| 酒店自助餐 | |
|
::::::星期四::::::十一月二十二日:::::: 哇...今日要九點鐘就起身喇，因為約左醫院個義工馬太話請我地幾個病人，同埋幾個類風濕既病人，一齊去酒店食lunch buffet呀，嘻，開心死，有記憶以來，好似都係細細個，去過一次酒店食自助餐咋，嘻，一諗起放到成台都係超精美既甜品、蛋糕，我就忍唔住笑出黎喇，嘻。間酒店係響西環架，叫做世紀海景酒店，馬太話想近ｄ瑪麗醫院，等有個病人可以請假黎食，可惜喇，結果醫生都係唔批准。西環果頭我一ｄ都唔熟架，都唔知可以撘咩車去，於是媽咪就諗住帶左我去，然後佢自己一個再地方坐下，等我食完黎接我咁喎，咦...但係我就響入面食得開開心心，呀媽就孤零零一個響條街度等我，邊得咁架，天打雷劈架喎，最衰我真係唔識去喇，媽咪又話無所謂，於是乎我地就照原定計劃，十點鐘出門口，落去官塘撘101。媽咪話呢架車會兜好多路先到西環，所以如果唔想遲到，最好預兩個鐘頭時間。架車經過土瓜灣既時候，我見到有隻狗響路邊個花叢度，前腳站穩，但後面兩隻腳就不停咁向後踢，好似響度跳下跳下咁，下？睇佢個款似係響度掘泥囉，但...呢個咁卡通既動作...淨係響卡通片見過咋喎，哈哈，乜真係有架？ 架車真係好耐呀，不過好彩我地預早左，結果十一點半就到喇，間酒店雖然唔係好大，但都幾靚架，見仲有時間，我同媽咪就周圍影下相，差唔多十二點鐘左右，有幾個病友都黎左喇，原來其中一個病友都帶左個女黎呀，佢就叫我媽咪都留低一齊食，嘻，我就梗係讚成喇，如果到時唔得既話咪最多自己俾錢囉，起碼唔洗媽咪響街吹風嘛，於是我地就上左去餐廳坐住等，馬太因為要接另外類風濕既病人，所以遲左少少先到，嘻，我地食野張台係一張好長既台黎架，雖然係由幾張細台切埋，但都好有feel呢。
    人到齊晒喇，好野！開始開餐！哇呢...ｄ甜品好靚呀，不過無理由一開始食甜品架嘛，於是我就食下其他野先，ｄ螺肉超好食呀，正！嘻。食到咁上下喇，就開始食甜品，有布甸喇，蛋糕喇，者喱喇...靚就幾靚喇，但又唔係特別好食喎，不過唔緊要喇，氣氛同外表撘夠。初初得我地呢一台人架咋，過左一陣就成間餐廳都係人喇，雖然佢地西裝骨骨，但食起野上黎都幾狼死架。
    唉...幾個病友一坐低就係講番個病架喇，但我同佢地唔同，佢地都係好番晒，或者情況隱定，所以會講得比較輕鬆，但我一聽到佢地講個病，我就又開始神遊喇，呵欠，響醫院覆診又係講呢ｄ，而家出黎玩，出黎開心又係講呢ｄ，唯有睇下便利喇...睇完晒佢地仲係講緊...好悶呀...我咪索性走左出去煲粥算囉，點知...煲左幾個字之後入到去，佢地都仲係講緊同一個話題，點解佢地唔悶既呢...我自己情況都唔好，所以我唔想講，更加唔想聽人地點勸我去換骨髓，未換過既人根本唔明係幾辛苦，換過既人又點？佢又未必好似我咁辛苦，真係唔想再聽...
 坐響度黑色衫既就係馬太喇，其他就係病友。 三點左右，我地都食飽飽嚕，媽咪本來話自己俾番自己果份架，但馬太唔肯，話一定要請埋媽咪喎，真係多謝晒呢。之後我同媽咪就撘叮叮去金鐘喇，嘻，話時話我都幾鐘意撘叮叮架，可能因為住響九龍，平時好少機會見喇，但坐響叮叮上面既感覺真係好悠閒，以前響天后番學，而男朋友就響側魚涌番工，每次我放學都會坐叮叮去同佢食lunch ，雖然我地已經分開好耐，但每次見到叮叮我又會諗起，果段無病，無憂無慮既日子，真係好令人懷念。仲有呀，果時我第一次撘叮叮去側魚涌，竟然唔知所有叮叮都係兩蚊，仲左搵右搵，暗地裡埋怨點解唔將車費既牌貼響當眼處，咁我落車俾錢先無唔夠散銀點算？哈。今日咁難得又撘叮叮，點都要影番張相先，嘻。
 好累呀，直情累到響車訓著左，到金鐘喇，因為聽日同nathya約左攝影師去港麗同香格里拉果度影相，所以我就索性帶媽咪上去視察一下，而且nathya又未見過呢度個環境，順便可以影ｄ相俾佢睇下嘛，嘻。影完我地就向海旁進發喇，嘻，其實黎金鐘既主要目的係想去「in的家」，呢，響添馬艦度起既呢，電視都有賣廣告架，我每次番馬麗醫院都會經過添馬艦，差唔多起左成年喇，都唔知佢起緊乜，但又起得幾靚咁，嘻，今日終於可以入去睇下搞乜東東喇。行下行下個肚突然...好...好肚餓呀，哈哈，頭先ｄ自助餐咁快落格既，都怪我食得太多甜品喇。
 「in的家」既入場費係二十五蚊，ｄ姐姐仔個個都好有禮貌、笑容落面架，果然好in呀，之後佢俾左一部助聽器我地，叫我地掛住響頸度喎，然後就有個導遊黎，帶我地入左一間房仔入面，佢一開個大螢幕，個助聽器就感應到咁，配合住個螢幕發出聲音，咦？係陳啟泰同鄭文雅響個螢幕入面呀，都幾落本喎，聽住佢地兩個響度講解陣間我地要點樣用個助聽器，講晒之後側邊幅牆就無端端打開左，咁我地就可以自己自由咁，依住每一個展品既號數，然後再按助聽器，咁就自自然然有陳啟泰同鄭文雅同我講解喇。 其實呢度主要係貫輸環保概念，行晒所有展品之後，仲會有兩個以電腦化同環保為目的既示範單位，哇，入面好高科技呀，例如番屋企之前可以遙控屋企既電器，開定冷氣、煲定咖啡，雪櫃可以上網，仲會scan到雪櫃入面有無野少左，然後就自動網上補貸，沖廁所既水係平日沖涼、洗野既水黎架，總之就樣樣都好正喇，仲有一個空中花園，入面既台椅都係用環保木材架，即係斬一棵樹就會響原地種番一棵樹苗。如果第時有間咁既屋就發達喇，得閒同朋友響空中花園吹下水，正！
 後面睇到尖沙咀架，個海境好正。 食完晒之後都差唔多五點幾嚕，頭先有個病友教媽咪，話ｄ癌細胞好鐘意食鯊魚骨架，如果用黎煲湯，飲左落肚之後，ｄ癌細胞會走過去食鯊魚骨，然後鯊魚骨又會包住ｄ應癌細胞，咁就可以將ｄ癌細胞排出體外喇，講到咁神奇，果個病友話響太古城既吉之島有得買，叫我地去搵下喎，於是呢我地就撘巴士過去太古城喇，響巴士上面我又訓著左，好累呢，但我地去到太古城搵極都搵唔到，我想搵生日熊又搵唔到，咦？忽然記起，響正太古城果度果間唔係吉之島黎架喎，呢間係UNY黎架...哈哈，咁我地又行番去吉之島搵嚕，但我同媽咪想搵既野都搵唔到，唯有走嚕。 本來諗住去食韓國燒烤，但我唔知做乜勁眼訓，雖然都好肚餓，但眼訓比肚餓多少少，所以決定番屋企訓覺，結果我由七點訓到一點，沖左涼又再訓過，哈，真係好累咁喎。 | |
| 3 on Free |
|
::::::星期日::::::十一月二十五日:::::: 原本逢星期日都要入元朗學氣功架，但今日尖沙咀中心搞籃球比賽，呀頌又搵左我去開會喎，半推半就之下我應承左黎幫手計時喇。上年我個小組「teen國」響尖咀搞band show，我入左醫院無得去幫手，然後年頭我個小組都摺埋左嚕，今次係另一個小組「思躍」搞架，我真係好想試下搞活動係點，於是就響媽咪反對下堅決今日一定要去喇，sorry呢，因為我唔想再有咩遺憾呀，上次已經去唔到，我好想今次有機會去呀。 八點半要番到尖沙咀中心，約左isiah七點九食早餐，最衰星期日無13x撘喇，唔係半個鐘就到尖咀，要撘1A就要預成個鐘，即係六點九出門口，於是我就較定鬧鐘，五點九起身喇，呵欠，都未訓醒就要刷牙、洗面、除衫、著衫、畫眼耳口鼻...我一直畫眉既水準都好參差，今次仲唔知點解畫左條一字眉，下？眼見就快要出門口喇，唯有求求其其執下喇，我一路撘車就一路擔心，不停照鏡，死喇，條眉真係好似畫得好肉酸喎，會唔會俾人笑架？唉...只好安慰自己「唔驚唔驚，眉呢ｄ野自己最覺之嘛，唔講唔會有人睇到既。」，就算係呀，條眉夾埋ｄ眼耳口鼻都怪怪咁喇... 我七點七就出到尖咀喇，isiah差唔多八點到，嘻，食番個雙蛋早餐先，不過我次次食親雙蛋＋通粉餐，都係食晒兩隻蛋就飽，勁浪費，下次都係淨係叫隻雙蛋算喇，嘻，又慳一畢。哎呀，食野果時我特登扮無野，但其實我響度不停偷偷照鏡架，希望一直唔講，isiah唔會主動睇到喇，嘻，好彩佢真係無為意，唔係實俾佢笑到面黃呀。 八點半番到中心，執好ｄ野我地就分批行過去康達徑球場，話時話都幾遠架，又行得快喎，行到過去勁累，之後就開始整理場地，掛彩帶、掛banner、搬台之類喇，咦...我勁豬丙呀，企響度成碌木咁，又唔識主動去幫手喎，我見樣樣野都好似好多人整緊咁，唉...好彩呀頌見我企鵝咁，就叫我派ｄ証俾工做人員，我先無咁礙外咋。九點九左右，參加比賽既人都陸陸續續到場喇，但我搞極個計時器都計唔到時，有無搞錯呀，計時器係開始同停咁咪得囉，點解呢個整極都整唔到架。十點，3 on Free，CS青年服務三人籃球挑戰賽正式開始！不過...我個計時器仲係壞喎，唯有臨急臨忙借左個朋友隻電子錶用住先喇，哈，其實我都唔係好識計時架，不過聽佢地講出界、開波都唔洗停，七分鐘吹雞咁就得喇，好似幾易咁喎，最難都係吹雞果下，驚無人聽到，驚唔夠氣，驚一吹口水鼻涕痰吹晒出黎，死喇...仲有五秒就要吹喇，四、三、二、一、咇~~~~~~滴汗，好彩以上既情況都無出現，佢地仲讚我吹得好呀，哈哈哈，沾沾自喜添，成個傻婆咁一個人響度笑。哎呀，唔知點解我隻耳仔又窒住左，呀珊就俾左ｄ香口膠我食，咦？果然係趙下趙下就無再耳塞喇喎，好野，以後耳塞有藥食嚕，多謝晒呀珊。
 如是者接下來幾場都係咁計時、吹雞、計時、吹雞，球證們都話我果聲雞聲好正，吹得夠大聲，同埋我吹雞就代表佢地有救喇，唔洗再精神緊張咁企響場入面。 兩點鐘，終於可以食飯喇，個個飯盒都唔多合胃口喎，千揀萬揀，終於揀左個肉片炒烏冬，都幾夠鑊氣，食之前巡例問下左右，ｄ肉片係豬肉定牛肉，點知原來係牛肉黎架，噢！於是isiah就同我交換左，咦...肉醬意粉...仲有一潭紅色既油響個邊度，好似好多色素同好油喎，望住都飽左一半嚕，再回憶起中五果年，有人跳樓跳正響隔離一米左右，搞到我成身血血、肉肉、腦漿...哎呀...即刻飽埋果一半喇，仲飽到想嘔呀。 飽完又係時候繼續做事喇，如是者繼續開始、停、吹三下雞，最尾一下長既，重複無數次之後，終於到左季軍賽喇，由Marginal對狂隊，拿，狂隊呢個名有少少變態呀，哈，一開場Marginal個教練就不停響度嗌「打得好呀Marginal！」黎激勵士氣，但狂隊係我地中心架，所以我暗地裡梗係想佢贏喇，而且Marginal個教練實在太嘈，影響比賽，結果...幾十比幾十咁喇，差一分咋...狂隊輸左嚕，不過贏一分都唔係好叻呀，車！車車車！之後就係冠軍賽，樂teen隊對H.F.L.C，果隊樂teen隊有條友係好好波，不過好串好樣衰，所以唔想佢贏，哈，結果係H.F.L.C贏左，哇呢，ｄ隊員拋起個隊長呀，個隊長仲喊得好慘，嘻，場面感人呢。
 左起：睇場呀頌、Marginal個大聲公教練、樂teen隊串男 執好晒ｄ野番中心，都差唔多七點嚕，呼，雖然我係坐響度計時，但吹雞都要用好多力氣架嘛，所以都有少少累，之後佢地成班話去唱ｋ喎，其實我都想去架，但心諗咁大班人，我唱歌又咁難聽，去到淨係聽又好悶架喎，於是我就走先番屋企嚕，呵，今日都幾好玩呀。 |