一 月 二 十 二 日 星 期 一
我愛芋頭
今朝起身出到廳,又見到麻麻同工人響度整緊糕,下....係咪發緊夢呀,點解尋日又係整 糕,今日又係整糕,日日起身都見佢地響度整糕既,好驚呀。原來尋日佢地係整年糕,啡 色甜甜果種呀,今日呢,就係整蘿白糕,但因為我唔食得臘味,所以我就要食特製既「齋 蘿白糕」,味道都幾lonely架,所以我咪搞d花臣,話要甜醬囉,嗚~~但媽咪話樓下惠康 、百佳都無呀,點算呢,年關迫近喎,之後無舖頭開....蘿白糕又唔夠味....咁點算呢(果 一刻真係好似以為d舖頭以後都唔開咁,好傍惶)唯有今日問下d親戚有無喇。麻麻話d齋 蘿白糕邊好味架,係呀係呀,你都知呢,我都覺左好耐喇,所以我就申請麻麻整芋頭糕, 好野,今日佢真係整呀,好靚呀,紫色既芋頭糕,好浪漫呀,由細到大我最鐘意食芋頭雪 糕,係因為我媽咪鐘意,所以我又食既,不過成日都覺得好怪,芋頭明明係煮送架,用黎 整雪糕咪油淋淋囉,哈哈哈。不過今朝先蒸起d蘿白糕同芋頭糕,未有得咁快食住,仲要 等佢凍左,先可以切出黎煎,咁唯有等下喇。

無得食糕,無理由又食角仔當早餐架....我已經為果十包芝士圈,出賣左個喉朧喇....唔 得,要節制下,因為好多病友呢個時期都會爛口架,有個仲爛完裡面爛出面,佢每次一見 我無乜野番去覆診,就會好心贈我一句「遲早到你架喇!」,真係采過你呀。咁今日食乜 好呢,前幾日尾尾同包包話西多士易整喎,講講下我都想食,好喇,叫工人落去買麵包整 。結果都係麻麻幫我整既,首先搽花生醬響中間,再夾夾夾夾實佢,浸d蛋汁,再掟落去 煎....煎好喇,yeah~~有得食....咦?點解好似少左d野既?係....糖漿,一時醒唔起添 ,哎呀....屋企無呀,但又無理由為左食一塊西多士而買一樽糖漿架,好戇居咁喎,唔緊 要,糖漿同砂糖一樣係甜之嘛,落砂糖落砂糖,格仔餅咪又係落砂糖,一樣好好食架,哈 ,最後我好俾心機咁食左一半,都算係咁喇,我食到表都突埋呀,但又覺得唔食好浪費喎 ,麻麻整得咁辛苦,不過我icq fd安慰我,「你個胃點都矜貴過你塊西多士喇。」,講得 好,係呀係呀,尤其係我呢排成日無胃口,已經食少左野架喇,仲點可以放d唔好食既野 入去呢,呵呵呵,總算過心好過d。麻麻幫我食埋淨番半個多士,佢話d砂糖咬落去好似 蝨蛋,好恐佈。總之又糖漿又麵包,不如果對面餐廳買喇。

媽咪成日唔妥我唔食飯,今日竟然打番醫院喎,咁咪即係同「自首」,或怎至係「自殺」 差唔多?唔制呀,新年流流你唔係要我番入去喇fa,我唔要又俾佢地玩幾日呀,吊果d營 養水....又要食醫院飯送....嗚~~~~諗起都毛管棟呀,唔要唔要唔要....慘喇,下個星期 一要番去覆診呀....仲諗住放下新年假,點知又要番去,諗起上次截唔到的士既遭遇,我 而經係好唔想再出去街喇,我唔要俾人歧視我。

今日我去左一個千嬅既網頁呀,裡面既資料好齊架,好開心呀,我竟然可以搵得番,1999 年千嬅同苦榮既「冬天的故事」廣播劇呀,實在太好開心喇,我諗我都係第一次咁專心留 響一個網咁耐,我足足睇左個幾兩個鐘,我覺得千嬅迷不得不去。嘻,佢仲有得單撈千嬅 「我乜野都無,淨係心口得個勇字。」既wav ,嘿嘿,我單撈左番黎,放左響start window 既聲音果度,以後一開機就聽到喇,正正。

四哥話同呀基、呀如、呀龍佢地成班民安隊朋友仔上黎拜年喎,個心當然想見下佢地喇, 但又自慚形穢,我咁諗係咪好無聊呢....無計喇,十一月到而家,d頭髮都仲未出呀,媽 咪仲話我個樣愈黎愈似大賊喎,唔得唔得....我要執靚d先敢見佢地。其實佢地話年初六 黎架,不過我果日要覆診,但我又唔想覆診,我又想見佢地,但我又怕俾佢地見到我.... 好亂呀,總之....總之就唔想見人喇。


一 月 二 十 三 日 年 廿 九
團年飯
我今日又訓到三點幾四點喇,其實都不值得一講,因為我近呢兩個星期都係咁,我諗係冬天既關係喇,冬眠嘛....合乎情理。唔知點解醒左都仲好似訓緊覺咁,唔明我講乜?呢句野好明顯又係訓緊覺講架喇。爸爸尋晚終於搵到海鮮醬喇,但爸爸番得黎遲,我趕唔切叫麻麻唔好買,結果麻麻又幫我響雜貨舖搵到,變左有兩樽海鮮醬,唔緊要喇,食魚蛋都可以點下甜醬架。起左身之後麻麻就煎尋日整既芋頭糕俾我食,嘻,點少少海鮮醬,真係好好食呀,咬落去軟淋淋,不過係滯左少少,食左唔係太多我都飽 lu。
麻麻響廚房切緊年糕,我即時閃入去唱
「happy birthday to you ~~happy birthday to you~~」嘿嘿,玩下麻麻。
「嘿嘿嘿,呀芝真係乖女呀,唱生日歌。」咦?係喎,麻麻年廿九生日架喎。
「係呀係呀,哇,咁大把刀既?麻麻你劈友呀?」我見佢切切切年糕。
「工人,拿把再大d既刀黎。」哇,仲唔夠,要再大把d,劈劈劈劈年糕。

聽麻麻講,原來今朝我仲未醒既時侯,有個男仔拿住媽咪張卡片上黎搵媽咪,佢傻瓜到以為個「住址」係媽咪既舖頭,嘿嘿,因為佢係加拿大番黎架喎,所以咪咁傻仔囉。之後麻麻就叫佢撘車去柴灣搵媽咪,果然係外國番黎,淨係識撘的士,去到柴灣都幾重皮喎,佢咁急搵我媽咪做乜呢。之後媽咪又講番,原來果個男仔聽日就要上機,所以想買d有特色既野番去,山長水遠搵我媽咪,原來係為買手信,都算佢幾有心思。

今日isiha 又打我喇,嘿嘿,等我又乘機講下佢壞話先,你今次都算自投羅網喇。isiah 話今日年廿九呀,勞工處d大粒既高層們都提早閃晒,本來佢都走得架,但怕無人聽電話 ,所以就留番isiah 呢隻低級職員仔響度聽電話喇。佢無乜野做咪又去睇下我個網頁囉, 仲叫埋其他同事一齊睇,點知....當佢地圍晒響isiah 後面睇日記時,竟然睇到我前兩日 踩踩踩呀isiah ,嘿嘿嘿....今次仲唔瘀?於是就打俾我,找我晦氣囉,哈哈哈,我笑到唔停口呀,仲話「好野,你今日打俾我,等我寫日記又可以踩多你兩腳喇。」。佢隻野又瘀我,話我前幾日打錯字,將關健字眼「小組」打左「小姐」,又真係幾狽既,不過無人講過俾我知,我諗因為呢兩日都無人睇我日記,嘿嘿,成功偷雞。

記得上年 九月果時做展翅大使,佢既身份係「勞工處薛小姐」,我身份就係「可愛的(可憐的)展翅大使」,去果個唔知咩展翅展覽果日,我地約埋一早去又一城食早餐。我係緊張大師黎架 ,所以約人通常有早無遲,果朝我企響九龍磄地鐵站個影快相機前面等佢,等呀等,因為我又早到左,所以就覺得佢好似遲左好多咁喇,又打唔到俾佢喎,企響度俾人望望貢,個心諗「死喇....係咪我今日掛響袋個公仔大得滯呢,點解個個都望下我既?定係....我塊面有污糟左呀?照下鏡先....無呀,好靚女呀,d人唔係以為我黎九龍磄『等開工』呀, 真係啋啋啋啋過你呀,死喇死喇....isiah快d黎喇....」,好彩isiah都係遲左少少咋。 原來我地展翅大使之中,有一個人之前同isiah 一齊上警察訓練果個課程架,仲同唔多妥 isiah,你知喇,我又句句串住isiah,我地兩個仲自稱「世仇」添,搞到個個都以為我同 isiah真係唔妥,所以就同我一齊唱isiah呢樣唔好果樣唔好,當然其實isiah 樣樣都好喇 (呢句明霖你既),唉....我地扮得咁假都有人信,其實我地響度打情罵俏之嘛,不知幾恩愛呀。

媽咪話我前幾日咁樣話isiah,仲放埋佢張相上黎唔好喎,但其實都係因為isiah玩得,所以我地先咁friend之嘛,我地兩個都癲癲地既,超夾,而且我未有時間整理,所以 一直未將isiah 既相放入「虐兒實錄」入面,我幾驚佢以為我唔當佢 fd呀。嘿嘿,媽咪,你唔會明我同isiah 兩個鐘意互相虐待既特殊關係架喇。

年廿九個個番晒黎食團年飯呀,我三個月都未見過咁多人喇,因為媽咪驚多人多菌,易中招喎。今日好多人呀,好熱鬧,所以我都好開心,但又因為耐無見人,所以我好驚呀,唔敢行出去,所以響房狂訓。食飯要我一個人食先呀,因為隻隻筷子都有口水架嘛,又係驚有菌囉,超無癮呀,我拿拿臨飲完碗湯就閃番入房喇,好lonely呀....出面有講有笑,我就一個人,點算食團年飯喎,之後我咪發皮四囉,叫媽咪買個大既杯麵俾我,我一個人團年算喇。我唯有開住度房門,同個廳雖然仲係有段距離,但起碼我都可以聽真d佢地既笑聲嘛,等d熱鬧氣氛飄少少入黎。

年年都有同呀媽呀爸行花市架,不過係官塘果個花市仔,上年我仲特登響賣桃花果度兜兜 兜,天真咁以為真係有桃花運,結果我地買左盆吉番屋企。不過今年就唔得喇,姑娘講到明晒屋企唔可以有植物,無計。

不過我以前讀大一,好近維園,所以我放左學,早一早就一個人去行,超正呀,一d都唔 覺lonely,因為我買左成十隻公仔呀,四萬咁口番屋企。



 
一 月 二 十 四 日 年 初 一
又俾人掉低
唉....都怪我懶根深種,搞到而家成日要開夜車,尋晚我又開夜車喇,不過唔係為左寫日記,我....我....竟然係走左去打機,真係慚愧呀。話說penny仔前幾日話我知,佢響298 商場見到電腦game碟都係五十蚊十隻,仲要唔係舊野,有著數喎,嘻嘻,所以就叫媽咪麻 煩叔叔幫我買喇,好野,尋日佢買左足足二十隻俾我呀,開心到暈,呢個新年有排玩喇。 我個做game評既朋友話我知,「軒猿劍之天之痕」同「愛神餐館」係必買之game呀,後者 叔叔就幫我買左,前者我個朋友幫我響信和搵到,成四隻碟架,翻版中既貴野。一開始, 我揀左隻「The Typing of The Dead」黎玩,因為penny仔話過好玩,nathya 又話響機舖 狂玩喎,唔得,等我試下先,sega出品喎,咁得意既,d音響都幾正,唉....死喇,原來 我打英文打得好慢架,佢d喪屍又要一野咁彈出黎,嚇到我都唔識按keyboard,哎呀,呢 個game應該出中文版呀,我諗叫我打中文會好d,嗚~~~~結果我頭果版已經gameover,幾 瘀呢。之後我咪走去玩「軒猿劍之天之痕」囉,死喇,我最鐘意玩rpg game,一玩上手我 就唔捨得停手,結果我一直玩,玩到淩晨三點先捨得沖涼,原本諗住沖完就打日記架喇, 但....都係玩多陣喇,一玩就玩到五點幾,先至醒起「咦?我好似有d野未做喎....」, 麻麻六點幾就起身喇,如果俾佢見我未訓,實同我提早開年,好,等我閃入房打日記先。

五點幾六點,好靜呀,所以我打得好快,七點就打完喇,不過又無無聊聊喎,八八卦卦走去睇番以前男友個icq info。睇左之後真係有d後悔呀,佢有新女朋友我就預左喇,但佢講到好似以前果d女朋友,個個都比唔上而家呢個,我就有些微唔開心,佢話佢真係好鐘意佢女朋友。嘿嘿,我真係犯賤呀,晨早流流睇埋d咁既野,又搞到自己唔開心,不過我都鄧佢開心既,起碼佢會認為自己呢次係認真,咁我呢就會自自然然成為,佢唔認真而傷害到既最後一個喇,嘻嘻,既然係大家不成熟所做成既錯,都唔應該再放響心上面喇。電腦播住「還是會寂寞」,年初一清晨時份。我靜靜咁寫左一張祝福既紙條,摺左隻飛機掟左出街,我係衷心祝福佢架,所以我甘心做一次垃圾蟲。有d唔開心添,俾人抽我後腳,唔開心做乜好呢,無理由喊架,痴線既咩,但又訓唔著喎,本來想出廳玩「天之痕」架,唔得唔得,雖然麻麻可能會信我剛剛起身,但我心虛實忍唔住笑架喎,而且我平日成三點 先起身,搵鬼信。嘿嘿....結果我揀左去畫畫,真係有少少癲呀,好似d古人一諗起國恨家仇就走去寫下詩、畫下畫。其實我一直都無諗過畫,因為我次次畫畫都係即興既,畫畫畫畫畫,畫到差唔多九點就完成左喇,哈哈,因為自覺畫得幾好,所以沾沾自喜,連之前唔開心d乜都唔記得lu,yeah~~跟住我睇左一陣書就訓喇,嘿嘿,不過訓得好痛苦,都訓唔著,但又唔可以閃出去打機。

終於訓著左喇,zzzzZZZZ....但又有好多電話搵我,嗚~~平日工人都會話我訓左覺既,但點解今日又要嗌醒人喎,我剛剛九點鐘先訓著咋,唔好嘈鬼我喇。結果我醒左之後,記得好似有兩個人打過黎,又好似係一個....但究竟係邊個呢。後黎我先知,原來係有三個人 打過俾我,一個係細拳,一個係四哥,一個係bee狗狗,細拳同bee狗狗都話淨係聽到我「 唔唔....唔....唔....zzzZzzz」,bee狗狗仲話驚我變臉,所以好快(好驚)咁收左線,嘿 嘿嘿,算你知機,連我媽咪都驚我招變臉架。

今朝好多親戚上黎拜年呀,不過我醒既時侯都三點幾喇,所以佢地都差不多要走喇,咦? 佢地年年年初一都響我地屋企食飯架,點解今日去姑媽屋企既?其實去姑媽屋企本來唔係問題呀,但....成條街都係人,我唔想又戴住個口罩俾人望呀,年初一唔想唔開心係喇, 所以我決定留守大本營。最慘係工人,俾麻麻掟低響屋企陪我....悶,麻麻既意思都係想我有人陪下,但搞到個工人無得熱鬧又好似好慘既,而且我同佢你眼望我眼,除左叫佢煮野食,我都無乜野同佢講過,佢咪仲慘過我。

一丁友悶悶地,咪將今朝訓唔著畫果張畫,用photoimpact 上色囉,嘻,最近我愛上用photoimpact 既時間,因為我可以一邊聽住廣播劇,今日我就係聽「冬天的故事」,好正呀,又有楊千嬅喎,聽到我成日無喇喇對住部電腦笑,嚇親工人。之後我就響網上面,週圍向認識既網主拜年,有時去到人地既網頁,明明係好鐘意,但又唔知講乜好,所以都好少留言,但今日就可以乘機踩下場喇。之後都好似唔夠皮,所以再將果幅自己畫既賀圖
e- mail俾一d比較 fd既朋友,嘻嘻,好開心呀,好似真係去周圍去拜年咁。

年初一流流俾人掉低,夜晚仲要響屋企食自己,真係有點不是味兒呀,唔得,打去煩媽咪 ,叫佢番黎陪我,食乜好呢,好,就打邊爐喇,嘿嘿,我呢世女都係第一次年初一打邊爐咋,不過難為左媽咪囉,成條街乜鬼都無開,淨係得魚檔,於是乎就買左少少菜同魚,媽咪見隔離檔有生根賣喎,於是就叫魚檔個老闆過去「偷」過黎賣俾佢,嘿嘿,有計。真搞笑,結果我同工人同媽咪三個打邊爐,仲要係無肥牛,可謂係「雜菜火窩」喇,媽咪仲叫工人切幼雪櫃d豬肉出黎打,嘿嘿....唔係喇 fa,係無肥牛,但邊有人打邊爐打豬扒架.. ..果然係好難食既,不過我都食得好開心,因為我好鐘意食生根架,正。


呢幅就係年初一早上訓唔著既完成品喇。
呀咩祝各位新一年大吉大利,不勞而獲。


一 月 二 十 五 日 年 初 二
又被遺棄
尋晚我繼續打「軒猿劍之天之痕」,忽然醒起,咦?玩得咁辛苦,不如....去搵攻略喇, 一搵就俾我搵到個改game既,一改可以改到咩都9999呀,咁我咪唔洗再俾人蝦囉!好!一 於改。要重新再玩呀,不過唔緊要喇,我咁高level ,話咁快就去番之前打到果度喇。尋 晚我都係玩到三點咋,因為....改左game好似無乜難度....練到d乜野新招都好,但都無 左當初既成功感喇,之前係玩得辛苦少少,但係有的是時間(用打日記的時間),等級可以 慢慢儲嘛....無癮無癮....唔玩喇,打日記算....打完日記大約五點幾,見bee 哥哥都上 緊網喎,咪問佢傾唔傾電話囉,我地兩個平時都忙,所以好難先搵到時間傾下電話架,不 過其實最大原因都係我訓覺既時間太長....結果我同佢傾到天光,七點幾先收線,呼~~開 心開心,向bee 狗狗講晒呢幾日d心事,終於可以安心訓覺喇。

都未訓夠已經俾人嘈醒喇,哇....乜出面廳咁嘈既....原來係住響大埔既姑婆一家黎晒呀 ,再加埋姑姐同三嬸,成三家人黎晒喎,嘻,好熱鬧呀,好想出去感受下,但媽咪實唔俾 喇,又話多人多細菌咁。醒左我都唔敢出去,死喇,好急尿喎,我好想打電話俾媽咪,叫 佢入黎我房救我出去呀,原來太耐無見人真係會好驚多人架,以前都唔係咁既,希望第時 出番社會唔會變左自閉喇。結果媽咪同我護駕,我就出去怕怕羞羞咁keep住同一個四萬口 講「恭喜恭喜」。刷完牙又衝番入房,媽咪就問(嚴刑烤問)我食乜早餐,「食米粉喇,一 係飯,一係麵,丫!一係炒烏冬喇....」,佢一講d野食,我就忍唔住......嘔,我攬住 個垃圾桶狂嘔,陰公,因為無食野,同埋個胃寒,所以係嘔白泡既,唉....都話人地無胃 口囉,你一迫我食野,我就想嘔架喇,你等我肚餓,自自然然會食架喇,係要迫到人嘔。

出面廳部電腦俾細路霸左,無得玩「軒猿劍之天之痕」添,唔驚,買左十幾隻game,好, 就玩「愛神餐館」喇,哇....好玩呀,初初以為同夢幻西餐廳一樣,所以都無乜期待,但 玩落真係停唔到手,d畫面又靚喎,個game其實係講,我要周圍識d女仔,再教佢地煮送 ,之後就可以同佢地開餐館,有時仲要出外打獵,研究新既菜色。總之個game就超好玩喇 ,可以講係夢幻西餐廳+心跳回憶+石器時代+明星志願既合体,呀咩強力推介。同我一 樣咁大既表妹,就一直坐響我隔陪我玩,哇....我都玩左幾個鐘喇,唔係幾好意思添,話 晒都係表姐,俾佢玩喇,等我出去打下日記,見佢玩得咁開心,好想借俾佢番屋企玩,但 我又想玩喎,點好呢,於是就俾左隻「虛擬人生2」佢,番去慢慢煲喇。 玩到食晚飯時間,我先醒起,咦?媽咪呢,唔見左既?明明講好今日一齊去二舅父屋企架 ,嗚~~~~佢去都唔講聲我聽,我又俾人掉低喇。我一向好鐘意去二舅父屋企架,因為佢屋 企超大,響跑馬地架,仲同舒棋同一座,嘿嘿,而且又多野玩又多野食,每次去舅母都會 叫美心或者大家樂「到會」,d野食好正架,嘿嘿....咁我係細路仔黎架嘛,梗鐘意喇, 四舅母同二舅母個女都好得意架,超好玩,我成日玩四舅母個女玩到佢v哇鬼叫,正。唉 ....不過媽咪話「到會」d野食唔乾淨喎,所以都唔想我去,唉....(無野好講)我無食晚 飯呀,最主要係我無胃口,不過今次唔驚俾呀媽鬧,因為我係俾人掉低既,所以大條道理 絕~~食~~



二舅父用數碼相機影左,即時send埋俾我架,真係有少少眼紅。

呢幾日超大霧呀,今晚結果都係照放煙花,我望出去維港,淨係見到少少火花,無癮添, 唯有睇電視算喇,聽個fd講,睇住個電視,再開電台聽住dbackground音樂好正架,等我 又試下先,係正喎,今年仲有幾首係中文歌,好搞笑,有一生一火花、花花宇宙、失憶周 末、霧之戀,聽花花宇宙既時侯真好係想跳埋舞,但表妹響後面打緊機,又唔好意思喎, 唯有左腳踩右腳,盡量阻止自己發癲,但煙花係慢慢咁放架嘛,播快歌好似唔同feel,霧 之戀就唔同喇,雖然舊左d,但勝在歌詞華麗,聽落再加埋d咁靚既煙花,真係好滾動。 不過播霧之戀都幾搞笑,咁橋今年個天咁鬼大霧,都唔知邊鬼個堅持要今日放,不過好彩 無落雨。

尋日寄左好多張e卡俾朋友呀,今日我又收番兩張,一張係邦邦既,我都好耐無同佢聯絡喇,有時真係好驚無左佢呢個朋友架,見佢online又唔知講乜野好喎,最衰我唔出得街, 唔係實約佢去吹吹風吹吹水,佢響信末寫上「唔好唔記得我喎,永不永不說再見。」,睇到我好滾動呀,因為原來佢都重視我呢個朋友,原來佢同我一樣都驚對方會唔記得左自己 ,嘿嘿,其實又點會喎。另外一張係基哥回俾我既,嘿嘿,佢話張新年賀圖上隻女仔一定唔係我喎,因為佢好靚女,俾人串添,嘿嘿嘿(以笑遮醜),我就話應該係物似主人型喇。


一 月 二 十 六 日 赤 口
我啪晒....佢
今日年初三呀,一起身d人唔見晒,淨係得工人響度,尋日下午食左兩粒湯丸到今日喇, 好似有點意那個,咁今日食乜好呢,聽講麻麻今朝又整左芋頭糕,好,就叫工人煎芋頭糕喇,上幾次我都係用麻麻響雜貨舖買番黎既甜醬,好似咩道怪怪的,所以今日試下爸爸買果一樽「同珍」牌既,咦?好味好多喎,嘿嘿,好正呀。

今日個天超級清呀,"立"下眼望到個窗口,忍唔住企定左響度睇多兩眼,夜晚仲要好清楚 咁望到對面海,咁既天氣真係少有,都唔知邊個堅持尋晚放煙花,如果係今晚放實正到痺 呀,不過算喇,其實煙花都唔係咁好睇之嘛,尋日睇多一陣都覺得悶,咁恨睇係因為佢一 年先放兩次,唔睇好似有d可惜,同埋有d唔update。

今日麻麻入左大埔拜年呀,淨番我同工人,唉....好lonely呀,你地成日留我一個響屋企 ,嗚~~~~我真係自覺好似飄零燕裡面果個女仔呀,忍唔住一個人響度發癲,大大聲唱飄零燕首主題曲,唉....我好睇唔開呀,你地俾心機去拜年喇,我一個人響屋企,一次過啪晒你成盒朱古力,問你驚未?再唔係煮溶晒兜dreyers ,再同你飲左去,嘿嘿嘿....講就大大聲呀,但我又真係唔敢食朱古力喎,唉....上次我偷食,終於俾呀媽估中左,咪就係雪櫃兜薄荷雪糕囉....我又心虛忍唔住笑左出黎,不打自招。以後都係唔好響度講秘密呀, 日記都唔可以寫,咁就唯有尼埋響廁所同個屎塔講喇。呢幾日日日都無人響屋企,真係好有衝動過去郁左果幾盒朱古力呀....我睇得出有一盒係金莎,但又無膽食,真係樣衰呀。

俾人掉低,點都要發下皮四,我又叫工人唔好煮飯,再打俾媽咪,叫媽咪買打邊爐d料, 實行今晚又「拾下拾下」,今晚媽咪買左五包生根呀,仲有肥牛添呀,嗚~~實在太開心喇上年入院前打過幾次邊爐,但次次呀媽監督,乜都煮到老晒,今日我要自己煮呀,好味好味,如果響屋企有得打邊爐既話,我又唔係好介意俾人掉低呀,原來d肥牛多肥膏好似好食d架,因為太瘦會好難咬,我盡晒力喇,都食得唔多,其實個心仲想食架,不過我驚再食會嘔呀,個胃又唔係好,唉....算喇。

好多人問我今年收左幾多利是,係好似好多封,但我一封都未拆呀,因為對我黎講幾多錢 都無用,我又唔出得街shopping,咁不如留番起佢喇,其實我以前都幾大洗架,不過有三 份錢我都無用過,一份有二千幾,係我1999年做肯德基d糧,放左入紅簿仔,第二份係 我上年2000年生日,幾個舅母俾我既利是,唔知有幾錢呀,不過都無打算拆,第三份就係 我今年d利是錢,唔知點解唔會用呀,keep得耐,有感情卦。拎住一大堆利是,我會覺得 自己好有錢,但當拆開左之後,可能只係得幾百蚊,拎住果舊錢,雖然唔會太失望,但係 又買唔到d乜,咁我寧願拎住一大堆希望,自以為好有錢,咁樣會比較幸福。畢竟現實總 係令人失望,唯有抱住夢想,先可以獲得滿足。


一 月 二 十 七 日 年 初 四
最憎花生湯丸
哇....尋晚又超夜訓,今朝一早又急尿喎,又凍又眼訓,點算好呢,唯有唔睜開眼,好似 耍盲雞咁,兩隻手左摸右摸咁"中"出去,嘿嘿,拿拿臨"中"入廁所,因為趕時間所以我又 淨係著住件睡袍,好凍呀,之後又耍盲雞耍番入房繼續訓。我呀....訓覺夢到希希呀,嘻 嘻,死喇,今次真係上身呀,希希仲拖住我行街街呀,哇....佢真係索到暈,如果有個好 似佢咁既男朋友,真係幾生既福氣呀。不過其實靚仔都無用既,咪最多拖出黎果陣好似威 d,不過又有邊個理你拖住邊個丫,計我話呢,就梗係要一齊開心喇,我唔識分鐘唔鐘意 ,但開唔開心都仲識分,唔開心就唔好拖喇....人一世物一世,你驚搵唔到第二個咩。 今日我終於知道,點解麻麻整d角仔係咸架喇,原來....佢搓粉果陣,拿左d鹽當係糖呀 ,哈哈,唔係喇 fa,唔怪得知咸咸地喇,好古怪呀。

晚飯都無食過野,唉....又唔開胃喎,d送又唔多吸引,等到十二點幾,媽咪整花生湯丸 ,我同佢就一人五粒囉,嘿嘿,我一路食,一路睇有線,好搞笑呀,要一家五口,響五十 日裡面減五十公斤呀,哈哈,睇到我都唔記得晒要打日記。

今日成日都無做過d乜呀,無計喇,又係超晏先起身,一起身就食晚飯喇,夜晚又夜夜都 唔訓,為左整番好d個網頁囉。今晚真係好凍呀,得十度咋,如果可以閃番入被竇就好喇 ,但如果今日懶,聽日就要做雙份,所以唔可以再懶。聽到penny 可以同男朋友仔尼響被 竇睇電視呀,真係超羡慕。三點幾喇,都淨係寫左少少,食藥果陣唔小心俾粒藥卡一卡, 即時反胃,本來都忍忍忍忍住既,但剛剛打緊初二日記,講到果日嘔....一打個「嘔」字 ,我就忍唔住,扑過去個垃圾桶度,嘔....因為剛剛食左湯丸,所以嘔得特別激,好辛苦 呀,成屋都訓晒,想叫人俾張紙巾我都無,唯有嘔大聲d,企圖嘈醒麻麻,但都係無反應 ,反而嘈醒左工人,佢爬落黎拍我個背脊,死喇,點解我見到個垃圾桶有d紅紅紅色既? 唔係喇 fa,又嘔血?咁咪唯有叫工人嗌醒媽咪囉,開燈睇,哦....原來係d紅色既繩.... 剛剛食既花生湯丸嘔番晒出黎,仲有d響個鼻鼻度,唉....嘔完個人勁唔舒服,但又未打 日記,唯有沖番個涼先打喇,唉....成晚都一陣花生味響個鼻度,以後都唔食花生湯丸呀 ,好憎呀!


一 月 二 十 八 日 年 初 五
...........
今日成個下午我都用部notebbok玩緊愛神餐館,好好玩呀,本來都爆左機架喇,但我又唔 多滿意個結局喎,所以又再玩過,玩到好緊張之際....佢....唔郁喎?喂喂,俾d反應我 丫,嗚~~~~佢都係唔郁呀,我又無 save,唯有熄機再開喇,又要重新玩過。玩喇玩喇,玩 唔夠一陣又hang機....
「喂!你想點呀?」我好無奈咁望住佢。
「..............」佢講既野勁似鬧緊交既情侶。
「咦....剛剛先hang完一次,你又hang....」
「..........................」佢又唔講野,我唯有熄機再開喇,等左好耐之後......
「現在你可以放心關機。」佢講。
「下?唔係喇 fa,我係要開機,唔係熄機喎。」嗚~~~~佢又壞喇,欲哭無淚。
慘喇,上次整好到而家都唔知有無一個月,又壞又要拎過對面海整,好狽架喎,希望果條 友唔認得喇。

我上年病左之後,收過四盒燕窩,其中一盒係爸爸買既,其餘就係親戚送,但我一樽仔都未食過呀,其實都幾想試下,人地講到d燕窩咁貴,唔知食左d皮膚會唔會滑滑呢,但媽咪 又話燕窩咁鬼補,驚補埋d唔好既細胞,搞到個病唔好喎,所以我一直幾想食都唔敢食。 嘿嘿,但其實個個都謀住我果四盒燕窩,但因為我一向都係小惡霸,所以都無人敢郁我d 野,係我果個惡死姑姐,有日好好聲氣咁問我拿左一樽囉,見佢食得咁滋味,我都想飲番 啖。麻麻睇中左我盒燕窩,諗住今晚拎去食飯,送俾姨婆喎,哦~~無所謂喇,最緊要你唔 好拎屋企d朱古力去就得喇,橫掂d燕窩我又唔食得,費事放到過晒期喇。麻麻拿左一盒 燕窩同一盒唔知乜野,等我睇下係乜先,透過果張花紙,我睇到....好似係M&Ms黎架,哇 ,唔得,即時阻止,拿左盒貌似瑞士糖既同佢交換,嘿嘿,又有著數喇。

penny 仔話唔想用以前個logo喎,所以我就幫佢整過個喇,尋晚訓唔著,諗到點整喇,yeah ,而家興興地大logo呀,不如整多個大架喇,唔係喎,日本網頁又興細logo喎,咁點好呢 ,不如整夠三個喇,橫掂係死黨,無計喇。於是一整就整左三個,反而中間size果個最唔 滿意,其他兩個都幾好喇。
大logo 中logo 細logo

今晚又打邊爐喇,唉....食到有少少厭添,年初一、三、五都係打邊爐,媽咪話佢肥左成 十磅喎,有無咁緊要呀,唉....食到我眼都突埋,最慘係我好想食,但又食唔落,成日想 嘔。本來得爸爸、媽咪同我架咋,但爸爸帶多左個朋友番黎,個名叫「想死」喎,咁鬼搞 笑既,不過我耐無見陌生人,有d驚添,佢同我講野,我都淨係望住自己隻碗咁答佢,搞 到我好似同粒墨魚丸講野咁,自閉症。

我成日扭媽咪要食朱古力呀,所以佢今日偷偷地買左排朱古力俾我,嗚~~~~好滾動呀,一 邊話唔俾我食,之後又忍唔住買俾我,果然係慈母,啜~~~~果排朱古力係明治架,細細盒 ,但一睇就知係高級野,哇....好好食呀....數下手指,我都幾個月無食過朱古力喇,嗚 ~~~~好好食呀,實在太幸福喇。


 




仲未睇呀<-----呀 咩 昔 日 發 傻----->跟住點呢


© 呀咩吉場 http://meredith.com.hk