八 月 十 四 日

網頁風雲 尋晚發夢，兩個好朋友呀連同ｓｕｓｕｋｙ兩個夾埋唔理我，點知一起身ｓｕｓｕｋｙ打黎話 佢可以返慕光讀中六，仲同呀連一班，聽到果一刻真係幾不是味兒呀，但係諗深一層，又幾鄧 佢開心呀，ｓｕｓｕｋｙ你要努力讀書呀！ 今朝九點鐘社康姑娘就上左黎幫我洗傷口呀，見佢手震震咁，真係勁擔心呀，平日病房姑娘花 一分鐘的事，他足足搞左半個鐘，佩服！連續整左五日餅，今日都係抖抖喇，費事日日哽那些 失敗之作會中毒呀。嗚．．．．吉場開業以來，深得各位愛戴，但今日俾人第一次俾人彈呀， 所以有ｄ唔開心，她大慨說飄下來的東西花巧，而ｄ ｒｅａｌ就搞拖到個網好慢，可能真係 俾人寵慣喇，於是好介意的立刻去改，但為別人喜好而改，又不是自己意願，網頁就失去過性 了，而且是個人網頁呀，總有自我風格，這就是各人的眼光問題喇。在此謝謝小冰的意見呀， 我也會好好參考一下︿︿。 正為網實頁的事介意時，在報館工作的ｍａｒｔｉｎ哥打俾我呀，說起之前將我的網推薦了給 某雜誌的事，今天有回音了，他的記者朋友說想約我出來做一個關於我網頁的訪問，哈！笑左 我成晚呀，開心死喇，雖然知道篇幅不會太大，但有這樣的機會實在太難得了，哈！ 夜晚又同龍哥仔吹水，講起下次去西灣玩，果度風景真係靚到好似「麼麼茶」果個咁架。

八 月 十 五 日

呀德要走了 今早八時就起床了，要回瑪麗醫院覆診，「篤」手指驗血，今次好痛呀，我仲以為佢「篤」穿 左隻手指呀，原來血小板得番十七粒（正常人有一百五十粒），所以隻手指流血不止，之後「 銀」一「銀」隻手肘，又瘀左，好利害呀，痛！ 和我一起二月入院的姐姐，以前我們關係好好的，她一直到現在也沒有出過院，所以整天都不 開心，剛剛那次入院，我又住他鄰床，但我們一句話都沒說過，今天回去，聽說她調了去南朗 ，你知那是什麼地方嗎，那是一間善終醫院，我想，我也會有這麼一天嗎，輪到我時，我諗我 真係再笑唔出喇。 回到家裡，又收到小冰的信，哈，昨天說完我的網頁，今天就說我平日是扮開心呀，唉．．． ．好奇怪喔，我有點不開心喔，因為覺得她誤解我了，而我又是一個很介意別人看法的人，所 以我就盡力去解釋，寫了一篇＜我最幸福了＞，寫完過不了三個鐘，我又怪自己這篇東西太「 激」了，根本就是一時衝動所寫的，沒有主指、看完也不知自己講咩，真係「蟬」到爆呀，呀 咩真係超笨蛋，但這也是吉場的個性之一吧，哈，就係咁傻仔喇。 ｉｎｔｅｒｎｅｔ ｍａｇａｚｉｎｅ的記者今一打俾我，約好星期五在我家做訪問喔，好緊 張呀，真係多謝ｍａｒｔｉｎ哥幫我推薦呀，唔係佢我都無今日呀，佢仲係肉緊過我，好似個 網係佢親生仔咁，嗚～～～好動感呀！ 今日真係俾天玩呀，唔開心完又開心，開心完又唔開心，台灣的好好朋友呀德，告訴我他的店 子要關門大吉了，一想到可能再見不到他上網，我就忍不住哭起上來喔，什麼心情都沒有了， 記得他在我入院、失戀的日子不斷給我電話去鼓勵我，呀咩又怎可以沒有呀德呢，沒有他我的 日子怎過，說到這，我又．．．．．

八 月 十 六 日

今夜沒有風 嘻，呀的煎的班戟真是最好吃的早餐呀，好好吃喔，想吃嗎？不給你吃呀。今日聽左ＧＩＧＩ 的新ＣＤ，ＫＩＳＳ ＭＥ，有首歌真係幾好聽，叫「今夜沒有風」，好ＴＯＵＣＨＩＮＧ， 尤其係其中一句「必先有愛才可有痛，有你做伴才會做夢」，嗯，快快去下載喇。好開心呀， 見到斯斯係民主牆留言，他是我和呀德的好朋友呀，很久沒聯絡了，記得我們一起行走江湖時 ，還改了「咩德斯三人組」這個帥帥的名字，但現在各有各忙了，呀德最近又變得ＣＯＯＬ了 ，唉．．．．原本好想把網頁被訪的事告訴他，但他好像總是心不在焉，還是算了吧。 哇喇，有看ＲＥＪＯＣＥ廣告嗎，呀感好靚仔呀，「洗頭，ＰＵＳ~~」，好正呀，大家一齊跟 我講「洗你既頭髮，仲洗你既睇法，ＲＥＪＯＣＥ」。 我又想發嗡風喇，其實有時做事，忠於自己的感覺，過到自己果關就可以了，畢竟不同想法的 人太多了，我們都是自以為是的去想，實在好難可以取得共識，亦好難叫全世界舉手同意，可 以向自己交代就去做吧。

八 月 十 七 日

你地都乖喇 好悶呀，成日想開一個講平日ｄ開心野的ｉｔｅｍ，但諗黎諗去都諗唔到個格式，所以遲遲唔 開張呀，鑑於靈感乾涸呀，所以走左去睇左三套戲，古天樂係「極度重犯」裡面好鬼潚呀，搞 到我起勢咁亂跳亂叫「古仔你好正呀」。顛完之後入媽咪房訓覺，但係好熱，好似係沙灘曬太 陽咁乾蒸。唉....都話七月邪架喇，都唔知做咩，手震震倒瀉左杯阿華田落個ｋｅｙｂｏａｒｄ 度，於是拿拿臨反轉個ｋｅｙｂｏａｒｄ起勢咁拍，哇喇，唔拍尤自可，一拍之下，餅乾碎、 薯片，就連指甲都有，好邪。 媽咪同爸爸上左深圳，差ｄ俾人打何包呀，個賊用報紙庶住隻手開媽咪個袋，好彩媽咪醒目， 見到後起飛腳踢個賊，但係始終人地地頭呀，個賊一支箭咁走左，賤格。 哇喇，留言版變左城市論壇呀，我都唔知吵左咁耐係為乜？只不過係為啖氣之嘛，我真係舉起 雙手認輸喇，反正我的世界空氣多的是呀，俾你吸一口又不會死，爭贏了後又不會多舊肉，哈 ，生氣的人會變醜呀，唔好再嬲喇。原來有時講野唔係講得多就好架，講完一大堆，無 ｐｏｉｎｔ，都唔知講咩。我唔出聲就以為我死左？我只不過唔鐘意潑婦罵街，不如咁喇，天 氣都凍喇，大家留淡氣暖下肚喇，如果唔夠喉仲想鬧，就自己開個留言板鬧喇，呢度唔係城市 論壇，唔俾人係度用個水樽當大聲公講野架。強、六月、沙灘仔，你地都乖喇，我知你地錫我 ，但道理唔係個個聽得明架。其實我都好羡慕自細俾人寵慣的人，什麼都爭贏，沒人作對， 什麼想講就講，這些不是叫率直，是叫口不擇言。朋友們，適可而止吧，不可以再寫了。 呀咩吉場的賣點是「快樂」，又不是競技場，打打殺殺都不是呀咩想見到的，來來來，我們一 起大聲嗌一聲「出入平安！」，係咪開心ｄ呢，係喇，笑番咪好囉，傻瓜，嬲得多唔好架，係 咪？我們都是有風度的君子嘛。 ｐｓ：其實我都係一個大學生，哈，不過只係讀大一的學生，又野蠻、又中五畢業、又無教養，哈。

八 月 十 八 日

「庫爾斯克」號 哇喇，真係超驚呀，今日Ｉｎｔｅｒｎｅｔ Ｍａｇａｚｉｎｅ的記者姐姐ｉｓｉｓ上黎探我 呀，好彩姐姐好ｎｉｃｅ，所以我先無咁驚咋。其實今次我真係好開心架，所以話左俾好多朋 友知，原來有人分享，開心和不開心才變得真實和有意思。 昨晚看那套台灣節目，竟然繳請的嘉賓是表演~喝~牛~奶~，然後再在鼻流出來，多可怕的表演 ，之後還吞了一個硬幣，再嘔出來，真是.......十個服！ 這幾天都留意到那個關於拯救俄羅斯核潛艇「庫爾斯克」號的報導，看了後內心真有點不好受 ，試想想困在那又黑又冷的船倉中，面臨死亡的感覺是多可伯。那一百一十八個船員幾天前都 是那麼壯健，從沒想過這次光榮的任務竟是死亡的呼召。你說人生是多無常，好多好多意外都 是始料不及的，就那麼一秒鐘就把你一生扭轉了，我們還可以生存於世上，是幾大的恩賜。既 然人生最差就是死亡，我們還有什麼要怕？還有什麼值得去計較？這一秒你可以見到他，但可 能下一秒的一句「再見」就成永別。一生人可以說多少次「再見」？總有一次的「再見」是最 後，總有一次的「再見」是你們不會再見。好好珍惜你所擁有的，你才會幸福，當你在喊著你 失去什麼、得不到什麼時，試試去看一下你擁有的，其實你已經好幸福了，因為懂得滿足，你 才會真正富有。

八 月 十 九 日

自以為是的豕 好過份呀，點解「朝街孖兄弟」個呀媽係血癌呀？仲要一班無知的人又勁講血癌的負面東西， 令我好反感呀，真討厭，不如講埋無得醫，死梗好唔好，咁咪夠精彩，又高ｄ收視囉。 今日三點要去什麼「展翅大使」的吹水會呀，哈，入到去個個都唔係靚仔靚女（當然包括我呢 塊豬扒喇），所以當堂無咁驚，因為通當好正果ｄ都好串。講左三個鐘，仲ｋｅｅｐ到全部悶 場，真係好難得，我發現好多人都係民安隊架，所以一見如故，仲有一個係我果屆，不過唔同 組和無講過野，哈，我都無晒頭髮，佢竟然認得我呀，仲話「我梗認得你喇，你係孖辮妹嘛。 」哈，原來呀咩係民安隊都有ｄ名氣，勁！ 話時話，今日好邪，有個叫呀租的男仔打黎搵呀咩，佢話識我喎，又講得出我入過醫院，佢又 話個電話係我係條街度俾佢，真係好可疑呀，我都唔會隨街俾電話人，估左三分鐘都估唔到， 我咪話我諗到再打俾佢，哈，但我都無佢電話，是但喇，不過真係幾懸疑。 唉，個男仔朋友唔開心搵我傾計，傾左好耐都開解唔到佢，佢話覺得無知心朋友，我一聽到佢 咁講，即刻覺得好慚愧，覺得自己好無用，好想幫佢但又力不從心，好無奈，一邊心痛他哭， 我又怪責自己了，於是我們在電話裡頭都一起哭了。 有時同人傾計，我們都不知不覺會將自己的想法強加於別人身上，企圖要別人認同自己，但是 其實每個人心裡都有一個想法，每個人都認為自己是對的，這就可能叫自以為是吧。我想我一 定是這種人，因為我寫了一整個網頁、發嗡風發了幾十頁，那些個人感受通通都是我一個人認 為的。但有屬於自己的想法和覺得對的生活方式，才不會被別人牽著走，那到底自以為事，是 對是錯呢，我想不過份，又不會令別人難受就可以了。 光陰匆匆工作似機器 叫我困倦力疲 將心的感覺透支了 要去轉換空氣 凡事有驚喜 不需要皺眉 凡事有轉機 信心不放棄 總要釋放自己 面對未來 一切優劣是非 別困擾你 當失戀的心再跳躍不起 怕要愛別離 裝開心也振作不起 思想像要缺氣地喘氣 期望有驚喜 不需緊皺眉 何用費心機歇斯底里

八 月 二 十 日

長期的失眠症 今日真係好無聊呀，呀的又放假，早餐無人煎班戟，媽咪煮左個愛心麵俾我食，但係好難食呀 ，所以淨係食左三份一。民安隊第五張黑膠椅呀四哥黎探我呀，哈，我地一齊吹水，吹吹下水 訓著左ｚＺｚＺｚ。之後夜晚我地又傾電話傾到一點幾，勁呀，馬拉松式聯誼吹水活動。 我對那一群ｉｃｑ一開口就話溝你的男仔充滿強烈反感，今日有個人同我咁講，我即刻鬧左佢 成個鐘，可能呢排太太燥喇，但係佢地真係太低能，唔該佢地咁恨瘟女就ｒａｍｄｏｍ搵個喇 ，真係好煩呀。 今日係入境處的梁錦光先生出殯的日子，我真的替他很不值，也不明白點解ｄ大陸人成日要黎 香港，成日話團聚，點解唔番上去團聚喎，根本就係藉口，你地知唔知香港俾晒你地黎晒團聚 會陸沉架，你地咁鐘意黎，不如交換喇，我地番晒上去好唔好？ 我有一個古怪的習慣呀，有咩唔開心屈住，就會好早起身，近呢兩個月我都係咁，無論係淩晨 四、五點訓定係十二點訓，我都會早上九點、十點就醒，漸漸我的精神都變差了，一整天都沒 精打采，我不得不承認有一個心結是一直屈在心底。今日係呀基的生日，我八點就醒左，一直 都好想打個電話俾佢，但我不想給正快樂慶祝的他做成搔擾，我只是靜靜的站在向著他家那片 窗前，幽幽的唱起一首生日歌「祝你生日快樂~祝你生日快樂~祝你生日快樂~~祝你生日快樂~」 。既然打給他說一句「生日快樂」是一個祝福，那麼我現在一個人唱，也算是一個祝福喔。可 能我們已經到了老死不相往來的地步，所以我只好躲起來靜靜祝福你，也不願再打擾你的生活 ，「但願你永遠不要悲傷」。 如果仰鬱失眠的情況再持續下去，我想我會受不了，但我並不因為那個心結而拿埋口面，反而 覺得，既然這個結的存在已成事實，再怨都無用呀，所以我每天都抱著一個希望，我相信這個心 病，會好快給某一天某一個人的某一句說話，就一秒間打開了，以後我可以睡至日上三桿，就 是抱著呢個希望，我又傻傻更更笑起來喇。 ｐｓ：六月呀，唔好唔開心，你實溝死仔架。

時光倒流<------昔日發傻------->下回分解