九 月 二 十 五 日
我係龍的傳人
嘻,我化療完指數低呀,所以媽咪尋日買左好多急凍點心番黎,咁我就唔洗下下食班焯做 早餐咁悶喇,食邊種好呢,就食我最最鐘意的蝦腸喇,好食好食,總比無得食好食。媽咪 今日唔洗返工,於是我地兩母女就好溫馨咁係屋企睇奧運,好緊張呀,中國又拿多三個金 牌,拿雙槓金牌果個李小鵬勁cute呀,望住佢笑我都忍唔住笑左出黎,哎呀,俾人電親添。 媽咪一係屋企,我就好想佢整野食,但結果次次都係我整俾佢食,今次都唔例外,佢話想 食我整的蛋糕喎,蛋糕就easy喇,剛剛之前買左一盒溝好晒,淨係加蛋加牛油就ok喇,反 而整餅乾就難好多,因為要自己溝d麵粉,又會唔知整左d咩狗餅出黎,汪。當我焗緊蛋 糕時,bess姐姐就拎住「呼吸班」張from上到黎,我就填填填喇,原來我係學生(其實已經 係好耐之前的事),個班有得半價架,不過折左都要成千蚊先得三堂,係我以前讀一個月切 雞的價錢喇,我都知呢個「呼吸班」學的野可能係物有所值,但我怕我個豬腦吸收唔切, 到時都係帶埋紙筆,抄低佢講d野,隻隻字都值錢架。bess姐姐等我填完張from就走喇, 媽咪又跟住走喎,梗係喇,黐車坐嘛,唉....丟低我呢個兒童係屋企,結果我辛辛苦苦整 的蛋糕,媽咪一個都無食就走左,嗚~~我一個人哽晒十幾個蛋糕仔,就快變痴肥羊喇,咩~~ 五點幾就梗係睇奧運、睇無線喇,好緊張呀,孔令輝連贏兩局,再連輸兩局,真係睇到我 個心都跳出黎,第五局小輝贏左我仲開心到嗌埋出黎呀,yeah!金牌喎,我都係第一次對 自己國家咁有歸屬感,仲掙住認自己係大陸妹,「我係龍的傳人!」。
好耐未試過一路傾電話一路沖涼喇,今晚終於有機會再試一次,記得上一次咁做已經係三 年前的事,果陣時同好朋友傾電話,總有講唔完的話題,一日到黑可以傾足八個鐘都唔累 ,怎至食飯同沖涼都唔可以阻礙我同我的好朋友繼續傾落去,偶然仲會傾到天光,然之後 詐病唔返學去訓覺,雖然那些好朋友到現在已怎少聯絡,但我成日都會無端端又諗起以前 傻傻瓜瓜的日子,然後我又會諗起幾個以前曾經稱兄道弟的好朋友,「我好掛住你地呀! 」。



九 月 二 十 六 日 星 期 二
我地分手喇
嗚嗚~~起身興致勃勃咁打開雪櫃,咦?我心愛的牛肉腸粉呢?唉....原來俾我哥哥食左, 實在太可惡喇,果一刻真係失望到想喊,唯有硬哽左個叉燒腸喇,嗚嗚~~死喇,呢排好似 食極都唔夠咁,之後又食左條好黑芝麻朱古力雪條,好食好食,有機會大家都要試下,係 明治出品,惠康有售,唉....食完之後又後悔自己忍唔到口,再咁落個頭會變左墨魚丸咁 圓碌碌,你都咪話唔好笑呀。哎呀哎呀,中國女排俾俄羅斯d大山婆"禁"住黎打,俄羅斯 個教練喝到盡咁鬧人,都贏緊架喇,d隊員仲個個口黑面黑,輸一球又發老皮,相比起中 國,二比零都仲可以笑住黎打,歡天喜地,少少火藥味都無,結果中國輸三比零,每局都 係差一、兩分果種,不過我真係好佩服中國女排的体育精神,再加上上次睇完「人妖打排 球」覺得好正,真係有衝動去打volleyball呀,朋友們,一起大嗌「v,i,c,t,o,r, y!victory!!」。
喂,「戀戰沖繩」唔好睇架,欺騙我金錢同時間,不過你鐘意王菲的話又唔同。
好開心呀,展大好朋友karry 打俾我呀,我地講緊下次去街去邊呀,雖然未有得去,但講 下都好開心喇,不過我最想最想就係生日果日可以去西灣露營,我諗可以的話,呢個會係 我過得最特別的一個生日。
唉....實在太令人失望喇,一個同我「衰婆」前、「衰公」後的老死,竟然出賣我,佢將 我講俾佢知的秘密唱左俾佢追緊而又追唔到果個女仔知,而個女仔又流口咁唱左俾我好朋 友知,咁結果我所謂的秘密就兜左一個圈傳番入我耳仔,哇,你話係咪路先,佢追女仔咪 追飽佢囉,我又無得罪佢,對我黎講的一個秘密,竟然俾佢用黎當禮物咁送俾人,唉.... 一件我覺得好重要的事,竟然不被專重,仲俾人用黎當茶餘飯後的笑話,所謂的老死仲唔認有講過,之 後俾我揭發左,又要認番喎,哈,你話佢係咪瘀皮?可能人地會覺得我小器,但你試下替 我諗一諗,我也有維護自己一個小小秘密的權利吧,講得係「秘密」,就當然唔想俾人知 喇,無喇喇係其他人的口講出黎果一刻,我卑微的自尊心受傷害了,你可以一直不讓我知 道你講左俾其他人知,咁我地就係一世的朋友了,但,我知道了,我覺得我對你的信任都 太多餘,我怎可能蠢得去信你?點解我睇唔出你根本無當過我朋友,只不過係想吐我講出 自己的秘密,再暗地裡同其他人恥笑我傻。如果我係同「友情」談戀愛的話,那麼我地分 手喇....


九 月 二 十 七 日 星 期 三
呀咩整餅
嘻,今朝終於有得一償所願,食牛肉腸粉喇,我好鬼鐘意食鹹d,所以一開波就錯手落左 好多好多鼓油,哇,好鹹呀,鹹死羊喇,不過都好好食,唔知幾時先有得去茶樓食香噴噴 的新鮮腸粉呢?
好想申請番一個可以俾訪客留言的日記簿呀,近黎去好多網頁,都已經用緊 lu,即時覺得 自己好落後,仲係用緊html....其實我都唔知日記應唔應該改版,各有好處喇,所以懶懶 咩費事諗咁多,索性踢俾麵包諗(哈哈,擺呀包上台),一於佢改我先改,我跟佢有粥食粥 ,有麵包食麵包(無草食果陣,我係絕對會食左包架)。
今日一口氣入左六個網頁聯盟,雖然對吉場生意不會有太大影響,但係跟左大佬好似有人 撐咁,係唔同d架(感覺上),同埋有一種好friendy的感覺。今日我係icq識左個小魔女呀 ,哈哈,佢好鬼直接,第一句就話覺得我係傻架,唉....一眼就俾人飾穿左,佢網頁都有 link我,簡介果度仲寫:
一個很可愛女孩的網~
一個睇完會感受到好多0既網頁
很欣賞網主阿咩的樂觀積極性格~
網頁的設計也很漂亮~
基本上我每一PART都喜歡~
搞到呀咩感動到想喊,因為實在無人咁誇獎過我,嗚~~~~
悶悶地又走去整餅,我死都唔信邪呀,雖然我對整餅毫無天份,但我後天補救呀,整左N 咁多次,我唔信一次都唔得,於是就抱住大無畏的精神,出盡九牛二虎之力搞呀搞,之後 丟左入雪櫃等佢發酵,不過等到黎都食晚飯 lu,所以睇完金裝四大才子再繼續整,整整下 karry 打黎喎,唔掂,佢一打黎我就失控咁講「出冊」去邊度wet ,哎呀,講下星期日去 我天台睇煙花、又講下展翅大"分唇"租邊個場好,再講下十四、十五號去邊通頂,講講下 ....搞到幾盤餅乾都焗過龍變左黑炭,咦....好苦呀,不過其他靚靚餅乾都好好食,嘻, 算係最好一次 lu,之後媽媽同哥哥好捧場咁食晒,好開心呀,好!我要繼續努力。

九 月 二 十 八 日 星 期 四
永遠都唔相信「永遠」
嘻,今朝又有得食蝦腸喇,好開心呀,日日咁食法,唔知幾時食厭呢。哎呀,晏晝食左半 個月餅,唉....呢排無街去,日日係屋企係咁食,死喇....會唔會痴肥呢?不過食得是福 ,記得係醫院,化療果幾日想吃也吃不下,明明個肚打緊鼓,但都係食唔到,夾硬食又會 嘔,唉....肥就肥喇,反正食得是福,食得是福!
icq2000b可以用咪同人傾計呀,好似傾電話咁架,嘻,計落條數咪好扺?可以超平價傾長 途電話,嘻,我努力遊說路人甲先生"單撈"icq2000b,同我試玩呢個"分唇",哇哇,我地 超長氣地傾左成粒鐘呀,嘻,幾得意丫,你快d試下喇。
開心呀,雖然中國女排入唔到四強,但憑住三比一贏左唔知邊個國家,可以拿番個第五, 我睇到超肉緊呀,每贏一球我就開心都成個彈起,大聲嗌「好野!」,之後睇跳水,伏明 霞愈跳愈好,郭晶晶就緊貼第二,哈哈,結果緊係我地中國的跳水皇后伏明霞拿金牌喇, 晶晶就拿銀牌,個樣好鬼失望呀,忽然間覺得佢地兩個好靚,我總係覺得一個叻的人係特 別靚,但一個外表好索,但又無內函的人,就令我覺得幾靚都好,都會有睇厭的一日。
近排好鐘意聽歌,其中一首係"醫神"的新歌,叫「k歌之王」,我覺得個名好搞笑,一聽 之下,原來係一首慢歌,其中一句好"腰"心"腰"肺,「誰人又相信一世一生這膚淺對白.. ..」,嗯嗯,絕對同意,我雖然係蠢蠢地,但絕對唔相信「永遠」呢個詞語,每次我聽到 人地講起「永遠」,我之會冷冷一笑,既然聽日的事都預料唔到,誰又敢講「永遠」?「 永遠」只不過係某d人一廂情愿的想法吧,我記得我都曾經做過呢d蠢事,果一刻,我對 自己沒信心了,我想用這個謊話去挽留一個唔再愛我的人,所以硬迫自己同佢都相信我們 「永遠」都不會分開,哈哈,而家諗起我都覺得好好笑,一個連自己都騙不了的謊話,我 果一刻竟然講得出口,只因為我太無助了。我覺得鐘意一個人、在乎一個朋友,都唔洗用 到「永遠」呢句咁嚴重的對白,我淨係要知道我呢一刻係好在乎你就可以了。「永遠」係 無自信的人常講的對白,如果真的可以做到,又何必多此一舉?如果到時做唔到,仲會俾 人暗地裡取笑你傻。我唔會話我永遠都唔相信「永遠」,可能我寫完之後的幾分鐘,我又 相信了都未定,不過我知我呢一秒鐘係唔會信。

九 月 二 十 九 日 星 期 五
呀咩吉場新logo
早餐同午餐都係食蝦腸,自從有左急凍的腸粉,唔洗再去茶樓先有得食lu,而且我仲日日 食,覺得再唔係咁矜貴,好,要忍一忍,食下其他野做早餐喇,唔係會好快厭。
今日繼續伸展惡勢力,周圍去連結別人的網頁,哇哇,唉....我真一係一隻井底之羊呀, 睇完別人的網頁,不禁令我幾自卑,他們的網頁內容豐富、設計又一流,睇黎我要好好學 習喇。「普洱茶莊」的網頁有教人整logo架,嗚嗚~~太開心喇,我跟住佢step-by-step咁 做,就整左第一個識郁的logo喇,之後夜晚又再整多一個我覺得比較好的,實在太開心喇 ,兩個我都咁鐘意。
第一個 第二個 遲頓版
包包都係整左三個呀,嘻,我地兩個心有靈犀呀,不過我都係鐘意以前果個多,colorful d。
第一個 第二個 第三個
今日又睇奧運,睇無線喇,原來男仔跳水仲好睇呀,超靚仔的田亮一係拿9.5分,一係 拿10分,胡佳都唔錯,緊貼第二,頭兩名都俾我地中國霸住,哈哈哈,坐定粒六喇,聽 日總決賽贏梗呀,呀,謙虛d,amammm,唔係唔係,其他國家都好勁,所以田亮要加油呀 ,最後忍唔住講多次,「田亮你好靚仔呀!」。
好感動呀,甜心話佢係橙,專登開花黎俾我呢隻羊食喎,嗚嗚~~甜心,我又點捨得咬你丫 ,你咁皮黃骨瘦,d骨"參"死我呀。


九 月 三 十 日 星 期 六
我係made in china
又食腸粉做早餐,正!好精彩呀,胡佳跳水難度3.2,超靚無水花,足足拿左六個10分、一 個9.5分,總分有99分呀,之後到田亮,個個都俾8、9分,但難度3.6呀,所以總分有101呀 哈,眾望所歸,田亮拿金牌,胡佳拿銀牌,happy happy~



十 月 一 日 星 期 日
燒死我喇
哇,一早起身約好karry 同幾個展大的朋友仔諗住一齊去我屋企樓上個天台睇煙花,哎呀, 但係哥哥話原來個天台係有業權架,今日仲放煙花,個業主實會趕我地走,唉....r爆頭, 唯有轉地方喇,好鬼內疚,好彩karry 姑姐牛池灣屋企有個天台可以睇到煙花,實在太好喇 。一切都妥妥當當時,我呢隻麻煩人竟然開~始~頭~痛~,不詳預兆!一探熱之下,嚇到我差 d咬爆支探熱針,下?唔係喇卦,發燒?拿拿臨走去訓下覺先,但訓左成個下午都無退燒的 跡像,仲節節上升,下下?38度?~~~~~~咚!激暈了。嗚嗚~~唯有忍痛同karry 講句「你地 玩得開心d喇。」。今晚好多親戚都來吃飯,媽咪仲專登拿左箱日本墨魚仔出黎招呼客人, 唉....可憐的我,明知生野唔食得,仲發緊燒,都費事多此一問喇,唯有一拐一拐咁"尼"響 廁所沖涼降溫喇,我一向血壓都低,再加上發緊燒,沖完涼暈響媽咪張床度,唉....好唔舒 服呀,之後媽咪拿左支"死光槍"黎幫我吹乾d頭髮,我就依然訓響度扮煎魚。又會國慶同悉 尼奧運閉幕同一日咁濕滯架,睇完人地果d,當堂覺得香港d煙花好細、好核突,好似係大 陸自己買黎放果d咁,哈哈,不過最正就係屋企個窗口睇到煙花,無樓庶住,係就係遠d, 不過唔洗同人迫係咁架喇,可惜唔可以同karry 佢地一齊「哇!」喇,唉....仲約左好耐, 點知又無得去,掃慶。睇完煙花又覺得無乜點頭痛喎,仲走左去玩〈the sims〉,以為無事 喇,點知一探之下,又升多d,下?媽咪、爸爸話要今晚入院呀,嗚~~我死嫘,勁喊,攬住 張床死都唔肯入院,果一刻真係好down,不停埋怨自己點解會有呢個病,我先得17歲,我應 該成日周圍去玩,我應該去番學讀書....我才不要堅強,我要軟弱,我要喊,我要有人錫.. ..但係身邊又有邊個可以体會到疾病的痛苦?整晚反復的飲水、敷冰袋、去廁所、探熱.... 不到一個鐘意起一次身,而溫度計一直無情的維持住38度、39度,頭又痛,身体又發熱,幾 時先天光呢?我腦裡面響起梁漢文的「pg家長指引」,「你要陪住我,我怕我有病望著支探 熱針,燒得這麼滾,卻欠缺你為我擔心......」 


睇左未<------------昔人發傻------------>繼續睇