十 二 月 十 八 日 星 期 一

我的聖旦郵包 尋晚為左寫聖旦卡，好鬼夜訓呀，今朝又要八點鐘就起身，唉....媽咪陪我番醫院覆診嘛，好唔習 慣呀，要封密晒成個人，怕紫外光照到會加速皮膚排斥喎，之後戴完口罩，仲要戴多個地 盤佬果ｄ「豬咀」，又怕吸到有菌的空氣，唉....行多兩步我就開始暈暈地喇，缺氧嘛。 一落樓下ｄ人就望實我，好似當我係外星人咁，唉....歧視不存在，世界更可愛。 上到的士即時除口罩喇，呼~~差ｄ焗死羊呀，上班時間，去到北角已經開始塞車喇，如果 唔係個的士佬好傾，真係會有少少俾人打劫的感覺。九點幾先返到去，哇，慘喇，排最尾 、第二十七個見醫生呀，哈哈，個個都早早黎，得我同媽咪咁遲。返到黎醫院果種感覺好 好呀，因為撞口撞面的人都係病人，唔會再咁多人用奇怪眼光睇我喇。無乜野做就梗係睇下男 仔喇，抽血要有條帶綁住隻手架，不過都係醫院提供，有個男仔好搞笑架，一野響身度掉 條帶出黎話係「私伙野」，哈哈哈，cool！有性格，連帶都自備。 抽完血要去照肺，等緊入ｘ光室時，聽到有人嗌一個男仔的名字，咦？個名好熟喎，咪好 似係以前一個好番的病友？我望住佢，佢又望住我，之前我地有傾過電話架，佢仲買過野 食返黎探我，但我同佢都戴住口罩，好似山賊咁樣，我又唔多肯定喎，所以一直都唔敢嗌 佢，後來聽姑娘講，原來佢好番喇，但又復發....唔好彩的人原來唔止我一個。 由早上九點，等等等等等到三點幾，終於可以見李醫生喇，嘻，佢好nice、好慈詳架，因 為聖旦的關係，所以要等到下個星期四先再覆診， 「下個星期唔係我喇，係鄺教授。咁你鐘意我多ｄ定鄺教授多ｄ呀？」李醫生問。 「梗係你喇。」我賣口乖說。 「鄺教授個頭大ｄ喎，可以裝到多ｄ野。」 「但係你靚仔ｄ喎。」 哈哈哈，李醫生真係搞笑。 五點幾返到屋企，第一時間睇下個郵包響邊，哇！好大個post pack呀~~~好緊張呀，唔知 邊個係聖旦老人呢，睇下個sender，咦？呀基？哇~~好開心呀，原來係民安隊的老死呀， 個盒咁大，唔知係乜呢，唔會係人頭丫....嘻，係最好可愛的公仔黎架，郁郁佢就會唱聖 旦歌，哇，真係好滾動呀，呀基每次都係唔聲唔聲嚇我一驚，因為佢平日太太太正經喇， 所以果一驚就更加驚。果時剛剛起病入院，我仲記得佢一本正經咁拎左一袋糖出黎，哈哈 ，估唔到佢正正經經，但對朋友都幾細心，呀基真係一個好cute的男仔。 唉....今日竟然有人睇完我網頁，同我講....「你個樣好似女仔呀。」，下？唔係喇fa， 嗚嗚~~~~我唔係「似」女仔，我直頭係女仔呀，激死人喇(超高音)，都怪我info寫自己係 伯父喇，頭髮又短....唉....等我第時留番長ｄ頭髮，綁番兩條孖辮仔，到時無人再會認 錯喇卦。 嘻，零晨一點，做廚的哥哥用焗爐，焗左一塊超美味的牛扒眼俾我做宵夜，哇~~真係好好 食呀，哥哥，如果你睇到呢段野，就快ｄ再整多次俾我食喇。           嘻，多謝基哥，我好鐘意隻公仔呀，呀咩仲同佢一齊唱歌呀。

十 二 月 十 九 日 星 期 二

飲的品味 慘喇，一早起身都唔知食乜好，因為食野無左咸味，九菜餅同班焯都唔係咁想食，結果淨 係飲左一杯阿華田，呼~~我好鐘意飲阿華田架，夏天加幾粒冰，冬天又可以淨用熱水沖， 飲完成個人都暖笠笠，最近我發現玻璃樽的阿華田粉，沖出黎的味道是最好的，鐵鑵裝和 一包包的三合一味道都怪怪的。如果去到茶餐廳，我就鐘意叫熱奶茶，因為屋企沖唔到黎 飲嘛，以前返學，早餐又好、午飯又好，我都鐘意叫熱奶茶，對「熱」飲的執著，就連到 了夏天都會堅持，雖然係飲到滿頭汗，但都唔會減退我對熱奶茶的熱愛。奶茶的香味、那 濃濃香香的味道、那淺啡的顏色、那鐵匙敲著玻璃杯的「噹噹」聲....加起黎，真係感官 的享受。 結果我無食早餐，午餐就只吃了一隻煎蛋，就一直到晚飯喇。哥哥尋日買左隻「鬚根show2 」，今日「立」左佢黎睇，哈哈哈，好鬼正呀，咁就笑左三個鐘喇。又晚唔知做乜頭痛呀 ，以前頭痛通常都係發燒的預兆，唔係喇fa，發燒要入一個星期醫院，咁我聖旦都要響醫 院過？聖旦老人又淨係去兒童病房，咁咪好蝕底？嗚嗚~~~~好彩原來係虛驚一場，不過都 係早ｄ訓安全ｄ，但訓之前都要整好個郵包寄俾朋友，唉....個郵包就大大個，我又係用 線聯，聯完好似一隻新年的「角仔」咁，好鬼cute。 發現屋企原來有一部碎肉機，嘻，於是我就將成鑵菠蘿倒晒落去，搞搞搞呀，整左一杯好 正好多波蘿碎的波蘿冰，哇~~好好飲呀，正！ 唉....其實我叫呀咩，係因為我英文名叫Meredith，有個「咩」音，而唔係因為我鐘意羊 ，又或者羊年出世，但不知不覺間，連我張床單被舖，都俾我媽咪換左做羊咩咩，好邪。 我發現媽咪真係好錫我，因為毛公仔會黐塵，所以我成床公仔都被打入冷宮，媽咪一邊收 埋我ｄ公仔，今日又買左隻羊咩咩公仔番黎喇，哈哈哈，其實我會鐘意熊仔多ｄ，不過望 住隻羊，隻羊又眼仔碌碌望住我，嘻，其實佢都幾可愛，ｄ羊毛仲好似一舊舊雪咁，好得 意，多謝媽咪，啜~~ 入我地羊家，梗係要影番張監犯相。 黎~~笑下喇「咩~~~~」

十 二 月 二 十 日 星 期 三

腳痛慘過頭痛 哇！好叻女呀，今朝一個人竟然可以食晒一個出前一丁海鮮辣辣麵呀，本來想食味千拉麵 架，不過發現十月已經過左期喇，覺得自己好叻呀，記得響醫院，果時好肚餓，煮左個豬 骨麵，係好香，但一食落口，點解無咩架，唔係個麵有問題，係我味覺太頓喇，而且食左 幾啖，已經覺得個肚脹脹咁想嘔，唉....肚餓都食唔落，今次都算係苦盡甘來喇，嗚~~~~ 好滾動呀。 朝早十點幾做果套「楊門女將」今日終於大結局喇，以前我係唔會睇舊的劇集架，呢套仲 要係舊到十幾年前，果時我諗我仲係ｂｂ仔，譚玉英姐姐響戲入面得十幾歲，仲係做二打 六咋，我仲記得入院前一日，同民安隊ｄ朋友去食早餐果陣，仲見到呢套野剛剛開始做， 今日三十集大結局喇，我入過院，亦出左院喇，六個星期真係過得快呀，最離奇就係馮寶 寶響戲入面反串做男仔，同楊盼盼結婚，馮寶寶真係幾鬼型仔架。 因為要預防排斥，所以一年內早晚都要食一種叫「環孢素」的藥丸，剛剛開始係食一粒超 大，加一粒細，大果粒成兩截手指咁長，吞唔到實反胃，腰果咁大粒不在話下，仲要係坑 渠水味，所以食之前我都開左佢先，散一散ｄ味，之後check 到藥重，減下減下，減到而 家朝早食三粒，夜晚食兩粒。藥輕呢ｄ排斥就會走出黎，藥重呢就會手板、腳板痛，嗚~~ 而家我就係腳板痛喇，成日好似俾針拮咁，行步路都痛，要就住黎行，著得衫多真係幾似 企鵝，就算唔掂地、訓覺都痛，嗚~~最慘就係沖涼，ｄ水一流到落腳就開始火燒咁痛，尤 如熱窩上的綿羊，痛到一路沖涼一路跳舞呀。唔得，等我搵隻厚篾篾入住隻腳先。 呀咩最近發現有人做出令人髮指的行為，就係....我屋企人竟然響廳部電腦，公然上網「 偷睇」我日記，疑犯包括羊媽媽同羊哥哥，佢地仲要大聲講、細聲笑，完全唔顧及受害人 的感受，呀咩在此呼喻各網民，如果見到下圖的左二及左四人士，請從速致電羊農署，電 話係28442630，我再次澄清羊媽媽同羊哥哥係高度危險人物，會「咩咩~~~~」咁叫。小心。 重酬(酬勞係由羊媽媽讚助)。

十 二 月 二 十 一 日 星 期 四

好幸福呀 呼~~今日總算係一身輕晒，嘻，因為今日係二十一號囉，尋晚仲千叮萬囑麻麻記得幫我寄 最後兩張聖旦卡，仲有三日就聖旦節喇，今日截郵喇嘛，今個聖旦寫左七張聖旦卡呀，總 算係對一直照顧的朋友的一點心意喇。 叮噹~~十點幾咁早邊個按門鐘呢，哇，一開門原來係 ups 的速遞員， 「唔該有無「呢個」呀？」佢唔識讀Meredith，所以指住個郵包上面個名。 「我係呀。」哇，又有聖旦禮物？ 「咁簽收喇。」佢拿住部好似人地碌卡果ｄ機，俾我簽名，真係大鄉里呀，第一次見咋。 「唔該晒。」心諗：你快ｄ走喇，我驚你話寄錯唔係俾我架，拿拿臨啪埋隻門。 哈哈哈(奸笑)，閂埋門就係我架喇，好開心呀，今個聖旦好多第一次呀，第一次收到郵寄 的聖旦禮物，仲要係呀咩最鐘意的毛毛公仔，嗚~~今日又第一次收到速遞，仲要係遠自加拿 大的朋友仔寄黎架，軟綿綿唔知係咩呢，哇，原來係一頂橙色的冷帽帽同頸巾呀，嗚~~好 暖呀，頂帽帽可以笠埋隻耳仔架，咁就唔怕冷親羊角喇，仲有埋頸巾，嗚~~實在太細心喇 ，好滾動呀~~~~當我仲滾緊時，又再收多兩張聖旦卡，咦？有一張係bee 哥哥，另一張係 講野超重低音，低十六度的仁傑，信封面仲係有呀咩指定要寫的「靚女」二字，而bee 哥 哥信封裡面就有一隻黑膠豉油碟，底下仲印有「塑膠業訓練中心」的字樣，係佢親手整架 ，哇哇哇！嗚~~~~實在太幸福喇，呀咩攬住呢一大堆聖旦禮物，幸福得暈倒了。 正所謂「冬至大過年」，年年冬至或者係每個星期日，親戚都會黎我屋企食飯架，次次都 十個八個，好鬼熱鬧，不過今次因為我剛出院，所以媽咪下左命令，怕太多人我會感染， 所以等我穩定ｄ先再叫佢地黎，唉....今年冬至冷清清，果種感覺好似新年無人黎拜年咁 ，夜晚呀麻仲走左去姑媽屋企食飯，爸爸未收工，媽咪本來去到樓下，但又響惠康蕩失路 ，結果最後得我同工人食飯，唉....冬至應該有斬料架嘛，我又無，嗚~~~~雖有叫工人炸 薯仔波，當係斬左料喇，搞到好似響麥當勞做冬咁，嗚~~~~好lonely呀。

十 二 月 二 十 二 日 星 期 五

抱著希望來 今日朝頭早響網上面行黎行去，發現有一種新的 cgi祈願板板，可以許願架，嘻，咁我咪 可以一日有一個願望囉，哇，好貪心呀，正興高采烈要整上吉場之際，咦？我好似係cgi 白痴黎架喎(滴汗....)，嗚~~~~好想要呀，個板板好靚呀，唔制呀~~~~丫！呀咩本人係笨 就笨ｄ，但好彩有一班「動腦筋小組」，嘻~~cgi，Yo！洗乜驚~~penny姐姐個網頁好多cgi 架，佢實掂喇，但penny 都俾個祈願板板搞到亂晒，點算呢，唔緊要邦邦師父出馬！即刻 留左個offline massage俾師父，呼~~然後偷懶去左訓覺覺，六點幾一開icq，邦邦同penny 就話俾我知整好左喇，嗚~~多謝晒，呀咩身邊實在太多叻人喇。上年年頭剛剛買部電腦番 黎，都係全靠邦邦教我整網頁咋，右下角個線上羊數計都係邦邦出手整架，無佢就無吉場 喇，佢係吉場的再生父母呀。果個祈願板板首先係小娟子有先，然後都penny 同呀咩吉場 ，之後包包同傻尾尾都整番個，哇~~好開心呀，我地五個網頁好似姐妹網呀。雖然呀咩唔 係神仙，唔可以將祈願板板的願望都變真，但我好開心每個人都抱著大大小小的願望呀， 有希望，先有活下去的動力，你有希望嗎？去祈願板板寫下來吧。 忽然好想聽backstreet boys的black and blue 大碟呀，但一直都買唔到，唯有上網搵喇 ，搵左成個下午都淨係搵到其中一首mp3 ，好想聽呀 >"<。 晏畫susuky打俾我，話俾我知佢上緊電腦堂，仲睇緊我網頁呀，哇~~姐姐仔，你中六架喇 ，仲好似大唔透咁，話口未完佢就好大聲同其他同學講「你地靜ｄ喇，而家上緊堂架.... 呀sir 一唔係度你地又作反....」我真係頂佢唔順呀，其身不正仲響度話人，唉....我呀 咩係好學生黎架嘛，點解會同呢個壞學生咁friend架(滴汗)。 哥哥今晚又煮牛扒喇，不過今次係煮俾佢女朋友食，唉....哥哥呀哥哥~~點解你成日煮野 食俾你女朋友食架，我諗我的理想對象，除左要大口(唔好問我點解，總之我覺得正喇。) 之外，一定要煮野食叻，我可以成日食到佢拿手的美食，就算有一日同佢分左手，我最懷 念的都係佢的廚技。我所指的叻，唔一定係識整滿漢全席，叻，可能係煎太陽蛋叻，又可 能係煮公仔麵煮到出神入化，哈哈，不過入得廚房的男仔都係絕種架喇，如果我有一個識 整蛋糕、餅乾的男朋友，咁我就唔洗成日好lonely咁搓住果舊粉，辛苦一個下午，整出黎 的餅始終都係十四掉下去都唔碎，唉....究竟點解咬唔入呢.... susuky同我呀，1999年的校運會，我地個獎牌都係借番黎架咋，噓~~

十 二 月 二 十 三 日 星 期 六

最後晚餐 哇喇，好開心呀，有朋友將成隻GIGI新碟的mp3 send左俾我，一聽之下，發現有兩首歌好 好聽架，ｄ歌詞好touching，一首係<灰姑娘>，另一首係<最後晚餐>， 「難過得很想哭訴至少永不要控訴 卻恨我仍期待你日後也許對我更好 原諒我貪　如果有下次　分手晚餐 我記得著上更優質襯衫 能讓我揀　如果有下次　 要痛下決心早一晚 了解分手寶鑑 最後也可以　搏多一句稱讚」 分手係好難過，但我寧願傷心，都唔想憎你、控訴你的不好。分手已經係我地最後一次見 面喇，如果我預知你的決定，我會好好細心打扮，好像你第一次約會我般，又或者還有下 次的話，我會先去學習分手的風度，起碼最後也可以博你多一句的稱讚.... 如果可以和平分手，未至於傷害對方太深的話，日後還有做回朋友的可能，但弄得一塌糊 塗的話，我永遠也不想再見到你，我寧願當我們從來沒認識過，我不會再打擾你的生活， 而我的生命，也在你離開的那天重新開始。 死喇死喇....我明明話左唔鐘意陳冠希，但點解今晚睇勁歌，見佢唱住「i own you~i own you~讓我全心喜歡你....」，我又忍唔住眼定定咁睇實個電視，仲笑左出黎，哈哈哈，唔 得呀，佢個樣痴痴呆呆，真係好好笑呀，唔會架唔會架，我唔會鐘意佢架，我係非一般的 時下青少年黎架，唔會....唔會....

十 二 月 二 十 四 日 星 期 日

我的第四份聖旦禮物 唉....點解屋企除左公仔麵之外，就係出前一丁....工人煮野食又難食，響屋企想食野就 唯有自己落手煮，但....我再食公仔麵的話，我驚我會變左公仔，天無絕人之路，我響冰 箱的一個角落，發現左一包微波爐珍珠雞，哇~~正呀，我好鐘意食糯米雞架，拿拿臨拎去 蒸喇，唉....其實姑娘講過唔食得即食點心架，不過....無野食丫嘛，屋企又無人識整， 最多肚痛，死就死喇。為左心靈上好過ｄ，所以我蒸左好耐好耐....早餐蒸到變左下午茶 ，嗯，幾好食，不過蒸得太耐，所以連一粒完整的飯都發現唔到，淨係好似糊仔咁，嘻， 不過我都係過下口癮算喇。 以下一段請以純正普通話讀出： 好開心呀，我快要暈低喇，今日我又收到速遞喇，係台灣的呀德寄俾我的聖旦禮物呀，嗚 ~~好多謝你喔，今年都算是我收得最多禮物的聖旦了，郵費要三百多元台幣呀，究竟是什 麼來呢，哇喇，一打開，原來是三個小小的裝飾錶，哈，我第一時間想到「千里迢迢送我 終？」，大吉利是，cccc，呀德一向不迷信，所以他也沒想到這點，我是新新人類呀，百 無禁忌的，那三個裝飾錶好別緻，那個機械人的錶頭、手和腳都可以動，可愛得不得了， 好開心呀，多謝你呀。 呀德給我的三個小鐘。   今日係平安夜，上年係我過得最難忘的一個聖旦節，不如響呢三日，我講個冬天的故事俾 大家聽喇。 冬天的故事<上> 仲記得上年的平安夜，我要幫爸爸手，去沙田愉田苑的x'mas party 整麥芽糖餅，其實唔 想去架，平安夜喎，同男朋友去拍下拖唔好，不過爸爸又唔夠人手，無辨法喇。等我叫埋 男朋友陪我去做野先，咁之後咪可以去街街囉。唔知點解，今日望住佢，佢的眼神總係閃 閃縮縮，撘車去沙田的途中，佢都無乜點講過野，唔好諗咁多野喇，俾心機做野先，之後 咪可以去玩囉。好忙呀，好多人排隊要麥芽糖餅，整到唔停得手，整左粒幾鐘，佢都一直 只係呆響身邊，我開始察覺佢同平日的有點唔同，今日的沉默來得特別可怕，然後，佢靜 靜的響我耳邊講左一句：「呀咩，我地都係分手喇....」，果句說話響我耳仔裡面一直迴 轉，好似響左一個世紀，我都寧願真係一個世紀，起碼我仲有時間去逃避，但身邊小孩嚷 著要麥芽糖餅的聲音，和男朋友轉身想離開的動作，將我拉回這個世界，我竟然可以好迅 速地答佢：「哦~~你今晚可唔可以陪我望彌撒呀。」，我無表露我的傷心，我淨係機械式 的繼續整麥芽糖餅，而佢都只係繼續企響我身邊，繼續佢的沉默.... 四點幾，終於做完野喇，佢話要返一返屋企先，原本打算回家裝扮一下再出去玩，但一下 子無晒心機，點解我地要響平安夜分手？個個都為節日慶祝，而我就孤令令，坐響污糟的 後樓梯等佢，忽然間我覺得自己好可憐，我好似一個乞衣，乞求別人愛我....之後我地去 左平日去開果間麵店食野，佢繼續沉默，我亦都無講野。 天黑喇，我地上左樂富山，望住維港五光十色的聖旦燈飾，好似對住我笑咁，我諗今晚我 係應該開心的，但現在我偏偏對著它流眼淚，我辜負左聖旦節對我的一番心意。響山上面 ，我地傾左好多野，由相識講到點解要分手，係好唔捨得，但都唯有放手。原來唔開心， 係因為接受唔到現實。我地之間許下一個承諾，一起過埋最後呢個聖旦同除夕，之後就不 拖不欠，我地總算有共識下同意分手了。望住對面海長江大夏外牆，上面寫著「7 days to 2000」，聖旦節又再對住我笑喇，我諗我都應該笑住去倒數，我地剩落黎的7 days.... 離開樂富時已經係十點幾喇，男朋友笑住問我：「你唔係話要去望彌撒咩？」，我愉快地 點頭，係我，我的平安夜而家先至開始，去玩喇！去邊間教堂好呢，其實我心裡面已經有 一間，去考會考oral時，我曾經經過過一間好靚好宏偉的教堂，今日係一個好日子，我要 再去一次。去到銅鑼灣，四圍都好熱鬧呀，我上次係撘電車去的，今次就憑我小小的記憶 ，我同我男朋友嘗試行去，睇住錶，已經係十一點幾喇，我地開始著急，響人來人往的銅 鑼灣手拖手，跑起上黎，果種感覺好似私奔去教堂，又好似電影裡面俾人追殺咁，別人都用奇怪 的眼神望住我地，但我地就自得其樂，好似傻瓜咁笑得好開心。「呼....呼..呼....」我 地終於跑到馬場隔離，一間叫聖瑪嘉利堂的教堂前喇，教堂裡面湧滿晒人，我地兜左幾個圈都 無位坐，點算呢....嘻，我地響教堂出面的長樓梯，兩個人靜靜的坐下來，呢度對住教堂 ，可以望到唱聖詩，十二點喇，樓梯同教堂出面都圍滿望彌撒的人，透過教堂的大窗，望 到一班青年緩緩唱起悅耳的 Silent Night 。其實我唔係信徒，但都唔知點解好想好想黎 呢度，我平日係好鐘意一班人一齊通街癲，但平安夜，我諗應該係一個Silent Night，相 比起尖沙咀狂歡，我就鐘意響教堂望彌撒，這裡先有真正平安夜的氣氛。 「看 那麼多嘴角在微笑 是為何 有 那麼多聲線在合唱 愉快的歌 誰都比我爛漫 笑聲若然沒結果 這天 這些開心的人怎麼過....」 望彌撒還未完，兩點幾我地就行番出銅鑼灣，途中，佢拿左一份禮物出黎俾我，我拆開黎 睇，完來係一條miffy 的大毛巾，佢話大毛巾係包裹住身体，就好似佢個心貼住我，好感 動，如果唔係佢同我講分手，我真係會以為佢仲鐘意我，我攬住果條好大好大的毛巾時， 一定係笑得好燦爛，別人一定睇唔出，我地竟然係一對分左手的情侶。 地鐵為平安夜而通宵服務至清晨，但你對我的感情，早在平安夜的清晨已out of service。 「聽日係聖旦節，我地去邊玩呀....」 沙田愉田苑呀，孖辮果個咪我囉。

悽涼過後<----------呀 咩 昔 日 發 傻---------->跟住點呀

© 呀咩吉場 http://meredith.com.hk