妹妹

     1999年8月23日認識妳,2002年6月10見妳最後一面.妳係我既同學,網友,朋友,契老婆

同學<--

       我覺得我地班切雞同學係同其他班唔同既,
因為其他班唔會上堂之前買茶葉蛋,"um春"蛋一齊食,
唔會一齊去西貢BBQ,唔會上堂咁多計傾,當miss無到,
唔會畢業之後經常約出泥聚餐.
妳,我,Sammie,Raymond,Vivian,雯雯,阿sir,費迪,史提芬,Yoko,永遠都係朋友.

仲未有病look

做過化療之後，再出頭髮 look

網友<--

        妳既烏托邦令我開始造自己既網頁,妳既吉場令我識多左好多朋友,
個個網友都鐘意妳,我覺得鐘意妳既都會係好人,我都好鐘意妳.
由阿德叫妳傻咩咩,妳叫阿德笨德德開始,我就開始鐘意左個笨字...
結果我地都改左姓笨,我亦有機會去台灣見倒笨德德,笨素素,笨品品.
笨家村村長應該係阿德,妳係村姑.妳,我,kk,尾尾,吉場神獸(平安夜),
阿豆(豆釘),小魔女,義犬bee99,南姐,曲奇,傻下唔傻下既傻兔兔,
冬冬(小伍),小倍,小may,仲有細蚊同花花(艾雷斯),我地永遠都係咁笨!

吉場石澳賀生辰，十九歲喇!

朋友<--

        我會記得玻璃介指,沙糖可樂虫虫,意粉兜,木錢箱,
大嶼山超級無敵兵乓波,捉蟹仔,麥倉軟雪糕,萬字夾,meet妳塊面,
四百幾蚊蕉葉,撕海報,好核突既電話聲,1984...
同妳既回憶都全部記低,妳係我隻羊,會永遠住o係我既動物園.

 麥倉軟雪糕

契老婆<--

          妳成家人都咁好玩,妳叫我契老公,羊媽媽會叫我女婿,
羊爸爸會話"你好似溝緊我個女喎",咩哥哥又講"我個妹唔係咁差姐下話",
真係好好笑,仲有妳d 羊親羊戚,都係好玩得既,我羨慕妳地既關係呀.
我諗我地係全世界第一對契既夫妻,真係好好玩,雖然時間好短,我會永遠懷念妳.

       同妳一樣,我唔信神,我更加唔信死後世界,我知道我地永別啦,
我會好珍惜認識妳呢份感情,記得既,感受過既會陪住我,
妳既離開真係令到我好痛好痛,我唔想接受呢個事實,
好灰好灰,放心,我知妳既精神係咩,識倒妳,係我既福氣.
 

細拳 2002-06-22 02:57:45

謫自 Uzone21.com 永遠懷念你，呀咩…

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

細拳 

         我覺得咩咩真係好叻女,得病之後佢當然係好堅強,好樂觀咁面對,
其實得病之前佢亦都係一個有理想,有決心有活力既醒目女,
雖然咩咩佢中學成績唔好,但係佢知道自己既興趣係設計,
所以就向呢方面進修,唔係話求其是但讀住先果隻,
因為佢同時報左大一同香港設計學院兩間,應該係有決心學設計既,
咩咩亦都好用心做功課架,好似有次上堂要我地設計一個類似記事本既野,
只係要求我地諗個設計意念先,但係咩咩第二堂已經整好一本成百既製成品出泥,
仲要真係好似出面賣緊果d 咁靚,真係有天份.

        我仲記得咩咩之前做過肯德基partime,識得自己搵$$$,比起家下好多
o靚妹真係積極不知幾多倍,我眼中既咩咩係一個唔會輕易話放棄既女仔,
佢最唔鐘意發生既事就係決定左要做既事做唔倒,
但係偏偏血癌令到佢做唔倒好多想做既事.

       我記得咩媽媽講過咩咩armarm知道自己有血癌既時候都無喊出泥,
但係講到話無得再返學,唔可以再同我地一齊上堂既時候就即刻喊到收唔倒聲...

      咩咩係一個活潑開朗既少女,好主動去結交朋友,佢好鐘意傾計架,
見倒人傾計既時候會想一齊傾,問有乜咁好傾,跟住傾埋一份,
仲發表好多話題tim,咁可能係佢交朋友方法之一,

          同埋咩咩好鐘意影相,未買數碼相機之前佢已經周不時上堂去街都同我地影相,
影得好開心架.咩咩真係好多朋友,或者話佢識好多好多人,
連蔡康年都識...哈,得病之後佢亦因為識得人做遊戲雜誌,
可以幫手寫佢鐘意玩既石器時代遊戲攻略,又可以賺$$$.

或且或者係我老餅啦,我覺得咩咩諗既野,做既野都好新鮮,好特別,
好似寫網頁佢會用notepad而唔係用咩軟件,打中文就用九方(?),
law個意粉兜卦o係背囊當裝飾,屈曲萬字夾當耳環戴,
同我當街met陳曉東楊千嬅海報,諗得出既咩咩都夠膽試,
但係又唔可以話佢亂咁泥,可以講咩咩既思想都算有紋有路,
有睇佢寫既文章都知道咩咩對人對事都有佢獨特既見解,佢思想成唔成熟???
佢得十九歲,想點呀?不過咩咩曾經send錯左一段messate比我,
但係我好記得內容:"成熟同年齡基本上無關,慶祝生次數多左,
唔代表你個人真係成熟左,只可以話你對於吹蠟燭呢個程序比較熟悉..
"我唔知呢段文字係咩咩自己諗定係睇書睇番泥
但係佢識得用,我就知佢唔係細路女.

2002/6/25(Tue) 21:37 吉場牛言版
~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

細拳 

"其實我真係好羡慕你地架~ 
可以成日一齊出去玩~ 
你地個個都好熟好friend~ 
但我一次都未出過黎~ 
我好似唔屬於你地既圈子咁~ 
我怕有一日你地唔記得左我呀~" 

上面呢段說話係咩咩留比我既,因為病所以佢不時要入院,
所以有時約左朋友都被逼失約,我知咩咩會因為咁好唔開心
真係驚我地會唔記得佢,但係我諗咩咩每一個朋友都係好關心佢,
我地好多朋友都係因為咩咩而認識,因為咩咩而加深認識
甚至有好多唔認識咩咩既,從來未見過咩咩一面既網友,
都受到咩咩影響,做人樂觀積極左,咩咩永遠都係我地好朋友,識倒佢,我引以為榮.

星期四晚見啦,我都希望係歡送咩咩,大家都精神d .   

2002/6/25(Tue) 21:37  吉場牛言版

這個是咩咩十九歲生日，細拳送 o既賀禮。

吳綽姿(咩咩)

2000年前走到佐敦的香港設計學院報讀一個夜校文憑課程,開學日是1999年八月二十三日,咩咩就坐在我的後座,是我喜愛的那種單眼皮女孩,所以很自然地會多留意她.看見她的功課都很用心去做,也很有設計天份,那時一星期有三晚上課,見面多了,同學們開始有說有笑,不過來上課的同學就越來越少了,到最後班中包括我在內只有十個同學是保持正常出席率的,所以這個小圈子很快熟絡起來,十分親切的同學:咩咩,雯雯,小霆,森苗,費迪,史提芬,阿sir,Raymond,Yoko.正值2000年,當時想造一個個人網頁,得知咩咩已經造了一個,於是便向她請教,發覺個人網頁就像自己另一個家似的,十分有趣,開始跟咩咩多了話題.

有一晚,咩咩通知我她進了浸會醫院,我和森苗史提芬放學後一起到浸會探望她,咩媽媽在病房門外告訴我們咩咩是急性血癌...自此咩咩就經常要進出醫院,我和咩咩的聯繫主要在網上的icq及咩咩網頁的留言版,因為咩咩在醫院也會用手提電腦上網,將生活的點滴記在網頁上就成為咩咩的精神寄託了,我也在網上加深了對咩咩的認識.咩咩的病令她出戶外的機會大大減少,所以我很珍惜可以和咩咩見面的聚會:到醫院探她,設計學院同學聚餐,網友聚會,我一定抽空出席,因為我很害怕...2002年六月十六日,害怕的事發生了,咩咩離開了這個世界,但我們的友情沒有告終,沒有可能見面...但,情不變.

精神不滅.和咩咩的回憶-->上堂時吃蛋蛋---到浸會時看見咩咩扁著嘴抱著布娃娃坐在病床上,好天真.第一次去瑪麗,摺了一盒紙鶴送給咩咩---化療後首次外出,和設計學院的同學去吃韓國燒烤,在街上咩咩抱著我的手而行,她害怕途人的目光---咩咩一家人+展翅同學到大嶼山宿營,和咩咩+kk+小倍+冬冬談天,好親近,翌日陪咩咩到石灘散步,捉蟹---2002年六月十日,我到瑪麗送了那年的生日願望給咩咩,那天竟是見咩咩的最後一面,晚上咩媽媽來電說咩咩祝我生日快樂---咩哥哥載我們到天水圍,在車上鏡影中看到咩咩笑得很甜---咩咩每次生氣也說要和我離婚(haha)---咩咩有一次叫我買"沙糖可樂虫虫"給她吃---用了一日一夜廢寢忘食設計咩咩的十九歲生日禮物---費迪載我和咩咩回家,我和咩咩鑽出車頂天窗合照---1013石澳燒烤,在夜空下的沙灘,我們一大班網友一起送生日禮物給咩咩---笨字一大個---世上第一對上契夫妻?(hehe)---玻璃介子---在旺角街頭和咩咩撕走陳曉東+楊千嬅的宣傳海報---很愛很愛麥當勞大軟雪糕---設計學院同學初次聚會,西貢BBQ,咩咩被我的滔滔不絕吸引一起講是講非,那晚下著毛毛雨

摘自細拳的精神不滅∵回憶中友情

<回到頁頂>