| 二零零零年 八 月 八 日 | ||
|
每天都抓狂 哇喇，其實看見別人的網頁都有日記，我都好想寫架，但係自己都無得好似人地咁日日去玩， 邊有咁多野寫喎，但又為左一己私欲，唯有天天亂抓狂，哈~~咁就自然多野發嗡風喇，有時諗 番，個網係為自己寫的，自己想講什麼就什麼，但近期吉場都變得商業化喇，這個新的日記就 是要和商業化對抗，我要吉場活生生有番自己的性格，嗯，呀咩開壇作法喇。 | ||
| 八 月 九 日 | ||
|
放榜日 放榜喇，上年的今日都係我的大日子。果幾個英文字母係死架，人係生架，佢唔可以掌握你一 生，廿幾分唔通就可以打破腳唔洗做咩，今天過後零分又好、三十分又好，都係要繼續努力架 喇，你要讀書無人唔俾你讀，我五分係好差，我無自怨自艾呀，可能因為根本無打算上中六喇 ，不過我係之後半年都實踐到我理想讀切雞，我咪又係拿住果五分，活到今天又係一條好漢。 朋友send massage黎叫我勸佢唔好做傻事，真係俾佢吹賬。 同甜心諗緊個我頭染咩色好，我想染青or橙色，但最後都係決定紅色。 susuky十二點幾打黎，話我知佢有十分，佢都算鬼馬喇，自己係廣西人，操得一口流利的國語 仲去考普通話，俾佢博到個c，勁呀！佢又捉住我講佢上左"face"雜誌(大家不要買呀)，仲有有 個食大茶飯的男仔成日纏住佢，愈聽愈覺得勁似做戲呀，搞到我都心郁郁好想去玩tim。 半夜三點，都七月喇，有線洗唔洗玩到咁盡呀，仲播"陰陽路"，都顛架。 | ||
| 八 月 十 日 | ||
|
終於有電視睇 今日又廷續尋日的無聊，所以又去左「呀咩整餅」，尋日「發」蛋「發」到手抽筋咁滯呀，先 整到d好古怪的所謂曲奇餅，我諗cookie monster見到實激到變左紅，不過我自己就唯有邊話好食 邊叫人食喇，哈，幾陰毒。今日我整朱古力蛋糕呀，原本整左個細細的試味，又幾好食，但整 個大時，點整都係個表面熟，裡面唔得，結果就失敗左喇，唉..... 媽咪幫我係深圳買左對木乃伊鞋呀，最衰粉紅色無我個碼喇，於是就買左藍色，卡娃伊呀，有 新鞋著，搞到我好想去街tim。 唉....屋企部二十九寸電視前兩日發皮氣罷工呀，我地又家貧喎，買番部細五寸的電視番黎，我 諗要坐到好近先睇到。 識到一個講野好有深度的icq朋友tamwf，原來有時講野唔洗多，最緊要有point，佢影d相簡值係一流 呀！ 我係網友個網頁發現東東著吊帶衫，好傷心呀，真係唔知好嬲定好笑。嗚~~~~
| ||
| 八 月 十 一 日 | ||
|
Mary Says 好邪呀，尋晚發夢去camp，見到民安隊打我果個女仔，又見到一些慕光的同學，仲見到身在加拿 大的暉暉，我仲不斷問佢，「你唔係話暑假番唔到黎咩？」，哈！原來我真係幾掛住暉暉架， 暉暉你幾時陪我去玩呀？媽咪今日唔洗番工，而我就興致勃勃咁坐係麻麻張遙遙椅度欣賞新電 視，尋日送黎果陣我仲有眼不識泰山話佢細，但原來佢係sony平銀幕，d立体聲勁正，好似係太 空館天幕廳睇戲咁，實在太好喇。今日又整餅呀，係幾好食，但係超硬，我諗由十四樓掟落街 都唔會爛呀，哈。食左個好甜好多核的西瓜，我都唔知自己真係係度食核定食西瓜。聽左一首 好好聽的英文歌，叫Mary Says，王力宏唱架，係講一對分手的男女.....哈，係呢類慘情歌先o岩 我呢個失戀老人架喇。 susuky好慘呀，我母校話唔承認佢普通話果三分，因為佢地無教國語，即係當佢得七分，所以 唔收，真係唔知好嬲定好笑。 | ||
| 八 月 十 二 日 | ||
|
開大食會 今朝我又整餅了，嗯，我保持得好好喔，連續四日都失敗，實在係好難得，蔡瀾見到我都會好 佩服我。好野！呀諾話下個星期帶我去一個位於荃灣好正的地方，好緊張呀。同呀如傾下次去 邊玩呀，我地打算去有十個「靚」的西灣玩，講到興高采烈時，佢問我 「呀咩！咁撘咩車去呀？」呀如問我。 「唔知呀。」哈，即時滴汗....點算呢，仲講左成粒鐘，點知唔識去，「瘀」字點寫呢.... 「我好想唔去呀！阿咩又唔識點去，講就天下無敵，做就....仲話叫多d 人去，唔好卦。」 嗚~~~~連平日唔聲唔聲的呀如都串我.....嗚~~~~ 夜晚去左姑媽屋企開大食會，姑姐的火雞絲泠麵真係超好食呀！食完野又無野玩，咁咪同表哥 、表妹、細佬走左去玩超經典的任~天~堂~係咪邪呢？認真超趣味呀，睇住game裡面果個人勁似 笠住條紅底褲、揹住個「哨機」，拎住支所謂的熗(其實似拎住個維他奶盒必d野飲出黎)，簡直 係笑到扒街，頂癮！ 哈！我剪頭髮呀，光頭仔仲產左條界，勁yeah呀。 | ||
| 八 月 十 三 日 | ||
|
七月十四 我的偶像小喵到訪呀，好感動呀，佢個網頁好卡哇伊架。唔知佢點黎架呢。 我第五日整餅喇，原本係整蛋糕，但發現太硬，所以索性張錯就錯，整餅乾，但係媽咪話似麵 包，不過又幾好食喎，就叫「羊大餅」喇。今日我又整左個新的招牌喇，不過呀強哥仔話個公 仔有埋個頭會好d，其實個公仔係我做壁佈果陣畫架，係光頭呀咩扮小強的，哈！  今日七月十四呀，夜晚入房一打開電視就播緊「七月又十四之信不信由你」，哇，洗唔洗勁日 日播鬼片呀？搞到好似普世歡騰咁，真哈皮呀。 | ||