今日都幾鬼多人覆診喎，媽咪都問過我好唔好派利是，我咪同佢夾定，帶埋細路哥果Ｄ先 俾，嘿嘿，點知今日為人父母果一堆都無返，好野(ｄ孤寒野出晒)，但抽血果陣，媽咪又 拿ｄ利是出黎派俾姑娘喎，哇....你知喇，一派親野實好哄動架，仲要係一班師奶姑娘， 果把高八度既聲....耳膜都爆呀。呀媽俾ｄ利是姑娘，ｄ姑娘又派利是俾我，唉....好似 去左茶樓呀，亂戰中我收到三封利是，嘿嘿，最驚係有個姑娘好後生架，無理由結左婚架 ，個利是封係hello kitty 黎架，諗諗下....事有ｑｋ，醫院咁多病人，姑娘如果派利是 ，咁咪派到破產？唔通....扼細路仔既？會唔會係麥記贈飲黎架，抑話再恐佈ｄ，係揮春 呢？本來話左唔拆利是架嘛，但好奇心底下，都係裝下先，呼....原來係真金白銀架，有 著數有著數。

我上年十月生日，血科有個姑娘，送左個sony貓毛毛銀包俾我，得意到想喊，佢係托人俾 我既，十一月頭我就復發入左骨髓科，一直都無機會多謝佢，直到今日，我終於見到佢喇 ，嘿嘿，好開心呀。佢叫念慈姑娘，好有愛心架，初初入院，人生路不熟，我成日尼埋響 被竇喊架，佢又幫我蓋被，又幫我熄燈，我最記得佢件衫掛住隻唐老鴨既公仔，所以我叫 佢「唐老鴨姑娘」。我初時見佢又幫病人倒水，又餵食藥咁，仲以為個病人係佢親戚添， 點知原來佢對個個都咁好架，有次抽緊骨髓，我仲瘀到喊住咁拖住佢隻手話「我最鐘意既 姑娘係你。」。嘿嘿。我鐘意佢除左佢有愛心之外，係佢玩得，我地成日互窒，有次我住 30a 床，佢就話我細喎....(意有所指)，我地兩個狂笑，但媽咪就唔知我地兩個講乜。我 成日嗌佢「白衣魔鬼」架，嘿嘿，我入院既時間，ｄ姑娘俾我玩殘咁滯。愈講愈遠，今日 我見到佢，於是靜靜咁走過去，大嗌「魔鬼」，嘿嘿，佢好似仲興奮過我咁，無窒我呀， 淨係捉住我話好掛住我囉，好開心呀，呢句我都講得多，好少人咁同我講，我地又大大聲 互相揶揄一番，嘻，好開心呀，笑到有少少頭痛。我都無諗過有姑娘會送野俾病人架，但 佢真係送左個銀包俾我，嗚~~~~所以我覺得同佢真係friend既，嘿嘿，咁黎分辨又好似白 痴左ｄ。

今日見醫生，佢話....要抽骨髓喎，因為我成日唔食野，唉....醫生講果陣我又唔識話「 唔好！」喎，應承左之後先後悔，唉....下個星期一抽呀，好驚呀好驚呀，嗚~~~~平日拿 藥果度，有成幾百人響度排隊架，今日....數晒都係得大約三十個，媽咪話ｄ人唔揀新年 流流番黎喎，唉....我都唔想....抽骨髓，嗚~~~~

番黎果陣，個的士佬好多野講呀，睇佢滿頭白髮，講野仲可以超大聲，真係中氣十足呀， 佢仲非常有智識，知道我戴口罩，係代表我扺抗力低，唔似得ｄ無知既師奶，以為我有傳 染病，所以....我同媽咪睇中左佢，一於以後call佢黎接我地喇，我地講價講到以後都係 一百五十蚊一程呀，即係平左十蚊，不過媽咪臨走又俾利是人....嘿嘿，咁計落呢兩次都 無平到，嘿嘿....媽咪真係有錢呀....

夜晚我朋友icq我，話bsb既the call好聽喎，叫我用napster響佢度拿，哇.....死喇，napster 咩黎架，一時間覺得自己好唔update添。原來只要果個人登記左係napster 既用戶，咁其 他napster用戶就可以單撈佢電腦裡面既mp3喇，當然只會show mp3出黎俾你單撈喇，世界 各地好多人都登記左成為用戶，所以基本上你要咩英文歌都好易搵得到，不過中文歌呢， 就難少少喇，都可以試下既。單撈左番黎超好玩呀，又可以睇下人地收埋ｄ咩歌，我玩左 成晚呀，搵左幾首一直搵唔到既英文歌，呢個軟件係呀咩強力推介，都係1mb 幾之嘛，絕 對試得過，我都登記左呀，單撈左番黎既話呢，可以add我個account，咁我地就可以互相 分享下電腦裡面既mp3 喇。
單撈here

我見到有人單撈自己ｄ歌果陣，都有少少俾人偷緊野既感覺，不過最搞笑就係有人單撈我 首「足球小將」，嘿嘿.....果首其實係bee狗狗send俾我既「咸濕版」黎架，果個人一定 好驚「喜」呀，嘿嘿....

一起身出聽....係響電腦台....死喇，又想嘔，唔係喇fa，剛剛起身無咁邪架，邊有野嘔 喎，幾日都無啖好食，仲要我嘔凸？嗚~~~~無陰公呀....今日專登早ｄ起身，又要人嘔， 結果我攬住個垃圾桶嘔，咪又係嘔黃膽水囉，邊有野嘔喎，嘔到我眼淚水都出埋。成日都 無食過野，直到夜晚，嘻嘻，今晚又打邊爐呀，近呢個星期足足打左四次喇....嘿嘿.... 因為我鐘意食囉，咁比起身飯，我會好ｄ胃口，所以媽咪就晚晚都買打邊爐ｄ野番黎，但 我都係有心無力，明明好肚餓，但又食唔落，唉....山珍海味響我前面，我都無能為力。

本來四哥同呀基聽日黎拜年架，不過佢地話三點上黎，哇....預你地遲下到咁，上到黎咪 成四點....哇....平時karry 佢地成班，都一點就上黎喇，成四點黎到都無野好玩，打機 又唔打得耐，最遲七點鐘就要走，咦....上得一陣，咁不如唔好上喇，橫掂你地又話驚上 到黎無野玩，於是就推左四哥喇，佢又埋怨我，話唔知點同呀基講喎，唉....搞到咁煩為 乜呢，其實想黎咪早ｄ黎，唔想黎咪唔好黎囉，中間時間黎....搞著你又搞著我，你驚黎 到悶，我又擔心做東道主招呼不週喎，算喇，到左有日你地唔好俾咁多壓力我先黎探我喇 ，我屋企唔係遊樂場，抱住好好玩既心態一定失望而回，我屋企最多係俾你打下機、吹下 水架咋，好悶架。

好開心呀，今日我甜心終於上網喇，我甜心係邊個？咪就係「六月」囉，佢英文名叫june ，所以我呢個大陸婆索性叫佢六月，話晒大家都係土產，中文稱呼親切ｄ，不過我都係叫 佢甜心多。原來佢個英文名內有玄機架，因為我地都係上年六月初次懈后，嘿嘿嘿(好似夾 硬左ｄ)，響icq同過好多人傾計，但我都好少會add人既，除左佢，我第一次同個傾計就覺 得同佢好夾喇，我地毫不留情咁以「衰婆」「傻婆」相稱，佢又唔介意喎，我覺得佢好鬼 玩得，所以就鐘意左佢喇。除左平時玩之外，我地都會互訴少女心事，真係閨中密友黎架 ，不過十二月出左院之後，都無乜見過佢上網喇，所以都有ｄ擔心，有時收到佢ｄ offline massage ，又「嗚~~~~」又「唉....」，仲以為佢有ｄ咩唔開心，嘻，不過今日一天都光 晒喇，原來之前係甜心掛住玩同讀書，所以無上網(嗚~~都唔掛住人)，嘻，好野，見番佢 真係有幾分滾動呀....(下刪五百字肉麻野，但以下呢句一定要講)甜心我愛你，yeah！。

今日成日都無食過野呀，麻麻話我練仙喎，唉....我係想瘦，但我唔想又嘔、又食唔到野 咁瘦呀，都唔知係咪因為無食野所以無精神，所以成日訓(賴喇賴喇)，慘喇....夜晚一點 幾，有ｄ餓添，嘻，媽咪又未訓喎，所以就嫘佢煎腸仔我食喇，一於用叉燒醬煮喇，哇， 好好食呀，不過ｄ叉燒醬好似麥芽糖咁硬堀堀，怪怪的，煎左三條，我好努力咁食左條半 ，唉....迫不得已，我都想食埋落去，但又想嘔....

爸爸今晚無端端叫我早ｄ訓喎，佢仲話有恐~怖~野~~，問我想唔想聽，下，唔好喇卦，我 仲要寫日記架，你唔好嚇我喇，打死都唔聽，但係都嚇到我要開住廚房燈，先敢開夜車， 有怪莫怪....有怪莫怪....

其實我由細細個已經鐘意食果撻，我仲記得以前媽咪響黃埔做野，我好鐘意跟埋佢返工， 因為番工之前我地會經過一間餅店，果度賣既果撻只售三個半，每次媽咪都會買半打，然 後我就可以響媽咪開工時，食好多個喇，果段日子真係好值得懷念。不過有時滿心歡喜地 去到餅店，偏偏會無得賣，咁果日我唯有食椰撻補數喇。大個左之後都好少再食喇，因為 成八、九蚊先一個小小的果撻，我實在係唔捨得食呀，唯有每次經過地鐵站既美心，望多 兩眼就算喇，而且我每次食撻類食品，我都會食得好無儀態，有損市容。嘻嘻，抱住「有 病大晒」呢個理由，我又任性地要食果撻，不過有新鮮生果就一定唔食得，鑵頭、有防腐 劑既就例外，撻上面可以食既生果都唔多喇，所以我會寧願食粟子撻，而且又平少少呢， 其實我都係貪ｄ忌簾好食之嘛。雖然東海棠個款好似富貴ｄ，但其實美心既果撻仲好食呀 ，因為美心個撻皮有一層朱古力，咬落去又脆ｄ，一流，快ｄ買番個黎試下。

尋日無端端諗起想食街邊ｄ糯米飯，於是就叫麻麻煮喇，不過都幾考起，因為唔可以有蠟 肉，花生又要自己炸，哇哇，麻麻真係炸花生喎，超好食呀，仲特登用個煲煲左一碗仔糯 米飯，之後又煮熟ｄ豉油，一切都搞掂晒喇，幣....但我又想嘔喇....嗚~~美食當前.... 都係頂唔順，結果浪費左麻麻一番心機，唉....都怪我無用喇。

夜晚無喇喇坐坐下想嘔喎....嘔....又乜都嘔番晒出黎，大佬呀，已經無食野架喇，仲要 我嘔凸，無陰公呀....再咁落去，我諗我不出半個月，一定變左骨感美少女。

呵~~今日有人重金收賣我，仲好大手筆添，佢用一盒十六粒裝既金莎做掩口費，哇....我 呢隻細路女梗係俾人收賣到喇，yeah~~係無乜骨氣架喇，嘿嘿，唔講？得~~梗得喇，要我 失憶都得呀。

今日bee 狗狗問左我好多html既野，因為佢要大改版呀，之前佢個網頁陰陰沉沉，仲叫做 世界殯儀館，最搞笑係如果按右健既話，會彈「死人野你都偷？」既視窗出黎。佢想改版 做粉色、好lovely既網頁喎，嘻嘻，所以我都贈興咁，送左個粉紅色banner俾佢放響門口 ，襯到絕。

爸爸今晚又語重深長咁叫我早ｄ訓喇，仲出埋絕招，佢好恐怖咁對我講「你知唔知點解要 放幅觀音相響度呀，因為....你都係早ｄ訓喇下....」佢欲言又止咁，搞到我今晚開晒廳 ｄ燈先敢開夜車，呼~~~~陰風陣陣，我都係告辭先喇。