呀咩吉場呀咩之冬天的故事

冬天的故事<上>
仲記得上年的平安夜，我要幫爸爸手，去沙田愉田苑的x'mas party 整麥芽糖餅，其實唔想去架，平安夜喎，同男朋友去拍下拖唔好，不過爸爸又唔夠人手，無辨法喇。等我叫埋男朋友陪我去做野先，咁之後咪可以去街街囉。唔知點解，今日望住佢，佢的眼神總係閃閃縮縮，撘車去沙田的途中，佢都無乜點講過野，唔好諗咁多野喇，俾心機做野先，之後咪可以去玩囉。好忙呀，好多人排隊要麥芽糖餅，整到唔停得手，整左粒幾鐘，佢都一直只係呆響身邊，我開始察覺佢同平日的有點唔同，今日的沉默來得特別可怕，然後，佢靜靜的響我耳邊講左一句：「呀咩，我地都係分手喇....」，果句說話響我耳仔裡面一直迴轉，好似響左一個世紀，我都寧願真係一個世紀，起碼我仲有時間去逃避，但身邊小孩嚷著要麥芽糖餅的聲音，和男朋友轉身想離開的動作，將我拉回這個世界，我竟然可以好迅速地答佢：「哦~~你今晚可唔可以陪我望彌撒呀。」，我無表露我的傷心，我淨係機械式的繼續整麥芽糖餅，而佢都只係繼續企響我身邊，繼續佢的沉默.... 四點幾，終於做完野喇，佢話要返一返屋企先，原本打算回家裝扮一下再出去玩，但一下子無晒心機，點解我地要響平安夜分手？個個都為節日慶祝，而我就孤令令，坐響污糟的後樓梯等佢，忽然間我覺得自己好可憐，我好似一個乞衣，乞求別人愛我....之後我地去左平日去開果間麵店食野，佢繼續沉默，我亦都無講野。天黑喇，我地上左樂富山，望住維港五光十色的聖旦燈飾，好似對住我笑咁，我諗今晚我係應該開心的，但現在我偏偏對著它流眼淚，我辜負左聖旦節對我的一番心意。響山上面，我地傾左好多野，由相識講到點解要分手，係好唔捨得，但都唯有放手。原來唔開心，係因為接受唔到現實。我地之間許下一個承諾，一起過埋最後呢個聖旦同除夕，之後就不拖不欠，我地總算有共識下同意分手了。望住對面海長江大夏外牆，上面寫著「7 days to 2000」，聖旦節又再對住我笑喇，我諗我都應該笑住去倒數，我地剩落黎的7 days.... 離開樂富時已經係十點幾喇，男朋友笑住問我：「你唔係話要去望彌撒咩？」，我愉快地點頭，係我，我的平安夜而家先至開始，去玩喇！去邊間教堂好呢，其實我心裡面已經有一間，去考會考oral時，我曾經經過過一間好靚好宏偉的教堂，今日係一個好日子，我要再去一次。去到銅鑼灣，四圍都好熱鬧呀，我上次係撘電車去的，今次就憑我小小的記憶，我同我男朋友嘗試行去，睇住錶，已經係十一點幾喇，我地開始著急，響人來人往的銅鑼灣手拖手，跑起上黎，果種感覺好似私奔去教堂，又好似電影裡面俾人追殺咁，別人都用奇怪的眼神望住我地，但我地就自得其樂，好似傻瓜咁笑得好開心。「呼....呼..呼....」我地終於跑到馬場隔離，一間叫聖瑪嘉利堂的教堂前喇，教堂裡面湧滿晒人，我地兜左幾個圈都無位坐，點算呢....嘻，我地響教堂出面的長樓梯，兩個人靜靜的坐下來，呢度對住教堂，可以望到唱聖詩，十二點喇，樓梯同教堂出面都圍滿望彌撒的人，透過教堂的大窗，望到一班青年緩緩唱起悅耳的 Silent Night 。其實我唔係信徒，但都唔知點解好想好想黎呢度，我平日係好鐘意一班人一齊通街癲，但平安夜，我諗應該係一個Silent Night，相比起尖沙咀狂歡，我就鐘意響教堂望彌撒，這裡先有真正平安夜的氣氛。「看那麼多嘴角在微笑是為何有那麼多聲線在合唱愉快的歌誰都比我爛漫笑聲若然沒結果這天這些開心的人怎麼過....」望彌撒還未完，兩點幾我地就行番出銅鑼灣，途中，佢拿左一份禮物出黎俾我，我拆開黎睇，完來係一條miffy 的大毛巾，佢話大毛巾係包裹住身体，就好似佢個心貼住我，好感動，如果唔係佢同我講分手，我真係會以為佢仲鐘意我，我攬住果條好大好大的毛巾時，一定係笑得好燦爛，別人一定睇唔出，我地竟然係一對分左手的情侶。地鐵為平安夜而通宵服務至清晨，但你對我的感情，早在平安夜的清晨已out of service。「聽日係聖旦節，我地去邊玩呀....」沙田愉田苑呀，孖辮果個咪我囉。

冬天的故事<中>
又到我講故的時間喇，我一路講，你可以一路想像當時的情境，怎至想像一下你就係女主角----呀咩，黎喇，我地將時間校番去二千年前的最後一個聖旦.... 「聽日係聖旦節，我地去邊玩呀....」我問。「唔知呀....聽日先算喇。」男朋友答。「我有個心願呀，我想試下響長江大廈下面睇住佢倒數呀。」我天真地說。平安夜果晚，佢送到我番屋企，已經係三點幾喇，屋企人都訓晒，到左我一個人靜下來，先係我真正面對現實的時侯，到底我想點呢，應該點做，一向依賴的人都要走了，我一個人，可以點做。望住對面海長江大廈外牆，上面快樂的倒數著「6 days to 2000」，聖旦節又向我笑了，我係咪都要笑住去倒數離別呢....畢竟，用6 days去再建立一段感情，係無可能的。聖旦節的下午，佢上左黎我屋企，我地兩個好似好朋友咁，講晒以前對對方的不滿出黎，唔知點解，講左出黎反而開心左，終於唔洗屈住，聽完後有ｄ想拉佢入後巷打一身的感覺，但反而傻傻瓜瓜笑起上黎，淨係覺得，現在呢一刻的感覺，係我地一齊咁耐最自然，最不裝模作樣，呢個先係鐘意玩、鐘意笑的呀咩，要成日扮良家婦女一向唔係我強項。呀諾、呀秋同呀彬三個都算唔話得，知我聖旦前同男朋友分左手，所以專登打黎約我上太平山山頂玩，但我又一早約左男朋友，咁點好呢，朋友至上，唯有帶埋男朋友出去喇，希望呀諾佢地唔會打起上黎喇，到時真係唔知幫邊面好。我約好佢地七點山頂等，時間緊迫，唯有分頭行事，男朋友細心地為我將長長的頭髮夾曲，再塗上定形水，而我就專心地在眼蓋上塗上閃粉，哇喇，不得了，已經六點幾喇，但頭髮還有一邊未夾呀，唯有草草的將另一邊的夾曲，再發喇，我地去玩喇！街上面好大風，我著左一件毛毛的白色上衣，我覺得佢最有聖旦feel，雖然香港無雪，但毛毛好似雪一樣，降落響我衫上面，我仲著左一條紅色格仔裙，企響樓下等巴士果陣，風一吹，我就明白咩叫扺冷貪潚霜。其實上山頂，應該係落官塘撘地鐵去中環，但我鐘意撘巴士，所以撘左601 去金鐘。撘巴士係慢好多，但沿途望到咁多燈飾都係值得架，落車果陣已經係七點幾八點喇。「我地要跑過去中環馬頭先得喇。」我說。「好呀！」佢笑住咁拖住我，響途人不多的金鐘道上向中環跑。我地穿過好多座掛上聖旦燈飾的大廈，跑到中銀大廈旁的一條無頂的天橋時，我地的腳步放慢下來，呼~~平日遠遠的望住中銀大廈覺得佢好細小，無諗過原來響佢隔離欣嘗佢，係會咁壯觀架。中銀隔離有座大廈，同中銀差唔多高，每個窗都有一盞大光燈，望上去唔覺得似咩聖旦燈飾喎，忽然全座大廈的燈一閃，「6 DAYS」，又一閃「TO」，然後再一閃「 2000」。「咦？呢座咪係長江大廈？」我好雀躍的說。「係呀。」佢笑住咁回答我。

冬天的故事<下>
「咦？呢座咪係長江大廈？」我好雀躍的說。「係呀。」佢笑住咁回答我。原來係正長江大廈下面，係睇唔到佢倒數架，只係憑住少許印像去估佢上面係咩字，睇黎我唯有要遠遠響尖沙咀，怎至屋企的窗口，先可以望住佢倒數喇。雖然望住倒數呢個願望唔可以達成，但企響長江大廈下面果一刻，我知佢係有感動過。牆身又由「6 DAYS TO 2000」變番做一棵好大的聖旦樹。「好靚呀，好開心可以響長江大廈下面倒數呀，好似發緊夢呀。」我痴痴的望住果棵最大的聖旦樹，如果呢一秒就係永遠就好喇.... 「行喇。」佢都係一個微笑，然後拖著我，繼續走向中環碼頭。因為我地兩個都唔熟中環的路，結果兜左個大圈，不過唔緊要喇，難得可以響聖旦節，有燈飾睇但又不太多人的街頭走走，都算係錯有錯著。糊裡糊塗咁，我地經過添馬艦隔離的一條天橋，向海旁方向行，走過金鐘海旁後，我地終於黎到中環碼頭喇，上左一架去山頂的巴士。巴士走過跑馬地，開始慢慢走上山頂，響車上面望番落銅鑼灣，係一幅聖旦燈飾風景，但漸漸燈飾的光，好似水彩畫上滴了水，化開了....變得有點模楜、有點失落，破壞呢幅水彩畫，係我的眼睙，我真係無用呀，趁佢唔覺，我靜靜的擦去兩行淚水，然後緊緊抿著咀，對住反光的玻璃窗練習笑一次。「咦？點解仲未到架，呀諾實等左好耐呀....」我機械式的笑著把頭轉過去，但原來佢一直望住我，剛剛的一切佢都望到了。「出面好大塵呀，吹晒落人地塊面度....」我自圓其說。佢只係呆呆的望住我，咩都無講過，為左避開尷尬，我轉過身去閂窗，但原來窗根本無開過。一切的不自然都被佢望到了。巴士到左山頂喇，我地四處走走，搵下見唔見呀諾同佢三個，雖然遲左好多，但我一ｄ都唔著急，反而享受剩下來獨處的機會..............

羊媽媽後記

呢段感情卻因為咩咩的病而廷續多五個多月，要走始終會走......
但他走之前係希望可以訓練到咩咩可以成熟......可以獨立.....可以自己承受疾病的痛苦.....唔駛加重父母的精神壓力....但....這談何容易 ?

做人父母.....在這個時候點會唔睇住自己個仔女，我地好願意去承受呢個擔子，一家人嘛「有福同享，有難同當」這個是理所當然 !

點都好，他的離開，我地都唔會怪佢，緣份要黎你擋不了，要走也是一樣唧。

這個下集，咩咩好耐之前曾放過幾天，不知為何後來會收返，但故事總有結局，就讓我為這個故事加上句號吧 !!!!!! 3-11-2003