十 月 二 十 三 日 星 期 一
我係我自己
好眼訓呀,九點幾起身,十一點出門口,咁早去邊?去唱k囉,出門口打俾nathya,點知佢 仲訓緊覺,唉....我響樓下撘果架超多人的1A出油麻地,都預左佢遲到架喇,但竟然要我企 響砵蘭街度等,真的有點兒那個,今日預左唔係行街,淨係哩響k房,所以超級街方裝,我 諗光天化日一定唔似企街喇。我地響油麻地nathya唱,呢間lunch k到四點呀,嘻,有著數 ,一黎就梗係整番首「給自己的情書」喇,仲有「pg家長指引」,唱左四個鐘,唱到啞口無 言,好彩有「爽樂」香口膠通一通鼻塞。經過ok便利店,今期軟雪糕係阿華田呀!唔知好唔 好味呢,下次一定要試試。
唱完k,又心郁郁想去街喎,話晒一場黎到旺角,無理由空手而回架,首先,我地又走左去 兆萬影卡,之後就陪nathya去睇尖頭高淨鞋,結果佢分別以140同250賣左兩對,陪佢睇左兩 日鞋,睇得多左我都覺得幾靚,不過我又好少著得咁成熟,青春無敵丫嘛,點可以十八歲就 將自己扮到咁老餅架,唔通等到七老八十先扮後生咩,而且對鞋咁高,點追車喎。我發現人 一定會被身邊的朋友影響,nathya身上的一件衫、怎至一隻篾,都係佢好朋友joan的品味, 佢成日將「我見到joan著得好靚架。」掛響口邊,我都幾佩服佢咁虔誠,唔知道果樣野係咪 適合自己,都為求變成另一個joan。我諗呢個原理,同每一樣野見得多就會順眼起黎有關, 活在社會中,每一個人總是互相影響。我的兩個好朋友--nathya同susuky著衫都好鬼sexy( 我覺得),不過我覺得佢地都著得好好睇架,鬼佢地有身材咩,但我無俾佢地影響,第一我 無佢地咁索喇,第二我鐘意有自己風格,個個鐘意黑黑白白,但我係鐘意彩色呀,我唔係要 博出位,但我覺得彩色先係我的顏色我唔要似人,我要似自己。就算我有錢買晒楊千嬅d衫,髮型又同佢一樣,我始終仲係 我,又或者我著住黃夏蕙d衫,無晒頭髮,我亦都仲係自己,我唔覺得自己要似別人先會好 ,因為我對自己有信心。我要做自己,我係我自己。
原來旺角中心頂樓好多公仔賣架,哇,我見到一個套響手玩的跳跳虎公仔呀,好得意呀,嘻 ,買左黎同自己玩都好呀,我同nathya仲一齊買左隻長錶帶的斯文錶,紅色,好富貴樣架。 之後行過去花園街的途中,又遇到一個賣公仔的小販,哎呀,我同nathya都忍唔住手,佢買 左隻傻豹,我就買左一隻瘦豬同post pet,救命呀,唔好再俾我見到公仔喇,我就快要讓左 張床出黎訓地下喇。之後又撘車出尖咀,行到七點幾,媽咪打俾我催我番屋企打邊爐喇,nathya話 行到條腰就快斷,而我就行到隻腳甩左出黎咁,都係提早收隊喇。
呢排認真激呀,十五號之後已經打左三次邊爐,今日又黎喇,我同媽咪兩個響個廳度用煎pan 打,仲要係麻辣窩喎,辣到我變左孖潤腸,飲左兩鑵可樂消辣,之後媽咪響個窩度"不"左一 碗辣椒油出黎呀,唔怪得咁辣喇。今日終於可以一嘗心願,食 肥牛食飽喇,原來滿足可以好簡單,食一種你好鐘意食的食物,任食食到飽就可以了。


十 月 二 十 四 日 星 期 二
一個兒戲的承諾
七點就醒左喇,呵欠~~咦?點解個電子鐘個時間唔係七點架?唔通尋晚斷過電?唔理喇,去 廁所先,行出廳見到媽咪企響度搞緊個萬能插穌,再行入廚房又見到爸爸響度搞緊個電掣, 奇怪喇,今日個個都咁早醒?當我去緊廁所的時侯,我就聽到媽咪尖叫,我走出去八卦下喇 ,原來尋晚流電斷路掣跳左,所以停左一陣電,媽咪爸爸就係熱到醒左,所以尋找一下點解 會流電呢,媽咪拆開個插穌,見到一條類似燒焦左的電線,拎出黎一睇,哇!嚇到連個插穌 都掉左落地下,原來係一條唔識死的四腳蛇,爬左入去個插穌度,仲電到斷左條尾,哈哈哈 ,實在太搞笑喇。九點鐘同媽咪出門口去瑪麗醫院複診,撘緊車果陣,發現隔離8p巴士上層 車頭,竟然有個超薄電視,又唔係機場巴,無理由係睇下層果種閉路電視架,如果係電視就 wonderful 喇!撘到中環,竟然響條街度見到財神爺呀,佢行過條街都好似特別有貴氣。去 到醫院成十點幾lu,篤左咁多次手指,痛又唔係好痛呀,但都係好驚,響個手指頭拮一下, 仲「必」d血出黎喎,唉....我暈喇。
之後去左置富飲茶,下午兩點再返黎見醫生,哇,今日見到好多病友呀,我地個個曾經都一 齊住個醫院,朝見口、晚見面,行過會打招呼,得閒又會去其他人房傾計,有好食野又會大 家分,互相照顧、鼓勵,我諗我地的關係唔只係「鄰居」,仲好似係上戰場的戰友一樣。醫 生話我差唔多時間要入去做化療喇,但上次發燒入醫院住左成個幾星期,隔兩個星期就要返 入去?我都未玩夠,唔制!所以死嫘下個月中先入,嘻,又成功!可以wet多兩個星期! 去完瑪麗睇西醫,之後就去灣仔睇中醫,唉....又要開始我日日「臥身嘗膽」的歲月喇。
嘻,今日媽咪買左我最鐘意食的dreyers 朱古力碎加薄荷味雪糕,超正呀,又唔係好甜,但 就好清涼,好香朱古力味,惠康仲減價呀,karry 你記得買呀!
我好掛住離開左的tina姐姐同靜宜,我又再一次打聽其他病友,知唔知佢地葬左響邊,但睇 黎佢唔想我知道,唔想我再提起。車經過灣仔的天主教墳場,門口的一對對聯,寫住「今日 吾体歸故土,他朝君体也相同。」,即刻覺得條頸涼一涼,好似有人響耳邊講「今日我死, 聽日就到你喇,哈哈~~」,好鬼驚。
今日搵番d舊相,竟然搵到一張係我同呀基響醫院影的寶麗來,我仲記得果時我地諗,得一 張,咁點分呢,我就話呢次我keep,之後再見到佢就到佢keep,雖然係一個兒戲的承諾,但 卻提醒我,如果我真係想同佢做朋友,我就得作出一d野去維繫,四哥叫我聽日同佢同呀基 一齊食lunch ,我決定去了。

十 月 二 十 五 日 星 期 三
我想同「你」做朋友
九點鐘起身,十點幾出門口,撘1A去九龍城,唉....其實我都唔知自己應唔應該去,我怕佢 地兩個有野傾,咁我咪阻住佢地囉,呀咩好少做呢種乞人憎角色架喎,但我又好恨見到四哥 同基哥,見到佢地,又令我諗起民安隊d開心野。個心想去,但又怕唔受歡迎,不過隻腳都 不由自主咁踏左上巴士的上層了,當個心唔知飛左去邊時,我竟然響觀塘街頭,碰到四個月 前和我分左手的前男友,佢同一個長頭髮的女仔一齊,我的心被恨恨刺了一下,從佢離開果 一日起,我就一直不敢去觸碰有關佢的一切事情,因為我根本忘記唔到,佢響我有病時,恨 心離開我這個事實,由我再企番起身,一個人活得很好的那一天起,我決定當呢個人死左, 每當我朋友提起佢的近況,都好似提醒緊我「你唔好再騙自己喇。」,係,我真的接受唔到 事實。就那麼一眼,我個心一直好唔舒服,點解要俾我再見到佢?點解....你打俾nathya, 話俾佢知,但唔知點解講果一刻,我覺得好羞恥,我好慚愧自己為一個對自己唔好的人而唔 開心,我好懷疑自己一直響網頁講的說話,講得出、做唔到,連我自己都睇唔起自己剛剛眼 眶差點滴下的兩行眼淚。我地以前成日都會去樂富山,九龍城,係屬於我同佢的老地方。
見到四哥同基哥之後,總算開心番d喇,四哥d頭髮依然都係好長,好似個假髮咁,一望落 去連我都熱埋一份,而基哥因為做救生員的關係,剪到個頭好似櫻木咁短,好似和尚。四哥 一個人食左兩個早餐呀,好勁呀,不過可能佢有心事喇,所以變左「沉默的呀四」,淨係低 住頭起勢咁食野,唉....搞到鬼咁多dead air,我一個人點講咁多野喎。張寶麗來我俾番佢 保存喇,總算完成我一個小小的心願喇。十一點坐到十二點 幾,勁多學生食lunch ,仲坐坐下俾人「請」走,之後四哥就揮一揮衣袖,不帶走一片雲彩 咁去左番工喇,淨番我同基哥兩個企左響九龍城廣場吹水,其實我真係幾珍惜呢個朋友,雖 然我地一點都唔熟,亦無真真正正傾過計,但我總覺得,佢會係一個好好的朋友,不過友情 同戀愛也有共通點,都係要相方同意,才可以成事,所以我又唔可以強人所難,迫人地同我 做朋友呀。我漸漸發現,我的自信都係由朋友而來,所以我好努力去識朋友,朋友無限,但 時間有限,我無能力將全世界的人都變成我的好朋友,唯有偏心的找幾個適合自己的,再用 時間同關心,去換取朋友間的感情。不過睇黎我的白痴、過份熱情的性格嚇怕左呢位朋友, 嘻,唯有一笑置之喇,我交出黎想同你做朋友的心,給你一下子率破了,似乎你真係唔係咁 想同我做朋友,呢舊檸檬好大,身為你「普通朋友」的我,唯有酸溜溜的吃檸檬了。
鐘意吃朱古力的朋友請注意,最近我搵到一種好好吃的朱古力餅,就係「麥維他」的Boasters 餅乾,有朱古力樽子同朱古力提子兩種口味,我淨係食過前者,實在覺得d朱古力好好食呀 ,各大惠康有售,今個星期仲減價,記得試下。
bee 哥哥話出左credit card 喎,我決定聽日偷左去亂買野!我話俾佢知「今次你實破產, 仲會x家產,留番d遺產,俾我買地產。」佢回我一句「死產」,哈哈,傻更更咁傻笑一輪 ,我又開心番喇,雖然今日有幾樣唔開心的事,但無理由同自己過唔去架,唔開心咪一笑置 之囉,「做人做得簡單,先係最難。」。
可樂+鐵杯+三粒冰+冰敲撞杯邊+「噹噹」聲+冰涼+二十幾度+炎熱+晚上=呀咩笑容 和半小時的滿足感覺。
你講得對,我唔再係一年前長頭髮、健健康康的呀咩了,我的病令我無晒頭髮、失去自由, 但我無俾佢打敗,反而笑得更多、變得更樂觀,現在的我,先係真正的我。
「我唔再係以前的呀咩了。」


十 月 二 十 六 日 星 期 四
本來完美的一天
哇~~今日本來約左bee哥哥去wet架,不過....原來媽咪同爸爸今日都放假,想帶我上深圳玩 喎,有著數呀,所以甩左bee哥哥底,sorry呀,爸爸媽咪一向都忙到死,好難得兩個一齊得 閒,可以享下家庭樂,嘻,上完深圳又可以番屋企打邊爐,yeah!完美的一天!
一早起身煮左個超正的冬陰公米粉,之後上左秀茂坪社署,將「傷殘金」D錢轉番入我戶口 ,呢個基金總算對我去街有番d資助,嘻,有病就可以拿,唔理你屋企有幾多錢收入,哈。 到左十一點幾,媽咪諗住打俾爸爸,叫爸爸出門口,匯合我地一齊番深圳,但爸爸話醫院打 電話黎,叫我下午兩點要番去醫院染血,我同媽咪一聽到,面色一沉,死喇....醫院唔會無 緣無故打黎叫我番去,除非真係好緊要....媽咪要上番深圳拿貨,而我就出左灣仔ive 搵個 朋友食lunch ,經過伊館,醒起今朝九點鐘起,有中國跳水隊黎香港d飛賣,但係賣晒喇, 唉....好想睇呀,之後我又問下有無十二月「胡桃夾子」d飛賣,呢套舞台劇我恨睇好耐喇 ,我覺得無睇過,就好似無真正過過聖誕節咁,但佢話要十一月三號先開始賣飛,好!下個 星期再來!
兩點鐘,爸爸騎綿羊仔黎灣仔接我去瑪麗醫院,我的心有最好的希望,亦有最壞的打算。綿 羊仔剛剛駛過一條有多樹的路,果一刻,我好想好想可以去行山,我成日以為我係鐘意落雨 ,但原來當我見到陽光,我係可以笑咁開心,我情不自禁咁張開兩手,幻想自己唔係坐響綿 羊仔後坐,而係自由自在咁飛緊,呼~~我覺得我應該係屬於出面花碌碌的世界,我唔會入番 去醫院,我唔要死響醫院。
見到醫生喇,醫生話前幾日覆診,染血染到有唔正常的細胞,所以要抽骨髓,唉....每一次 聽到抽骨髓我都喊足幾日....但今次我好冷靜,我諗我個心更關心的係病情,我即刻打俾個 朋友,同佢講我好想去行山,我淨係好想去玩、去玩、去玩....響再入醫院之前,可以去做 我一直想做的事。醫生問我想幾時抽骨髓,我話而家抽,因為我唔想驚多幾日,抽骨髓之前 我食左半粒「訓覺藥」,但一直我都好緊張,根本毫無睡意,隻手拿住姑娘剛剛送俾我的生 日禮物,我一直好想買的sony貓貓銀包,因為太驚喇,所以哭左兩聲,開始抽之後我都無再 喊過,我諗呢次都算係我最勇敢的一次,係好痛,但我覺得我係可以忍受到的,所以我一直 忍,最痛我諗都係佢割舊骨出黎果幾下,....兩、三個字之後,終於抽完喇,我一起身就覺 得好暈,哈,d藥力而家先發,抽完骨髓要平訓四個鐘呀,但我人有三急,所以兩個鐘頭就 走左去廁所,但腰骨好酸痛,所以拐下拐下。
因為今日係俾人響條街度急call黎,所以毫無準備,自從早餐之後,就到夜晚十點幾先食第 二餐,比較驚喜的係夜晚哥哥同nathya一齊黎探我,呢個情境令我個心有d不安,因為我記 得我第一次入院,nathya都係好夜黎探我,果時除左我之外,個個都知我係血癌,呢一刻, 我又諗,我係咪有大鑊野呢。我個心好亂....但我又搵唔到人同我傾計....聽日我就知自己 咩事喇....我真係好驚....


十 月 二 十 七 日 星 期 五
我的病復發了
孤獨、可怕的夜晚終於過去了,抽骨髓的地方依然隱隱作痛,醫生話個報告要下午先知, 叫我番屋企先,下個星期二覆診先睇報告,我聽到之後好開心呀,因為我怕知道個結果後 ,我無機會出院,不過未知結果,無理由諗到咁灰架,可能無事呢。哈,睇黎我今次的樂 觀都無乜用,醫生五點幾打黎,哈,恭喜我喇,醫生話我骨髓有癌細胞,媽咪問有幾%癌 細胞,醫生唔肯講,話緊嚇親我地....佢叫聽日番去開緊急會議,越多親人去越好,仲要 染埋我哥哥d同我的身体,一時間我咩都諗唔到,我個腦裡面,諗起曾經有好多好多人話 我係廢人,唔讀書唔做野,我又諗起過去的六次化療所帶俾我的痛苦,現在一次復發,等 於前功盡費了,都已經做到最後一次了,為什麼會復發,我仲以為康復係我最好的聖誕禮 物,我又諗起過左身的tina和靜宜,我也會死嗎....我個腦好亂呀,再下去,我仲有幾多 年可以浪費響呢個病上?每次見到同我差唔多年紀的人,我都會覺得好自卑,點解仲要廷 續我呢種自卑感?
今日原本係慶祝出院,所以又打邊爐,但現在好似變成係最後的晚餐。我唔知我仲有無機 會出番醫院,但我希望唔會有人怪我偷懶唔再寫網頁,其實我都唔想,如果可以選的話, 響入院前,我好想做一件自己一直想做的事,就係行山,好想好想。
我無刻意話俾朋友知,因為我知道點講,人地都唔會明,難過的始終只有自己,所以我寧 願將煩惱留俾自己,但活在一個人的世界中,實在有點吃力,要一個十八歲的人,撐咁多 咁多苦,老天爺你忍心嗎?
無人明白自己,無人想聽自己講野,果種感覺真的有點難過。


十 月 二 十 八 日 星 期 六
完成心願
我以前好樂意去用日記告訴你我的快樂,因為我想我的快樂可以在日記中重溫一次,我也 想你可以分享到我的開心,但不開心的事,要我面對都好艱難了,我實在不想重溫一次。 我唔想對朋友講我的病惡化了,係因為別人唔會比我更了解呢個病,告訴了朋友,看見他 為我傷心,我的心又過不去,看見他一幅不打緊的樣子,我又覺得他不在乎我,所以,我 寧願你只是知我有病,而唔知我的病情轉壞了。
我由二月到現在,化療左六次,做多一次就可以講係好番喇,但呢個時竟然俾呢個壞消息 我,果一刻我淨係諗到痛同無自由,我仲要捱多久?
今天早上,我同屋企人番左去瑪麗的骨髓科同醫生開會,去到之後,我真係唔可以再扮無 野喇,其實我真係好驚好驚....醫生話,驗骨髓的結果係初期復發,我都係算唔好彩果個 ,現在唯有換哥哥的骨髓,但首先要排期入院做一次高度的化療,為期七日,之後接下來 就係換骨髓,今次住院可能要兩個月時間,之後仲要有半年唔可以外出,救命呀,殺左我 喇。骨髓科得十間房,好多人輪左半年先入到去換骨髓,但因為我係比較緊急,癌細胞已 經增加至8個%,所以俾打尖,下個星期就會入喇。
因為做左好多次化療的關係,醫生話,我可能會無bb,我聽到爸爸即刻打趣話「今次無仇 報喇。」,而我就忍唔住喊左出黎,透露左我係好鐘意bb仔....我一直都好想將來可以 有一個有自己血統的bb,佢的眼、耳、口、鼻、性格都會有爸爸、媽媽的遺傳,不論靚 或醜,我都會好好疼愛佢,我現在辛苦就夠了,為什麼要我一世都背著這個病? 換骨髓有好多排斥、後遺症、併發症,我好驚,我好難想像自己個口會爛幾日,爛到淨係 可以飲水;吃類固純藥會全身腫脹;全身皮膚會好像燒焦左一樣咁黑,黑足一年,仲會甩 皮同痛;半年唔可以外出,只可留在家中;九個月唔可以食外面的食物;要住院兩個月, 仲要房間只可以有爸爸、媽媽,其他人只可以好似探監咁隔住玻璃;我的自由,我的青春 ,就在這個病上面白白浪費,我仲要背這個病幾耐?
因為情況緊急,所以今天就開始一切身体檢查,佢抽左我二十五支試管的血去驗,唉.... 我仲要未食早餐,差d暈呀,之後又要驗肺功能,照肺....呼~~兩、三個鐘終於做晒喇, 一切都停下來之際,無名的恐懼又迅速侵蝕我,我好驚呀,我好想去走走,我要去可以呼 吸自由空氣的地方,結果我相約朋友到了好近瑪麗醫院的薄扶林水塘山走走行一行,每當 我記起醫生同我講,只有三至六成的成功率,我都好怕,我怕我今次唔可以再去玩喇,我 喜歡畫畫的一雙手也白白浪費了,我又記得好多好多病友,離開前一刻都好辛苦,辛苦到 典下典下,大聲呻吟,我好驚,我好驚等死果個今次會係自己,試想想,在病床上,全身 都插滿醫療儀器,醫生只係講一句「....除非有奇跡喇,唔係都....」捱左咁耐、痛左咁 多次,失去自由、學業、朋友,都未玩得夠、都仲未出院,咁就響醫院等死,我唔要呀!我仲有 好多好多野想做,仲有好多野未玩過,好亂呀,我淨係有權選換同唔換骨髓,睇癌細胞生 長速度,我諗過唔到兩個月,到時後悔都來不及了,即係焗住要醫喇,我無野想講喇。 我應該學懂滿足,雖然今次只不過係去郊野公園漫步,但我暗地裡當左呢次係行山,原本 約左朋友月中前去西灣行山,不過都無咁的福份了,我現在淨係想響餘的幾日,做一些以 前想做,但又無做的事,離不開醫院,都總算無悔今生。呼~~接下來就係去左金鐘太古廣場, 我記得以前成日同朋友去淺水灣玩、釣魚,呢度係必經,日子多了,對這個高傲的地方也 產生了難以言喻的親切感,今次一別,可能要待天氣回暖的月份,聽到蟬叫果時,我才可 以再探你了。我吃左一個肯德基的C餐,因為以前做肯德基,好似食緊自己公司的榮譽出 品咁,每一口每一口都好好吃,每一啖都係恩賜,總算又做了一樣想做的事了。


十 月 二 十 九 日 星 期 日
心靈的住處
今早終於可以一償心願,煮了一個好好吃的福字牌冬陰公米粉做早餐。我從來都不喜歡趕 著時間去吃東西,大不了就不吃算了。「食」係一種恩賜,應該慢慢去享受舌頭的的味道 和牙齒咀嚼時的口感,「食」像一幅畫,「食」也像郊響樂,懂得食都是一種藝術。
五點幾,我約左朋友去樂富山,行上山時,天色已是旁晚了,山腳到山腰都仲有微微的街 燈,但由山腰到山頂都沒有燈了,今晚仲無月光,前面上山的路伸手不見五指,這個熟識 的地方竟然添上了一陣陰森,我真係有點驚,我叫我朋友大聲唱歌壯壯我的膽,假裝鎮定 的我,忽然被一陣強烈的怪風嚇倒了,高高的樹都被吹得左搖右擺,「哇喇,哇喇。」的 響起,不怕不怕,只係風吧了,哇~~~~無喇喇有舊黑影,從天而降,跌到一米前的地下, 嚇到我即刻尖叫,呼~~原來只是一塊大樹葉,我的心跳加速,繼續一步一步行到山頂,總 算係有驚無險,眼前盡是整個九龍和香港島的樓景,我同朋友行至涯邊,靜靜坐下,有一 對情侶剛剛走了,餘下來的只有一個男人,坐在距離我們數十米的地方,我地暗暗希望佢 唔會跳落去吧。九龍仔泳游一個泳客都無,始終都入冬了。每次同朋友來這個地方,都係 近十點才願走,畢竟吹水都係一些無悠無慮的人所做的事,但今晚我不可以了,坐得越耐 我的心越亂,一心只係諗住下個星期要去受死,我的雅興都老早飄到無雷公咁遠喇,唔得 喇!唔得喇!好辛苦呀,入院後的兩個月我唔可以再返屋企,忽然好掛住好掛屋企,果度 先係我心靈的居所,我要回家,我要回家!我喊住咁對朋友說,佢亦只好帶一點點無奈的 陪我下山了。下山後,我又怕一個人的獨處,我又怕要一個人回家,我怕自己靜不下來, 所以打俾媽咪,約左佢去食韓國燒烤。原來在我追求離開屋企,出去外面獨立,識更多更 多朋友的同時,我心底裡還是覺得屋企才是心靈的住處,響果度我先可以做番一個任性的 真我。
九點幾,媽咪上左去拿位先,而我就一個人上去搵媽咪,當時我係排等升降機的最後一個 ,就快到果陣有個攝石人攝左響我前面,哇!你唔係喇fa,升降機一到,佢就理所當然的 入早我一個,有無搞錯架,當我入去時,咇咇!咇咇!下?仲超重呀,果個攝石人仲要加 多句,叫我彈出去喎,下?佢仲丟低同佢一齊黎果個男仔,個男仔好無奈咁,一個人行到 三樓,而我就嬲爆爆咁再等下一部喇,十幾歲、女仔之家咁鬼無家教都有架,上到去之後 ,見到攝石人企響我同我媽咪前面喎,幾歹都寸番佢夠本喇,咪八婆前、無家教後咁勁同 媽咪講佢d惡行囉,呼~~總算係順番口氣,我地仲入坐得早過佢,哈哈哈。
其實我唔係咁恨食韓國燒烤架,不過,我又怕以後無乜機會食,所以無理由錯過呢個咁好 的機會架,一開波我就燒左兩碟牛肉喇,正!


岩岩玩完<-------------昔日發傻------------>惡夢的開始