媽咪生日快樂

::::::十二月三十一日::::::星期一:::::

今日係媽咪生日呀,我同哥哥尋晚一撘入十二點就唱生日歌,再捧個蛋糕出黎,係脆脆芒果蛋糕呀,好吃好吃,嘻,睇下媽咪幾開心。

今晚係大除夕呀,本來想約karry佢地架,但karry要同屋企人一齊,而今年展翅班同學仔又話出去玩喎,於是我就跟大隊,睇下有咩搞作喇。前兩日我地幾個響電話討論去邊好,決定去韓國燒烤,佢地幾個一係住荃灣,一係住青衣,一係住屯門,總之九成九都係新界區,所以就話響荃灣食嚕,但係除夕流流,響荃灣好似怪怪地喎,梗係響尖沙咀、銅鑼灣迫下先似樣架嘛,但佢地又話荃灣燒平d,只需百幾蚊,車,尖沙咀都係百幾蚊之嘛,如果係計平既話不如黎晒官塘燒喇,七十幾蚊之嘛,唉...想近自己之嘛。如果響荃灣我都唔係咁想去,因為去荃灣一定要撘地鐵,而上次平安夜撘地鐵,我差d暈響度呀,諗起都打個冷震,最後決定響尖沙咀,咪好嚕,大家去既路程都差唔多,公平d嘛,於是我同thomas同jimmy一齊打電話去book台,book完之後jimmy無端端話唔去,叫我地自己去,下?唔係咁玩嘛,頭先傾果時個個話好,而家book左先話唔去,玩野呀,唉...真係激死我呀。過左兩日時間,最後決定唔去尖沙咀,唔去韓國燒烤,咁去邊呢,去銅鑼灣喎,都好呀,不過我打算十點鐘左右走,去工展會同媽咪一齊倒數,因為同班同學都唔係咁熟,又唔多玩得埋,連去邊都搞一大餐,無乜共識咁,唔想無無謂謂浪費左咁重要既一日嘛,廣告都有教喇「始終都係媽媽好。」。

今日係除夕喎,梗係要扮靚d,但...我個咀角裂左呀,係囉,本來無咁衰架,其實係我刷牙果時"依"得個口太大(絕對唔係笑到個咀裂左呀),本來佢都結蕉架喇,我又衰多手囉,成鬼日"meet"佢,"meet"到佢遲遲都未好番,唔理喇,今晚大晒,照上粧喇!上年除夕剛剛出院無得去玩,前年就去左跑馬地睇show,果次都幾開心架,我黐左粒閃閃貼紙響左邊眼角,夾曲左d頭髮,掛左隻傻豹響件衫度,戴左頂小丑帽,仲拎左兩隻大手板手套添,哈,好懷念呢,好!今次都咁打扮先。

掛住打扮,搞到遲晒出門口,去到銅鑼灣仲要封路,搞到遠遠先有得落車,佢地約好響地鐵站F出口等,我就懶醒,諗住時代廣場係A出口,咁F出口實響sogo果邊架喇,於是咪由三越行左過去世貿中心(唔係911果個呀...),行左好耐之後,經過E出口以為就到喇,點知...行到去sogo都唔見,最後打俾jimmy,先知原來F出口即係屈臣士對住果個...嗚,我足足兜多左一個長方形咁多路呀,行到眼坦坦。頭先響車上面見到眼鏡舖出面有人派波波呀,係入氫氣果d喎,勁想拎番個,不過因為封晒路同太多人,原本行三十秒必定到既路程,我諗起碼要行一個字或以上囉,唉...波波呀,我想要波波...


好多人呀條街

thomas、jimmy、阿達、阿瑩、阿may、sammy幾個響茶餐廳食野,jimmy嗌左個「雞公」,我R晒頭都唔知係乜,唔通係雞公既肉?定係我聽錯,應該係雞「冠」呢,哇...食雞冠咁恐佈,個侍應俾左個公仔麵佢,上面有d肉,咦...莫非上面d肉就係雞冠...呀...後來先知,「雞公」即係...雞扒公仔麵,嚇親添。因為好恨食格仔餅既關係,所以叫左個奶醬多,又有奶,又有醬,咪差唔多。sammy就勁嚕,佢嗌左個西多士,食完一個仲唔夠,要整多個添,唔滯架喎,兩個加埋都三十幾蚊喇,食個飯咪仲扺d,不過想食又例外既。jimmy食完走左出去話買野喎,原來佢聽我講話想要波波,專登走去拎呀,可惜俾人拎晒嚕,但我都好滾動呢,起碼有朋友對自己咁有心喎。

食完野我地就成棚人行番過去去屈臣士果邊,開始討論仲可以去邊,哈,時間仲係八點幾,咁快就要諗去邊,d時間點磨呢.呢.呢,忽然氣氛變得好無聊,因為無人有意見去邊,而我地企下企下,已經響人地giodano門口企左好耐,呼...好彩我預左今晚去搵媽咪咋,咪陪佢地企下嚕,之後佢地話行入去時代廣場,哇,隔幾個街口已經俾想入時代廣場既人潮阻住去路嚕,原來果邊一早爆晒喇,而我地隊尾呢度,根本連時代廣場都見唔到,前面既人企定定唔郁,後面又不停有人湧過黎,我地只係黎左一陣之嘛,已經俾人迫實晒,佢地話實入唔到時代架喇,要走快d走,再遲少少走都走唔郁呀,真係誇張呀。

結果我地又走番去giodano門口,哈,人家真係多得我地唔少呀,遮左佢半個門口,難委阿達個女朋友黎埋陪我地企,不過我好羡慕佢呀,咁凍都可以著咁少衫,著得鬼咁靚,我身子弱囉,每次出街都包到成隻粽咁,件衫登台咁靚都無用喇,件褸都遮實晒嚕。見佢地無乜搞作,我就提議不如去工展會喇,哈,有人陪我去丫嘛,佢地又無乜意見,問我點去喎,銅鑼灣行過去唔會好遠卦,行去囉,兩個地鐵站之嘛,橫掂無野做,咁多人當行百萬行都好呀。thomas同阿瑩見我地無乜打算,所以就約其他朋友嚕,thomas就話落club,佢係我第一個識既朋友會去呢d地方,真係驚歎呀,而阿瑩就陪多我地一陣之後再過去尖沙咀,都好呀,我又有著落嚕,我都想個個過得開心架嘛。

於是我、jimmy 、瑩瑩、阿may、sammy、阿達、阿達's女友,一行七人就開始行過去灣仔,其實...話行果個係我,諗住大時大節係行下迫下先有氣氛架嘛,見佢地無反對,咪行囉,點知行左一半之後jimmy就扭計話唔舒服,我就陪佢慢慢行嚕,之後佢地又嫌遠,咁又係,未行到過灣仔個個塊面都變晒色咁滯嚕,於是我地咪諗住行到過去灣仔地鐵站撘的士,我又衰多口話有穿梳巴士,但等極都無,好似老點左佢地咁,唉...到頭來都係分兩架的士去。嘻,我有三張免費飛呀,我同jimmy同阿瑩三個響的士分左佢,又慳十蚊喇。

我地入到工展會,聚集左之後,阿達就同佢女朋友兩個去行,拍拖嘛,而我地五個就一齊慢慢行,哇哇,行左一陣我就忍唔住,要去我黎親都吃既阿波羅雪糕,而jimmy就買左一兜燒賣同魚蛋,好正咁喎,之後佢買左個沙律,瑩瑩又買左雪糕,呵,終於搵到今晚最有意義既時間喇,好吃好吃,雖然天氣好凍,不過可以食想食既野就一d都唔凍,仲好幸福添。咦?食食下發現唔見左sammy,sammy呢!周圍都搵唔到佢,佢換左電話又無俾我地喎,都係因為佢打過一次俾我,我先有咋,我咪打俾佢嚕,原來佢一個人走左去,呀...仲細咩,成班一齊走左去都唔出聲,佢話去左影相喎,搵番佢之後無耐,又唔見左佢嚕,唉...懶得再搵佢,咁古怪既人都有既,你係想自己一個既,你無需要同我地一齊架,既然我地一齊黎既,你走開係唔係都要講聲呢,我地會擔心你蕩失路架嘛,唉...唔怪得佢話佢無乜朋友喇,我都開始頂唔順佢既古怪性格。今晚最刺激就係,我地成班偷偷走左入本來欄住既大維他奶模型度影相,哈,有罪惡感先夠開心卦。


jimmy仔扮克勤

阿瑩走埋之後,開始覺得今晚好失敗,出到黎先知無地方去,企左成晚,差d變左企鵝,而家又愈黎愈人少,所以我就決定離開佢地,去左搵媽咪,順便坐下抖下,一坐低我就唔願走嚕,同媽咪一齊開心d,多d計傾丫嘛。媽咪買左兜螺肉同埋格仔餅番黎俾我吃呀,d格仔餅就麻麻地,腍既,都唔得脆,仲好放左成日咁,食左一啖就忍唔住放低左,d螺肉就唔錯,呵呵,繼厭食之後,暴食症就黎喇,不過唔緊要呀,仲有排俾我暴食,食得愈多愈開心,最好去食番次回本既自助餐,哈哈哈(進入忘我狀態)。


左起,阿may、我、瑩瑩、jimmy

jimmy黎媽咪攤位搵我,俾左個膠袋我,立下眼見到入面有一個綠色既圈圈,上面有幾朵紅色既玫瑰,哇,咁邪門,成個花牌咁,采采采,我仲未死呀,做乜送個花牌佢我呀,於是我咪俾番佢嚕,哈,其實果個係個廁紙套黎架,不過我屋企係用盒裝紙巾,見用唔著咪俾番佢嚕,但佢怪我佢送俾我既野我唔要喎...唔係唔係,係我用唔著,放響我屋企我又會周圍放,遲早變左垃圾,咁我珍惜佢呢份禮物,所以我俾番佢,希望佢可以用到個廁紙套既真正功用嘛,哇哇...解釋完都有少少覺得自己實無老人院收呀,結果為左佢開心,我都係收左,不過可以點用呢又係呢一回事。

十二點喇十二點喇,我掉低我媽咪,走左出去廣場搵班同學仔倒數,唔係唔想同媽咪過,而係媽咪唔會介意呢d時刻嘛,我地晚晚響屋企都可以倒數架,但我同我班同學仔,始終係一齊黎既,唔一齊渡過呢個時刻,我會覺得自己好無義氣囉,(整個莫文蔚喜劇之王look丫唔該)正所謂「情與義~~~~值千金~~~~刀山去地獄去有何憾~~~~」,都好呀,呢邊有阿好姨同我地一齊倒數。

同班同學仔倒數完,我地就分別喇,過番去搵媽咪,媽咪話頭先倒數呢面好有氣氛呀,個個檔口d人都走晒出黎一齊數,仲睇住長江大廈添,哇...好羡慕呀,我既長江大廈呀。同媽咪一齊行去地鐵站果邊撘巴士,經過有棵好大既聖誕樹,忍唔住衝左過去影左兩張相,係呀係呀,我好鐘意同聖誕樹合照架,唔知點解喎,因為鐘意,所以鐘意囉。架巴士經過銅鑼灣,d人潮先散,哈,好彩無黎迫咋,唔係撘巴士都無位坐,一定累死街頭呀。我就好有精力四圍望呀,但成點鐘嚕,媽咪就一早頂唔順響巴士瞌著左嚕。


聖誕樹呀~~


神奇萬能媽咪累了

新既一年祝大家每天偷笑、傻笑、狂笑,阿咩吉場與你同在,秒秒鐘歡聚歡笑~~

叫我表姑姐

::::::一月二日::::::星期三::::

哇哇,上次同展翅班同學仔去唱K,皆因唔想俾佢地知我唱歌咁難聽,所以一直都齋聽,無乜點唱,俾左百四蚊聽K,真係有少少心有不甘,所以決定一定要去再唱一次夠皮既,呵,好彩阿dick放埋今日假,聽日先要番學,所以一於捉佢陪我,兩條友去?梗係喇,個個都要番工番學,而且人少少先夠膽唱丫嘛。

前日除夕,夾硬勁上粉落個咀角度,想遮左個傷口去,點鬼知...惡報黎喇,尋晚開始個咀角已經痛痛地,今朝起身仲起埋水泡仔,一個一個咁,痛到我死呀,哎呀,但去街唔化粧會好驚嚇架喎,仲約左響銅鑼灣呢d地方添,但...如果我照上粉,佢惡化爛面我咪死俾佢睇!哈,於是我好專業咁,化晒成塊面,淨係唔化個咀角,得既咩?唔知呀,唔會好覺...卦。媽咪仲嚇鬼呀,話我個咀角生蛇呀,呀...救命呀,我見過好多病友生蛇,都痛不欲生架,仲要入醫院吊藥呢,因為d蛇會入神經線,所以會痛到發癲架,唔制呀,我剛剛出黎,又要我入番去,唔係嘛,嗚...媽咪仲話醫好都有疤痕架,我唔要變刀疤咩呀。嚇到我無晒心機,望住塊鏡發牛豆,嗚嗚嗚...

媽咪今日都係響工展會開工,於是我地就一齊撘巴士出去喇,我約左阿dick響灣仔唱K呀,因為佢四點鐘左右要番學杯夾band喎,為左唱多d時間,所以就揀間近佢學校架喇。本來lunch k係由十二點開始架,但我扭扭擰擰,所以又約遲左半個鐘,哇哇哇,因為我地遲左d去到開房,d細既房俾晒人,所以俾左間成二十人既大大房我地呀,哇......(大到有迴音)勁開心呀,我第一次試兩條友都咁大間房架咋,個電視又寧捨大過人喎,呵呵。thomas同阿達響銅鑼灣番工,佢地話黎喎,唔...我諗無乜所謂喇,唔係大棚人我都敢唱...卦,過左兩個字左右佢地就黎到嚕,死喇...原來我真係會唔敢唱架,阿dick話晒都識左年幾喇嘛,哎呀哎呀,結果下下都要佢地伴住我唱,我先敢唱,真係無鬼用呀,而且thomas、阿達同阿dick又唔係咁熟,所以d氣氛好似好靜,無乜人講野,到左兩點幾,我地已經到左無晒歌好點既地步,其實我仲有好多歌想唱架,不過...怕醜呢...哈,我會架喎。lunch k到三點完,但多數唔趕,可以唱多一陣架嘛,上次同阿龍去唱,唱到五點幾添呀,但今次一到三點即cut,哦噢,閃。


好大呀...呀...呀...

阿dick佢要番學校,一個鐘左右,我就諗住一條友去銅鑼灣行一陣街,等埋佢放學再一齊去行多陣,點解一條友都去行?因為我真係好去恨睇衫、睇化粧品、睇野食呀,我響醫院困左咁耐,每次一睇non-no真係發癲咁滯,所以我要去shopping!thomas同阿達又無地方去,其實佢地放lunch咋喎,點解可以放咁耐架,佢地話同埋我去行街,下,咦...我睇女仔野喎,兩個男仔好似實Q咁跟住,好驚架喎,而且點可以俾佢地見到我貪小便宜既師奶樣架,於是我地又企左響前日除夕,企左好耐諗去邊度好既地鐵站E出口,佢地兩佢企響度,睇人地點sell保險喎,我甩唔到身咪同佢地一齊企嚕。

糾纏左半個鐘頭左右,我地決定去麥記食野,咦咦咦,出左新新口味喎,係唔知乜野芭菲,廣告個look係幾吸引,不過見到佢好鬼大杯,又有dcreme響度,好滯咁,所以我地都最後都係分別買左三杯朱古力、菠蘿、士多啤梨新地,呵呵。


係都要影人個爛咀...

今次係我地第一次三個靜靜咁坐響度傾計,其實一講起我既過往,我根本無可能唔講我既病,我唔係有心瞞佢地,所以我都決定老實如盤托出,但總好似難以啟齒咁,我咪嬉皮笑臉咁講「其實...我係有絕症架,哈哈哈。」阿達初初唔信架,但我愈講愈深入,佢就開始信喇,而thomas就話佢一早知,因為佢睇左我網頁,係咪真架,不過我都無理由唔信既。

我地吹水吹到五點鐘左右,阿dick就黎到喇,於是我同thomas、阿達就響sogo對面既路口分別,呵,終於有得去行街喇。哇!忽然有兩個女仔走過黎,問我「你係唔係阿咩吉場既阿咩呀?」,哇哇哇,開心死我喇,原來係我睇我網頁既網友呀,我開心到亂講野,不停話自己今日爛咀,嘿嘿,好似個癲婆咁,哎呀,係丫嘛,如果知道會撞到網友,我一定著靚d呀,點知今日...爛咀,唔理喇,我捉住佢地兩個同我合照,嘻,好彩有帶相機,實在太太太興奮喇。


好開心見到網友呀

帶住興奮既心情,我同阿dick兩個去左行sogo,聽人講開左間日式十蚊店嘛,梗係要去睇下,果間野響金百利卓悅隔離有電梯落,哇哇,有好多日本既用品,仲有化粧品、眼鏡、cd、袋...應有盡有,通通都係十蚊咋,我諗同市面上既中蚊店比較,呢度既野的確係靚d,同埋香港人崇日丫嘛。本來我揀中左幅八婆眼鏡架,但可惜係老花鏡,其他又睇唔中,可惜可惜。最後我買左一個禁止通電話既木牌,諗住掛響個袋度,哈,另外又買左個錢箱,sammy話儲緊錢去旅行嘛,送俾佢最適合,個錢箱得意在佢係彷日本神社d香油箱,搞鬼。

買完平野之後,我地再落多一層,去左行超市,哇哇哇,離遠睇到有人排晒長龍呀,咩事呢,原來係排隊買puff cakes,足足排到打晒蛇餅,呵,香港人既心態梗係愈多人排隊愈想試架喇,於是我就捉左阿dick陪我去排。雜誌講,puff cakes係類似泡芙既物體,外面係好鬆化既鬆餅,入面就係凍凍既奶油,初頭都唔明有乜好食,但見到咁多人排隊,梗係唔輸蝕。本來諗住一人一個試下架咋,但排左成半個鐘,先買得兩個好似有d唔扺,所以決定買多個俾媽咪試。嗯嗯...咦?又真係幾好食喎,雖然個鬆餅皮係剛剛焗起,但唔會話好熱,入面凍冰冰既奶油,又唔覺得太甜、太滯,唔怪得十蚊個都咁多人買喇,又真係幾好食既。


好多puff cakes呀

今晚係表哥個bb滿月,響藍田擺左兩圍滿月酒,所以我等埋媽咪收工一齊去,但唔同地方點約好呢?媽咪話佢響金鐘撘603,過到黎銅鑼灣我就上番佢架車,再一齊去喎,哇,高難度喎,就快到果陣,媽咪打俾我,佢話樓上得番一個位咋,係佢特登放個袋響度霸住,唔係無埋添呀,但佢話如果再上既話就好難保得住個位嚕。車黎喇,俾個男人衝左上上層,佢企響個樓梯口睇左好耐,呵,可能見唔到媽咪隔離個位喇,所以走番落黎,呵,我地終於母女團聚喇。

我地去到藍田美心酒樓,好多親戚都黎晒呀,今晚梗係個bb做主角喇,個個輪流抱住佢影相。我由細到大都無試過抱bb架,因為覺得佢地好重,我怕佢地一掙扎,我會跌佢落地下,但今次佢地叫我試下抱下個bb喎,我欲拒還迎咁,最終bb就交到我手上喇,我抱住佢笑到癲左,唔知點解好開心,抱住一個小生命響懷中,佢暖暖既身驅,仲有厚厚、軟綿綿既衫仔,雖然正在熟睡,但佢微微既郁動,令我有種前所未有既別感覺,嘻,我做左表姑姐呀,bb~bb~叫聲表姑姐喇。


合家福


叫我表姑姐喇

本來諗住刷番餐,但個咀角好痛呀,d細細既水泡仔仲多過今朝,睇佢愈生愈開,有擴散既跡像,死喇,毀容呀...媽咪話聽日覆診俾醫生睇下係唔係生蛇喎...千其唔好係呀...

間k房好大呀::::::睇下::::::

帶狗睇最愛演唱會

::::::一月五日::::星期六:::

前兩日覆診左,袁姑娘一睇左我個咀角,就話我係生蛇,仲即刻好細心咁同我book定床,點知醫生話「蛇?都無條蛇響度。」,哈,佢話係泡疹一型,即係飛滋果類,搽d藥膏就無事架喇,呼...好彩,搞到袁姑娘又要打番去cancel番張床,真係邪呀,平時血科d床好難book架嘛,但今次唔洗入院又book到血科床喎,哈,無奈。

都好,唔洗入院,因為我今日約左bee狗仔去睇最愛演唱會呀,嘻,話說前排響醫院,無無聊聊睇雜誌既時候,見到gigi開演唱會,得三場咋,咁我記得bee狗佢幾鐘意gigi,我又幾欣賞佢喎,哈,平平地買張八十蚊飛,當去聽下歌都好呀,於是就叫bee狗買飛睇喇,不過八十蚊得果兩行,一早賣晒嚕,所以我地買左百五十蚊飛,呵呵,我地睇最後一場呀,好緊張呢,呢次係我第一次睇個人演唱會咋。

今日唔敢化粧呀,雖然有藥膏搽咀角,但d水泡愈生愈多,廢事爛面喇,而且橫掂都爛咀角嚕,仲化粧,人地會覺得我醜人多八怪架嘛...所以索性自然d,真相係醜d架喇,唔扺得咩,而且今晚個個都係睇gigi架喇,扮咁靚做乜喎,入到場漆黑一片,鬼知你醜定靚喎。六點左右,我撘巴士直達紅磡火車站,bee狗佢要番工,放六點,電話聯絡嚕。見佢未到,我咪響火車站入面行下嚕,話時話,呢度既裝修同機場勁似,點解既呢。哇哇,見到優之良品,即刻走入去睇下有無正野食,哎呀哎呀,俾我搵到辣辣地、甜甜地既紅燒魚柳,正呀,買左佢先。之後又去左零食物語,見到有幾十盒生日熊響度,多又唔係多呀,不過見有時間,咪即管睇下有無我想搵既囉,哈,俾我搵到呀,十一月十三,我想搵thomas既生日熊,哈,仲俾我搵到jimmy九月三、叔叔十月十七既熊仔呀,好,一於買晒佢,唔知佢先鐘唔鐘意架,不過心意既野,搏得佢地一笑,我已經好開心嚕。

bee狗黎到之後,我地上左去美心食野,咦...無餐牌既?原來可以揀既野得好少,已經一碗碗咁現成既放響度做版俾人睇,除左飯,就係沙律,見到都覺得悶呀,所以我無買野食,淨係飲左bee狗杯餐茶,同食頭先買既甜甜紅燒魚柳嚕,而bee狗就嗌左個飯,佢就梗係好胃口喇,簡直係春色滿面,不過我都鄧佢開心既,苦盡甘來。其實知佢「有喜」果刻,真係有少少吃醋架,我雖然唔係鐘意bee狗,但總覺得好朋友俾人分薄左喎,又擔心佢會重色輕友呢,不過見佢開心,我都開心,嘻,衰狗。唔知點解總係覺得成間美心既人都係黎睇演唱會,唔係拎住演唱會d飛,就係拎住gigi既野,咁又係,呢間美心又貴又無野好食,俾我經過既話都唔響度食喇。

七點幾八點左右,我地開始入場,哇哇,超級多人呀,響對面馬路已經開始排隊入場喇,臨入門口前,有演唱會既工作人員響度派野,有雙面既poster喇,一面係gigi既拳手look,另外一面就係G For Girl cd封面既紅長裙look,索到暈,仲有雙面寫住「g for girl」既圓形紙牌仔,同埋螢光條條,哈,乜咁多野派既。

原來我地個百五蚊為好高架,響中間入,仲要行多大約十幾行先到,真係索晒氣呀,坐低無耐有個男人拎住個牛奶公司既大筒響度賣雪糕喎,哈,我都係第一次見咋,我初初仲以為唔俾食野既添,於是我就用十蚊雞買左個甜筒吃喇,完來全場好多呢d賣雪糕既人架,真係得意呀,咦...下面最近個台,三百二蚊飛果度,都有人賣雪糕,不過就富貴得多喇,係賣Haagen-Dazs呀,哇哇哇,咁又係,買得貴飛既人通常都係食貴野既。八點鐘左右,演唱會就開始喇,種感覺好震憾呀,因為感到全場都係愛gigi既人,每個人都係為左梁詠琪而黎。雖然我坐山頂咁滯,但都覺得gigi好索,一開始黎一個拳手look,同黑鬼玩拳擊,gigi梗係做贏果個喇,姐手姐腳咁就打低左個黑鬼嚕。唱左幾首之後林憶蓮上台獻花,gigi開心到喊呀,好似個小fans咁問憶蓮「我可唔可以攬住你呀?」,又開心到嘻嘻嘻嘻咁笑,好鬼得意。


gigi拳手look


憶蓮呀

gigi仲唱左好多自己既經典正歌,有「死心塌地」、「他喜歡的是你」、「迫不得已」、「I'll Be Loving You」、「嫌棄」...其中最搞笑就係唱「至死不遇」前,gigi請左個女fans出黎,坐響台中間張椅度,然後gigi就一邊唱歌,一邊圍繞住佢,做出d好鬼誘人既動作,哈哈,引得全場大笑,最激就係gigi一野抱住個女fans既頭,塞落自己個胸度,哇...食波餅呀,果個fans就正喇,除左可以同gigi有親密接觸之外,仲有手提電話做禮物,買貴飛果然係有d著數呀。其間gigi去左換衫既時候,山腳同最近台dfans唔知點解衝晒去前面喎,呀...諗黎諗去都唔知點解佢地要咁做,原來...係握手時間呀,因為有d人睇足三場,所以知道咪預早去霸個好位囉。今場既嘉賓係城城呀,好搞鬼,因為gigi高過aaron好多,行埋一齊好似姐姐同弟弟咁。雖然坐山頂咁滯,但我都影左好多相,足足用左一張64mb卡同一張16mb卡,嘻, 我仲偷偷錄音錄低左gigi唱歌,噓...


男版gigi


para para
櫻之花

我曾經都因為gigi同伊麵一齊既事,而唔喜歡過佢架,但時間可以証明一切,gigi的確好勇敢,然後我漸漸開始欣賞佢,而且睇佢既舉子談吐,我感覺佢係一個幾純品既女仔添,gigi亦刻意揀左首「一個為你甘去蹈火海的人」黎表明佢既心意,好霖呀。最後唱「花火」同「灰姑娘」果時,gigi喊得好勁呀,搞到我都鬼咁感動。有機會真係想睇多d其他鐘意既歌手既演唱會,千嬅...你快d開演唱會喇。


童話公主
look

睇完演唱會十點幾嚕,我同bee狗經過火車站既時候,見到好多賣相既攤檔,哇哇,強呀,前兩晚既相故然係有,就連今晚既相都有呀,好勁呀,d相好近好靚好清,搞到我都有衝動買番set,唔...如果係千嬅既話我實買...嘻。本來我地仲想落尖咀吃甜品架,不過見夜嚕,怕無車歸家,所以最後bee狗仔都係陪我去撘巴士算嚕,唔...唔知幾時再見到bee狗呢,黎緊佢要搞年宵既野,好忙呢,不過好朋友唔洗成日見住既,只要個心係有對方咪得嚕。

架巴士行到紅磡,哇哇...成條街既人都攬住公仔既?諗諗下先記得,係喎,冬日嘉年華喎,我都未去過添,個個都拎住公仔,唔通好易掟既?好恨去呀。媽咪同爸爸響官塘福興打邊爐呀,所以我就響官塘落車,去搵佢地喇。頭先不能夠同阿bee狗吃甜品,心思思想去食添,所以經過許牛山就買左個芒果西米露拎走,好正架,一大舊芒果肉,仲有呀,d西米露係用芒果汁整架,哇哇...流晒口水。上到福興搵媽咪爸爸,佢地吃緊自助邊爐呀,我黎等佢地一齊番屋企之嘛,又唔係幫襯,所以個經理只俾我坐兩個字......洗唔洗呀,算...我咪放低個袋,響街邊搵下有無野食嚕,咦...都無炸大腸既,最後買左五蚊粉果同五蚊燒賣,食得是福,呵。

好遠既山頂遙望gigi::::::睇下::::::

 前面笑左未呀<---->呀 咩 昔 日 發 傻<---->睇下仲有乜野笑