----星月童話---58---

原來我重有感覺---小丸子

 星期日睇完電視,稔住上來"及及"係乜料,點知睇到呀咩其中一篇冇乜特別既日記(大慨講呀咩約左朋友食早餐),我竟然喊左三個鐘,收唔到聲。我喊呀,我竟然重會喊呀!一直以為我既淚線,隨著我既心,一齊死左啦。我係一個廿九歲既女仔,三個月前同我拍左拖七年,去到談婚論嫁地步既男朋友分開左。我既心,難過得唔識點樣形容。但係天生大喊包既我,竟然流唔出一滴眼淚。我嘗試過好多方法去搞喊自己都唔成功。我以為我已經唔再有感覺,打我唔識痛,瘙我唔識笑。但係呀咩好輕描淡寫既一篇日記,喚醒左我既感覺細胞,亦喚醒左我對我最愛既姑姐既懷念。

一路睇呀咩寫既野,一路係度稔:咦?噤似姑姐既?!唔知係咪緣份,我同我細姑姐既關係比起同自己媽咪更close,佢就好似我第二個媽咪一樣。可惜,姑姐係兩年前因為直腸癌過左身啦。但係佢既經歷,佢既性格同佢對生命既態度同呀咩十分相似。(佢之前又係經常出入瑪麗,又好似係K9病房咖窩,唔知呀咩同我姑姐有冇見過面呢?!)

係呀咩既日記裡面,好多時會提到食野。嘩!食完呢樣又話食果樣。。公仔麵,蛋糕,PIZZA,丁丁點心,肥牛,雪糕,乜都唔放過。(我稔佢後來食得唔多係因為化療影響)我姑姐亦係一個極級為食妹,個口食緊一件,手裡拿住一件,對眼都唔放過望住碟上既一件,話佢霸左咖啦!!好正,好為食。記得有次姑姐話未去過Soho區,於是就趁佢放假出院時,同我舊男友帶左佢去Soho食飯。剛剛做完化療既佢,竟然可以食晒三人份既甜品。甚至佢同我講最後既一句說話都係"我想食你上次買上來我屋企果D超大粒士多啤喱"。 佢同呀咩一樣噤為食,唔知家陣係天堂既大食會party,佢兩個會唔會係搞手呢?

我姑姐係天生樂天派,有乜事都好少理。當大家都為佢既病擔心時,佢都不知幾開心。每日係醫院裡都好似開party,係lift口已經聽到佢既笑聲。腦裡面多多大計,一時又話要去蹲係度果D大排檔食魚蛋分,一時又叫我帶佢去北海道浸溫泉。果時我個心好唔明,點解佢病到死下死下,兩個女又噤細個,點解可以睇得噤開?當佢一心以為好返,突然又再復發時,點解會係佢反過來安慰我?我稔,可能佢係基督徒卦!可能佢既宗教信養令佢噤睇得開卦!直到我睇晒呀咩既日記,呀咩教識左我,原來,快樂係我地自己既手中,想唔想要,只在乎自己會唔會將手抓緊。

其實我同呀咩一樣,好怕人講耶穌。唔好誤會,我尊重任何宗教。只係每當身邊朋友有病又或發生甚麼大事時,一眾基督徒一定會一擁而上,不停搵好多機會同你講道,安排見證分享,不停叫你信主,信主必得救,信主唔晒愁。我好明白人到低潮或軟弱時好容易會尋求宗教既精神支持。但我覺得我地都要尊重當事人既選擇。有好多教徒太進取既態道,實在有D監人乃後囉。就好似同你講,你就死咖啦,信主就上天堂,唔信主就落地獄,噤你信唔信呀?。。。好反感!

一直睇呀咩吉祥一直稔:唔晒審,呀咩一定係基督徒啦!但睇到佢去過報道會,感動到喊唔停,但最後竟然冇決志,感到十分驚訝!人係病既時候意志最薄弱。但呀咩病得噤重時,依然有自己既主見,依然照自己既心做事,我真係覺得,呢個小小既細路女,的確與眾不同。估唔到一個小妹妹可以教識我噤多道理,啟發我噤多!

咩咩,多謝你。多謝你既文字令我記得我重生存,重有感覺。多謝你提醒左我乜野係幸福。可惜我來唔切同你做朋友,不過我相信我姑姐已經代我同你做左死黨,一齊係天堂搞左好多好多大食會party。如過你見到佢,幫我同佢講聲,我好卦住佢,我會永遠愛佢。

小丸子

《back》