗚~~我九個月 無撘過巴士喇，雖然好累，但我都無訓度，不停對住車窗望風景，好似一個細路仔 咁，嘻嘻，可惜巴士個電視無開喇，我都未睇過巴士ｄ電視，好想睇下呀。

唔要入院呀~~

::::::星期五::::::八月三十一日:::::: 哇...起初口輕輕，以為日日行氣功好易，點知原來要五點鐘起身係好難架，每次行個半鐘步行功，一個人去行又悶喎，行完都散晒喇，番到屋企即刻訓番三粒鐘，訓醒又要行第二次喇，行完第二次，番上黎食個飯，又想訓，之後就行第三次...行晒三次之後，我連食晚飯都無力，一路食飯一路釣魚，十點幾就要訓喇，唔係第二朝唔夠訓又辛苦，根本忙到連日記都無時間寫，累到個腦一遍空白，撞正要寫game稿果日就慘喇，又眼訓又要寫，嗚嗚~~ 行左幾日，有時落雨咪夾硬偷懶唔去行嚕，但ｄ病友連落雨都去行架，唉...醫院話我無得醫，而家真係唯有靠氣功架咋，但我太多野想做喇，我又唔捨得停左個網頁，話晒都放左咁多心機，但唔行氣功就會死架喇喎...唉...我都唔知點呀，而家我仲行得走得，應該係我黎操控命運，而唔係等命運操控我。 唔知點解，我裝左條喉仔響心口上少少果個位，個傷口無端端腫左喎，雖然以前都試過係咁，但係...腫得愈黎愈勁，有一晚洗傷口果陣...仲...流血呀！我喊到收唔到聲，好驚好驚好驚咁，又唔知點做喎，咪打俾念慈姑娘問佢點算好嚕，佢叫我搵疊沙布按住傷口，止左血先，再即刻去急症室，但媽咪唔響身邊，我都唔知應該點做，止左血我都無咁驚，今晚要趕稿呀，寫晒先再算喇。媽咪番到黎我都係堅持唔入院，趕稿要緊呀，一個唔好彩要留院，我咪甩底，唔得既...訓醒先算喇。 第二日一早就番左醫院，姑娘一睇就話要"蚊"喉，我即時勁喊勁喊，死都唔肯"蚊"，條喉仔跟左我年幾架喇，我仲要繼續醫落去，無左佢我點醫呀？唔得架，嗚~~姑娘 唔肯用喉仔同我抽血呀，結果響手度抽，嗚~~好痛呀。醫生黎到睇左又話唔洗"蚊" 喎，可以睇多幾日，即刻笑番晒。見無喇喇出血，所以姑娘輸左幾包血小板俾我，唔知係佢果度凍定係做乜，我起勢咁震，死喇...如果條喉仔真係有菌...一輸野入去就會發冷...然後發燒...仲會死架...嗚嗚~~而家死左咪好唔扺，我好驚呀，我好驚呢次係我最後一次入院...燒一直都無退，所以醫生要我入院，要住外科病房...以前果度都會俾間細房我地ｄ血科病人，但今次...佢要我住最大果間房呀，隔離個呀婆仲要係肺結核架，好多人都響度感染左個肺，一日就唔響度喇...嗚嗚~~我唔想死響度呀，我死都唔換衫，我要出院。 黎抽我血果個醫生係血科實習架，一見到熟人即時淡定落黎，唔俾佢抽血，因為平時過左三十八度先要抽架嘛，我三十七點幾之嘛，唔俾...之後姑娘拎住個耳仔探熱機黎探熱，我都算放心ｄ，因為用耳仔探通常都低溫度ｄ...結果...我無燒喇！咪即刻要出院嚕，好野~~~~~番得屋企喇，嗚~~好彩咋，我都係唔要死響大房呀，嗚嗚~~~