八 月 二 十 一 日
過去的都過去了
死喇,媽咪一朝早探熱,話我有發燒呀,幾驚要入醫院呀,所我我就自欺欺人地成日都無再探熱, 驚丫嘛。繼尋日又鏟多左條界後,今日又一突破,就係染左橙色,係咪顛呢?雖然問心果句,我緊 係鐘意自己長頭髮喇,可以紮兩條孖辮扮可愛,但係畢竟現在短時期都無可能,因為仲有無限次化 療,這就是我的無奈,所以我就學會喜歡自己,喜歡自己你才會有自信,有自信你才會快樂。我們 不能選的事情只有去接受,你每天埋怨只會令日子過得更苦,我們試著去愛上那些人生的無奈吧。
在此鳴謝呀諾,幫我買晒染髮d野,同好細心咁買多支焗油,仲幫我染埋,真係無得頂,點報答佢 好呢....
哥哥從韓國回來喇,我夾梗要左佢一個好可愛的木盒子做手信,那個四四方方的小盒子,一打開就 會有魔鬼彈出來,哈哈,令我覺得好開心,正!
對於過去的一段感情,我已沒有太多感覺了,我每一次想到如果我再和他一起,我會對不起一班好 朋友,我會覺得好丟臉,於是我就不會想下去了。每次在我最低落時,都是你們令我回復笑臉,我 又怎捨得令我的朋友失望?比起所謂的愛情,你們都重要上一百倍,就是因為朋友我才重拾我曾經 失去的自信。不快樂的戀愛令我覺得孤獨,但從此我不再寂寞了,因為有你。
給重獲自由的妳:
我會愛惜自己,同樣我也不想妳再給他傷害了,你可知道,妳叫我不要再理你那刻,我的心有多痛 ,就連一個萍水相逢的我,也不忍心看見妳為他傷心,那妳又怎能不愛惜自己?妳的條件這麼好, 為什麼還要留戀一個不愛妳的人,他有幾好都好,但他不愛妳這個就是最大的缺點了。來呀,你應 該得到更好的,過去的已過去,那九個月你都累了,現在該去享受一個人的快樂呀,只有接受自己 你才會快樂。



八 月 二 十 二 日
icq規則
自從我將icq個性別轉左做男仔,我就見盡世態炎涼喇,有d男仔一知我又係男仔,就會話即時 話無野喇,幾現實呀,有d女仔又對住我發姣,令我不停滴汗,真係嘔白泡呀。其實我覺得icq 都應該有番一套規則,最起碼就係唔好亂Forward野喇,係唔係都Forward,有d就 話唔Forward又會有惡運、又會死,你估午夜凶靈咩,仲有唔好一上網就問人做緊咩,你問 我我都唯有答你我上緊網,有d人上網,下線又要send multiple massage 講一句「hi」一句「bye」,其他野又唔講,結果就一大堆not in list的人send d無聊野黎,唉...... 我都無add你,做咩成日叫我update呀。一兩個都無所謂,但係一日十幾個就真係過份左 少少。
今日成日都低燒,個頭又痛喎,所以頂唔順無寫日記就去左訓覺,仲要俾人話我偷懶,嗚嗚....


今日又搵到一張西灣的相,係咪似麼麼茶呢,星期日就有得去喇。



八 月 二 十 三 日
這幾天心情不好,對不起
這幾天都怪怪的,忽然變得好憤世疾俗,對什麼事都看不過眼,壞事都好像跟著我來, 令我不停生氣,不停找人罵,奇怪喇。好像一些唔鐘意睇字的朋友在批評我網頁太多字 ,畢竟我的網頁是我最心愛的東西,我要維護他,就叫他不懂欣賞就別看喇,看!係咪 有d似藝術家脾氣呢,但可惜無藝術家天資,但保護自己喜歡的東西也是人之常情吧。
媽咪今日話我成日低燒,可能係發毛菌入肺呀,如果係就大鑊喇,我諗起碼要住一個月 醫院,仲要一日吊一支一千蚊的黃藥水,千祈唔好有事呀。
媽咪的店子又俾人偷左野喇,但那兩個小賊偷左仲唔走,去左買糖,咁就俾我媽咪捉到 喇,才七、八歲,仲話「咪俾番你囉!」於是媽咪叫了他們的家長來,買了偷的東西了 事,但真的幾可怕,咁細就學壞。
今日落雨呀,勁開心,坐係窗前一路望一路笑,心情都即刻好晒。



八 月 二 十 四 日
回憶中的味道
淩晨四時,忽然覺得呼級困難,一想到可能真是發毛菌入肺,即使多累我都再睡不著了,但眼光 光就更驚,咁唯有好累咁走左去打機,機到早上九點幾就同媽咪撘車出灣仔睇中醫,實行中西合 壁。我見到上個星期六一起做義工訓練的歐巴桑,係一架密封空調巴士中,佢講電話的音量好似 用左大聲公咁,果然中氣十足,一定係受過長期鬧交訓練。中醫開左七包藥俾我呀,唉.... 黎緊呢一個禮拜我一定變苦婆都似。難得出得黎,緊係賴死要去行街喇,首先去左金百利諗住探 susuky,點知佢休息,咁就再去time square間page one探nathya ,佢係度用cuter開緊箱,一見到我就好開心咁衝埋黎,但開心到唔記得自己係邊個之餘, 仲唔記得自己拿住把cuter,真係俾佢嚇暈咁滯,好開心呀,買左三本心愛的書,一本係間 間都賣斷,蔡燦德的「得過且過」,一本係sheta介紹的「豕與自以為是的豬」,最後一本 係我最鐘意的卡通人物「凱西」做封面的「心靈雞湯」,其實仲有一本叫「交換日記」的書滿好 看的,但可惜剩下一本爛爛的,謝謝nathya打個八折俾我,嘻。
三月以來今日係第一次撘地鐵,好似自己再番番去以前咁。同媽咪去左敦煌飲茶,兩點半後全部 十蚊,我地食左七碟野,都係八十幾蚊,真係超值。之後再行左一陣花園街,就好開心咁番屋企 喇。
回到家再探熱已經無發燒喇,果然靚心情係唔同d,之後煲左幾個鐘電話粥,發現原來今早果個 歐巴桑係我老友isiah的死對頭,哈,世界真細小,行左成日今累呀,希望明天不會又淩晨 四點起身吧。
我以前去敦煌飲茶,最愛吃灌湯餃,但今次吃,味道好像不是以往那麼好味了。在沒有吃這個灌 湯餃的日子,他的好味程度不停擴大,可能他的味道根本沒變過,但回憶中的味道,始終是最好 的。如果回憶永遠是最好,那麼我寧願我永遠活在你的回憶裡,最起碼你還會覺得我是最好。

其實作者蔡燦德就是笑傲江湖中的儀琳呀--->

sheta推介--->我最愛的凱西--->



八 月 二 十 五 日
好彩我仲未死
嗚嗚~~~~d中藥好咸呀,好似飲豉油咁,咸到苦,仲要仲有十三次飲,死未?好奇怪呀一早一晚 飲完都飲完都好眼訓,所以訓左兩次晏覺。今日internet magazine的記者姐姐打電話黎同我補多 一次訪問,係關於我屋企的威水史,我都無係網頁提過,其實我爸爸是負責接表演做的,也是半 個魔術師,媽媽是繩藝家,曾經代表過香港去日本表演,哥哥是小丑,我和麻麻就懂織草蜢,我 的親戚也懂很多相關的東西,可算是藝術世家了,哈,但每次別人讚媽媽織繩叻,那麼女兒呢, 我就唯有說,我只懂打死結,媽媽的世胞我一點都遺傳不到,淨係畫畫好一點,真失禮。
今日睇細拳的網頁,好動感呀,原來他加了一頁是說我的,內容如下:
馴服過程:一齊o係切雞學院度買興趣($1000一個月),頭幾堂都坐o係姖前面,相比其他著背心露肉 臂既妹妹仔同學,呢隻單眼皮既羊特別可惡...x...可愛至真...之後姖不斷妒忌我既"原汁掃描"同 切雞靚過姖,好搞笑,到我要開動物園,知道姖有個烏托邦喎~~於是如此這般~~尚未馴服,動物園內 自出自入!
難忘記:有一晚,知道阿咩了左浸會醫院,於是我便同森苗同學放學後去探姖,之前只係聽過姖話d 血有問題,見姖早排面青青咁,以為係貧血,去到見到阿咩攬住隻公仔坐o係病床上面,見到我地就 做出一個詐嬌唔開心的表情,真係好想met姖塊面,姖阿媽話咩白血球食紅血球時我同森苗已經覺得 有d奇怪,到我畫完幅鉛筆畫比姖希望姖可以快d出院一齊上堂,要走啦,姖阿媽就好似電視劇情節 咁,送我地走,o係走廊度話我地聽:"姖有急性血癌"......(當時阿咩仲未知自己係血癌)我地默默 咁離開,回家途中,我個腦不斷播住<<遙遠的她>>呢首歌,我好擔心呀,未試過有親友咁重病......
睇完好想喊呀,我仲好記得佢地黎探我果晚的情境,好似尋日先發生咁,完來不知不覺我都病左半 年喇,究竟幾時先可以再去切雞呢,我真係好掛住一班同學呀,其實當我知道自己係咩病果一刻, 我腦裡面都係響起<<遙遠的她>>的幾句歌詞,「但這天收到她爸爸的一封信,信裡面說血癌已帶走 她....」嗯,好彩我仲未死。



八 月 二 十 六 日
對不起,我騙你們的
今日要去做展翅超人呀,六點幾就起左身喇,之後坐爸爸的綿羊仔去九龍塘,同isiah去雞記食早餐 ,好開心呀,好耐無見過呀翟喇,呀翟係勞工處的大粒佬黎架,今日佢都有份搞。唉.....原來所謂 的展翅大使只不過係一個識讀宣誓的人肉佈景版,真係了不起,哈哈,我地仲有口號架,就係「拍拍 ,拍拍拍,拍拍拍拍,展翅!」,係咪正呢,我仲以為係嗌「變身!」。十一點幾就散band喇,竟然 俾番五十蚊臨記費我地,哈,總算有d人性。之後我地十六個人去左樂富間東東開吹水會,好邪呀, 其中一個人是魔術師,原來他也認識我爸爸呀,世界真係細呀。
其實回家後我不是太開心的,因為我做了一件過不了自己的事,我說了一個大話。
給被羊騙了的人們:
當你們問我為什麼要把頭髮剪得短短時,我只是隨意的答「失戀呀!所以剪短。」,那是騙你們的。 我內疚你們真的相信我呀,我都當你們是朋友了,所以我實在不可以原諒自己的大話,下一次,我一 定告訴你們我剪髮的原因。


八 月 二 十 七 日
謝謝你
好感動呀,一起身就睇到其中一個展翅大使的massage,他沒有生氣我那個無聊的大話,還好諒解的 替我搵埋藉口,真的好想和他說句「謝謝你」。我知道真的不是所有人也可以接受我,看見他們閃避 的目光,我給傷害了,從來我也不當自己真的有病呀,我還是一個好地地的人,和你們沒分別,為什 麼這會構成我們做不成朋友的原因?我不想新相識的朋友知道,是怕你們怕了我,不和我做朋友,這 是我的自卑,我真的不想背著「有病的人」這個牌子,可以嗎?就當可憐我是一個傻瓜吧。
原本約好了今天去西灣呀,但天雨關係改期了,但又忘記告訴幾個朋友,害他們呆等,呀咩真是超笨 ,提早患上老人痴呆^^"。
唉....我的失眠愈來愈嚴重了,害我整天都沒精打彩,好辛苦呀,究竟我的仰鬱而到何時才停下來呢 ,嗚~~~~~~有人做社工嗎?誰可以幫幫可憐的小羔羊,解解這個仰鬱失眠症的迷。


上星期<-------昔日發傻-------->跟住睇