241個半月的我
二零零一年十一月二十號,我同nathya無端端講起,除左讀書時代影過沙龍之外,好耐都無影過喇喎,不如就搵日影番輯喇,當趁自己後生,又趁唔洗入醫院受苦。講到慶起,大家都好有興趣喎,但求求其其搵一個攝影師,又唔知佢技術如何,就好似我中三、十四歲果年,是但搵左一個,本來諗住去蘭桂坊影架嘛,最好出到黎佢竟然屈左我地去皇后像廣場影喎,佢仲要不停睇馬經,又完全無技術,真係俾人昆水咁呀,唉...果時細,梗係無同佢嘈喇,之後都係靠人介紹先敢再影咋。讀書時代梗係無無聊聊架喇,所以中四又走左去影,果個攝影師係女仔黎架,叫琳琳,都影得幾好架。中五畢業要交相去學校本紀念冊度,而且同學間又有交換寫紀念冊既習慣呢,點可以唔搵d好樣少少既相呀,於是約好幾個同學一齊去影,本來諗住搵番琳琳架,但原來佢無做嚕,交左俾佢拍檔傑飛,初初都擔心架,但傑飛俾人果種感覺都幾專業,影出黎既相仲比琳琳好添,真係錯有錯著喇。我地揀左響金鐘港麗同香格里拉酒店度影,影出黎d色都幾柔和呢。影沙龍都係中學時代會做既無聊野,所以畢左業一直都無再影嚕,而且九九年年尾又病鬼左呢,所以一直都無呢個念頭嚕。難得我同nathya都心血來潮,我就提議提傑飛影喇,不過搵晒成間房都唔見佢張卡片,有d地方仲搵左幾次添,但都真係無喎,最後我終於記得好似係放左響個膠盒仔入面,但個膠盒仔呢?去左邊去左邊...丫!原來係收埋左響媽咪鎖實左果個櫃度呀...嘻,終於搵得番喇,於是就約左二十三號,去番金鐘港麗同香格里拉酒店度影。如是者緊張左幾日,終於到左影相既日子喇,點知一早傑飛打黎話臨時有事影唔到...因為佢要響沙田大會堂影婚沙呀,除非我地都去沙田影喇,但室外又曬又熱,實影得好辛苦喇,咁唯有改期喇,再約下一個星期五,三十號,呢個就係事件既始末喇。

影呢攝相其實就好似影bb相咁,記錄低241個半月大既我,長大後又可以拎出黎比較一下喇。