二月 五 日 星 期 一

覆診日 八點鐘就起身喇....因為尋晚太緊張既關係，所以成五點幾先訓到，唉....訓得兩個鐘， 又感冒喎，乞嚏乞嚏....好辛苦好凍呀，唔理咁多喇，著晒全屋最暖既衫上身先，本來想 帶埋部notebook去架，但係....都係唔好喇，無心情呀....執乜行李好呢，書？無心情睇 呀.....我求求其其拿左今期本amy，仲有....sony貓公仔算喇，係咪好白痴呢？十八歲人 仲拎隻公仔出街，唉....咁我諗住陣間抽骨髓可以同sony貓玩，分散注意力咪無咁驚囉， 咁....扮sony貓同我講野果個緊係我媽咪喇，嘻嘻....我仲掛住個公仔既電話袋響前面， 搞到自己個look成個白痴妹咁，嘿嘿....係呀....今日幾歹都扮細路喇....費事其他病友 歧視我咁大個人抽骨髓仲喊呀。 媽咪上次call果個的士佬無黎呀，因為佢細路無做野，所以索性俾佢細路用私家車載我地 ，咁就可以搵多ｄ錢喇，不過聽落好似有ｄ唔妥....錢就照俾，但唔係坐的士喇喎....咁 會唔會犯法架？不過是但喇....之前仲擔心緊，佢細路架私家車會殘殘舊舊，不過黎左又 唔係丫，幾鬼靚架，裡面都幾乾淨，咁都放心ｄ。呢個叔叔又好似佢哥哥咁，好好傾架， 原來佢閒來都係用「白牌車」載下ｄ熟客既，雖然我地著數就無乜，但起碼唔洗再企街俾 人眼望望，都好既。我媽咪同個叔叔傾得好投契呀，仲不停討論「嘔」既問題，講到我都 想想地嘔.... 終於到喇，都唔知係佢手車唔掂，定係我感冒同唔夠訓，一落車我就軟軟下，軟到交叉腳 咁行，行左幾腳就開始暈暈暈....媽咪見我行得咁慢，就問我乜事喇，我就成身軟晒咁攬 左落佢度，好彩有個病友經過，衝入去借左架龍椅(輪椅)，呼....咁咪照推我上去覆診囉 。原來我血壓低呀，所以咁鬼暈。因為係新年之後，所以今日超多人覆診，我坐響張龍椅度等抽血，等到又悶又眼訓，咪唯有坐到好似條蛇咁訓陣囉，合埋眼唔夠一陣，ｄ人又以為我唔舒服，姑娘仲話俾張床我喎....唔洗喇，陣間抽完骨髓仲要平躺幾粒鐘，多謝喇。姑娘(有勢力人士)見我坐得咁軟皮蛇，又血壓低，咪叫我下個星期先抽骨髓，哇....即時成個人 超興奮，血壓都高ｄ呀，哈哈哈，好野，逃過一劫....不過....驚多一個星期咪仲樣衰.. ..唔理喇，拖得就拖.... 照肺果陣，見到有個剛剛做左導管手術的中年婦人，同埋佢老公等照ｘ光(即係手上面有條 喉，可以用黎入藥或抽血，我都有一條架)，姑娘要個女人換左紫袍先可以照，因為佢好怕 郁到條導管，於是個佢就不停咁喊，佢老公響更衣室幫佢換衫，個女人依然喊不停，聽到 我好心酸，唉....我覺得剛剛有病既人係最慘，唔習慣住醫院，無自由，又要受醫療上的 痛苦....唉.....如果無人有病就好喇.... 照完肺，媽咪就同我落左去七仔買野飲食藥，但部龍椅太大張，所以我就響門口等，等等下....無端端想嘔喎，死喇....個個垃圾桶都無煙灰缸既？咁唔通我塞個頭入去嘔咩，咪唯有大聲嗌媽咪囉，嗚~~~~媽咪又聽唔到喎，我好無助咁嘔左落地下，唉....咁大個人仲通街嘔，好無奈呀.... 今日要測試肺功能，我第二次去果度喇，果個叔叔好nice架，佢又好似認得我咁，嘻嘻， 不過我地血科個個都戴口罩，唔認得都唔出奇。搞掂晒之後我地又上番去等睇醫生。媽咪 入左去探病友，得我一個響出面等，咁咪諗住開餅乾食囉，但因為近黎ｄ指甲好似想甩想甩咁，所以我唔敢用力，白白痴痴咁開唔到，即時有個女人走過黎幫我開，嘻，之後想飲咖啡，我又拉唔開個蓋，又即時有個男人幫我開，嘻，唔該晒，其實我都幾鐘意覆診，俾著我響街，開唔到有邊個人會理喎，但呢度個個都係有病，所以就識得互相幫助，好溫暖呀 。上次有個姐姐帶左個女黎覆診，我仲同佢個女玩得好開心，但呢幾次都無見到佢地喇， 嘻，今日又俾我見番個姐姐，佢走過黎話佢個女好掛住我呀，成日話要黎官塘探我，又話要問我拿電話，得閒打俾我喎，嘿嘿，搞到我個心都甜晒，我記得佢好鐘意我送俾佢果個心心貼紙架，好喇，等我響屋企搵ｄ靚靚貼紙，下次覆診俾佢媽咪俾佢，嘻嘻。 到我見醫生喇，醫生眉頭深鎖，佢話可能係我個肝感染左，所以搞到成日嘔，仲有佢睇到我ｄ血小板出院以來，一次比一次少，就懷疑係個病又復發....所以叫我都係今日抽骨髓 ....一睇完醫生即時成個無晒心機，頭向下望，眼濕濕....淨係拎住隻電話袋公仔響度玩 ，一陣之後，姑娘又話下個星期先抽喎，唉....但咪又係要抽....我依然無心機呀....因 為我擔心緊自己既病情....(打到手指痛喇，明天待續)

二月 六 日 星 期 二

續覆診日 上回講到我尋日結果都係無抽到骨髓，不過醫生話俾我聽，我個病可能又再復發，好無奈呀，淨係好想快ｄ離開醫院，又或者有人叫醒我，等我可以響惡夢中醒來，訓醒左....原 來仲係2000年既二月，我無病無痛....但偏偏我就係響現實中，一直都無離開過。 媽咪話去拿藥，通常都要響果度等好耐，拿藥既地方雖然係大，但果度亦係醫院最多人既地方，我淨係覺得好累，好想訓下，所以無跟佢去拿藥，我一個人坐左響沙化訓覺，其實都未訓著晒，但我唔想同其他人講野，我真係笑唔出喇。半個鐘之後，媽咪拿左藥上番黎搵我，佢話哥哥黎車我地喎，都好呀....我都想去散散心，雖然係擔心，但諗住都無乜幫助。 等到成五點，呀哥一定係食左豬油呀，呀媽都忍唔住入七仔買個杯麵食下。正呀，遊車河緊係坐車頭先正架嘛，本來我都打算炸機....但心情唔靚，又想嘔喎，開得太大聲會暈，暈又想嘔架喇，所以都係細細聲算。呀哥ｄcd九成都係老餅野，咦？俾我發現左我隻 boyzone 既  cd，正呀，即時聽 love me for a reason，好好聽呀，我地無去好遠呀，淨係由瑪麗去深水灣，再經過淺水灣落赤柱，沿途有好多樹樹，我又聽緊 father and son喎， 果種 feel真係好正，哥哥去到赤柱，響百佳超級廣場果度停左車，哥哥走左去麥記食野， 而我同媽咪就響車，我超想嘔呀，又唔舒服喎，一定係佢手車唔掂喇....媽咪好難得俾我唔載口罩出車行下，因為呢度好少人，但我勁想嘔....最後我都係去行左一陣，但行完都辛苦到變臉喇，唉....俾著平時，有機會出黎走走，我一定超興奮....之後我哥哥車我地 落赤柱大街兜左一轉，原來....赤柱響我印像中都無乜改變，我覺得呢達地方係屬於我同我既第一個男朋友。我以前成日黎赤柱架，因為中學有兩年都係黎呢度picnic，之後中五果年既情人節，我第一個男朋友都係同我去赤柱玩，我仲記得，果日係我第一次收花，第 一次收公仔，嘻嘻，話晒都係初戀，所以好多白痴野，諗起都覺得好笑....之後我地又黎過拍拖，第三次同佢黎，已經唔只我地兩個人，因為我地分左手lu，所以成班朋友約出黎釣魚....我好鐘意呢度，呢度係屬於我最美好的回憶。 天黑 lu，哥哥就車我地去紅山半島兜左轉，雖然無錢住，但望下都好呀，我地響石澳出面條橋塞車呀，好彩有得聽楊千嬅演唱會，雖然我感冒，勁重鼻音，但都不停響度唱，因為我要分散注意力，我唔唱歌就會想嘔架喇，忍住....忍！我諗番起有次俾人迫我當眾唱歌，佢仲話估....我唱歌似千fa喎，哈哈，唔係喇 fa， 我唱俾你聽你就真係耳仔受罪喇， 我把咁既死人雞仔聲，叫我尖叫就叻，隨時震爆玻璃添呀。 番到屋企我就開始狂打電話，因為我怕自己將會永遠消失，我怕我ｄ朋友會唔記得左我， 我怕佢地唔知道我好鐘意佢地，所以我打左俾幾個推心至腹既知己，我喊住同佢地講「我好鐘意你架，你唔好唔記得我呀。」，我知我走既話，咩都帶唔走，就算係我同朋友既回憶都帶唔走，所以我唯有叫佢地記住我，因為我無能力再記住佢地喇。我仲打左俾關心一線既黃姑娘，因為我入院換骨髓既時侯，佢寄左一張卡俾我，我好想多謝佢。好開心呀， 佢一每日都安慰咁多人，但三個月之後既今日，佢都仲記得我，佢同我講，叫我當每一日都係最後一日咁過，咁我就會發現，有好多想做既野，嗯....係呀....好感動呀，多謝妳 。佢要我響呢個星期做一ｄ有意義既野，下個星期佢會打番俾我，問我做過ｄ乜，哇，好似做功課咁，咁我就要努力一下喇。黃姑娘平時安慰人把聲陰聲細氣，但今日我引到佢笑喎，佢一笑把聲即時可愛得多，好好聽架。 響上次換骨髓時，我已經暗暗決定，即使再有復發，都唔會再醫，因為我已經好累好累，我淨係想過普通人既生活，我想可以日日一早起身番學，我想星期六再可以同朋友出尖咀吹下風、吹下水，係曾經有好多人都唔鐘意呀咩，但自問我無傷天害理，點解個天係都要我死？你係天，我係人，我實鬥你唔過架，咁我唯有認輸囉，你開心喇。今世無機會做設計師喇，咁我唯有希望下一世，我仲係咁鐘意畫畫，欠下的唯有來生再做。

二 月 七 日 至 二 月 十 一 日

逃走後的第一個星期 呢一個星期，我真係無乜野做過呀，淨係覺得「人之將死」，雖然唔可以酒池肉林，但都要痛痛快快咁去做一ｄ自己想做既野，但我可以做既野不多呀，唯有終日打機，不務正業喇。呢個星期都就快完，我先記起黃姑娘叫我 可以做「有意義」既野，點算呢，好慚愧呀....不過我都諗通左少少野，其實除左電子媒体之外，我仲可唔可以響其他媒体上帶俾別人快樂呢，可惜我唔係一個才華橫溢既寫作天 才，更加唔係有錢到可以自資出書呀，唯有等下時來運到喇。 我屋企部pc呢幾日都成日發皮四，唉....我既慣性動作就係一起身，牙都未刷就開左pc先 ，去check 下依喵同睇下自己個場嘛，但而家....窒一窒，算喇，橫掂呢個星期都無寫過 日記，我都唔係咁想落場(自覺偷懶，唔敢面對鄉親父老)，結果把心一橫，索性唔玩電腦 ，決心要逃離呢個 it世界。 之後既日子，我就係不停咁沉迷地睇別人的日記，果本書叫做「交換日記３ 請問法國在 那裡」。記得入院的個多月，精神一直都不好，所以成日都訓響床上面眼光光，但每朝九點都會有呀嬸入黎換床單，點唔舒服都好，一定要起身坐埋一二邊，就係呢段短短的時間 ，我會拿起「交換日記３」來看，雖然精神不見得會立即好起來，但心情就會輕鬆了一點點，自此之後，每當我個腦好實，唔曉諗野果陣，我都會拿出黎睇。因為呢個星期，成個星期都唔識諗野，所以我就成日睇書。我發現與其去看一些「教如何獲得快樂」的書，倒不如去看一些好笑的書，因為在一場爆笑後，自然就獲得快樂，「快樂」根本不用別人教的。看書宜心情輕鬆，忌心不在焉。 自從星期一響醫院嘔完，我都無再嘔喇，因為我要用意志力刻服佢。我諗，如果我呢個星期都係咁嘔既話，下次復診好有機會要入院，到時話唔定要打好多針都唔定，一諗到呢點，我就忍忍忍忍忍，一定唔可以再嘔，我仲努力咁去嘗識食野，雖然每日都係「單條飯 」(即係一日一餐)，而份量也只是以前一餐的一半，但也算是進步，感謝唔洗再嘔，食得是福。 呢個星期好快就過左，抽骨髓既事近在眉睫，覆診前一晚，今次我無好似上星期咁訓唔著，反而十二點鐘就睡了，雖然醒了幾次，但都沒有太緊張，我諗我最怕既唔係抽骨髓，我最怕既係骨髓的結果不好，與其呆等，我寧願快一點抽了，告訴我是禍是福，不用我再暗自猜測。

二 月 十 二 日 星 期 一

覆診日  晚好早就訓 (即比平時早，但其實都唔早架喇)。其實我係好緊張架，成晚醒左好多次，終於早上八點喇，要起身喇。 我無乜執行李，淨係拎左隻sony貓公仔。而衣著都比平時更隨便，唉....著得幾靚又點喎 ，一陣抽骨髓一個唔覺意整污糟左咪痾拔甩。媽咪call左的士叔叔黎車我地，今次係坐的士去醫院，沿途都係媽咪同林伯伯傾計咋，我就無里心機咁望住窗口。 返到醫院喇，今日好多病友番黎覆診，連我初初有病時，同我同房既呀祺姐姐都響度呀，好開心添。今日唔洗去照ｘ光喇，原來換完骨髓三個月就唔洗架喇，好野，平時去到又要換紫袍，又要等呀等，而家唔洗 lu。於是我同媽咪就落左去七仔買早餐喇，原來七仔都有甘大滋 賣架，好食，我仲有買左一鑵熱咖啡。因為每次番醫院都要好早起身，而我又夜訓慣喎，所以副尊容成個白粉婆咁，咪唯有飲下咖啡補救一下囉，但每次都會有人好好奇咁問，我點解咁鐘意飲咖啡，咩喎，想飲咪飲囉。最近我都無乜再飲阿華田喇，因為我發現凍咖啡係好好飲架，又可以提醒，正。 我一路響度睇便利，一路食野飲野，咦？我唔係應該好驚好驚好驚既咩？點解而家又咁啖定既？諗諗下，係喎....我應該好驚架喎....隔離有幾個媽咪級既女人響度講野，我聽到原來佢地都係今日抽骨髓架，佢地都驚到震震震咁呀，嘻，我咁細個，驚就更加正常喇。中午十二點幾，大堂好靜，無乜人講野，可能太多人要抽骨髓，所以個個都響度祈禱，希望下一個嗌既名唔係自己。每次姑娘嗌名既聲線，都會劃破大家既沉默，然後整個大堂既目光，就會憐憫地落在「得獎者」既身上，繼而再發出一陣「噢....」的惋惜聲音，「得獎者」只有無奈地行入「刑房」受刑。「吳綽姿入黎抽骨髓....」終於到我喇，所 有人既目光都落響我身上，我忍唔住微微的叫了一聲，然後就手忙腳亂咁拎番我隻sony貓，好緊張咁行入「刑房」。 「刑房」裡面有三張床，有兩個病友都分別坐左響床上面，佢地都係等緊醫生黎抽骨髓既 ，而我就坐在最近路邊的一張床上面。順次序應該我係最後一個，但我已經驚到不得了， 我再保持唔到之前既鎮定喇，醫生都未開始抽第一個，我已經不停響度喊喇。然後時間慢慢過....醫生到左，同第一個抽，同第二個抽，然後就到我喇，我望住佢放響床上面，一支大鐵針，我知，我知佢係用黎刺穿盤骨的。醫生慢慢戴上手套，姑娘叫我躺下，但我就驚到不停喊，本來姑娘唔俾媽咪陪我架，不過我捉住媽咪件衫唔肯放，姑娘都無我符。一切都準備好晒喇，而我就喊得愈黎愈大聲，醫生只有好無奈咁企響度等我鎮定，最後連睇緊症既醫生都忍唔住出黎睇下我，因為我實在太嘈，喊到隔住兩度門都聽到，於是另一個醫生就話同我打「矇仔針」，雖然我喊到 癲左，但我好清楚知道，如果打「矇仔針」既話唔化算喎 ，仲要痛多一下，所以我繼續喊，醫生唯有答應我打入喉仔，嘻，咁咪唔會痛囉。 終於妥協了的我，唯有乖乖打側身，躺在枮板上，但我依然都係喊....因為我真係好驚。醫生在我背脊塗上涼涼的消毒藥水，然後左按右按我的骨，找個適合的位置，準備行刑。喂喂！醫生！我仲未打「矇仔針」喎，我仲好 精神呀大佬，醫生就話「得喇，得喇，搵緊俾你喇。」，但係佢一直都未打，我又好驚佢係呃鬼我，所以我每隔一陣就講一次「我仲未打「矇仔針」喎。」(未打都已經矇矇地)，終於姑娘拎左「矇仔針」番黎喇，一支箭咁同我打左入喉仔，因為係直入血管，所以佢一路打，我就一路暈，呢頭仲打緊針，醫生響我後面就開始打麻醉藥，之後既野我都唔記得清楚，媽咪話俾我知，佢抽緊骨髓既時侯我識得嗌痛，我又識 話隻腳好庫好痛，我暈暈下咁，淨係覺得好快抽完，抽完仲問「點解仲未抽既？快Ｄ抽喇 。」 一知抽完我就識笑番喇，訓響度傻笑，打左「矇仔針」好HIGH呀，會好想FING頭架。原來所有人都聽到我既慘叫聲，所以下一批要入黎抽既人就驚到震晒，因為佢地以為我喊係因為個醫生技術唔好，但其實我喊得最勁既時侯，醫生都未有機會郁手。平時抽完要平躺四、五個鐘架，但因為呢度係門診，又淨係得三張床，所以訓左九個字就俾姑娘趕走， 我唯有一拐一拐咁坐響沙發。 死喇....超瘀，坐正隔離果個係後生仔黎架，仲要有頭髮既 (即係相比起其他人靚仔)，佢仲話記得叫呀媽買糖俾我食喎，即係....頭先我既慘叫聲佢聽到晒，嗚~~~~可以瘀，但唔可以係靚仔面前瘀。坐番出黎一陣之嘛，唔知點解全部人都好似識我咁，個個一係望住我笑，一係就同隔離果個細細聲講野，死喇....細路仔打針喊都正常呀，我響呢度都係最細呀，唉....就係咁，我個朵就威震骨髓科。 入到去診症室，醫生第一句就係「哎唷，唔記得買波板糖俾你添，下次補番俾你呀。」嗚 ~~~~醫生，人地個背脊都俾人拮到穿晒窿喇，仲要瘀人，你於心何忍.... 算喇，見完醫生就希望快快閃喇，我唔想再有病友望住我微笑(偷笑)呀，我同媽咪落左去七仔買野食，嘻，我受完苦喎，幾歹都扭食朱古力喇，我成日望住廣告賣明治MELTY KISS 朱古力，又話入口即融，好野，終於有得食下喇。原來都唔係咁好食，好甜呀，都唔係即融既，嘻，不過都好開心，一償心願。 之後我地又坐哥哥架車去遊車河，嘻，今日既心情比上個星期好好多喇，我地首先係上左山頂，媽咪俾我唔戴口罩呀，YEAH，開心到暈。經過一間好多公仔既舖頭，哇....我忍唔住中左入去，好開心呀，好耐無見過咁多公仔喇，屋企既公仔九成都俾媽咪收埋晒。呀哥同我一人揀左一件冷衫仔俾公仔，哇....公仔衫仲貴過人衫。之後我地行左一陣，但可能好耐未試過行咁耐，睇緊衫既時侯我終於頂唔順，好暈好暈，唯有閃番上車坐喇。之後我地又去左赤柱，不過都夜晚 lu，我地影左ｄ相，哇，原來我ｄ面色一直都好差架，唔係白色，係青色架，成隻丫烏咁，希望遲ｄ會好番ｄ喇。經過七仔，見到嵐谷綠茶買兩支送暖手套呀，好cute架，所以又買左兩支綠茶，我地仲買左鹽燒紫菜，正，我的最愛。雖然好累，又一路行又一路腰骨痛，但今日都好開心，起碼抽左骨髓，唔洗再驚。

二 月 十 三 日 至 十 八 日

逃走後的第二個星期 星期一終於抽左骨髓喇，呼....即時又變回以前般常常傻笑，經歷左呢兩個星期既惶恐， 我發現我真係好想好想好番，好左第一件事係要番學，我要番去大一讀書，以前工筆畫堂 、書法堂我例必....合上兩眼想到你~~總有歌聲~~然後就伏響面昏睡，睇黎我對中國既古畫，同九龍皇帝式既書法，都係無乜天份架喇。我最鐘意上素描堂，雖然我由細到大都未真真正正學過素描。我記得第一堂，只不過係畫ｄ好簡單既圓呀、正方呀，但....從未接觸過，所以係咁素，係咁素，亂咁素，差ｄ紙都穿呀，每堂我都會留意下ｄ高分既同學仔係點畫，然後我又吸吸吸吸吸收下，參考下(抄考)，好快我就有ｄ心得喇。完左初級素描，到中級素描時，我都算掌握到少少技 巧喇，知道點先算好，巧合地，個呀sir 又好鐘意我喎(梗係喇，好學生喎)，成日醒ｄ正位俾我坐，又過番兩招俾我，所以我進步得好快。每畫完一樣題材，呀sir 都會揀一幅最高分既出黎，當眾讚下，今次終於有我份喇，果一刻我真係唔敢相信，我竟然可以勝過我一向眼中既「高人」，之後有幾次，我都俾呀sir拎出黎讚，但其實心裡面我都有點心虛，因為我總係覺得自己比不上別人，我從來都唔係什麼no.1的材料。 病左之後我再無返學喇，其實我響大一無乜朋友架，大多數都係點下頭，因為初初我係同朋友一齊入黎讀，所以上堂都係孖公仔咁，我地自己玩黎玩去，但佢兩個月就退左學喇，淨番我一個，我都唔敢相信，我會響某一個地方識唔到朋友，有時借起野上黎，都幾尷尬，所以我無喇喇無返學，都無人知我係病左，佢地唔知唔緊要呀，我最想係俾素描呀sir 知，俾佢知道我唔係唔再鐘意畫畫而退學。 仲有我好掛住天后既糯米雞，每次返學我都特登行過去買，然後響好大風、好凍既街上面，我攬住熱辣辣既糯米雞行番學，然後響閂實門既課室裡，一路上堂，一路慢慢品嚐。全個課室都係糯米雞味，每個同學都好羡慕咁望住我。我諗果一刻既感覺，就好似素描又得到呀sir 在眾人前讚賞一樣，不自覺自豪的笑起來。 唉....陰公呀，我抽骨髓果度痛左好多日呀，訓覺都唔可以做咁多個pose，因為轉身都痛 ，抽完番黎果晚我仲唔敢沖涼，因為....我驚個抽髓個窿會入水囉，哈哈哈，入左ｄ水入骨咪大件事。之後果日貼左張防水膠紙沖涼，以為好成功無滲水喇，點知著緊衫時，一彎低身，即時feel到有暖水從背脊腰間流出，好似賴尿咁，原來塊莎布滲晒水，即時笑到我腳軟，要媽咪參扶我返入房，再洗傷口。 星期三係情人節呀，心諗「死喇，俾人見到我online，咪知我無街去？」，嘿嘿，不過好彩就係有朋友陪，星期二果晚，我十二點打左俾bee狗狗呀，同佢講情人節快樂囉，之後我地一直傾一直傾，傾到天光咁滯，都唔明點解可以有咁多野講架，可能我地都有好多少女心事喇，哈哈。我仲記得黃姑娘叫我做ｄ有義意既野，但一直都唔知點做，眼見人地the pancakes果個女仔，得十九歲就搵到目標，二十一歲自資出碟，後來仲俾外國既唱片公司簽左，哇....睇佢個樣好似同我差唔多咁既年紀，但就咁鬼勁，不自覺覺得自己好無料。我同bee 狗狗講，我有一個奇想，就係可以出一本類似「交換日記」既書，但只係坐響度諗，根本 冇可能實現，所以經我地討論下，決定明天一起身，就寫封信去出版社。 第二日，我搵到三間出版社既e-mail，包括博益和兩間不太出名的出版社。書到用時方恨少，究竟一封正正式式的書信，係應該點寫呢....我記得好複雜架喎，又咩咩敬啟者，又什麼什麼文安，哇....人都癲呀，是但喇，就求求其其，好似平時寫俾朋友咁寫算喇，to 同from咪得囉，嘿嘿....(滴汗....) 其實寫呢封信既目的，唔係想發達，又或者係發咩明星夢，只不過我覺我地呢ｄ出黎行既 ，講過既野一定要做，唔係會俾ｄ長輩話我地呢ｄ年青人成日淨係講廢話，做野唔實際架 。雖然我咁做可能係有點不自量力，但起碼我有行出第一步，總好過坐著空想，等運到丫 。以前我會以自己個病為理由，而唔去做一ｄ野，但而家我覺得，唔應該再用自己個病黎做藉口喇，如果我真係想去做一件事，根本無任何野可以阻礙到，除非係我唔想做。我係病人，但唔會係一個廢人，我都可以活得比你好，我既人生唔會因為曾經病過而失色。 都有少少覺得自己白痴，年中不少人發呢ｄ明星夢架喇，但段估果三間出版社都唔會咁得閒寫封信黎笑我卦，咁瘀左都得我同bee 狗狗知，嘻，我無敢講俾人知呀，唔係實俾人笑死。嘻，年青人嘛，十八出頭，係應該對社會抱住一點幻想既，呢個年紀先有機會橫衝直撞，咩都應該試下，唔試過邊知自己掂唔掂喎。唔知我呢種係咪叫「傻勁」呢，哈哈哈。 年青人應該心口都有個「勇」字既。當你再無衝動去做一ｄ傻事既時侯，其實你已經脫離年青人的時代了。

 

© 呀咩吉場 http://meredith.com.hk