十 月 十 日 星 期 二

我出院喇 都星期二喇，我好擔心要響醫院過生日呀，我都唔敢睇日子，醫生仲話「我盡量睇下可唔可以 俾你響生日之前出院喇。」，聽佢ｄ語氣好似想生日前一晚先俾我走咁，唔係喇fa，我又厭食 ，醫院野食我聞到都反胃，今日都餓左第五日喇，再餓落去我驚我過唔到十八歲呀，唉....之 後高級ｄ果個醫生巡房，一見到我就話俾我走喎，下？係咪真架？我開心到唔敢信呀，咪拿拿 臨執行李走囉，呀~~呀里lu也~~多謝觀世音~~知道有得走，我一刻都唔想遲呀，再留響度我會 痴線架，呢幾日我受盡折磨呀，嘔左三日，餓左五日，又住廁所隔離，又唔見電話，以為同個 十九歲的姐姐同房會好多野講喇，點知原來佢都幾難相處架，同一間房左幾日，都唔多兩句， 仲要撞口撞面喎，幾鬼尷尬呀。 因為扺抗低呀，所以每次出院都要撘的士，唉....可憐我家境貧窮呀，醫院響上環，屋企響官 塘，去一次都百六蚊lu，爸爸開車都要俾油錢同隊道錢喇，所以又係一條數....好貴呀！ 離開左屋企八日，番到黎好似唔同晒咁，屋企好靚呀，一開電腦我就收到好多朋友關心的慰問 ，真係好多謝你呀，唔係你，我都唔知點撐落去lu，其實我響醫院每一日，都有朋友匯報我知 吉場有咩留言架，我都知道甜心同包姐姐好關心我，每一次見到你的留言，我都好想話俾你知 「呀咩無事呀！我一ｄ都唔覺得辛苦，我仲撐到。」，i love u all~~番到屋企當堂有番胃口 ，餓左五日，個肚腩仔都扁左，好可憐呀。 今日兩個舊男朋友都不約而同打俾我，又會咁橋？嘻，好開心呀，有人自投羅網問我想要咩生 日禮物，你竟然記得我生日，其實你講一句生日快樂我都好開心lu。

十 月 十 一 日 星 期 三

已經好幸福了 八點幾就醒左喇，今朝早餐係九菜餅，好好食呀，連日嘔吐過後，我開始有返胃口喇，嗚嗚 ~~好幸福呀。原本計劃生日去西灣露營架，不過剛剛出院，費事又入番去喇，咁點算呢，呀 ！不如去姑媽屋企打邊爐喇，嘻，都好丫，同ｄ親戚熱熱鬧鬧咁，仲可以食肥牛食飽，哇， 呢個生日都應該會唔錯唔錯。 響醫院我會諗「有得番屋企過生日就好喇。」，返到屋企我就會心郁郁想出街同ｄ朋友慶祝 喎，你話呢，人幾貪心，相比響醫院，我已經好幸福喇，我好慚愧自己的貪心呀，我又諗起 唔係度的 tina姐姐，我記得同佢同房果一次，剛剛係佢生日，佢成日都講住話好想番屋企過 ，但醫生覺得佢情況唔好，所以一直唔俾佢走，結果tina都係要響醫院過生日，佢個女、佢姐姐，佢姐姐個女黎齊晒，都係有種冷清清的感覺，不懂世事的我，果時淨係覺得分到蛋糕 食好開心，但反而就一點都体諒唔到 tina想番屋企過生日的心情。我左打探右打探都問唔到 tina姐姐葬左響邊，好灰心呀，我就快唔記得 tina姐姐個樣喇，我淨係記得佢把聲，我成日 都以為仲可以見到 tina，就算 tina過左身，我都仲以為可以同佢傾計，以為可以去探佢.... 我係咪好傻呀？我深信 tina知道我好掛住佢架，我唔會唔記得佢，佢都唔會唔記得我，我好 想見到 tina呀....

十 月 十 二 日 星 期 四

我是一個蠢人 好早就起左身喇，食完早餐又無野做喎，結果又訓過，訓到下午再起身，唉....好清閒呀， 唯有打下機渡日喇，唉....又係玩〈the sims〉，嘻，影左兩幅靚靚相呀，第一張係我同男主角積積，第二張就係我領養的bb，嘻，係咪一副幸福少奶奶的樣子呢。 我仲翻睇左一集〈悠長假期〉，雖然係第二次睇，但實在太好睇喇，嘻，木村托哉好靚仔呀 ！ｄ背境音樂又好聽喎， 今朝起身發覺天氣開始有ｄ涼喇，吹過黎的唔再係暖風，而係一陣陣涼風，蟬隨住夏天的完 結而可以暫時休息一下，呼~~好凍呀，但亦都令人清神一振，唔經唔覺，我的悠長假期都放 左一個春天和夏天了，究竟我的病仲要醫到何時呢？好多人都會奇怪為什麼遊手好閒唔讀書 又唔做野，甚至對我有點卑視，誤會我的人太多了，我總不能一一解釋，唯有任由他們誤解 吧，我錯在無權選擇，被迫放棄我一直的理想----讀設計，記得醫生話俾我知，我有血癌， 我還不覺得可怕，直到他告訴我，我唔可以再番學，我就忍唔住喊，我諗我比好多人更加想 讀書，上年這一陣秋風吹時，我還在每天讀兩間設計學校，我還在努力追尋我的理想。 我又想起一首歌的歌詞： 「秋天的風一陣陣的吹過，想起了去年的這個時候 你的心到底在想些甚麼，為甚麼留下這個結局讓我承受」 感情的問題到了今時今日不再困擾我了，去年這個時間的男朋友，也跟我由情人轉為朋友， 我好幸慶自己放得開，一些應該要走的東西，怎麼也留不下，一些應該給我遇上的人，今天 給我碰上了，有人說聰明的人是不會談戀愛，然而看見你，今日我又一再願意冒著再被出賣的危 險，去做一個蠢人，一個相信愛情的傻瓜。

十 月 十 三 日 星 期 五

不再在乎了 都唔知撞咩鬼，又開始失眠，今朝七點幾就醒左喇，下午我蕃薯哥哥上黎 scan一ｄ貓貓的圖 片，說起這個朋友倒幾有趣，我地係上九九年會考時認識的，佢個樣好似我一個鐘意過的男 仔，所以我對佢特別留意，不過我地只係同一個試場的考生罷了，根本無機會可以識到佢，而傘子中只有 而我就更加一定一定唔係通街識男仔的人，唉....都係算喇，但又俾我好巧合地俾我響三個 試場都撞到佢，好！結果我就鼓起勇氣識左佢，我地做左好朋友，之後更成為同事，佢教識 我打中文，唔係我都整唔到呢個網頁，係佢令我鐘意釣魚，哇，仲有好多好多，不過因為一 些誤會，我們吵了，最初我好努力想去和好，但他不屑的態度使我漸漸都放棄了，我覺得最 可惜的是大家都不再當對方係一回事，大家都不再在乎對方的想法同態度了。最近我們又再 聯絡，我們都刻意不提以往的事，他不再是以往那個咩都可以講的好兄弟，反而像一個跟我 沒過去的新朋友，可悲？我諗大家都唔再在乎了。希望蕃薯哥哥的貓貓網頁可以快Ｄ做好喇 ，話時話，我諗佢真係一個幾有愛心的人，鐘意bb，屋企又養左一隻貓一隻狗，哈，唔知收 唔收留我呢隻羊呢？ 今晚好早就訓左喇，呵欠，但兩點幾醒左又訓唔番，眼光光睇左一陣電視，點知無喇喇電話 響喎，哇喇，唔係咁邪呀？咁似午夜凶鈴架？死喇，我又唔敢聽電話，但又驚嘈醒屋企人喎 ，死就死喇，「喂？」，呀！原來係飛左去加拿大的陳明呀，~~~~咚！雖然好開心，但都忍 唔住責怪佢，姐姐仔，成三點喇喎，你竟然以為我仲未訓？你估我做賊架咩，唯有勸喻一句 「你下次記得計清楚ｄ時差，我會響香港時間朝九晚十一接聽你的電話。」

十 月 十 四 日 星 期 六

十七歲的最後一天/我最討厭生日 呼~~又七點幾起左身喇，八點幾電話響？哇！原來係台灣的呀德打俾我呀，嘻，佢話趁今日 佢個可愛小baby未起身，所以打左俾我同我預祝生日先，嘻嘻，感動到我暈呀。 哥哥一起身就拿埋口面咁話佢女朋友可能有左第三者，仲叫我教佢放毒入人地部電腦，下？ 唔係喇 fa，我覺得放毒的人，自己部電腦首先會中毒喎，嗚嗚~~我唔可以一日無腦架，之後 佢就去左番工喇，而我就同朋友響屋企玩左成日。呼~~聽日就十八歲喇，其實我一向都唔鐘 意生日，小學時代，同學們的生日禮物都離不開擦子膠、原子筆，但總不及自己挑選的那麼 合心意，可以用的都用，不用的就給丟在櫃底，好聽的就是成為了一份「紀念品」。中學了 ，每年生日都會收到好多禮物，收到禮物，自然別人生日就要回禮喇，呢個已經係明文的規 定了。生日喇，禮物都夠多喇，但又好想貪多別人一句「生日快樂」，所以就諗到一個好辨 法，我買左好多糖，見到人就請佢食糖，別人好自然會問點解無喇喇請食糖呀，嘻，我就順 理成章話俾人知「因為我生日囉。」，就係咁，我又得到一個唔知衷唔衷心的祝福，至少， 果一刻我的開心係由衷的。生日對我黎講好重要，果一日比其他三百六十四日係特別重要的 ，但其實對其他人黎講，都係好普通的一日，我想生日過得開心，當遇到少少唔開心的事， 我就會覺得係同我作對，係特別刁難我的，就係太刻意去在乎每一個細節，所以就顯得唔開 心的事加倍唔開心，開心的事反而變得微不足道，因為生日過得開心係「應該的」，我係咪 太貪心呢？對於「開心」我係從來都不嫌多的，但畢竟太介意，所以始終每一年的生日都係 美中不足，總係好似唔夠開心，看來，不快樂是源自太在乎，而快樂則源自滿足，既然生活 都這麼辛苦，為什麼還要對自己殘忍？不要再為難自己了，鑽牛角尖不開心的只有自己，你 也是時侯該放過自己了吧，這些日子辛苦你了。唔知聽日的生日過得開唔開心呢？不過心情 好，點都會開心，你睇，吉場有十六隻羊呀，哈哈，我呢隻羊咩又邊有可能心情唔好？我太 多錫我的好朋友了，每日睇我日記、聽我發up風的你，都係我其中一個好朋友，多謝你。 其實已經好眼訓喇，但又好想倒數十八歲的來臨，一向唔聽電台的我，把收音打開了，聽著 十二點前的最後一首歌，「誰人又相信一世一生這膚淺對白，來吧送給你叫幾百萬人流淚過 的歌....」，十二點喇，我默默的祝福十八歲的自己，要笑得比去年更快樂，每一天都比前 一天笑得更大聲，哈哈哈~~(有回音。呀咩在笑聲中漸漸遠去。) 適逢今日落大雨，呀咩就最鐘意架喇，所以夜晚偷偷撐住我最鐘意的粉藍色小雨傘，在人不 多的街上走走。別人都急急腳趕番屋企食飯，而我就悠然自得的反方向走，別人都奇怪我為 什麼在這個吃飯時間撐著傘在街上散步吧，但我反而愛這個時間、這種天氣，雨聲「滴滴得 得」的打在傘子上、打在屋頂、打在窗前，好像一個好親密的朋友在耳邊輕輕細語，而傘子 中只有我們兩人，夜裡的二人世界，好不浪漫。雨聲好像搞擊樂般，好有條理的一下一下奏 起樂章，我邀請這個好朋友與我起舞，我拖著庶柄，緩緩在街上跟著拍子左踏、右踏。同雨 傘拍拖不知是什麼心理，但未至於變態吧，「別人笑我太瘋顛，我笑他人看不穿。」，落一 次雨已經可以令我開心，點解你唔可以同我一樣呢？做人都係簡單好，易笑易喊，生存才有 價值。

十 月 十 五 日 星 期 日

呀咩牛一，咩~~~ 哇喇哇喇，不得了了，生日的早上已經接收到無數個「生日快樂」喇，有ｄ係icq 、有ｄ係 打電話、有ｄ係e-mail....哈哈，証明到呀咩ｄ朋友個個都好錫呀咩、個個都好nice、好有 人情味，每一個祝福我都緊記於心呀，有朋友仲好有心思咁唱左首生日歌send俾我，不過都 唔夠細拳整左個網頁俾我感動，嘻，好靚架，個網頁首midi係佢親手彈，係呀東的「黑色領 帶」mix生日歌，哈哈，呢個配撘幾特別，佢仲著呀東個頭key左上一幅我同佢的合照度，哈 哈，又幾鬼似喎，簡直鬼斧神功呀，有創意我鐘意。 bee 哥哥話我知，佢投稿去蘋果日報篇文今日登左喇，哇喇，佢話篇文響我生日果日登，仲 有篇文又同我有少少關係，所以好似一份專誠為我準備的禮物咁，嘻，我都好鄧佢開心呀。 哇喇，下午展翅的karry、tony、dick 黎左屋企探我呀，嗚嗚~~佢地知我無得出街玩，所以 山長水遠黎陪我，好！為表我的謝意，我好努力咁爬上我哥哥房的閣樓，將佢部play station 搬左出廳，呼，點知好戲在後頭，果幾百隻game碟比部play station更加難搬~~~~咚，我暈 喇，搬完都成身汗喇，剛剛好為今日做左個熱身，好！今日要盡情開心，哈哈。一點幾佢地 終於摸到上黎喇，哇喇，好耐無見喇，久別重逢，首先我地睇左套「小親親」，好鬼正呀， kelly同aaron第二次合作，呢個女仔比男仔高的組合依然好夾，我好鐘意kelly 的作家角色 ，好巴辣，但外剛內柔，對住鐘意的人好似一隻貓仔咁溫柔，好特別。睇完電視就梗係打機 喇，我搬得咁辛苦，唔可以唔玩下架，我地玩晒成隻拍拍機三，之後乜都玩下，嘻，我一向 都鐘意睇人打機架喇，我就坐響隔離幫佢地打氣囉，tony四點就走喇，之後佢自投羅網話番 俾我知，佢仲要未講「生日快樂」喎，哈哈，係喎，連我都唔記得左。之後karry 同呀dick 兩個繼續打機，嘻，我就響隔離一路飲可樂食薯片，一路睇佢地大戰三百六十個回合，哇喇 ，係喎，唔怕肥架咁食法？今日生日丫嘛，唔好講掃興野喇，難得咁開心，好！我送俾自己 的生日禮物就係任叫任食唔怕肥....一日咁多喇，哇！原來唔驚肥，起勢咁食係好開心架， 食得是福，心廣先會体胖架嘛。好開心呀，karry 果然細心呀，知我鐘意sony貓貓，送左兩 條電話繩俾我，好靚呀，不過....美中不足之處係我一個星期前俾人偷左陪電話，唉....得 物無所用，呢份係我今日的第一份禮物呀，嘻，多謝karry 。 打機打到夜晚七點，之後就同親戚響屋企打邊爐喇，哇喇，媽咪問洗唔洗買蛋糕喎，緊係要 喇，仲要係最肥最肥滿佈朱古力果種黑森林！生日大晒，一於有風駛盡理，肥！洗乜驚呀， 本住呢個精神，我決定要食肥牛食飽，哎呀，前勁凌勵，但後勁不繼，呼~~一次過好難食咁 飽架喎，算喇，媽咪專登買左一個細細的酒精爐俾我一個人分開打，哇，ｄ水有滾架，不過 一放ｄ野食落去就即該變番好平靜，相比另一個大爐，人地就好熱鬧，我就好冷靜，哈，我 諗呢個酒精爐唯一的貢獻，係留番俾我拎去露營果陣煮公仔麵，或者係拎去玩煮飯仔。 呼~~原來人大了收的禮物再不是什麼玩具、精品，反而是利是，唔知點解收利是果一刻總係 有Ｄ唔好意思，好似係無錢洗要人救濟，又好似係打劫人咁，總之唔係新年收就覺得好唔自 然喇，我反而希望收到毛公仔，起碼別人又唔洗出咁多錢，我又收得開心，咁先似番一個細 路女過的生日。十二點過左喇，其實生日都唔係咁特別之嘛，只不過係十八歲的第一日，之 後又有十八歲的第二日....如此類推。我唔覺得自己一踏入十八歲即刻成熟左喎，亦都唔覺 我多左幾隻手手腳腳，嘻，不過以後去七仔買酒飲唔會再心虛人地知我唔夠十八歲喇，呢一 刻我最想就係可以去灣仔海旁的麥當勞叫一杯啤酒，然後坐響大風到吹甩頭的露天茶坐同朋 友吹水，哈，簡直係中文書裡面Ｄ古代詩人生活呀。我諗生日最特別的係，香港特別行政區 會免費邀請我影一張全新的身份証，Ｄ過膠仲反光架，可能見我過去十八年行為良好喇，仲 會好似幼稚園Ｄ先生咁俾多兩粒星星我，我總共有三粒喇，唔知儲到幾多粒有禮物換呢？