友情.親情.聖誕夜

::::::十二月二十五日::::星期二:::

尋日玩咁辛苦,今日都係抖下......先出去,(下?仲要出去玩?)...咁大時大節,留響屋企過好似好無癮喎。幾個星期之前已經約好幾個展翅朋友仔,一齊去工展會同冬日嘉年華,哈,尋日就約左今期展翅大使,今日就約左上期展翅大使,真係多得展翅帶俾我咁多朋友。原本karry約我一點架,但我想訓晏d,所以就約三點,但...之後我又好累,結果推到五點,真係唔好意思呀。尋晚累得滯,無沖涼就訓左,所以今朝一早沖涼,本來都無流鼻血,但可能d水太熱,沖沖下涼個鼻又可始滲血水,撞鬼嚕,即刻著番衫飛出去,塞住兩個鼻哥窿,嘻,又俾我止到血喎,可以出去玩嚕!


金鐘地鐵站恆生等

五點鐘準時到達金鐘地鐵站恆生,等埋呀dickkarrytony,我地就出發行去工展會喇,嘻,好耐無見佢地喇,karry電曲左把頭髮,好鬼有女人味呀,即刻比下去添。媽咪響工展會開檔,所以有d免費入場券,我地可以唔洗買飛,嘻。入到去本來想探左媽咪先架,但行左好耐硬係唔見喎,無所謂喇,行住街先喇,哇哇,經過一個叫「可愛天國」既舖仔,哇呢,好多公仔呀,死喇,我又開始上身喇,發晒癲咁響度睇公仔,我同呀dickkarry一人買左一隻條尾好長既...「生物」(唔知係乜),條尾入面有鐵線,可以"cool"響隻手度,好卡哇伊架,之後仲睇中左隻牛牛公仔,哇...有黑白色同灰白色,最後我都係揀左黑白,嘻,老闆見我地咁幫襯,仲一人送左一張年歷俾我地呀,好野!行到去食街,我同karry就拿拿臨買魚蛋食,諗住買十蚊share喇,個老闆俾左一大兜我地呀,哇,果度差唔多有成廿粒呀,都係多得karry夠索,嘻,等我都有著數。

雖然話今日既狀態好過尋日,但都係唔太好,行多兩行就開始累,同埋可能太多人既關係,又有少少透唔到氣想暈既感覺,真係差勁呀,唯有去媽咪個舖位度坐,karry知我好想食阿波羅雪糕,於是佢地就去左搵下邊度有得賣,哇...佢地真係買到番黎呀,嘻,我一向最鐘意食波羅+西瓜,清清甜甜,好正架,仲要係karry請既添,真係正上加正,多謝karry


好食,正!

媽咪隔離果檔係「蠟手黨」,即係整蠟手果d呢,karry話想用自己隻手整個電話座喎,哈,睇住佢整好搞笑呢,果個師父仔靚仔又風趣喎,成日叫karry唔好反抗,真扺死。因為真係好累呀,最後決定都係留響媽咪度,同媽咪一齊收工,佢地仲約左阿翠同阿明響黃埔,我成日都要休息,唔想掃佢地興呢。唔可以同佢地一齊去冬季嘉年華,的確係有少少遺憾,希望可以快d又聚一聚喇,同佢地一齊真係好開心既呢,大家都真心相對,而家真係好難再搵到一班咁真既朋友。

媽咪大約九點左右就收舖喇,聖誕節咁早番屋企,好似有少少無癮喎,嘻,不如...過去尖沙咀迫下喇,於是我地就由添馬艦慢慢行過去中環碼頭,再撘小輪過去尖沙咀,哇...響維多利亞港中間既時候,望到兩邊岸都係節日既燈飾,真係好靚、好浪漫呀。尖咀勁多人勁多人呀,我地沿海邊行,好多後生仔女響度追逐,互相噴雪、噴噴條,該燴嚕,都唔知有咩好玩,俾噴雪噴左落件褸度,就真係水洗都唔清嚕,而且d女仔又著晒超短裙、高跟鞋,仲要跑到好似俾人追殺咁,哈,我睇佢幾時扑親我就笑嚕,一個二個俾d噴雪噴到成個頭都係白色,成隻女鬼咁,采!


人山人海既海運門口

之後我地繼續行過去金馬倫道果邊,真係多人到行唔有咁滯呀,有幾下真係俾人撞到差d飛左去。我地去左粥粉麵既舖食野,飲左杯熱檸茶之後,成個人即刻暖笠笠。我同媽咪坐埋一邊卡位,對面坐左兩個女仔,相隔得果兩尺,面對面食野,真係有少少唔係咁自然,我同果個女仔一齊想拎同一種調味料既時候,佢講左句日文,大約係唔好意思咁解,先知...原來佢地係日本人黎架,哇,made in japan既,果然係唔同d(一般崇日心態^^")。佢地走左之後,黎左對母子,個仔都幾歲,好鬼頑皮果種,佢響台底一隻天蠶腳車過黎,好...忍你,再黎第二下,小朋友...我對絲襪新架,我唯有同佢講「小朋友...你唔好再踢喇...」,佢媽咪即刻講晒唔好意思咁,呼,無事。

難得同媽咪行街,梗係捉佢去行嘉連威老道喇,嘻,大有斬獲,多謝晒。原本諗住去厚福街食甜品架,但頭先食得太飽,唯有留番下次先喇。撘車既時候已經十一點幾十二點嚕,呢架巴士比平時既特別短d,所以坐得好迫,我地上車時只係淨番兩個三人位未有人坐,原來前面果個三人位個地下有堆嘔吐物響度,我地唯有坐後面果個位喇,好彩無乜異味,唔係都幾難頂。個個上車都唔揀前面個三人位,但愈上愈人滿時,有個學生就被迫坐左,媽咪就好心咁俾左張馬經版佢墊住個地下,話晒都唔洗下下望到咁嘔心嘛。

祝你聖誕快樂,願我愛和愛我的人都可以暫時忘記煩惱,無憂無慮去歡渡佳節。

karry整蠟手1::::::睇下::::::
karry
整蠟手2::::::睇下::::::
karry
整蠟手3::::::睇下::::::
尖沙咀好多人呀...::::::睇下::::::